L2ma.com | لقمة طيبة | L2ma.com | لقمة طيبة | مخلل الخس | قبل, الي, كانت, كتير, الخس | L2ma.com

القائمة الرئيسية

الأكثر تصفحاً

مخلل الخس

الكاتب/ منى

08/06/2009

اليوم انا مبسوطة كتير , الحمد لله من فضل الله , يمكن ما خبرتكم قبل هلأ قديه بحب السفر و التغيير و ما بتفرق معي لوين أو كيف المهم فتج عين و غمض التانية شوف حالي ادام البحر أو ادام الجبل أو بمحل جديد مو رايحة اله قبل هلأ .

الطبيعة أحلى شي في السفر , سبحان الله طول الوقت و اسم البديع على لساني , بديع السماوات و الأرض . يا ترى شو في في الجنة ! كل شي في الطبيعة حلو . اللون الأزرق في البحر و طعمه المالح و هواه النظيف و ريحته الحلوة و صوت أمواجه الي بيصفي النفس و بيريح الأعصاب . و اللون الذهبي في الرمل , و ملمسه الناعم و غنجه بين صوابع الايد و كيف بيمر متل ما بتمر الايام و نحنا عم نتفرج عليها . اللون الأخضر في الجبل و شجر البلوط و الزيتون و الأرز , كل الطبيعة هون لتريحك بس انت افهم على لغتها .

امبارحة رجعت من البحر لهيك اليوم انا كتير مروقة و مزاجي عال , و هل السفرة انبسطنا فيها خيرات الله , الجو كان بيجنن لا شوب و لا برد , و الجمعة كانت حلوة كتير , ضحكنا و انبسطنا الحمد لله و اشتهيت كل الأحباب معي . اللاذقية ما كانت زحمة لأن لسا الشهادات و الجامعات ما خلصوا امتحاناتهم و انا هيك بنبسط اكتر لأن الزحمة بتديقلي نفسي .

مناظر الطريق كانت حلوة و مع اني بدوخ بالعادة على طريق السفر , بس هل المرة شديت حالي و أخدت كم صورة قبل ما ادخل في الغوما , قصدي النوما . لحتى تشوفي الطريق معي .

و هي منظر من الشاليه و اطلالته و هادا الشط الي سبحنا و اتمشينا و شربنا قهوة و جمعنا صدفات و رمينا حجر و رشينا بعض فيه و بجنبه .

طيب خلونا نحكي عن وصفتنا , اليوم عندنا مخلل طيب كتير , اتعلمته من أم زوجي و انا قبل ما كنت اعرف في شي اسمه مخلل الخس . مزيج التخليل نفسه في كل مخللاتي و التغير بنوع الخضرة الي استعملتها و هل المرة كانت الخس . و الي حابة تعمل مخلل أتمنى تجرب و لو بخسة واحدة و تشوف شو طيب و تغير شكل .

بالصحة و الهنا

7 – 8 خس من الحجم الصغير
6 حبة ثوم مقشر
حبة فليلفة حمراء حرّة ( اختياري )
حفنة من حبوب الحمص الجافة

مزيج التخليل :

كوب خل
نصف كوب ملح صخري خشن
ليتر و نصف ماء
ملعقة كبيرة سكر
نصف ملعقة كبيرة فليفلة حمراء ناعمة
ربع ملعقة صغيرة كزبرة مطحونة
direction

·          تغسل الخسات و تقسم كل واحدة الى نصفين بشكل عمودي , ينظف ما بين الأوراق بشكل جيد لتخلص من كل الأتربة الموجودة .

·          تغسل حبات الحمص و توضع في قاع مرطبان بلوري كبير ثم ترتب الخسات في المرطبان مع حبات الثوم و الفلفل الحرّ .

·          يحرك مزيج التخليل حتى يذوب الملح ثم يصب فوق الخس بحيث يغمره بشكل كامل و يغطى الوجه بكيس صغير نايلون لمنع ظهور أجزاء من الخس

·          يترك المخلل لمدة ثلاث أو أربع أيام في مكان دافئ حتى ينضج ثم يحفظ في البراد .

أضافة إلى المفضلة (0) |

أقتباس | مشاهدات : 2796

تعليقات (18)

1 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 08-06-2009 20:48
اهلين منى. شو هالقصه الحلوه و هالرحله اللي احلى? شكرا كتير انك اخدتينا معك و ما نسيتينا الله يرضى عليكي. الف الحمدالله على السلامه و كتير انبسطنا انك رحتى و غيرتي هوا. ان شاء الله دائما بالك رايق و ديما مبسوطه حبيبتي. اسمالله شو هالمناظر الحلوه? يعني كانو رحنا معك. اول مره بسمع عن مخلل الخس. تسلم ايديكي عالوصفه. طبعا راح اجربه. قبل يومين عملت مخلل الحصرم. اول مره بعمله ما بعرف كيف راح يطلع. و شكرا مره تانيه على ازلاغيط الحلوين. والله ما بكي شي هيك شطره بالزلاغيط هههه الله يفرحك دايما يا منى يخليلك كل احبابك.

