راح اعطيكي هالوصفه يلي كل الشيفات بيقولو صعب انو تنعمل بالبيت. بس من كتر حبي للمطبخ و للحلويات خاصه ضليت جرب و جرب لحتى وصلت للمقادير المظبوطه ان شاء الله بتجربيها و بتعجبك انتي و كل الاخوات في هالموقع الحبيب. الوصفه هيه لكنافه السميد اللبنانيه و اللي اساسها هو فرك الكنافه. هذه المقادير هي من مطبخي (مطبخ التجارب) .

كل مره بعملها يقف الضيوف و يستقبلونها بالتصفيق الحاد لمنظرها البديع و الطعمه التى تضاهي احسن المحلات.

و سارسل لك لاحقا وصفه الكعكه اللبنانيه التى تقدم بها الكنافه في لبنان مع صورتها من مطبخي

لك كل الحب و ارجوا ممن تجربها ان تخبرنا بالنتيجه و اي سوءال انا حاضره.

3 اكواب سميد ( ارجو قراءه الملاحظات بالاسفل)
1 كوب اما سمنه حيوانيه مثل البقره الحلوب او زبده
1 كوب سكر عادي
نصف كوب ماء مغلي
ربع كوب ماء الورد
ربع كوب ماء الزهر
ربع ملعقه صغيره محلب
2 ملعقه كبيره حليب بودره مثل نيدو او اي حليب بودره ثاني





·          يخلط السميد مع السكر و المحلب و الحليب البودره و تذوب الزبده او السمنه على نار هاديه و تفرك مع مزيج السميد.

·          تغلي الماء و يضاف له ماء الورد و ماء الزهر و يسخنوا على النار و يضافوا للسميد و يحركو بملعه خشبيه حتى يتمازجوا فقط. يجب ان يكون المزيج له قوام المهلبيه الثقيله او المغلي الثقيل. على حسب نوع السميد ممكن ان تحتاجي ان تضيفي بعض الماء المغلي . لانه كما نعرف فيه انواع تشرب ماء اكثر من انواع اخرى.

·          يوضع الخليط في صينيه غير لاصقه اذا توفرت و اذا لم تتوفر يوضع في صينيه عاديه مغطاه بورق الخبيز (بارشمان)

·          يوضعوا في فرن حراره 350 لمده 10 - 12 دقيقه فقط في الرف الوسطاني.

·          يخرجوا من الفرن و ستلاحظوا ان السميد شرب كل السوائل و اصبح قطعه واحده ولكنه لم يتغير لونه.

·          يترك ليبرد ثم اما يفتت باليد او يوطع في محضره الطعام (المولينكس) و يفرم ليصبح مثل الرمل. الان اصبح عنك شيء اسمه فرك الكنافه. من هنا تختاري اما ان تعملي به الكنافه و الحلويات الاخرى او ان تضعيه في الفريزر لاستعماله في وقت ثاني.

لعمل الكنافه نعمل التالي: 


·          نحضر صينيه تيفال(غير لاصقه) و ندهنها بالزبده و نفرد بها ثلاثه ارباع الفرك الدي حضرناه بالاعلى و نكبسه باليد حتى يكوي متساوي .

·          نضع كوب من الحليب السائل على النار مع نصف كوب من السميد الخشن و نحركه حتى يثقل القوام. ثم نضيف له كوبين او ثلاثه اكواب من الجبنه العكاويه المفتته و المحلاه. و نخلط المزيج حتى تذوب الجبنه و يصبح الخليط متجانس.

·          يسكب خليط الجبنه على السميد الممدود بالصينيه و يساوى السطح بظهر الملعقه الخشبيه بحرص.

·          يغطى مزيج الجبنه بباقي خليط السميد و الزبده و يفرد السميد بواسطه اطراف الاصابع و نحاول او ننزل السميد بين الصينيه و بين خليط الجبنه و الهدف من هذا ان نمنع الجبنه من الالتصاف بحواف الصينيه اثناء الخبز. 

·          بعد ان نفرد السميد يكبسه برقه حتى يصبح متساوي. لا تخافي كوني جريئه و انت تكبسي لن يضرها هذا بشيء.
·          تخبز بفرن محمي مسبقا بحراره 375 على الرف التحتي لمده 30 - 35 دقيقه او حتى تري ان الاطراف اصبحت محمره. عندها تحمي الشوايه و يحمر السطع ولكن انتبهي لا تتركيها لانها بسرعه تتحمر يعني 5 دقائق حسب فرنك .

·          تخرج من الفرن و يسكب عليها تقريبا نصف كوب من القطر البارد .

·          ندور بالسكينه على حواف الصينيه لنتاكد انه لا يويجد جبنه ملتصقه ثم نضف فوقها صينيه اكبر قليلا و نسمي بالله و نقلبها.

·          نسكب تقريبا كوب من القطر البارد عليها و نرشها بالفستق الحلبي المجروش و مربى زهر الليمون.
تقدم من مزيد من القطر على جنب كل واحد و ذوقه.


ملاحظات:

·          جربت هذه الكنافي بالسميد الخشن لوحده . او باستعمال نصف سميد خشن و نصف ناعم. او ناعم لوحده او نصف ناعم و نصف طحين ابيض و كل النتائج كانت ناجحه و مبهره انت و ذوقك.

·          لاحظت انه باستعمال الزبده تكون الكنافه اخف من السمنه.

