سلطة الجرجير بالفطر

اكتشفت ان نحنا شعب لا يقدر السلطات و لا يحترمها , و انا اسفة لهيك بداية بس هيك الحقيقة .

يعني بالوقت الي بكون انا مجربة فيه سلطة جديدة و بكون حاببتها كتير و يمكن عم افطر و اتغدى و اتعشى منها , لما بنزلها على الموقع بيكون التفاعل عليها قليل , أكيد لأن النفس و ما تهوى

كلنا نسمع عن فوائد الرياضة , بس يا ترى كم واحدة فينا تمارس الرياضة . كلنا نعرف عن فوائد السلطة و الخضرة النية , بس يا ترى كم واحدة فينا بيكون على مائدة غداها طبق سلطة كبير لحتى تطعمي عيلتها الي هي مسؤولة عنهم و غذائهم و قوتهم برقبتها و من أول مهامها ؟

عيلاتنا أمانة و نحنا المفروض فينا ننمي فيهم عادات غذائية صح لحياة أصح !

كمان مرة أسفة لأن حاسة في حدة بكلامي , بس من جد من وجعة قلبي على الجيل كله , بتلاقي الشباب بأول طلعتهم بالشارع وقت الغدا , كل واحد ماسك بايده همبرغر أو تنتين , مع علبة كولا و للأمانة الغذائية بتكون دايت للتخفيف من الحريرات !! و في أحسن الحالات ما بيكون في سيكارة في ايدهم .

وجبات الفطور و الغداء و العشاء مو بس تعبية بطن و شبع , الطعام محبة و الفة و عيلة حلوة بتلتم مع بعض , على حديث حلو  و على خبريات بعضهم . و لازم نعلم الأولاد احترام اللمة و احترام النعمة و بنفس الوقت نعلمهم كيف ياكلوا , لان التذوق فن و الطعام فن .

أسفة إذا زعجت حدا  , و رح اسكت هلأ و ارجع  لوصفة اليوم المحترمة   , سلطة الجرجير بالفطر . بموت عليها هل السلطة , من كتر مو بسيطة و من كتر مو طيبة , بخمس دقايق بتكون جاهزة و حامضة و يا سلام !


ممكن تتحضر بفطر فريش , بتكون كتير طيبة , نقطع الفطر لشرائح و نستعمله أو ممكن نقلبه بشوية زيت زيتون لمدة 5 دقايق , نرفعه عن النار و نضيف التتبيلة و نتركه لحتى يبرد و بعدها نضيفه على الجرجير

بالصحة و الهنا



PS

أنا و الرياضة مو صحبة كتير , لهيك مرة واحدة بس بحياتي سجلت بنادي رياضي و ما كملت التلات جلسات ,  الرياضة الي بعملها على الطريقة الفرنسية , يعني مشاويري بقضيها مشي و بطلع لاخر طابق على الدرج و هل القصص

باقة جرجير
كوب فطر معلب ( يمكن استعمال فطر طازج أو كمأة و طريقة التحضير في المقدمة )
تلت كوب ذرة

الصلصة :

عصير ليمونة و بشرها
فص ثوم مهروس ( اختياري )
3 – 4  ملعقة كبيرة زيت زيتون
ملح
نصف ملعقة صغيرة كمون
نصف ملعقة صغيرة فليلفة حمراء ناعمة

تعليقات (41)

2  الكاتب منى, on 25-05-2009 19:32 هلا سيمو   كلام مظبوط , و كمان الحلويات لا ننساهم بالسمنة البلدي   انا متل رفيقتك , بحب أكل كتير الخضرة نية , احم و حتى البيتنجان , لما بقشر البانجانة بأكل أولها , بيكون فيه حلاوة خفيفة و حتى اولادي طالعين متلي , بيتناتفوا على الخضرة النية مناتفة     ان شاء الله تجربيها و تكون طيبة و على زووءك