كل الحب :zzz

2 الكاتب ميساء, on 08-06-2009 21:44
عزيزتي منى عم قول لحالي وينها ميمو يا ترى وين غاطة الحمد لله عالسلامة انشا الله دائما بالهنا والمسرات ومتل ما قلتي سبحان رب العالمين جلت قدرته قديش خالق جمال بالكون ونحنا بلادنا الله يحميها ما في أجمل منها وكمان مخلل الخس ما في أطيب منو أنا حماتي بتعملو وبيطلع معها بيجنن يسلمو عالوصفة منى اشتقنالك :zzz

3 الكاتب لموسي, on 08-06-2009 23:18
الله يغطيك العافيه مافي احلى من السفر الصيف الماضي رحنا تركيا وتحديدا منطقه اسمها حيدر نبي واوزنجول والله قلت لزوجي معقول نحن بالدنيا ام بالجنه شيء يفوق الخيال الله يجمعنا بالفردوس نحن ومن نحب
اما مخلل الخس آآآآآآآآآآآه كانت امي الله يرحمها معلمه بالمخلالات طعمه تحت اسناني الهي يسلم دياتك

4 الكاتب dado, on 09-06-2009 01:04
الحمدلله عالسلامة منوش..
عم قول انا إك غاطة كم يوم.. شغلتيلنا بالنا عليكي.
والله البحر ما في أحلى منه.. وما في متله بيريح الأعصاب.
وكتير منيح اللي صحتلكن الروحة هلأ قبل الشوب والزحمة.
تتهني إنتي وعيلتك يارب.
عجبتني فكرة مخلل الخس.. أول مرة بسمع فيها وعالتجريب القريب انشالله.
أنا بموت عالمخللات بشكل عام.. بس هون ما بتلتقى.. والخضرة يلي بتتخللغالية كتير لأنها مستوردة ومو إنتاج بريطاني.. أما الخس أهلية بمحلية.. رح حضر الوصفة بأقرب وقت ان الله راد وخبرك.
شكرا إلك ولحماتك

5 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-06-2009 01:58
أول شي الحمدلله على السلامة وتنعاد عليكن بالخير والصحة والله يديم الفرح على الجميع :عزيزتي أنا بعمل مخلل الخس من زمان كتير بس ما بحط حمص ولا خل والتوم بدقو ناعم قبل ما حطو بيطلع بيجنن وبينضرب فيه المتل من كتر مو طيب بس ما بكتر مشان هيك ما بعرف إذا مع خل أحسن أو بدون خل أحسن لأن الخل بظن بيخلي يطول بس الزبدة الله يسلم هالإيدين يا رب ويجعلون عباب الكعبة يا رب .

6 الكاتب تورتاية بالكريز, on 09-06-2009 05:50
حمدا لله على السلااااااامة ياقمر اجازة سعيدة افتقدناكي كتير والله كل يوم بطل ع الموقع وبحس غيابك
الله يديم عليكم النعمة يارب رائعة الصور ماشاء الله تبارك الله وحلو الانسان يجدد طاقته ونشاطه بعد عام طويل من اتعب والمذاكرة مع الاولاد وشدة الاعصاب وعقبال كل سنة يارب وانتم باتم صحة وحال
عن الوصفة اول مرة اسمع بتخليل الخس وان شاء الله اجربه باذن الله تسلم ايدك حبيبة قلبي نورتي موقعك من جديد وبانتظار وصفاتك الحلوة

7 الكاتب منى, on 09-06-2009 07:45
هلا أمونة

و انت كمان حبيبتي ,ربي دايما مبسوطة و بصحة و بلمة العيلة كلها حواليكي و تشوفيهم بعيونك متل ما بتحبي و احسن ان شاء الله في الدنيا و الاخرة
شو مخلل الحصرم , فرقع الحمض بتمي بس من الاسم , ان شاء الله يطلع طيب و تخبرينا شو بيصير معك و اتمنى انك تجربي هل المخلل و يكون على زووءك :zzz

قولي بالزلاغيط ما بني شي , بس بالهناهين مو كتير تشدي ايدك , بس هون طلعوا عضلاتي لأن كتابة و بس :grin

8 الكاتب منى, on 09-06-2009 07:49
هلا ميوسة

تشتاقلك العافية و الصحة يا قمر . و متل ما قلتي بلادنا حلوة بس بدها اهتمام و عناية اكتر لحتى يبين جمالها
الله يسلم ديات حماتك و هلا فيك تجربي انت و تعمليه مفاجاة , شو رايك :zzz

9 الكاتب منى, on 09-06-2009 11:24
هلا لموسة

ااااممين يا حق انت و نحنا و كل الغوالي
الله يرحم ماماتك و تكون في الجنة و يرحمنا اذا ما صرنا متلها , و الله ما في اطيب من طبخ الامهات

10 الكاتب رنا, on 09-06-2009 11:37
شو هادا ياعيني ياعيني خليتيني حس حالي بسوريا :sigh

وللاسف السنة لافي سوريا ولا في لاذقية ...لانه السنة مالي نازلة بسبب الولادة :sigh