·          في حال استعمال السمنه الحيوانيه حاولت ان اخففها لثلاثه ارباع الكوب و نجحت ايضا و لكن الزبده يجب ان تظل كوب كامل (لان الزبده بها ماء)

·          لاحظت انه اضافه ربع ملعقه صغيره من المحلب كافي جدا و الا سيصبح طعم المحلب غالب و سيوءثر على النتيجه النهائيه.

·          السبب في اضافه السميد و الحليب مع الجبنه ان الجبنه ستصبح هشه جدا و لن تصبح قاسيه و لن تجلد عندما تبرد قليلا.

·          هذه المقادير تعمل صينيه بمقاس قطرها 40 سم .

·          من هذا الفرك ممكن ان نعمل حلويات كثيره مثل: البصمه و المفروكه بالسميد و المفروكه باللوز و المفروكه بالفستق و ممكن ان تحشى بالقشطه او الجوز او الفستق  .

تعليقات (119)

2  الكاتب ام محمد, on 24-05-2009 10:39 الله يعطيكي العافية اختي على الوصفة باين عليها طيبةان شاء الله التجربة قريبا

3  الكاتب ام نور, on 24-05-2009 11:03 الله يبارك فيكي اخت ايمان وصفة الا قيمتها فعلا وهي الاساس لا كتير انواع من الحلويات العربية ذكرتيني بالكنافة وشهيتيني اعملا جربتا مرتان وخلص عندي المقادير من والدي عالتمام بس سبحان الله ولا مرة خطرلي نزلا بس الفرق ما بيحط والدي ماء الزهر والورد مع الفرك والسبب انو بيحط بالقطر   وبيعجنا بالحليب وبالاخير لما يطحنا بتطلع ناعمة بينخلا كتير منيح لا حتى يكون الفرك متساوي ,وبيخبزا عالنار دغري مانو بالفرن وبيضل يبرم الصينية لا حتى تشقر كلا وبيرجع بيقلبا عالطرف الاخر شغلة بتطلع

4  الكاتب منى, on 24-05-2009 11:10 ممم , كلام جميل كتير ام نور الله يعطيكي الف عافية للمعلومات و الاضافات و ربي يخليلك الواد بصحته و عافيته

7  الكاتب رنا, on 24-05-2009 18:41 يالله ...يعني شو صار لو حاطتيلنا كل واحد قطعة والله انا حامل وبشهري الثامن وماعم بقدر وقف كتير عم بتعب واشتهيت على هالاكلة ...ياللله شو باينتها طيبة ...ياستي يسلم هالايدين الي بتلتف بالحرير وهالطريقة الواضحة جدا جدا جدا وبالنسبة لقطعة الكنافة كنت عم بمزح معك وانت عملتي خير اكتر من لو طعميتينا ياها لانه متل مابيقول متل ياباني انه لو عطيت الواحد سمكة ممكن تكون سديت حاجته للطعام ليوم واحد بينما لو علمته يصطاد طول عمره مارح يجوع يسلمو ايديكي والله يجزيكي كل خييييير ...بس ياترى مافي صورة

11  الكاتب لارا مينا, on 24-05-2009 21:42 والله تسلمي أخت إيمان على هالوصفة ... وكل شيء واضح تمام بس ياليت تحطين صورة في أقرب فرصة وإن شاء الله أعملها بعد الصور على طول ... على رأي المثل (الصورة تغني عن ألف كلمة )خصوصا إن الوصفة جديدة علي تماما وأبغى وقت لحد ما استوبعها كويس وبالذات الوصفات العربية الأصيلة أحس إنها دقيقة جدا ولازم الحذر في البداية لحد ما نتقنها بعكس الوصفات الآسيوية أو الغربية بتزبط معي من دون تعب كثير , وإن شاء الله الأخت منى بتنزل صور وبنكون استفدنا مرتين, وعندي سؤالين إذا ممكن , شو البصمة والمفروكة باسمع فيها دايما وإذا بتعرفي طريقتها ياليت تحطينها لنا مستقبلا حسب وقتك وظروفك أكيد؟   والسؤال الثاني في نهاية الوصفة كتبتي ممكن تحشى قشطة أو فستق أو جوز يعني أعمل نفس طريقة الكنافة بالجبنة بس أستبدل الجبنة بأحد الأشياء المذكورة .  وألف ألف شكر لكي على كل شيء والله يعطيكي العافية والصحة على طول وأستميحك عذرا على الإطالة وإذا أخذنا من وقتك

12  الكاتب ميساء, on 25-05-2009 07:19 تسلم ايديكي أخت ايمان والله هالكنافة باين عليها طيبة كتير وريحتها وهي طالعة من الفرن وصلت لعندي ألف شكر على التفصيل والشرح الوافي للوصفةوجزاك الله كل خير

14  الكاتب نور الأسلام, on 25-05-2009 12:19 السلام عليكم الله يعطيك العافيه اخت ايمان والله شي حلو وتمام الله يجزيك كل الخير وسلم دياتك

16  الكاتب منى, on 25-05-2009 15:43 يا سلام على هل الدعوات الحلوة يا سيمو ربي يجعلهم من قسمة أمونة و نصيبها

18  الكاتب منى, on 25-05-2009 18:25 الف شكر الك سيمو و هادا بس من زووءك و لطفك و ان شاء الله تجربي وصفة من الموقع أو أكتر و تكون متل ما بتحبي

