L2ma.com | لقمة طيبة | L2ma.com | لقمة طيبة | ترايفل بشوكولا مارس | الكاسترد, على, شوكولا, · , حتى | L2ma.com

القائمة الرئيسية

الأكثر تصفحاً

ترايفل بشوكولا مارس

الكاتب/ منى

27/05/2009

ترايفل بشوكولا مارس

الترايفل من الحلويات الانكليزية السهلة و الطيبة و خصوصاً لهل الشوبات الجاية على بكير و أنواعه ما في الها حدود .

فكرته بسيطة , طبقة كيك , بعدها طبقة كاسترد و فوقها فواكهة و منعيد . اليوم أنا محضرته من دون فواكهة و استعملت لتلوين أخر طبقة من الكاسترد شوكولا مارس و بالاخير رشيت كتير شوكولا على الوجه ., كمان شوكولا مارس .

مع الكاسترد حطيت بشرة ليمون و يم يم شو طلعت لابقة طعمتها مع االشوكولا , هيك خطرلي شبهها بشي عروس و عريس لابقيين لبعض كتير .

الوصفة حضرتها باستعمال السويس رول , بعد ما جهزته وطالعته من الفرن , تركته مفرود و بس ما برد قطعته لدائرتين , حطيت أول دائرة بأسفل الطبق و تاني دائرة فوق الشي و بالنص الفراطة الي بقيت من القالب , الله يسترنا دنيا و اخرة . انت ممكن تحضريه بالكيك السفنجي أو بالليدي فنجرز أو بالسويس رول الجاهز , أو بشرحات كيك قديم و حابة تعمليه نيو لوك أو حتى فيك تحضريها بالبسكويت و أخر الشي ممكن تحضريه بالكاسترد الجاهز , بس حدا بيكون عنده هيك وصفة للكاسترد بتاخد العقل بيروح على الجاهز !

الوجه زينته بالمارس المدقوقة , حطيت الشوكولا بالفريزر يمكن لساعة و بعدها طالعتها و اشتغل الدق فيها لفرغ شوي من شحنات الضغط يوم عزيمة خالو تقي , دقيتها دق كسرت عضامها فيه

أخر شي للأخوات في سوريا مو ضروري استعمال شوكولا مارس , ممكن تحضير الوصفة بأي شوكولا على حليب و تكون محشية بالنوغا متل رالاس أو مولز و بتطلع طيبة , بس لضيوفكم حضروها بمارس أطيب .

بالصحة و الهنا

سويسرول

الكاسترد :

4 كوب حليب
2 بيضة
2 – 3 فنجان سكر
فانيليا
4 ملعقة كبيرة طحين
2 ملعقة كبيرة زبدة
بشرة ليمونة
3 حبة شوكولا مارس

للتزيين :

5 – 6 حبة شوكولا مارس مدقوقة ( وزن العبوة 25 غ )
direction

·          يحضر السويسرول و مع وصفته تزاد بشرة ليمونة للمقادير , تضاف مع الطحين بعد نخله ثم يخبز السويسرول , تخرج الصينية من الفرن ثم تترك حتى تبرد .

·          يختار طبق كبير و غميق ثم يقلب على السويسرول و تقطع دائرتان من السويسرول على مقاس القالب و تترك جانباً .

·          يحضر الكاسترد : يوضع الحليب و البيض و الفانيليا و السكر و الطحين في خفاقة العصير و يمزج الكل حتى الحصول على مزيج متجانس .

·          يوضع مزيج الكاسترد على نار متوسطة و يقلب الكل بمضرب سلك حتى يغلي و يبدأ بالسمك .

·          يبعد الكاسترد عن النار و تضاف الزبدة و بشر الليمون و يقلب حتى تذوب الزبدة و تمتزج مع الكاسترد ثم يقسم الكاسترد لثلاث أقسام , تضاف الشوكولا لأحد هذه الأقسام ثم تقلب بسرعة حتى تذوب الشوكولا بحرارة الكاسترد .

·          في الطبق الغميق توضع أول شرحة من السويسرول ثم تغطى بأول قسم من الكاسترد السادة . يغطى الكاسترد بما تبقى من قالب السويسرول ثم يسكب فوقه القسم الأخر من الكاسترد بالحليب .

·          يغطى الكاسترد بالدائرة الثانية من الكيك ثم يغطى بالكاسترد على شوكولا و يوضع في البراد حتى وقت التقديم .

·          قبل التقديم , توضع شوكولا مارس في الفريزر لمدة ساعة , ثم تخرج و تدق و هي لا تزال مغلفة بورقتها باستعمال هاون حتى تنعم , تفتح و تنثر فوق الكاسترد ثم يقدم الحلى فوراً و يفضل أن يكون بارداً جداً .