3  الكاتب semo, on 25-05-2009 19:54 الله يخليلك ولادك والله شهيتيني اتعرف عليكي وعلى قطاطك     بس قصة البيتنجان جديدة والله برافو عليكي ومنيح انو ولادك بيشبهوكي     وانا لفت نظري بسلطة ورد الشتا انكن بتاكلو الزهرة نية والله انا ما بقدر دوقا او شم ريحتامطبوخة  بقى كيف نية  بصراحة برافو عليكن

4  الكاتب نوارة, on 25-05-2009 20:49 والله حكيك صح يا ميمو انا بحب السلطات بس بحس انو ماعندي وقت اشتغل شغلة زيادة ايام بتحمس وبرجع ببرد بس صراحة هلق شجعتيني  بس صراحة بعد ماتزوجت صرت غير صارت عندي الخضار شي اساسي بحياتي يعني بعمل الصندويش للشغل كتير ايام محمد بقول ماعرفت حالي عم باكل صندويشة مرتديلا\ دجاج 0000 ولا صندويشة خضار  كانت عندي الفليفلة ما بتتاكل غير بالمناسبات 00000  ومشان السلطة شكلها كتير طيبة وانا مرة بسوريا دقت سلطة فيها فطر وحبيتها بس هداك الوقت ما كان عندي حس طبخ ابدا  رح اجربها ان شاء الله بتكون نفسها

5  الكاتب منى, on 26-05-2009 06:54 هلا سيمو   و الله طيبة الزهرة , يمكن بالول تكون غريبة بس بعد التجربة ممكن تتقبليها , و حتى البيتنجان كمان نفس الشي , بس أوله و بس يعني من كل حبة بيطلع الك لقمة واحدة طيبة

6  الكاتب منى, on 26-05-2009 06:54 هلا نوراة   برافو عليك , قصدي على سندويشات محمد , و انا متلك , اما اعمل المرتديلا أو الهمبرغر بحط شي ورقتين تلاتة خس و اذا ما في خس بحط ملفوف , لازم تكون السندويشة كريسبي     ان شاء الله تجربي هل السلطة و تطلع متل الي دقتيها او اطيب ,ديري بالك على حالك my lovely best friend

7  الكاتب ام محمد, on 26-05-2009 07:38 والله مظبوط كلامك يا منى انا كتير بفرم سلطة مع الاكل بس دائمابرجع الصحن مثل ماهويادوب اكلو منه معلقة او تنتين اولادي ابدا مو صحبة مع السلطةفبحاول دائمااحط الخضار بالسندويش   منرجع لوصفتك الشهيةيسلمو دياتك وان شاءالله اليوم سوف اجربها

9  الكاتب منى, on 26-05-2009 10:58 هلا ام محمد   و الله مشكلة , بس منيح انك بتعوضيلهم الخضرة بغير شي .    انا الحمد لله بالعكس , السلطة دايما حاضرة و بالاصل ما منخليهم ياكلوا سلطة الا للأخر لأن اذا رح اسمحلهم ما بيعودوا ياكلوا غير سلطة     ان شاء الله تجربي الوصفة و تكون على زووءك و متل ما بتحبي

10  الكاتب منى, on 26-05-2009 11:01 هلا هيا   مم اكيد يمي مع البصل الاخضر , ان شاء الله رح جربها على طريقتك شكلها بيشهي   الف شكر الك للوصفة شكلها كتير طيبة

14  الكاتب منى, on 26-05-2009 19:26 هلا لين   كلك زووء اختي و الله خجلتيني بهل الرد و الكلام الحلو .    كمان في شعوب متل اليابان عمرها مديد و صحتها عال من طبيعة طعامهم , و الواحد لازم يغير مو لطولة العمر و بس , لا للصحة و العافية

15  الكاتب منى, on 26-05-2009 19:27 هلا ام جود   اول مرة بعرف ان السلطة في ناس بتعتبرها عيب في العزومات شو هل الناس الي ما عندهم زوء و لا بيعرفوا ياكلوا , ايه و الله في أكل ما بينبلع اذا مو معه طبق سلطة     الذرة في الوصفة لاضافة لون أكتر الشي و انا كتير احيان بعملها من دونها , يعني كيف ما بتحبي