22  الكاتب آرام, on 27-05-2009 09:28 شكراً أخت إيمان على التوضيحات. سأجرب تحضير الفرك قريباً وأخبرك النتيجة.  بالنسبة لمربى الزهر صار عندي فضول أعرف طريقته بالتفصيل

24  الكاتب ام دانية, on 29-05-2009 08:31 يسلم ايدك يارب عجبتني فكرتا كتيررررررررر كنت حابة كتير جربها بس للاسف مالي فاضية لانو عم جهز حالي للنزلة على حلب بس ان شاءالله رح جربها بس ارجع وخصوصا انو هون ما بلاقي منا بس يعني ممكن سوال على الماشي ياترى شو هاد محلب؟وين ممكن اشتري من حلب؟

25  الكاتب منى, on 29-05-2009 11:41 هلا أختي وداد   اتمنى أمونة تجاوبك لان انا لسا مو مجربة الوصفة و هي اكيد أدرى , بانتظار امونة لتجاوب

26  الكاتب منى, on 29-05-2009 11:42 هلا ام دانبة   المحلب ملياااان بكل مكان , و اكيد بالمدينة رح تشوفي باي محل بتسألي فيه , عند سوق العطاريين

27  الكاتب آرام, on 29-05-2009 14:12 أخت إيمان .. جربت تحضير الفرك اليوم الصبح .. عملت نصف الكمية وقسمت كل المقادير على 2 .. وبعد أكتر من ربع ساعة بالفرن بقيت معجنة .. حسيت أنو في شي غلط .. رجعت قرأت الوصفة بدقة .. واكتشفت أني خبصت خبصة ماكنة .. قسمت كل المقادير على 2 عدا الماء المغلي .. حطيت نص كوب وكان لازم أحط ربع وبالفعل كنت لاحظت قبل ما أحطها بالفرن أنو الخليط مانو سميك متل المهلبية الثقيلة يعني كان مريق متل سيريلاك الأطفال .. طبعاً في النهاية ما طلع عندي فرك .. طلعت مامونية .. بس كتير مشرشحة   كررت العملية من الأول .. وانتبهت للمقادير بدقة .. وطلع الفرك ولا أروع   يسلموا ايديك والله يعطيك العافية .. بالفعل وصفة ممتازة ودقيقة.  جهزت بالفرك صينية كنافة بالجبنة .. حسيت أنو الفرك ناشف وناقصه زبدة أو سمنة (مع أني حطيت نص كوب زبدة لـ 1.5 كوب سميد حسب الوصفة) .. فأضفت 3 ملاعق كبيرة سمنة للفرك .. وبعد ما خبزت الصينية بالفرن طلع شكلها حلو وريحتها طيبة كتير .. فرحت عليها وقررت أني أقلبها هالمرة .. حتى تطلع بروفيشيونال .. هزيت الصينية لأتأكد أنو ما في التصاق بالأرضية أو الحواف وبعدين قلبتها .. وعينك ما تشوف إلا النور .. نزلت كل شقفة لوحدها .. وصارت خبيصة .. يبدو أن السمنة الزيادة ما خلتها متماسكة ففرطت أثناء القلب ونزلت كرفتة .. أو يمكن أنا ما عرفت أقلبها .. المهم أني لازم أخبصها دائماً .. بس الحقيقة أنو طعمتها طيبة كتير لولا سمنتها الكتيرة .. الأكيد أنو المرة الجاية ما رح أضيف ولا نقطة سمنة .. وكمان ما رح أقلبها .. ومو ضروري تطلع بروفيشيونال يعني   ألف شكر إلك .. وللأخت منى طبعاً .. ودمتم بخير.

31  الكاتب منى, on 31-05-2009 09:55 سبحان الله ارام و الله محضرة وصفة و في المقدمة ذاكرة نفس المعلومات الي ذكرتها انت , حرفيا ! بس بكم اضافة .  انا معك البهارات المطحونة غير البهارات الحب تمام و كلهم طحنهم سهل ما عدا الزنجبيل

33  الكاتب نور الأسلام, on 31-05-2009 12:46 السلام عليكم شو هدا اخت ايمان الله يعطيك الف عافيه بسم الله ماشاء الله الصوره غيرررررررررررشكلا الله يجزيك كل الخير شي بشهيي

34  الصورة بتجنن الكاتب freesoul, on 31-05-2009 13:43 مرحبا  كنت مارقة من جنب لقمة طيبة دخلت بدي اشوف اذا في شي جديد خصوصا انو انا بادية دايت من شي اسبوع وحابة اعمل من وصفات السلطات . ولمن شفت صورة فرك الكنافة شطت ريالتي  مو معقول الصورة   فظيعة من جمالها .الصراحة لا تقاوم    بس راح حاول غض بصر منشان ما تضعف عزيمتي قبل لا يضعف جسمي   يا ستي يسلمو هالايدين ويعيشوا ويعملو ابداعات

35  الكاتب منى, on 31-05-2009 14:20 و الله مو معقولة , بروح و بجي و بتطلع على الصورة و مع ان الحلويات مو كتير صحابي , بس هل الصينية الكنافة بالذات مو معقول شو مشتهية دوقها , بس وين راحت على ان شاء الله ربي الف عافية و الف صحة و هنا بكل فرفوطة كنافة دقتوها و لا تنسي امونة شي مرة تبعتيلي كنافة من شغل دياتك الحلوة

