شوكي بحشوة الخضار و اللحمة 
 

هل الشوكي ملون و فيه شي بيجلب النظر و بيفرح القلب قبل ما اتدوقيه .

حضرته بأخر عزيمة , و سألتني خالة حسناء على طريقة تحضيره . و قالتلي اوعى تقوليلي هادا غراتان , لأن خالة ما بتحب الوصفات الي بتنطبخ بحليب متل المعكرونة غراتان و القرنبيط غراتان و البطاطا غراتان . قلتلها هو في حليب بس حطيته بالأخير , يعني الشوكي انطبخ بالمرق و بعدها البيشاميل بس بالأخير . لهيك انا كاتبة اسمه شوكي غراتان بس بتحفظ , ما لقيت اسم أظبط منه

الحشوة ما بتأخد لحمة كتير لأن فيها خضار و نوع الخضرة الي ممكن تستعمليها عايد لزوءك , انا استعملت فطر و فليلفة حمراء و بازلاء


هل المرة ما رح حط مثل , رح حط شو بينادوا البياعين على الشوكي لمن بدهن يبعوه و يدللوا ان شوكياتهم طرايا و ما في أطيب منهم :

ع طابات الندى يا شوكي
ع الكماية يا شوكي

و لما بيقرب وقت الشوكي يخلص بينادوا :

تعا ودعوا يا شوكي
أخر طبخة يا شوكي
ع المونة يا شوكي
 

ان شاء الله تجربيه و يعجبك و بألف صحة و هنا

15 – 16 حبة شوكي مقشرة
ملعقة كبيرة سمنة أو زبدة
بصلة صغيرة الحجم مفرومة ناعماً
ربع كيلو لحمة غنم مفرومة
حبة صغيرة فليلفة حمراء مفرومة ناعم
تلت كوب بازلاء مسلوقة
تلت كوب فطر مفروم
نصف ملعقة صغيرة بهار مشكل
رشة صغيرة قرفة
2 - 3 كوب مرق

البيشاميل :

2 كوب حليب
2 ملعقة كبيرة طحين
2 ملعقة كبيرة زبدة
رشة ملح و فلفل أبيض و جوزة الطيب
ملعقة صغيرة مايونيز ( اختياري )

جبنة بارمزان أو قشقوان مبشورة





·          يقشر الشوكي و يوضع في ماء فيه ملح ليمون أو عصير ليمون حتى لا يتغير لونه حتى انتهاء تقشير بقية الحبات .

·          يرفع من الماء و يجفف ثم يقلى بالزيت حتى يشقر , يرفع من الزيت على ورق ماص ثم يرتب في طبق بايركس .

·          لتحضير الحشوة يقلى البصل بالسمنة أو الزبدة حتى يطرى , تضاف اللحمة و تقلب على نار متوسطة حتى تنضج و يجف مرقها .

·          تضاف الفليلفة و الفطر و البازلاء و البهار و القرفة و يقلب الكل لبضع دقائق .

·          تحشى قلوب الشوكي بالحشوة ثم يصب المرق بشكل لطيف كي تبقى الحشوة على الشوكي . يصب المرق بحيث يغطي قلوب الشوكي من دون أن يصل للحشوة .

·          تغطى الصينية بورق ألمنيوم و تخبز في الفرن على درجة حرارة 180 درجة مئوية لمدة نصف ساعة أو حتى ينضج الشوكي .

·          تجهز صلصة البيشاميل , تذوب الزبدة على نار هادئة , يضاف الطحين و يقلب الكل لبضعة دقائق .

·          يضاف الحليب و الملح و البهارات بالتدريج مع التقليب بعد كل إضافة و يترك حتى يغلي و يسمك ثم يبعد عن النار و يضاف المايونيز في حال الرغبة باستخدامه . يمكن إضافة مكعب مرق و يمكن تحضير صلصة بيشاميل خفيفة السعرات الحرارية .

·          بعد أن ينضج الشوكي يوزع البيشاميل على الحبات و ترش بالجبنة ثم يرجع الطبق للفرن و يترك لمدة ربع ساعة أخرى أو حتى تحمر الجبنة .

·          يقدم الشوكي فوراً لوحده أو مع طبق من الرز المفلفل و السلطة الحامضة .