أضافة إلى المفضلة (2) |

أقتباس | مشاهدات : 7621

تعليقات (24)

1 الكاتب ام محمد, on 27-05-2009 10:18
الله يسلم هاالديات شي اكثر من رائع
والصورة بتشهي

منمون بدي اقولك لو ترجعي شويه للمنيوالتركي
وتعمليناغريبة استنبول

لاتؤاخذيني عم بتقل عليكي بس حبيت اذكرك ياقمرالله يحفظك ويطول عمرك ويخلينا ياكي

2 الكاتب لين, on 27-05-2009 11:15
والله كتير طيب انا بدال الكيك بحط بسكويت بس طريقتك بيطلع اطرى تسلم اديكي يا رب

3 الكاتب لين, on 27-05-2009 11:19
ما في الز من هكيك ياالله اكلك ما اتيبو عم تكسريلنا الريجيم

4 الكاتب ام نور, on 27-05-2009 11:25
الف شكر منى وصفة رائعة وبتبيض الوج ادام الضيوف كلك زوء

5 الكاتب سارونات, on 27-05-2009 13:05
السلام عليكم و رحمة الله و بركاته

سبحان الله لساتني مبارحه عم بحكي و قول بدي جرب السويسرول على طريقتك و كمان قلت صار وقت ارجع لعمل كاسترد لان الجو حر و شوفي سبحان الله هالوصفة عن جد كتير حلوة بس الكمية كتيييييييير كبيرة علي راح حضر نصها او ربعها
اختي منى ليش الشوكولا ما منحطها غير على اخر لحظة يعني ما فينا نحطها على الوش و بعدين نحطها بالبراد
-- كمان قديش بتضاين الوصفة بالبراد و هل اذا تركناها ليومين لازم نغطيها
--- كمان بعتقد بتنفع هالوصفة اذا خرب الكيك لا سمح الله فينانستعمله فيها

--- اخر شي عم شوف السويسرول رفيع و الكاتو الاسفنجي سميك هاذ معناته ان مو مهم سمك الكيكة مو هيك

يسلم دياتك على الوصفة اختي منى و عقبال وصفة كيكة التوفي لان لساتو ما ضبط معي و عم فكر ارجع ساويه

بالتوفيق
سلام

6 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 27-05-2009 14:28
يم يم يم يا منى على هالوصفه شو دخلت مرائي. تخيلتا بتجنن. تسلم ايديكي. شكلا كتييير حلو كمان. لو تعرفي الساعه عندي خمسه و نصف صباحا. هيك بدك ياني ابلش يومي?? :zzz

7 الكاتب رنا, on 27-05-2009 22:11
ياستي وصفة رائعة عن جد لذيذة كتير على فكرة من يومين كان عنا ضيوف وحضرت وصفات الحلو من الموقع وبعد ماخلصوا اكل راحوا فورا عالكمبيوتر ليشوفوا من ين اجاني هالابداع :grin

قريت ونفخت عليكي من العين عن جد شي بيرفع الراس

بس الترايفل يلي عاملتيه اذا جينا نتخيل لفلوفة السويس رول كيف رح اقسمه نصين يعني بتطلع سميكة ؟؟..فهمتي علي منوووشة ولا انا فهمانة غلط قصدي لانه لفلوفة السويس رول طويلة اذا انقسمت ....هاااااااااااااااا معناها حاطتيها بالعرض خلص خلص فهمت الظاهر انا نعست كنت مفكرتك موقفتيها توقيف :grin

دخيلك لاتواخذيني

8 الكاتب semo, on 28-05-2009 19:31
يمي يمي
شو هالاكلات الطيبة اللي منظرها بتشهي بقى كيف طعمها

والمشكلة اني عم اعمل ريجيم الي كم يوم لانو محسوبتك مجنونة نحف وبتموت عالاكل

اكيد رح جربها
في عندي سؤال او بالاحرى رجاء متل مابتعرفي انا مغتربة وكتير بحب القراص اللي بيكونو كبار وفيهن محلب وشمرا مابعرف اذا عرفتيهن

حابة اذا عندك طريقة تحضيرن تقليلي كيف
سألت كتير بس ماحدا بيعرف شلون بينعمل ياريت تتكرمي علي بالمقادير وطريقة التحضير

وانا الك من الشاكرين :roll

9 الكاتب منى, on 30-05-2009 12:02
هلا ام محمد

تكرم عيونك اختي , لا تتقلي و لا شي , انا الي اتاخرت بالوصفة :roll

10 الكاتب منى, on 30-05-2009 12:12
هلا لين

لا شو ريجيم و ما ريجيم , الله يبعدنا عنه و يبعده عنا :grin

الله يسلمك اختي و يخليكي و اذا جربتيه بالكيك ان شاء الله تخبريني شو بيصير معك

11 الكاتب منى, on 30-05-2009 13:11
هلا سارونات

ان شاء الله تجربي الوصفتين و يكونوا متل ما بدك .

بتضاين الوصفة بالبراد يمكن لتلات او اربع ايام بس ممكن تنشف شوي لهيك الاحسن ان تغطيها و الوصفة اكيد بتنفع اذا ما نجح الكيك الاسفنجي , و الكيك رح نقطعه لتلات شرائح و نطبق الوصفة متل مو مذكور

ان شاء الله تجربيها و تظبط معك و تطلع يميي

12 الكاتب سارونات, on 30-05-2009 22:40
السلام عليكم و رحمة الله و بركاته

الحمد لله بعد ما جربت كيكة السفن اب بالليمون و نجحت الحمد لله قلت راح اخذ منها شوي و ساوي فيه الترافل بس ما تركوني ساويه لان كتير عجبهم الكيك :grin

بقى ان شاء الله بالمستقبل بساويلي شي كيكة و استعملها للترافل

بالتوفيق
سلام

13 الكاتب منى, on 31-05-2009 20:03
هلا امونة

شو هل الصباح الحلو , شوكولا و كريما , يا ستي طبقت عليك الغنية صباحك سكر :zzz

ان شاء الله دايما مبسوطة و فرحانة و الله لا يحرمني هل الضحكة الحلوة

14 الكاتب منى, on 31-05-2009 20:06
هلا رنونة

دقيقة اول لفك من الحيط الي دخلت فيه , هلا بالاخير شو صار :grin

شوفي رنونة السويس رول ما رح فكه , متل ما هو مستطيل رح اقطع منه دائرتين و استعملهم لوصفتي و الباقي بالنص , يعني لا طول و لا عرض الله يوفقك مستوي افقي بقطر متساوي ( اليوم كان التلاتة من الاولاد عنهم رياضيات , بدك تعزريني شوي اخدة هل التعابير على لساني )

الف صحة و هنا على قلبك و قلب ضيوفك واحد واحد و كتير انبسطت ان العزيمة كانت ناجحة

15 الكاتب منى, on 31-05-2009 20:07
هلا سيمو

و كمان طعمتها لذيذة و سهلة ما يغرك كتر الحكي :zzz

ليكون قصدك على البريوش ؟ الصراحة ما عرفتها لهل الوصفة الي ذكرتيها , حبيت فيدك :roll

16 الكاتب منى, on 31-05-2009 20:26
هلا سارونات

الف عافية و صحة على الكيك و على كل شي جربتيه او ناوية تجربيه

17 الكاتب بشرى, on 02-06-2009 16:00
يييممممم ..

شكله طيب كتير .. رح جربو الخميس إن شاء الله ..

إخواتي شو متفاجئين بالأكلات اللي عم اعملها .. كل يوم بقدم مادة بالليل بعملن اكلة جديدة تعلمتا منك .. حكيتلا كتير لأمي عنك يا منوشة .. قالتلي ما شاء الله حولا شي بيرفع الراس .. حتى صار بدا تتعلم الانترنت مشان تدخل ع موقعك ..

18 الكاتب منى, on 02-06-2009 17:54
هلا بشورة

الف الحمد على السلامة و انا عم قول لحالي وين غاطة , هلا انت بحلب يعني ؟

و بديوا امتحاناتك , الله يوفقك بكل موادك , شدي الهمة , بدنا نجاح بكل المواد و بمعدلات باذن الله

سلامي لماماتك الله يخليك ياها , هنن الاصل و الله

19 الكاتب JoJo, on 10-06-2009 01:27
يم يم يم ما الز طعمه
يسلموو الايادي منى علي وصفتك السهلة والرائعة

20 الكاتب منى, on 10-06-2009 11:49
هلا جوجو

الله يسلمك و يخليك يا عسل , نورتي اختي

21 الكاتب نهى, on 10-06-2009 16:43
تسلم ايديكي يامنى
ماشاء الله انا جربته بالبسكوت وطلع جميل
واحلى مافيه الكاسترد المنزلى لانى كنت دايما اعمله بالبودرة وكنت احس انى ماقدر اكل منه كتير يادوب معلقتين وده آخرى
لكن ده حاساه مفيد والولاد ياكلوا منه وانا مطمنة

22 الكاتب منى, on 10-06-2009 18:14
الف الف صحة و هنا يا نهى على كل لقمة على قلبك و قلب الكتاكيت الحلوة , ربي عافية على قلبهم :zzz

كتير انبسطت انه عجبك و حبيته و ان شاء الله كمان تجربيه بالكيك و يكون على زووءك

23 السلام عليكم ورحمة الله وبركاته.
الكاتب omtasneem, on 12-06-2009 15:01
يم يم ياسلام جربتها من يومين ولااروع طيبة كتير يسلمو ايديك علا قولت جوزي لاانحفناوجربتها بالكاتو الاسفنجي وطلع شو نفش نفشة اديش بعرف طرق للكاتو الاسفنجي هي احسن وحدة يسلمو ايديك

24 الكاتب منى, on 12-06-2009 16:00
هلا ام تسنيم

ريتو صحة و الف هنا و كتير عن جد تير انبسطت ان الكيك نجح معك , هي احلى خبرية لليوم

يلا كم لقمة ما رح ياثروا على النحف و السمن :zzz

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 27/05/2009 )

< السابق		التالى >

[ عودة ]