يلا الحمد لله على كل شي والله يهنيكن ببلادنا يارب والله يرجعنا سالمين ...
يسلم ايديكي منى كتير طيب مخلل الخس خصوصي مع الشوكي ...والحمد لله على سلامتك بس ماقلتيلنا شلون اسعار الشاليهات السنة :grin

11 الكاتب منى, on 09-06-2009 12:45
هلا دالو

سلامة بالك , كان لازم خبرك قبل ما سافر , معك حق , يلا الجايات اكتر من الرايحات
و الله اشتهيتك معي , و انت واحدة من الي خطروا على بالي لمن اتمشيت لوحدي بالليل على الشط :zzz

ان شاء الله تجربي هل المخللات و تكون على زووءك , انا متلك بحب المخلل كتير , بس لسا بنتي جودي بتموت عليه , اتصوري قال على كبرها بدها تخترع مسكة بنكهة المخلل , شو هل اصحاب المعامل المتخلفين و لا واحد خطر بباله يعمل هيك نكهة :grin

و من يوميين عم تستأذني لتنقع مسكة مع المخلل , لحتى تاخد من نكهته و تبقى دايما الطعمة بتمها :grin

12 الكاتب منى, on 09-06-2009 13:06
هلا وداد

الله يسلمك و يحفظك , و الف شكر الك لأنك كتبتي طريقتك

التوم انا ما بدقه لحتى يعطي طعمة بس تكون خفيفة و الحمص لحتى يبقى المخلل مقرمش , اما عدم اضافة الخل فهي شغلة جديدة , و اتوقع بيطلع طيب كتير , ان شاء الله بجربه شي مرة على طريقتك

الف الف شكر الك للدعوة , هي اول مرة حدا بيدعيلي هيك دعوة غالية , ربي جمعا أختي و عاجلا غير اجل يا حق :sigh

13 الكاتب منى, on 09-06-2009 13:09
هلا ام ياسمين

سالت عليك العافية و الخير دايما .
و الله ما في احلى منها و انبسطنا كتير بلمة الاهل و الجو الحلو و اشتهيتكم معي

ان شاء الله تجربيه و تحبيه و انا بانتظار رايك يا قمر

14 الكاتب منى, on 09-06-2009 13:19
هلا رنونة

المهم انك تقومي بالسلامة انت و البي بي و لحقانة على سوريا و الاذقية و كل هل القصص

ربي يرجعك سالمة و غانمة انت و كل مشتهي و ربي يقومك بخير انت و الكتكوت

الشاليهات متل عادتها , بس نحنا لحقنا التخفيضان لان لسا الموسم ما بدي متل العادة و اخدنا بالشاطئ الازرق دوبلكس لان كانت معي بنت احماي بسعر معقول نوعاً ما

15 الكاتب freesoul, on 09-06-2009 15:21
يا عيني ياعيني على هالمخلل
انا عم قول لحالي وين غاطة منى صارلها شي اسبوع . ياستي تتهني انتي وعيلتك والطريق على اللددقية ما في احلى منو خصوصا لمن بتعدي على جسر سد بللوران شي متل الخيال حتى انو صوروا كم مسلسل بها المنطقة .ان شاء الله بس انزل على حلب حنروح على اللدقية.هلق صحي انا ساكنة بجدة , بس بحرنا المتوسط غييييررر. ريحة البحر ولونه ورمله الاصفر متل الذهب تحت الشمس شي بيشهى.انا عم اتغزل لأنو كتير مشتاقة.البحر الاحمر بجده سمكه كتير طيب بس ريحته مع هالشوبات مو ظريفة ولونه مقتم بسبب غاباته المرجانية وما في رمل اغلبه صخر .يلا ان شاء الله حانزل بعد شي شهر واروح على اللادقيةمع العيلة
يا ستى ذكرتيني بمخلل الخس يللي كنت اكله بحلب جنب مجدرة البرغل يللا كمان باكله لمن انزل . يسلمو هالايادي

16 الكاتب منى, on 10-06-2009 12:11
هلا ام جود

و الله كلامك مزبوط و لازم الواحد فينا يعرف كل مناطق بلدوا لان في كتير من هل المناطق متل الاميرة النائمة , بدها بس يجي الامير لحتى تظهر مفاتنها و حسنها
ان شاء الله ترجعي سالمة و غانمة و قريب و تعملي كل الي نفسك فيه و ربي يسلم هل الديات الي كتبت و ردت

17 الكاتب semo, on 16-06-2009 12:02
الحمد لله على السلامة
ومبسوطة انك انبسطتي باللادقية
وعقبالي ماروح عبلدي وروح سيرانات بسوريا
وهالمخللات الطيبات خرج الواحد ياخدون معو على هيك رحلات
يسلمو هالايدين يارب

18 الكاتب منى, on 16-06-2009 12:35
هلا سيمو

الله يسلمك و يحفظك , اشتهيت كل الحبايب معي

ان شاء الله بترجعي سالمة و غانمة على سوريا و تعملي مشاوير متل ما بتحبي و اكتر , الله يسلمك و يحفظك و يخليك سيمو

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 14/06/2009 )

< السابق		التالى >

[ عودة ]