تعليقات (27)

2  الكاتب منى, on 24-05-2009 10:37 هلا سمسومة   الله سلمك و ان شاء الله تجربيها و تعجبك .  و الله متل ما قلتي عرفانة حالها قلبي معلق فيها , خليلي عيني ربي يفرحني فيها و باخواتها و يبارك فيهم و بكل الغوالي عليك يا حق

3  الكاتب ام نور, on 24-05-2009 10:43 السلام عليكم ورحمة الله وبركاته   كيفك منى انشالله بخير الله يعينك عجمعة الامتحانات وينجح هالحلوين سلم دياتك عاهل غراتان اكتر من رائع رح جربو باسرع وقت بس بيصير ما ينقلا شو الفايدة من قليو

4  الكاتب منى, on 24-05-2009 10:57 هلا ام نور   شو أخبار عزيمتك ؟ ان شاء الله امورك كانت تمام , و اكلت همك و الله    يا ستي انا متعودة ااقلي الشوكي قبل ما اطبخه , بحسه بيصير اطيب , و اذا انت متعودة ما تقليه فممكن تحضريه بالطريقة الي بتريحك     ان شاء الله تجربيه و يكون على زووءك و بانتظار رايك حبيبتي

6  الكاتب سلاف, on 24-05-2009 11:41   شو بستمتع وأنا بقرا مقدمتك بتقديم الطبق  بس ياليت كنتي نزلتي كم رسمه للاموره فرح الله يخليها ويحميها 00 بركي في زباين بره بدها تشتري   الله يخليلك كل اولادك يامنى وتشوفيهن متل مابتحبي  ويسلم ايدكي على الشوكي منظرها بيفتح النفس   كنت بدي اسالك الشوكي لازم يكون دوائر على حاله ولا بصير يكون مقطع اربع قطع ؟؟؟   الشوكي اللي باقي عندي مقطع بصير ولا مابصير ؟؟؟  اذا قلتي مابصير بدك تنزلي الشوكي بلحمه   كني مابصير لان كاتبه مابصير يوصل المرق للحشوه   شكرا كتير منى وبوسيلي هالاموره فرح

8  الكاتب نوارة, on 24-05-2009 16:25 ابوس قلبها انا اللي غلا قلبي عليها ما شاء الله   الله يبعتلها ايام حلوة الهاولباقي الشلة   اما عن الشوكي جربتهامن قبل وطلعت طيبة بس ما خطرلي احطلها جبنة اكيد هيك اطيب بكتير لانو الجبنة مو بس بطيب الاكل وبتحلي الحياة كمان

9  الكاتب رنا, on 24-05-2009 19:40 شي كتير طيب وخالتي مديرة مطبخ بالشام وبيعملو عندها هالطبق ودقته عندهن وبالفعل طيبة ...بس متل ماقالت الاخت لموسي انه بعض الناس مابيقتنعو بالتجديد بالاكل خايفة يكون بيت حماي من هالناس ..يلا رح جرب اعمل كم وحدة بركي بس انزل عند اهلي لانه اجانا طبختين شوكي واختفى من الاسواق

12  الكاتب منى, on 24-05-2009 20:26 هلا سلوفة   تكرم عينك , ببقى بنزل رسوماتها و بعمل عليهم مزاد علني   ممم , اتوقع بيصر بالشوكي المقطع , ممكن تجربي و بيطلع متل صينية لقمة تشكن , يعني الشكل شوي متغير   بوساتك وصلوا و انتي كمان بوسيلي الاولاد الحلويين , أبضايات الحارة

13  الكاتب منى, on 24-05-2009 20:27 هلا لموسة   لا هلا الجيل اتغير و الكل بيحب التجديد , زمن أول اتحول   الف هنا على الشوكي و انبسطت كتير بردك و تواجدك

14  الكاتب منى, on 24-05-2009 20:27 هلا نوارة   خليلي عينك نوارة , اامين يا رب و ان شاء الله تجربيها بالجبنة و تكون طيبة و متل ما بتحبي

15  الكاتب منى, on 24-05-2009 20:30 هلا رنونة   ان شاء الله بيعجبهم , و كلام مظبوط و خصوصا الكبار بالسن   يلا جربيه بكم واحدة و اذا عجبهم ابقي كملي   بوساتك وصلوا وان شاء الله دايما مبسوطة و ربي يقومك بالسلامة انتي و البي بي