36  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 31-05-2009 20:15 اهلين منى شكرا حبيبتي. بتقدري انك تحطي صوره الفرك و هو طري ثم بعد ما طلع من الفرن و نصفه مفتفت ثم الجبنه وهي تنزل على الطبقه الاولى ثم و انا بنزل الفرك بين الصينيه و الجبنه للتوضيح. اذا امكن صور صغيره لانه الصوره تغني عن مليون كلمه . انا اللي لازم اشكرك على كرمك و اخلاقك العاليه يا بنت الاصول. و يا ريتك جنبي لاعملك احلى صينيه كنافه. واذا بعتيلي عنوانك عيب علي اذا ما بعتلك اياها ب ارامكس بتوصلك مثلجه بس سخنيها بالفرن. (مش عم بمزح) هههه كل الحب و الاحترام لك.  ==========  اهلين نور الاسلام شكرا اختي جازاك الله خيرا. ان شاء الله بتعملها و راح تطلع احسن من الصوره. تحياتي.  ==========  اهلين فري سول. الله يسلمك حبيبتي. عندي اقتراح. قولي لحالك بس انزل هالكام كيلو راح كافيء حالي بقطعه كنافه صغيره. انا مثلا بحاول ما اكل نشا او حلو بس باكل قطعه صغيره بيوم من ايام نهايه الاسبوع. لان الواحد روح بييجي على باله مرات شي حلو. سلام.  ==========

37  الكاتب ام عمر, on 31-05-2009 21:39 ما شاء الله روعة روعة روعة استني مني كم مليون سؤال قبل مااعملهااااااااا بالرد الجاية ان شاء الله

38  الكاتب ام محمد, on 01-06-2009 07:11 الله يسلم دياتك يا ايمان عملتها البارحةوالفرك طلع تمام وريحته بتاخدالعقل والطعمة روعة بس الحشوة عملتها بالقشطة المعلبةوالقشطة كان لونها بيج يعني ما طلع معي هذه الطبقةالبيضاء الجميلة مثل الصورة بس طعمتهاروعةوكمان في شغلة طلع لون الكنافةعندي بني وانتي طالع معك احمربشهي شو السر واخيرا بعرف حالي طولت بس عجد وصفة اكثر من رائعة الله يجزيكي كل خيروبانتظار الوصفات اخرى

41  الكاتب منى, on 01-06-2009 17:34 هلا وداد   و الله اختي انا لسا مو مجربتها , بس ما دام امونة ما ذكرت الصبغة معناها ما في , هلا الكنافة العادية بيطلع لونها على اشقر معي من دون صبغة و السبب لان بخليها على نار 160 لحتى تستوي , فبتلاقي صار لونها احمر و بيجنن .. هلا ان شاء الله بتلحقنا امونة بالجواب

42  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 01-06-2009 19:55 الاخت ام عمر شكرا حبيبتي. ان شاء الله بتجربيها و بتشوفي قديش سهله بس حبيبتي اقرئي كل الملاحظات و الاجوبه لانه فيه اجابات لكثير من الاسئله و انا حاضره. تكرم عينيك.  =============  ام محمد برافو جربتيها انا مبسوطه. صحتين. هذه الحشوه بالصوره ليست قشطه هذا خليط الجبنه مع السميد و الحليب. بس ممكن عمل قشطه هذا القياس بياخذ ثلاثه اكواب حليب مخلوطه مع سته ملاعق كبيره نشا يعقدوا على النار و بعد ان يثخنوا يضاف علبه او علبتان قشطه مثل نستله او اي نوع ثاني يعني القشطهالمضافه تكون بمقدار كوب مش اكثر. و يخلط معهم ملقه صغيره من الماء زهر و الماء ورد و ممكن حبه واحد فقط مسكه مطحونه. اضغطيالفرك باول طبقه منيح ثم ضغي القشطه لازم تكون جامده ثم ضعي ثاني طبقه فرك ووزعيها بحرص شديد. اخبزيها لمده ثلانين دقيقه مش اكتر. بالتوفيق.  ============  الاخت وداد لم اضف لون هذا اللون طلع غامق بالتصوير لونها طلع بني محمر لاني انشغلت عنها بالفرن خسه دقائق زياده. لازم يكون لونها اشقر محمر احسن من بني محمر حطيها لمده ثلاثين دقيقه فقط بالفرن. بالنسبه لمقادير المنتدى الثاني انا بقول خليكي معانا هون لانه كل الوصفات مجربه اكثي من مره و اذا لاحظتي انه انا عم بحاول انو اطلع احسن النتائج باقل دسم. شوفي الصوره راح تنطق هههههاقلك شي نفذي الوصفه و انتي مغمضه بس اقرائي كل الملاحظات و كل الاجوبه. بالنسبه للسميد راح يمسك لانه بعد ما خبزناه اول مره فتحت الحبه و صار طري فلما نضغطه باول طبقه راح يمسك باذن الله. اتكلي على الله اختي بالتوفيق.  ===========  الاخ ارام. مش عارفه شو اجاوب اقول شكرا او لا حول ولا قوه الا بالله

44  الكاتب سارونات, on 01-06-2009 21:42 السلام عليكم و رحمة الله و بركاته    يسلم دياتك اختي ايمان و الصورة طالعة كتير حلوة ان شاء الله بس افضى راح اقرأ الوصفة منيح و اذا صار عندي اي سؤال راح اسألك بقى حضري حالك لوابل من الاسئلة     جازاك الله خيرا اختي و في انتظار المزيد من وصفاتك    بالتوفيق  سلام

