فتحت ايميلي كالعادة كل يوم الصبح , و كان فيه رسالة من أحد المواقع الانكليزية المتخصصة بالخبز , هل الموقع أنا مشتركة فيه لهيك كل يوم بيبعت الي شو الجديد فيه .
أحد المواضيع الي لفت نظري كان خبز الشوكولا بالخميرة البرية , فتحته و سبحان الله , غلى قلبي بمجرد ما شفت الاسم على الصور , كان مكتوب بالانكليزي اليمان , فتوقعت أن صاحب أو صاحبة الوصفة عربي . و كان في نهاية الوصفة رابط لبلوج .
حسيت باحساس المغتربين , كيف بيلفوا السوريين على بعضهم أو المصاروة أو اللبنانية , بتحس شي من ريحة بلدك و انا كنت كتيبر محمسة لأكتشف هوية صاحب أو صاحبة الموقع .
فتحت البلوج الانكليزي و اذ طلع في رابط لبلوج عربي و لما فتحته عرفت أنها واحدة من الأخوات المميزات جداً في منتدى لك , نسرين .
لنسرين كنت شفت موضوع من كم شهر عن وصفة النيوكي و كنت كتير مبسوطة من الموضوع و الوصفة أولا و كمان كنت كتير فخورة فيها ثانياً لأنها بنت بلدي .
البلوج تبعها حلو و أنا لازم اتصفحه كل يوم أو يومين و شوف شو ضايفتلنا جديد و خصوصاً أن جميع المواقع الي كانت محجوبة عندنا بسوريا و الي بتنتهي بـ blogspot تم الافراج عنها أخيراً , يعني ما بقى في صعوبة بتصفحهم .
شفت سلطة الجرجير و طريقتها نفس طريقتي , بس الفكرة الجديدة عندها هي نقع البصل بالخل و الليمون , بهل الطريقة خفت كتير ريحة البصل المزعجة و كمان عطت لكل السلطة نكهة مميزة .
حضرت السلطة لعزيمتي و كانت نيتي مو بس سلطة . كيف ممكن نزين الطاولة ببوكيه ورد , أنا زينتها بهل السلطة و بكل ألوانها المميزة . يعني زينة بتتاكل .
بالصحة و الهنا
باقة جرجير حبة بصل صغيرة حبة صغيرة جزر حبة صغيرة ليمون حبة بندورة بضع أوراق ملفوف أحمر
الصلصة :
عصير ليمونة و بشرها 2 ملعقة كبيرة خل 3 - 4 ملعقة كبيرة زيت زيتون
·تقطع البصلة لجوانح ثم تفرك بالملح و تعصر قليلاً للتخلص من عصيرها .
·تبشر الليمون و تعصر ثم تقلب مع الخل و الزيت و القليل من الملح ثم تضاف البصلة و تترك لتنقع حتى اعداد بقية السلطة .
·يقطع الجرجير باليد لقطع كبيرة و يرتب في طبق التقديم .
·يبشر الجزر على الطرف الخشن من المبشرة , تفرم البندورة لمكعبات متوسطة و تفرم أوراق الملفوف .
·ترتب الخضار فوق الجرجير و عند التقديم تنثر الصلصة فوقه و تقدم فوراً .
تعليقات (18)