17  الكاتب نور الأسلام, on 26-05-2009 22:24 السلام عليكم كيفك منى تحياتي الك الظاهر السلطه رافعه قضيه والله كلامك مزبوط قبل ماتعرف على الموقع ماكنت اعرف انواع من السلطات ونحنا عنا كانت السلطه فقط برمضان متواجده كل يوم علسفره وبغير رمضان فقط مع بعض الاطباق يسلمو اديك وتحياتي الك

18  الكاتب ميساء, on 26-05-2009 23:13 عزيزتي منى كلامك صحيح تماما لأن أغلب الناس لا تهتم بالسلطات والخضروات وأنا بعرف عديد كبير جدا من الناس اللي صحن السلطة ما بينحط على سفرتهن بالشهر مرة بس أنا الحمد لله أولادي بيحبوا السلطات كتير و أنا بطبيعتي ميالة للأكل النباتي أكثر وصدقيني لولا زوجي ما بفكر أطبخ بلحمة غير وجبة واحدة بالأسبوع وعندي بنتي مايا ما بتحب ابدا قصص الfast food ولا يمكن تحط بتمها الا الوجبات المحضرة بالبيت متل البرغر والبيتزا والاسكالوب وغيرهم وبتقلي ماما أنا ما بحب أكل بره واذا اضطرت شي مرة كنا بمطعم ما بتاكل غير بطاطا مقلية وبتكون طولت عليكي بس بدي اتشكرك على هالملاحظة لأنها طالعة من قلب محب وما بتصور حدا من الأخوات بالموقع يكون انزعج من نصيحتك الغالية ولو يا ميمو بتموني

19  الكاتب بشرى, on 27-05-2009 02:14 يميييييي ما أطيبا .. جربتا اليوم وكتير طيبة ..     والله اليوم انتي طول الوقت عبالي يا منوشة .. شفت كتب طبخ بمكتبة جرير كتير حلوين وفي كتاب خصوصي عن السلطات اشتهيت اشتريه ووقت قررت سكر الكاشيير بلكي غير مرة ان شاء الله     يسلم إيدكي حبيبتي

20  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 27-05-2009 03:16 والله معك حق يا منى بكل كلمه. هلاء قمنا عن الغدا و صحن الصلطه يلي عملتو ضل زي ما هوه و ما حدا مسكو. بنتي بتقلي ماما كبه قمت حسيت بالذنب وقلتلا لا ماما يمكن انا راح اكله بعدين. بس وين بعدين انا عارفه حالي مش رح امسكه. مش عارف ليش لما يكون في اكل تاني مع السلطه ما امنمسكا بس لو كان الغدا عباره عن صحن سلطه و فوقه شي مشوي هذه الطريقه الوحيده لحتى ناكله. يعني لازم نغير طريقتنا و نحاول انو نجبر حالنا ناكل الشء المفيد مو بس الطيب. على العموم هذه السلطه اللي عاملتيها شكلا بيشهي و كتير مفيد انا بعمله بس مع السبانخ نفس الطريقه و الحلو فيها انو المشروم مدبل مع الزيت بيعطي طعمه لذيذه. تسلم ايديكي على كل شي عم بتقدميه يا منى.

22  الكاتب رنا, on 27-05-2009 22:01 ولي ولي منى عصبت علينا   طولي بالك علينا منونة والله نحنا حبابين وحياة الله انا كل يوم باكل سلطة بس مو متل سلطاتك المرتبة ياستي صحن السلطة الي بيعملوه بيت حماي موحد يوميا بس لازم الكل ياكل طبعا الاولاد مابيقربوا عليه ...السلطة الي بيعملوها انا بسميها سلطة عربية لانه فيها كل الخضرة خس خيار جزر ملفوف احمر وابيض بصل اخضر اذا في خس بقدونس نعناع بقلة والحمض اما خل او ليمون ورشة كمون وفليفلة يعني بيطلع صحن هالقد قده بس والله مامنقدر بلاه ...وماشاء الله عمي ابو زوجي عمرها تقريبا 80 سنة ومابيعاني من ولا مرض ...الله يديمه بصحته وعافيته وطبعا السبب هو عادة غذائية ذهبية ويلي هي صحن السلطة كل يوم ..اما بالنسبة لبيت اهلي يوم ايه يوم لاء صن تبولة كل العيلة عندها غرام فيها هلأ هيك انا طلعت براءة ياسيادة القاضي   بس والله معك حق شعبنا ماكتير صحبة مع السلطة خصوصي الاولاد