45  الكاتب ميساء, on 02-06-2009 18:36 مسا الخير عالجميع   أنا كان تلفوني معطل من يوم الخميس وكنت را يحة طق وانجلط لأني ما عم أقدر فوت عالموقع بس لما امبارح تصلح ودخلت ولقيت وصفة كاتو الكاراميل وصورة هالكنافة اللي بتاخد العقل صرت راح موت على لقمة واحدة بس الله يسلم ايديكي يا منى ولا يحرمني منك ويسلم ايديكي يا إيمان ما شاء الله عليكي ويجزيكي ربي كل خير على التوضيح بالصور

46  الكاتب منى, on 02-06-2009 19:09 هلا ميوسة   منيح الي اتصلح , بس شو طول , يلا ان شاء الله تجربي هل الكنافة و كمان الكيك و يكونوا على زووءك و الله يعطيها الف عافية امونة على هل الوصفة و الصور كمان , زينت الموقع فيهم و الله

48  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 03-06-2009 01:43 اهلين سارونات الله يسلمك و يحلي ايامك يا رب. حبيبتي اقرائي الوصفه مع الصور و الملاحظات وكل الاسئله و الاجوبه تحتها و بعدها تكرم عينك حبيبتي اسالي قد ما بدك راح افتح لك هوت لاين مخصوص لللاسئله.  =================  اهلين ميساء. الله يسامحه التلفون. هلاء وقته يخرب? سلامه قلبك حبيبتي بتمنى تجربيها و تجربي كيك التوفي بيشهي ماني مصدقه و اجربه. شكرا على الكلام الحلو.  ================  اهلين يا منى. يا حبيبتي انتي اللي شرفتيني بوضع وصفتي في موقعك المميز يا مزوقه. الله يرضى عليكي.

49  الكاتب ام محمد, on 03-06-2009 10:15 الله الله الله البارحة جربتها بالجبنةويا سلام كل لقمة نغم ومن دون مبالغة اطيب من الجاهزبكتتتتيروبتشعري باالفخروقت بتقدميها  الله يعطيكي الصحة والعافيةومشكورة لانك وضحتيلي  كيف اساوي الكنافة بالقشطةوهدا كله بيدل على ذوقك وكرمك

50  الكاتب semo, on 03-06-2009 11:50 الظاهر ما شفتي اسألتي امونة

53  الكاتب ام محمد, on 03-06-2009 23:06 ياسلام يا امونة بتطلع طيبة وسبحان الله وقت عملتها حطيت جبنة موزريلا مع العكاوي وكتيرطلعت طيبة بس اختي ما فهمت شويعني نص فريش مازوريللا و نص مازوريللا عادي انابجيب جبنة موزاريلا على شكل مستطيل وبقطعها وببشرهافاالله يخليكي قوليلي شو يعني فريش وعادي   وجزاك الله الف خير

57  الكاتب Iman, on 08-06-2009 06:49 الاخت وداد الحمدالله انها عجبتك و عجبت ضيوفك. يسلموا ايديكي حبيبتي و الف صحه و هنا على قلوبكم. يا الله شو مبسوطه على ردك. كتير بفرح لما حدا بيجربا و بيرجع يخبرنا شو النتيجه. و يا ريت اي حد بيجربا يذكر اي نوع سميد جرب. انا اكتر شي بحب نصف سميد خشن و نص ناعم. صحتين شكرا على الرد عزيزتي.

59  وأخيرا عملت الكنافة بس ... الكاتب لارا مينا, on 09-06-2009 22:37 مساء الخير...قبل يومين عملت الفرك بسميد ناعم وبالزبط مثل ماقالت الأخت إيمان,,, واستفدت كثير من أخطاء الإخوان والأخوات ومن ردود الأخت إيمان عليهم وطلع بسم الله ماشاء الله مع إن الوصفة جديدة علي تماماوأخذ معي 18 دقيقة بالفرن أول شيء 15 من تحت وبعدين 3 من فوق ... وما كان عندي محضرة الطعام والفرامة فيها قطعة ناقصة وطحانة البن إلي عندي صغيرة ورح آخذ وقت كبير وأنا أفرم الفرك ففكرت في فكرة وهي إني أفرمه في قطاعة الخضار الكهربائية وهي بتشبه محضرة الطعام بس على أصغر وأطول شوي وكمان من مولينكس وطلع الفرك 100% والخطوة إلي بعدها عملت الحشوة وطلعت 100% وبعدها جبت صينية ستيل ومن نوع فاخر لأن ماعندي صينية غير لاصقة ودهنتها بالسمنة بحرارة الغرفة وبكمية مناسبة وضغطت أول قسم من الفرك بشكل كويس وحطيت الحشوة وبعدها الفرك وكمان ضغطت بشكل كويس وبعدها خبزتها على الرف التحتي 30 دقيقة على 180 درجة مثل الوصفة بالزبط وحمرتها شوي من فوق وكان كل شيئء تمام وسميت بالله وقلبتها وعينك يامنى وياإيمان ماتشوف إلا النور على رأي الأخ أرام انفصلت الطبقة السفلى عن الحشوة تماما وكانت لاصقة بالصينية وكأنها مثبتة بصمغ لأنها كانت محروقة... والطبقة وحتى وهي محروقة متماسكة وهذا يعني إن الفرك طلع مزبوط بس الحراة كانت قوية.. مع إن الفرن كهربائي نوعيته ممتازة وأنا عادة مستحيل أخبز الكيك أو المعجنات على الرف التحتي بس الوسط لأن بتتحمر أسرع شوي بس أنا حبيت أتقيد بالوصفة لأنها أول مرة فهاذي أول غلطة لأن أكيد الأفران بتختلف عن بعضها أو كان المفروض أخبزها وقت أقل والغلطة الثانية كان لازم صينية غير لاصقة لأن الفرك بطبيعته بيلزق حتى لوكانت مدهونة كويس وهاذي الغلطة الثانية أو كان لازم أستخدم ورق الزبدة علشان تنقلب الكنافة كويس المهم أنا طولت عليكم بس حبيت أخبركم بالنتيجة والأخطاء إلي صارت معي علشان إلي ماعملوها يستفيدون زي مااستفدت من أخطاء غيري وطبعا أخطائي عرفت تصحيحها ورح أتلافاها المرة الجاية.. وعلى فكرة رشيت الكنافة بشيرة وقطعتها وأكلناها كلهامع إنها بدون سقف علوي وطيبة كثيييير يعني ماخسرنا شي.. فلكي كل الشكر أخت إيمان وعلى صبرك وطولت بالك علينا وتحياتي الحارة لكي . وألف حمد الله على السلامة أخت منى أو مثل مابيقولوا بالعامية عندنا (سلامة الأسفار ) والله يسعدكم دائما وأبدا ومبروك نجاح أولادك .