16  الكاتب نور الأسلام, on 24-05-2009 21:55 السلام عليكم كيفك منى تحياتي الك منظر الطبق بشهي انا ما بعرف الشوكي بس بسمع عنو ولسل كمان ماجربت البشاميل النو مابحب الحليب وما بيجي عبالي اطبخ وصفات بالحليب لاتستغربي من كلامي هداالي صاير معي تسلملي الموره الحلوى فرح اذا لسل المعرض فلتح لاجي اتفرج واشتري طالعين نتعشى عالبحر وابني صرعني وهو يلى بح يعني بحر سلامي

17  الكاتب منى, on 25-05-2009 13:22 له يا نور كيف لازم تتعرفي عليه قصدي على الشوكي و البيشاميل .  كلامك مو مستغربته , خالتي متلك و ما بتطيق شي اسمه غراتان   الله يخليلك ابنك و تشوفيه شب يخزي العين عنه و تجي تزورينا بالمعرض انت واياه

19  الكاتب منى, on 26-05-2009 06:58 هلا سارونات   الله يسلمك و يحفظلك احبابك كلهم بصحة و عافية .  أختي اذا ما رح تقليه فممكن تطبيقه بالصينية و تعملي الوصفة عادي , بس بهيك انا مو مسؤولة اذا ما طلع كتير طيب أو اذا كانت طعمته عادية

20  الكاتب ام دانية, on 29-05-2009 08:36 يممممممممممم على منظر الصورة شي بيغرف القلب ياريتني كنت جنب الصينية لكنت قضيت عليها بسرعة قديش حابة جربها بس هون مافي شوكي رح حاول جيب معي من حلب واعملها لانها خارطة مشطي كتيرررررررررر وعلى فكرة انا جهزت كذا وصفة من وصفاتك مشان اعملها بحلب مومشان شي مشان تقول عني حماتي اني شاطرة وست بيت ممتازة ههههههههه بس اكيد مع ذكر اسم الموقع

21  الكاتب منى, on 22-04-2010 21:16 لا دانية ما في داعي تذكري الموقع ابدا , انا بحب ينكر الموقع وقت لطش وصفة على النت اما في العالم الحقيقي , الطشي و على راحتك و لا تخبري حدى     الف صحة و هنا مقدما و ان شاء الله تعجب الكل

22  الكاتب juman, on 18-10-2010 04:58 مرحبا يا ستي هريتك تعليقات اليوم انا هلا قايمة اعملها وبخبرك شو بصير معي

23  الكاتب منى, on 25-10-2010 08:02 بالعكس جمان   انا بحب التعليقاات كتير , يلا رح استنى رايك يا جميل

24  الكاتب juman, on 26-10-2010 21:42 السلام عليكم,اسفة طولت بالرد عليكي ما صح اللي يسلمو ايديكي ,كتير كتير طيب وعجب زوجي كمان, ما ننحرم من وصفاتك يللي بتبيض الوجه يا رب,, عندي طلب ازا في وصفات حلوة ومرتبة لكاتو اناناس ,يعني نفس الاناناس مو ميته ويكون طيب متل كات و التفاح,لانو قديش جربت وصفات قبلو كان يطلع طعم التفاح كانو مطبوخ بس وصفتك كتير روعة لانو بطلت اثق باي موقع تاني اخد منو, بس لقمة طيبة لان كل شي فيه مكتوب بامانة عالية,,سوري طولت عليكي ولا حرمنا جديدك

25  الكاتب منى, on 10-11-2010 19:10 تكرم عيونك جمان ان شاء الله بنزل الوصفة قريب     ريتو الف صحة وهنا على كاتو التفاح , عن جد فرحت كتير لان زبط معك , حسيت في اكتر من اخت ما طلع معهن تمام و هو وصفة يممي     شكرا كتير لردك و كلامك و ربي يديم المحبة و المعروف

26  الكاتب منولة, on 12-05-2012 03:28 عملتها مرة بس مع شوية اختلافات بالطريقة وما حبيناها لأنو طلع الشوكي شوي قاسي فيها.. بس رح أجربها بكرا بطريقتك.. وبخبرك عن النتائج ان شا الله

27  الكاتب منى, on 12-05-2012 16:05 لقمة طيبة و بس و الباقي كله خس

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved