L2ma.com | لقمة طيبة | L2ma.com | لقمة طيبة | كبة صاجية | · , الكبة, على, الحشوة, حتى | L2ma.com

القائمة الرئيسية

كبة صاجية

الكاتب/ منى

21/05/2009

اليوم كبتنا صاجية , واحدة من أطيب الكبب الحلبية و ما أظن أنها معروفة برة حلب .

الكبة الها نفس مبدأ الكبة المشوية و لكن بشحمة أأقل و بعد ما بتتجهز تنقلى بالسمنة على الصاج و هل الكلام بالطريقة الأصلية .

هلأ شو الي عم يصير ؟

في كتير ناس ما بقت تحط الشحمة لقلب الحشوة للتخفيف من الدسامة , بتطلع طيبة بس كنوع جديد و ما بقى اسمها كبة صاجية . و في ناس بتسعمل مزيج من الشحمة و الدهنة و هدا الشي عايد للرغبة و الزوء .

الشحمة المناسبة لتحضر هل النوع هي شحمة بيت الكلي و بيتميز عن غير أنواع شحمة بأنها بتدوب بسهولة أكبر و الأصل بهل الكبة أن تكون رقيقة بس في كمان حزب بيصر انها اذا كانت سميكة فرح تكون أطيب و مدعومة بحشوة اللحمة و المكسرات .

أخر الشي اكتشفت ان الهبرة الي نستعملها بحلب للكبة مو معروفة بره حلب , بيكون لونها أحمر و شكلها متل المرهم و هي الهبرة بتتحضر بأن تخفق اللحمة الهبرة عند اللحام في خلاط كبير مع مكعبات ثلج و ملح و تعطينا تماسك للكبة و يمكن هادا واحد من أسرار حلب ام المعالي و الرتب و بيت المحاشي و الكبب .

طيب خلونا هلأ نشوف طريقة تحضيرها و الخطوات المصورة أخدتها لأية و هي عم تحضر الكبة الصاجية , خبرتني انها رح تعمل هل الكبة و انا كنت وعدت ميوسة من شي 3 الاف سنة اني رح نزل الها الوصفة و الوصفة من دون خطوات توضيحية رح تكون صعبة شوي , لهيك قلت فرصة لأوفي بوعدي لأني بالفترة الأخيرة لاحظت أن حجم انفي بدأ يتغير من عدد الوعود الي وعدتها الكم و ما نفذتها ! سماح ايه

مثل اليوم :

يلي بتحطوا بالدست بيطلعلك بالمغرفة

بالصحة و الهنا

الحشوة :

100 غ شحمة ( أو 50غ شحمة و 50 غ دهنة )
حبة كبيرة بصل
ثلاث أرباع كيلو لحمة غنم مفرومة وسط
نصف ملعقة صغيرة فليلفة حمراء ناعمة
نصف ملعقة صغيرة بهار مشكل
رشة قرفة
صنوبر أو لوز مقطع
جوز مفروم

عجينة الكبة :

نصف كيلو هبرة غنم أو عجل ( هبرة خاصة بالكبة مطحونة لتصبح كالمرهم )
نصف كيلو برغل أسمر
حبة بصل
نصف ملعقة بهار مشكل
ملح حسب الرغبة
رشة قرفة

سمنة لقلي الأقراص
direction

تحضير الحشوة :

·          تفرم الشحمة مع البصل على ماكينة فرم اللحمة الشفرات المتوسطة ثم تدعك مع الفليلفة الحمراء الناعمة و نصف البهار المشكل و توضع جانباً .

·          تقلى اللحمة على نار متوسطة حتى تنضج و يجف مرقها .

·          تبعد اللحمة عن النار ثم تتبل بباقي البهار و تضاف الشحمة و تقلب الحشوة .

·          تترك الحشوة حتى تبرد مع التقليب كل 5 دقائق و الهدف أن تمتزج اللحمة بالشحمة بشكل تام .

·          تضاف المكسرات , أصبحت الحشوة جاهزة .

تحضير عجينة الكبة :

·          ينقع البرغل و البصل و القليل من الملح بالماء البارد مدة 10 إلى 15 دقيقة ثم يصفى جيداً .

·          يفرم البرغل مع البصلة على ماكينة فرم اللحمة ثلاث مرات .

·          تبلل اليدان بالماء البارد ثم تدعك الكبة باليد بشكل جيد و في حال توافر صينية فخارية تكون النتيجة أفضل .

·          تضاف اللحمة الهبرة و البهار و رشة القرفة و تدعك مع البرغل لمدة عشر دقائق على الأقل حتى نحصل على عجينة متماسكة و طرية .

·          تذاق الكبة و يضاف القليل من الملح إذا دعت الحاجة و تعدل البهارات حسب الرغبة .

تحضير الكبة الصاجية :

·          يحضر صحنان بحجم واحد , حجم الصحن حسب الرغبة و بالوصفة الأصلية تعد الكبة بحجم أكبر بكثير مقارنة بحجم الكبة الظاهرة بالصورة .

·          تقطع الكبة لكرات بحجم مناسب لحجم الصحن ثم يقلب الصحن و يغطى بورقة نايلون مبللة بالقليل من الماء البارد .

· ترق الكرة قليلاً باليد ثم يضغط عليها بصحن أخر للحصول على دائرة مستوية و رقيقة . يرق قرص أخر بنفس الطريقة .

يضغط على القرص براحة اليد حتى يصبح مستوي قليلاً

يضغط على أول قرص بطبق للحصول على شكل مستوي

· توضع ملعقتان أو ثلاثة ملاعق من الحشوة المجهزة على أول قرص و يراعى عدم اقترابها من الحواف .

توضع ملعقتان أو ثلاثة ملاعق من الحشوة على أول طبقة

· يوضع القرص الأخر بانتباه فوق الحشوة ثم يغطى بورق نايلون أخر و تسد أطرافه بشكل جيد .

·          يرفع القرص على راحة اليد المبلولة بالقليل من الماء البارد و يدار و يكبس قليلاً و بلطف حتى يأخذ الشكل المطلوب .

·          يوضع القرص المجهز على صينية واسعة مغطاة بورق نايلون , تكرر العملية مع بقية الكبة حتى تنتهي كل الكمية .

·          تذوب السمنة على نار هادئة في صاج أو طواية غير لاصقة و تترك حتى تحمى . تقلى الأقراص قرص واحد أو قرصيين كل مرة حسب حجم الأقراص و حجب حجم الصاج و تترك حتى ينضج أول وجه .

·          تقلب الكبة على الطرف الأخر و تترك حتى تنضج و تذوب الشحمة و تتشربها الكبة .

·          تقدم الكبة فوراً مع السلطة الحامضة أو سلطة ست كليلة أو اللبن العيران .

أضافة إلى المفضلة (0) |

أقتباس | مشاهدات : 5350

تعليقات (28)

1 الكاتب ام دانية, on 21-05-2009 21:03
والله حرام ياست منى ايه فرط قلبي من منظر الكبة :cry

مممممممممممممممم ايه ما عم صدق ايمتى انزل على حلب لحتى اكل الكبة وخصوصا بالشحمة اكيد غير شكل :grin

يسلم هل الديات

2 الكاتب رنا, on 21-05-2009 21:26
ياعينو ياعينوووووووو

شي بيشهي ونفس طريقتنا
وياستي حكيك مزبوط عن الهبرة انه مو موجودة برا حلب ولما شافوها اهل الشام قال شو هاللحمة ليش لونها زهري :eek

حتى هون اذا بدنا نعمل كبة او مرتديلا صرنا نحطها عالخلاط ومع هالتلجات بتصير متل هبرة حلب المدقوقة
الف شكر الك ولاية على توضيح هالاكلة الصعبة

3 الكاتب ميساء, on 21-05-2009 22:52
هيههههههههههه أخيرا وصلت الكبة الصاجية من حلب وعلى أصولها من تحت ديات صبايا حلب الحلوات الله يخليلي ياكي يا ميمو ويسلم ايديكي أنت و آية ويعطيكون العافية وتنالواالخير من رب العالمين أنا متأكدة يا منى أنو أنت ما بتنسي ولا طلب من طلبات الأخوات في الموقع يس كمان نحنا لازم نقدرمسؤولياتك الأخرى ووقتك الضيق ما بين واجباتك نحو بيتك وأسرتك و مجهودك العظيم الذي تقدمينه من خلال الموقع ومرة تانية ألف شكر وامتنان يا غالية :zzz

4 الكاتب لين, on 21-05-2009 22:54
تسلمي يا مزوءة على ردودك الحلوة و الله يجمعني برفيقة متلك كلها مفهومية يا عيني على هل كبة عظمة على عظمة بس شوي صعبة=رح جربا بس بتزبط بدون شحم

5 الكاتب لموسي, on 21-05-2009 22:57
يسلم هل ايدين انت واللي ساعدك دخيل عينك يامنى شيكي على ايميلك بعت لك كم استفسار وردي علي بليز

6 الكاتب منى, on 21-05-2009 23:50
هلا ام دانية

سلامة قلبك يا عسل ان شاء الله توصلي بالسلامة و تاكلي اطيب كبة حلبية من تحت ديات ست الحبايب

7 الكاتب freesoul, on 22-05-2009 11:59
ااخ يا منى شقد شهيتيني عل الكبة من زمان ما اكلناها وما بعرف اعملها ابدا . ما علمتني امي اعمل كبة قبل ما اتزوج. الله يسامحك يا امي .كنت مشغولة بالدراسة وبعدها اتزوجت وسافرت واشتغلت فما فضيت للكبة ابدا.يللا بلكي بتشجع وبعملها بس بخاف ما تزبط معي :cry

8 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 22-05-2009 18:56
بسم الله ما شاء الله. يخزي العين عنك و عن اختك. الله يعطيكم الصحه و العافيه يا رب. شو هالكبه يللي بتشهي. والله ما قدرت امر بدون ما علق. بتعرفي صارلي فتره عم بدخل على بلوجات و مواقع طبخ و شفت هالكبه بس مش عارفه وين و عاملينها على حجم اصغر و ضلت ببالي اعملها بس هاي شكلا غير اسمالله احلى والله من الصوره كاني دقت طعمتها يامنى. الاسبوع اللي جايي لازم اعملا باذن الله. ريتون يسلموا هالايدين يلي طبخوا و اللي صوروا.

امونه

9 الكاتب سلاف, on 23-05-2009 11:57
ربي يسلم هالايدين ويحميكي انتي واخواتك يا منى00 عيله كلها شيفات ماهرات ماشاء الله حولكن

منظر الكبه شيئ بشهي00
قريت كل الوصفات الجديده وشفت السفره اللي عاملتيها ماشاء الله لاقوة الا بالله فنانه يامنى ماكتبت تعليق بكل بوصفه لاني عم اتأخر لفوت صايره هالفتره 00 ومابدي تلاقني ناطه بكل الوصفات00 بقى باختصار كل شيئ جديد بجنن وان شاء الله ربي يعطيكي الصحه والقوه ويخليكي لكل اللي بحبوكي ومن غير ماشافوكي واولهن انا
وناطره وصفة الشوكي يابلحمه ياغراتان اللي بسفترك شكلها نغممممممم 00

10 الكاتب تورتاية بالكريز, on 23-05-2009 18:29
تسلم ايدك يارب انت والغالية ايه ماشاء الله عليها وعليكي

شي بيشهي وبيفتح النفس بصراحة يامنمون بفتح موقعك بحس بجوع والله حقيقي اتهيالي كل البنات اللي بيدخلوا بيصير معاهم نفس الشيء :zzz

كمان اول مرة اعرف ان الصاجية غير المشوية كنت الخبط بينهم والصور حكاية بتهيالي لو نمت بحلم فيهم مش قلتلك الموضوع بقى عاوز زيارة الله يديم عليكم النعمة حبيبة قلبي شغل رائع وباذن الله ساجربها قريبا ان شااااااء الله شكلها يشجع جدا جدا بسم الله ماشاء الله

11 الكاتب غيث, on 24-05-2009 01:35
ليليليليش اخيرا نزلت هالوصفة ابوس روحك يا منى على هالاكلة الله يسلم دياتك وديات اللي عملوها ويجزيكم الخيرونحن مقدرين تعبك وقلة وقتك بيت واولاد وووو الله يلبسك العافيةونحن كمان طلباتنا كتيرة ودمنا تقيل لذلك نشكرك كتير وعلى اقل من مهلك والله مقدرين تعبك معناايه والله انا وصفة واحدة وظليت شي 4 شهور عم اتهيألأنزلها وكل يوم بقول بكرة بقى انت الله يعينك عدا عن الاسئلة والتعليقات اللي بتردي عليهم اول باول الله يجزيك الخير ويبل قلبك بولادك

12 الكاتب منى, on 24-05-2009 08:01
هلا رنونة

انا هل الطريقة اتعلمتها من عمتي حجة رغيدة و من حماتي الله يخليلنا ياها بصحتها و عافيتها, من هون شوي و من هون شوي و بتطلع غير شكل :zzz

لا شكر و لا شي , ان شاء الله تجربيها و تطلع متل تبعة ماماتك

13 الكاتب منى, on 24-05-2009 08:25
هلا ميوسة

الله يعافيكي و يعافي قلبك و بدنك و ان شاء الله تجربيها و تكون النطرة مستاهلة

الف شكر الك لكل هل الرد الحلو و الكلام الغالي , ربي يديم المحبة و المعروف دوما

14 الكاتب منى, on 24-05-2009 08:31
هلا لين

ان شاء الله ربي بيدلك هعلى رفيقة تكون عون الك للدنيا و الاخرة بكل شي يا حق

كلك زووء , ان شاء الله تجربيه و تكون متل ما بتحبي

15 الكاتب منى, on 24-05-2009 20:18
هلا لموسة

الله يسلمك و يحفظك و يخليك و تكرم عيونك الايميل بعتته الك

16 الكاتب منى, on 24-05-2009 20:19
هلا ام جود

و لا يهمك , انا ممكن ساعدك و ايا معلومة او استفسار انا تحت امرك و بخدمتك لحتى تفاجاي ماماتك بكبة من شغل ايدك

17 الكاتب منى, on 24-05-2009 20:20
هلا أمونة

ان شاء الله تجربيها و تكون على زووءك و متل ما بتحبي , بس لا تروحي يمين و لا يسار , لقمة طيبة و بس :grin

لا تنسي تخبريني شو بيصير معك

18 الكاتب منى, on 24-05-2009 20:21
هلا سلوفة

هادا بس من زووءك و ربي يبارك فيك و بكل عيلتك الحلوة
كتير انبسطت ان الوصفات عجبوك , و أتمنى تجربيهم و يكونوا متل ما بتحبي و أطيب :zzz

19 الكاتب منى, on 24-05-2009 20:22
هلا ام ياسمين

له حبيبتي , خسى الجوع و الله , ان شاء الله بتشرفينا و بتنورينا و نعمل الك اطيب سفرة سورية على كيف كيفك :zzz

ان شاء الله تجربيها و تكون متل ما بدك و أطيب و لا تنسي اما تعزميني أو تعزميني :grin

20 الكاتب منى, on 24-05-2009 20:24
هلا غيوثة

لك صلوا على محمد و زين زين مكحول العين و الهادنا صلوا عليه , لللليش :grin

, انا الي ابوس روحك على هل الزلغوطة الحلوة , وصلت رنتها لعندي :zzz

الف شكر الك للدعوة الغالية , ربي يبل قلبك باولادك و تشوفيهم متل ما بتحبي و أحسن و يملوا العين و القلب

21 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 25-05-2009 03:12
منى اليوم الاحد اجازه عملت الكبه الصاجيه. وااااو ما شاء الله على هالوصفه بتجنن. قعدت اعملها وزوجي قعد على الكاونتر في المطبخ ليشوف كيف بتنعمل. بصراحه انجنينا نحنا التنين عليها و على طعمتها. سلم ايديكي و ايدين اختك كمان مره. انا اضفت للعجينه شويه حبق و مردقوش و نعنع و رشه صغيييره محلب. يعني اسمالله بينعمل عليها افخم عزومه. حبيت اقللك علشان يللي ما جربها يجربا. وصفه فخمه. شكرا

22 الكاتب منى, on 25-05-2009 13:22
هلا أمونة

يممي و الله من وصفك اشتهيت دوقها , الف صحة و الف هنا على قبلك وقلب زوجك .
اكيد البهارات الي اضفتيها عطت طعم , و هي بهارات لذيذة و استعملها بس للكبة النية , اكيد كمان مع هل الكبةو رح تعطي طعم طيب كتير
الف شكر الك لتجربتك الوصفة و كمان الف شكر الك للأضافة و الفكرة اللذيذة :zzz

23 الكاتب semo, on 25-05-2009 16:49
يالله شو مشتهية الكبة بكل انواعا بس المشكلة ماعندي ماكينة لحمة

منظر بيشهي واكيد الطعمة اطيب واطيب

الله يعطيكي الف عافية
لازم لما اجي عسوريا زورك ودوء من اكلاتك الطيبين

شايفة ما اقل زوئي :grin

بعزم حالي لحالي

24 الكاتب منى, on 26-05-2009 19:29
هلا سيمو

بالعكس , دا انت تامر يا جميل و انا بنفسي كتير أعمل عزومة كبيرة لكل الاخوات في الموقع و تكون العزيمة في بيتي لحتى نتعرف على بعض كلنا و مناكل كبة و يلنجي و يبرق و يمكن فريكة :zzz

25 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 26-05-2009 15:41
منى يا منى شو هذا حرام والله حرام شو هالاغراءات هذه اللي بتقدميلنا اياها عن جد شي بجنن بدي اجربها ان شاءالله وتغيير شكل عن الكبة المقلية
طيب هلأ يا منى بدي اسألك بالنسبة للكبة المقلية بقدر اعملها من قبل بيوم وحطها بالثلاجة بحيث اني اقليها ثاني يوم لأني ما بدي احطها بالفريزر فشو رأيك يا ريت تفيديني وبكون شاكرة الك

26 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 26-05-2009 15:58
مرحبا منى معلش انا نسيت أسألك وسامحيني على كثر الاسئلة بس بالنسبة للكبة الصاجية كم تقريبا كمية السمنة اللي راح نستعملها للقلي يعني مثل كمية الزيت اللي بنقلي فيه الكبة المقلية ولا خفيف والسؤال الثاني بقدر استعمل جهاز التوستر الكهربائي (الجريل) وادهنه بشوية سمنة بدل الصاجة او الطواية

27 الكاتب منى, on 26-05-2009 19:28
هلا هيا

ان شاء الله تجربيها و تكون طيبة و متل ما بتحبي أو ألذ
الكبة المقلية اكيد فيك تعمليها قبل بيوم و تحطيها بالبراد لتاني يوم , بس بشرط تغطيها لحتى ما تنشف
الكبة الصاجية بتنقلى بسمنة قليلة , يعني ملعقة أو ملعقتين , لان هيا رح تنز من الشحمة الي بقلبها .

ممممم التوستر أتوقع انه بيصير , بس مو مجربة لاقول الك على المضمون

يلا ان شاء الله تجربيها و انا بانتظار رايك و كلامك بعد التجربة

28 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 03-06-2009 17:00
مرحبا منى كيف الصحة منى انا بعثت لك تعليق عند الكبة المقلية وسألتك عن البرغل يا ريت تفيديني شكرا الك

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 30/05/2009 )

< السابق		التالى >

[ عودة ]