60  الكاتب منى, on 10-06-2009 10:43 هلا لارا يا عسل   و الله حسيت حالي واقفة بجنبك و انت عم تقلبي الصينية و تاكلي هل المقلب , بس اهم الشي انك عرفتي وين الاغلاط   انا هلا ما بقيت مظغوطة و ان شاء الله رح جرببها هل الكم يوم , و كتير محمسة الها     الله يسلمك لارا و الف صحة و عافية و هنا على الكنافة بسقف و من دونه

61  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 10-06-2009 17:04 اهلين لارا. حبيبتي انا كتير معجبه باصرارك و عزمك على تغلب الصعاب. يعني اشتغلت بعكس الظروف ما شاء الله عليكي. حبيبتي الغلطه الوحيده يا عمري هي استعمال صينيه استينليس استيل. فهو لا ينفع لمثل هذه الوصفه لانه يسحب حراره بشكل اكبر من الفرن و بالتالي يحرق و تلصق الاشياء عليه. انا ذكرت بالوصفه انه اخبزها بالصينيه الغير لاصقه او ممكن صينيه المنيوم. لانه اذا دهن جيدا بالزبده او السمنه لن يلصق. على العموم انا هون بحب انصح اي حد راح يجرب وصفه انو يجربا على مقادير صغيره يعني ربع المقدار مثلا حتى لا تخسروا حبيباتي. شكرا كتير يا لارا يا حلوه لانك خبرتينا بالنتيجه. باذن الله المره الجايه را تزبط و تطلع احسن مني. والله انها بتستاهل اكثر من تجربه لان الطعمه خياليه. اسالوا ام محمد هههه. شكرا يا لارا.  =========  اما الحبيبه منى انا ماني مصدقه تجربتك يا ام التجارب. بدي صوره تجربتك ههههه. ان شاء الله تعجبك و تعجب عليتك.

62  الكاتب منى, on 10-06-2009 18:08 و لو يا امونة , ما بقى يطلعلي جنب هل الصورة تبعتك

66  الكاتب رنا, on 17-06-2009 11:01 طيب معناها السميد بشو بدي قيسه ...ياحبيبتي ياامونة طلع عندك كذا كوب ...ياريت تحدديلي المقادير بالغرامات اذا مافيها سئلة

67  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 18-06-2009 06:56 اهلين رنا سوري انا لخبطك كتير. قيسي كل شيء في كوب واحد انت اختاري اما كوب القياس او كوب شاي عادي حبيبتي. يعني قيسي السكر و السميد و الزبده و الجبنه قي نفس الكوب. ارجو ان اكون قد وضحت الصوره لك عزيزتي. و اي سوءال ارجو الا تترددي.