23  الكاتب رنا, on 27-05-2009 22:02 التعليق لازم كان يكون عالوصفة ...ياستي الجرجير كتير طيب وانا بحب الفطر لذلك اكيد السلطة طيبة وتغييير شكل بس المشكلة انه في ناس بتتلبك معدتها من اكل الفطر النئ وحتى لو من العلب مابعرف ليش   بس انشالله رح جربها اول مابيجي جرير تازة

25  الكاتب منى, on 30-05-2009 12:00 هلا نور   هلا يصير عندك تشكيلة اكبر و اوسع لتختاري منها , ان شاء الله تجربي و تصير طبق اساسي على السفرة

26  الكاتب منى, on 30-05-2009 12:03 هلا ميوسة   انا كمان بميل على الوصفات النباتية و بحب كتير تكون غداي و هلا جاينا الصيف و فيه كتير وصفات الواحد بيحضرها و ما بيشبع منها   أبوسها بنوتك شو بتغرف القلب , ان شاء الله ربي يفرحك فيها و في كل حبابك

27  الكاتب منى, on 30-05-2009 12:03 هلا بشورة   الف صحة و هنا حبيبتي , بس ان شاء الله ما تكوني نسيتي تاكلي عني كم لقمة   يلا مو مشكلة على الكتاب , ان شاء الله بتشتريه مرة تانية و اذا جربتي منه شي سلطة لازم تعلمينا ياها

28  الكاتب منى, on 30-05-2009 12:21 هلا امونة   كمان فكرة الي قلتيها , بس الواحد لازم يتعود على السلطة حتى لو ما بيحبها و لو بصحن صغير   الله يسلم هل الديات على الفكرة الي ذكرتيها امونة و الشكر الك يا ست المعدلات

30  الكاتب منى, on 31-05-2009 10:53 هلا رنونة   لا عصبت و لا شي شو انا بقدر طالع شقاري عليكم , بعدها بتتركوني لحالي   ما شاء الله عمك الله يخليه بصحته و عافيته , فرحت على حالي لان انا عندي نفس العادة الذهبية   براءة من زمان رنونة و لو , انا قاضي حباب و بس دمعتين بطالع الكل براءة   ان شاء الله تجربيها و تكون علتى زووءك و متل ما بتحبي

31  الكاتب منى, on 31-05-2009 20:01 هلا ام هدى   الف صحة و هنا على السلطة اليونانية , هي واحدة من الوصفات المميزة بالموقع بالصوص السري تبعها     مممم , انا السندويشة الي قلتي عليها عندي اختها , بس باضافة جبنة , بتعرفي نحنا حلب من دون الجبنة ما بيسوى , ريتو الف صحة و هنا على قلبك و قلب البرنسيسة الصغنونة   ان شاء الله تجربيها و تطلع متل ما بتحبي و اطيب

32  الكاتب dado, on 01-06-2009 18:45 مرحبا منوش  يمكن ألذ بهدلة وتوبيخة بسمعها "بالأحرى بقراها" بحياتي..   إي هيك ها.. فشي خلقك فنا شوي   والله معك حق.. نحنا شعب بيعتبر السلطة شي تكميلي.. وبالعزايم شي تحصيل حاصل.. بينما بالغرب بتلاقي السلطة أهم شي.. وغالبا بيحاولو يغنوا السلطة باللحم أو السمك لحتى هي تكون الوجبة الأساسية.. وهون في كتير مطاعم بتحط سلطات ضمن قائمة الوجبات الرئسية.  بس مو الكل ما بيهتموا.. هلأ أنا جربت معظم السلطات والشوربات يلي عندك بالموقع.. لأني بحب هدول الصنفين من الأكل كتير.. وحتى لو ما كان في غيرن عالطاولة ما بزعل.. وبحاول يكونوا على سفرتي كل يوم. بس بصراحة.. ما بعرف ليش ما برد على وصفات السلطة .. يمكن نحنا بيهمنا كتير عنصر الإبهار.. ولهيك منفكر إنو يالله.. لك هو صحن سلطة مو محرزة الواحد يوقف عندها.  بس إنتي انتبهتي قديش إجاكي ردود عالموضوع هون بعد ما بهدلتينا بالأول   هادا أكبر دليل إنو نحنا شعب ما بيجي إلا بالرص   آسفة كتير منى إذا طولت عليكي..  * بس ملاحظة بكرة عندي عزيمة وناوية جرب هالسلطة