68  الكاتب آرام, on 29-06-2009 10:26 الأخت إيمان والأخت منى .. جربت الكنافة مرة أخرى من يومين .. طلعت أفضل من المرات السابقة بس كمان فاشلة .. مع أني سميت بالله بكل خطوة وقرأت آية الكرسي كذا مرة أثناء العمل   استخدمت نص سميد خشن ونص ناعم .. واستعملت زبدة بس وحسب الكمية المذكورة بالوصفة .. الفرك طلع تمام وما فيه أي مشكلة .. ورصيت الكنافة كتير منيح الطبقة الأولى وبعدين التانية .. وما كان عندي أي مشكلة التصاق لا بتحضير الفرك ولا بالكنافة .. المشكلة هالمرة على ما أعتقد كانت بالحشوة .. ما توفرت عندي جبنة حلوة فاستخدمت موزاريلا .. وباعتبار أنها بتدوب بسرعة خفت تطلع سائلة زيادة فما أضفت إلها الحليب والسميد .. قطعتها شرائح بسماكة 0.5 سم ورتبتها جنب بعض فوق الطبقة الأولى .. وأثناء خبز الكنافة ظهرت تشققات على الوجه .. وبعد ما طالعتها من الفرن كان سطحها متشقق وغير مستو (فيه تضاريس) مع أن الجبنة ذابت وصارت طبقة واحدة .. بس كان واضح أن الكنافة غير متماسكة .. ولو حاولت أقلبها أكيد كانت رح تفرط .. ولذلك سقيتها بالقطر وقطعتها بدون ما أقلبها .. وبالفعل منيح ما قلبتها .. لأن القطع (مع أني قطعتها بحجم صغير نسبياً) كانت يا دوب ماسكة حالها .. يعني طلعت الكنافة لذيذة وشهية بس شكلها غلط .. وبدل الأمورة الحلوة الي بالصورة فوق طلعت معي عجوز شمطاء   متل ما قالت الأخت لارامينا هذا جزاء إلي ما يسمع الكلام ويطبق الوصفة بحذافيرها   على كل حال رح ضل أعيدها حتى تزبط .. وأنا وراها والزمن طويل.    أخت منى عندك فكرة عن مربى زهر الليمون وين بينباع بحلب

69  الكاتب منى, on 29-06-2009 19:44 ووواخ , يلا خيرها بغيرها , و يا رب المرة التانية تزبط معك و تصير متل الصلاة على النبي و تطلع معك يا سيدي على كيف كيفك     و انا عم استفيد مع الاخطاء الي صارت معكم و هياتي ما رح اتلجلج بهل الوصفة لتزبط معي متل امونة .    شوف ارام انا اشتريت هل المربى مرة واحدة , بس من شي تلات سنين و الصراحة ما عم اذكر من وين , يمكن من المختار الي بالخالدية , بس و الله مو متذكرة مزبوط , ان شاء الله اذا شفته في شي محل ببقى بخبرك فورا .

70  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 08-07-2009 20:23 اهلين الاخ ارام. اخي بالنسبه للكنافه لو انك خلطها مع خليط السميد و الحليب كان مسكها لانو المازوريللا كتير طريه و بتصير مايعه لحالها كتير. بس معليش هيك عم تتعلم من اخطائك. بس عندي سوءال بالله عليك يعني شو بيصير لو انك تقيدت بالخطوات بحذافيرها? هههههه عم بمزح. ان شاء الله ريتو الف صحه وهنا. و عندي احساس انه من كتر التجارب راح تضارب علينا بالنهايه و يمكن انك تخترع طريقه جديده كمان. هههه اما بالنسبه لمربى زهر الليمون او زهر النارنج رحت جبت المرطبان اللي عندي اشتريته من عمان من سوبرماركت الامانه وهو منتج سوري و مكتوب عليه التالي: مربى زهر النارنج ماركه زينه ريف دمشق س . ص 16 س. ت ( من اليمين للشمال بالارقام بس راح اكتبها بالاحرف( سته واحد سته واحد) انتاج شركه عاصم سكر و شركاه. ان شاء الله اكون افدتك اخي. و اذا حبيت انك انت تسويه لازم تجمع ازهار النارنج او البرتقال و تحط معاهم سكر بنفس وزنهم و شويه ماء و مثل المربى يغلو كام غلوه مو كتير وبعدين بيضيفو لهم نقطه ليمون علشان يعقد السكر و شويه لون احمر و يحفظوا في مرطبان معقم و جاف مثل المربى تمام في البراد. يمكن اذا ما لقيت وين بينباعوا انك تشتري الزهر طاره و تعمله انت بالبيت

71  الكاتب آرام, on 09-07-2009 10:42 ألف شكر إلك أخت إيمان على المعلومات القيمة بالنسبة لمربى الزهر .. وحتى لو اشتريت منه جاهز هلأ بس ناوي الربيع الجاية بإذن الله أحضره بالبيت .. عندنا في الشركة عدة أشجار نارنج .. وفي العادة بأيام الربيع لما تزهر الأشجار كل يوم أضع زهرة نارنج مع إبريق الشاي .. بيطلع شي نغم   بس عندي سؤال أختي .. يمكن طريقة مربى الزهر بتشبه طريقة مربى الورد (موجودة الوصفة بقسم المربى بالموقع) .. يعني لازم نستخدم بس أوراق الزهر البيضاء ونتخلص من قلب الوردة وما يحتويه مو هيك ؟؟  بالنسبة للتقيد بالوصفة بحذافيرها فــــ … التوبة … المرة الجاية ما رح أحيد عن التعليمات قيد أنملة بكل الأحوال الموزاريلا ما عاد أستخدمها بالكنافة، والجبنة البلدية الحلوة أطيب وأضمن.    أما قصة إني أضارب عليكم فمعاذ الله .. يعني إذا طلعت معي الكنافة في يوم من الأيام بربع حلاوة الصورة الي فوق يكتر خير الله

74  الكاتب منى, on 13-07-2009 12:40 سلمن امونة , وصلت الفكرة

77  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-09-2009 19:23 اهلين جي اس ام. كتير مبسوطه انك جربتيها. عندي احساس انها ما طلعت مزبوطه متل ما بدك لعده اسباب:  1- يمكن ماخليتي خليط السميد و الحليب يصبح كثيف و ثقيل القوام قبل ما تضيفي الجبنه و هذا خلا الجبنه مريقه و هذا يعمل على تفتت الكنافه عند قلبها.  2- او انك كثفتيه ولكن كانت نسبه الجبنه المستخدمه كثيره على كميه الحليب و السميد لاني في الوصفه قلت كبايه حليب و نصف كبايه سميد على 3 فناجين جبنه. و هذا يعمل ايضا على ان تكون الكنافه مريقه ولا تحتفظ بشكلها عندما تقلب.   3- في حاله انك ما قلبتيها بعد الخبيز علشان خايفه تخرب. طبعا الوجه الموجود بالاعلى عندك كان يجب ان يكون هو الوجه الاسفل لانه لن يكون محمر مثل الوجه التحتي. هممم انا بقترح عليكي انك تعملها بصينيه تيفال (غير لاصقه) فهي تعطي احسن النتائج. والله انها بتستاهل اكثر من تجربه لانك بعد ما تتقنيها راح تنشهري كتيييير بين اصحابك لانو قليل جدا جدا انك تلاقي ناس بتعرف تتقنها. و المقادير و الطريقه لهذه الوصفه جائت بعد تجارب كثيييره في مطبخي يعني بعد تعب كبير وهي دقيقه جدا جدا. والحمدلله انو في سيدتين ظبطوها وهما الاخت ام محمد و الاخت وداد. على العموم حبيبتي كتير بشكرك على اعلامي بالنتيجه لانو هذه الاسئله والاجوبه يتعلم منها الباقيين. و ان شاء الله المره القادمه راح تكون احسن من اللي فوق بس انتي حطيها في راسك و خلي عندك اصرار. شوفي حبيبتي اذا حسيتي انو خليط الفرك ما شرب الماء بالفرن خليه كمان شوي و طلعيه و اتركيه ليبرد ستلاحظي انو حبه السميد شربت الماء و تفتحت و صار بامكانك انك تفتتيه بالفرك بين الكفين. و اذا نشف كتير افرميه بالماكنه.

79  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 22-10-2009 22:59 اهلين ام محمد88. كتير انبسط انك اعملتيها و عجبت زوجك. يسلموا ايديكي و صحه وهنا على قلوبكم. شكرا انك خبرتينا. و نحنا كمان صرنا مدمنين على هالموقع المميز.

82  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 07-12-2009 18:36 اهلين لوش ان شاء الله بتجربيها و بتعجبك. حبيبتي وصفه الكعكه راح اعملها قريب جدا و انزلها لعيونك و لعيون كل مغترب و محروم من هالاشياء يلي كنا نفكر انو صعبه ولكن مع العزيمه و الاراده ما بقى في شي صعب. اهم شي هو الاصرار على الاتقان. صح?? بقى خليكي معانا هون و ترقبي التحف على هذا الموقع المميز.

83  الكاتب loosh, on 11-01-2010 18:10 اختي ايماااااااان ما معقول جربتها وطلعت تححححفة الله يسلم دياتك يا رب ومتل ما عم تعطينا الله يعطيكي خير وبركة وصحة يا رب  الارادة والعزيمة موجودين الحمدالله وربي يخليلي ياكي الحمدالله انا عندي ذوق بالاكل عموما يعني بعرف اعمل الاكل وبعرف اكل كمان ههههوانا معكن ان الله راد ورح تابعكن دايما   واهم شي الكعكة لتكمل الاكلة اللي بموت فيها والي سنين محرومة منها     والك اطيب الدعاوي مني ومن زوجي كمان   مودتي يالغلا

84  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 14-01-2010 16:20 اهلين لوش. والله بسطيني انك عملتيها و زبطت معك. صحتين وهنا على قلوبكم. الكعكه متل ما وعدتك قريبا بس هالاسبوعين مشغوله كتير. لان لازم اعملا و ابعت الصوره مع الوصفه. شكرا انك خبرتينا بالنتيجه علشان الل يتشجع و يعملا.

86  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 02-03-2010 16:49 حبيباتي انا ما نسيتكم بس عندي ظروف صعبه جدا. زوجي مريض جدا بالمستشفى. باذن الله بس يخف راح ابعث الوصفه. معليش طولوا بالكم علي لانو بالي مش رايق.

87  الكاتب منى, on 04-03-2010 20:37

90  الكاتب منى, on 18-04-2010 13:32 ما عندي فكرة     ان شاء الله تشوف امونة السؤال و تجاوبك

94  الكاتب بابريكا, on 20-08-2010 16:00 اختي الكريمه ايمان انا عملت فرك الكنافه قبل شهر بالسميد الناعم وطلع طري جدا وانا اريد فرك مقرمش مثل فرك كنافة البريد لا اريده ناعم جدا اريد شوية قرمشه ماذا افعل ؟     شكرا كتير الك

97  Crispy farek الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 21-08-2010 01:53 Hi Paprika, Love your name As for your question about crispy farek you can put less water while preparing the farek before baking it the first time also you can mix the farek with 1/2 a cup of samne before adding the cheese. And finally is to use the coarse smeed instead of fine smeed. I hope this will give you crispier knafe. Good luck. If you tried it this way please let us know to add value to our recipe.

98  Ishta knafe الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 21-08-2010 01:57 Yes Paprika you can use the farek for making ishta knafe. When you press the first layer of farek, add the ishta made with milk and corn flour and make it thick and not runny, then let it get cold before adding the second layer of farek, Please read all the questions because it will have so many answers .