33  الكاتب بشرى, on 02-06-2009 16:01 يسلم إيديكي يارب شو عجبتن لأهلي .. وطلعت أطيب بكتير من المرة الماضية .. بتعرفي خضار بلدنا غير .. أنا بسوريا هلأ

34  الكاتب منى, on 04-06-2009 11:51 هلا دالو   يعني بتعرفي حالك سكر و عسل و الا نو , لان حكياتك بيجننوا , ردك بقراه و برجع بقراه و كمان مرة و مرة و كل مرة بضحك من جوة قلبي كأن عم اقراه لاول مرة , دقيقة ااقراة مرة عاشرة     و الله مو بهدلة و لا شي و انا ما عم ااقصد على الردود , اقصد على عدد القراءات اولا ,على كل الاحوال انا ما بيطلعلي بهدل حدا , لان انا قطة و انوسة و مو صاحبة صوات , بس الصراحة قلتي الحق , نحنا شعب ما بيجي الا بالرص      شو صار بعزومتك

35  الكاتب منى, on 04-06-2009 12:10 هلا بشورة   يا ستي نورت سوريا كلها باحلى صبية ,الحمد لله على السلامة و كتير انبسطت انها عجبت العيلة

36  الكاتب dado, on 17-06-2009 09:48 مرحبا  أنا آسفة عالتأخير..  بس التهيت بالوصفات الجديدة   عزيمتي كانت تمام والسلطة كانت أتمم.. عجبت ضيوفي والأهم من ذلك إنها عجبتني   تسلمي يا منوش.. إنتي يلي حكياتك بياخدوا العقل.. وبتلاقيني بقرأ مقدمة الوصفة كذا مرة.. وأحيانا بكون عم بحبش بالموقع ولما بفتح شي وصفة قديمة محطوطة هيك بدون مقدمة بنفقس .. ولما بيكون في شي صفحة عم تفشي خلقك فيها ما بحب اقراها عالسريع.. لازم كون رايقة مشان استمتع فيها.  وإنتي بتعرفي إنو كلامك هو من أهم الأسباب يلي بتعلق الواحد بموقعك. أكيد بالإضافة للوصفات الممتازة والثقة يلي بتتكون عند الشخص أول ما يقرا كلامك وشرحك

37  الكاتب منى, on 17-06-2009 11:19 بتعرفي دالو اول ما بديت الموقع كنت دوما اكتب مقدمات , بس على اعتبار كان عدد الزوار لسا قليل فما كان حدا يرد علي , و صرت حس حالي متل الي عم يحكي مع حالو و لهيك صرت نزل الوصفة من تم ساكت     كتير انبسطت ان عزيمتك كانت ميسرة و صحة و هنا على قلب الجميع فردا فردا

38  الكاتب بتول الحلبية, on 12-07-2010 23:40 ياستي بديان شعبنا يعرف شو هي السلطة وشو أهميتها  يسلم ايديك مبينة رائعة وعندي وصفة سلطة فيها جرجير كمان بقى ان شاء الله ببعتلك ياها....ادعولي يا جماعة بقيان مادة للتخرج

40  الكاتب منى, on 22-10-2011 12:03 صحتين و الف عافية حبيبتي

41  الكاتب منى, on 22-10-2011 17:35 هلا بتول   ان شاء الله تجربيها و تحبيها     طمنينا عنك , شو الاخبار , ان شاء الله بتنجي و منفرح فيك

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved