سلطة اليوم سلطة كتير طيبة و كتير سهلة و بنفس الوقت مميزة و تغير شكل .

السلطة دقتها مرة في الغراند أول ما فتح و عجبتني فكرتها لهيك صرت حضرها دايما و خصوصا في العزايم , الا ما تكون الواحد فينا محضرة وصفة بدها دجاج مسلوق , من هل الدجاج فيكي تحضري هل السلطة من دون مجهود اضافي او مقادير زيادة .

الوصفة بسيطة و ما الها غير سريين , الأول انك تمزجي مزيج الدجاج المايونيز مع الخس قبل التقديم مباشرة لحتى يبقى الخس فريش و مقرمش . و التاني انك تقطعي صدر الدجاج لمكعبات و بعدها تسلقيه و بهيك بيكون شكل الدجاج حلو كتير و ما رح يتفتت , اما اذا سلقتيه و بعدها قطعتيه رح يصير شكل السلطة مو كتير حلو

بالصحة و الهنا

2 صدر دجاج مسلوق
5 - 6 ملعقة كبيرة مايونيز
ملعقة صغيرة مسطحة من بودرة الكاري
ورق خس





·          يقطع صدر الدجاج الى مكعبات ثم يسلق مع الباقة العطرية حتى ينضج .

·          يقلب المايونيز و الكاري حتى الحصول على مزيج متجانس .

·          يرفع الدجاج من مرق السلق و يترك حتى يبرد ثم يضاف لمايونيز المنكهة بطعم الكاري و يوضع في البراد حتى يبرد الكل .

·          يغسل ورق الخس و يترك حتى يجف ثم يقطع باليد لقطع كبيرة و يصف في طبق التقديم .

·          يسكب مزيج الدجاج و المايونيز فوق الخس و تقدم و قبل أن توزع السلطة في الأطباق يقلب الدجاج و المايونيز و الخس .

تعليقات (23)

1  hi الكاتب لين, on 21-05-2009 14:31 تسلمي والله يحميكي من كل عين شو مشتهية تعملي كتاب طبخ كنت اول وحدة بشتريه لاني عجزت ولا كتاب اشتريته عجبني انا بنبسط لما بقرا هكيك شكلك لطيفة لو بدي اتساءل عليكي واطلب طريقة البروستد زوجي بيتوحم وانا بجيب لولاد لا تاخزيني بحكي كتير لاني لحالي وبحكم زوجي طبيب ما بشوفو متل البشر لهيك ناقصنني لت اسفة كتيروthanks i love curry

2  الكاتب نور الأسلام, on 21-05-2009 18:57 مساء الخير يا وجه الخير كل يوم وصفه احلى من التانيه ماشاء الله تبارك الله عندي سؤال اديه ممكن نحفظ مرقة الدجاج بالبراد

3  الكاتب منى, on 21-05-2009 19:39 هلا لين   الكتاب عم ينطبخ على نار هادية , ان شاء الله بيجهز خلال سنة و بيكون فيه كل وصفات الموقع و أكتر   تكرم عيونك رح نزل وصفة البروستد , بس لا تزعلي مني اذا اتأخرت     و لا يهمك , شو طولت و ما طولتي ؟ نحنا هون متل الخوات و أعز ان شاء الله

4  الكاتب منى, on 21-05-2009 19:53 هلا نور   هادا بس من زووءك اختي , ان شاء الله تجربي السلطة و تعجبك    المرقة ممكن تنحفظ ليوميين او تلاتة حسب الفصل أما في الفريز فممكن تحفظيها لحتى شهر

6  الكاتب منى, on 24-05-2009 20:23 هلا لوليا   الف شكر الك للرد و التواجد الطيب و نور الموقع بهل الطلة الحلوة اختي

8  الكاتب منى, on 25-05-2009 19:31 هلا سيمو   ان شاء الله تجربيها و تشوفي شو طيبة و لذيذة

9  الكاتب DOUHA, on 29-05-2009 01:16 انا جربتا وطلعت بتجننننننن وسهلة اكتر من اللزوم   مرسي منى

11  الكاتب منى, on 18-06-2009 16:10 هلا اخ ارام   ما في التباس و لا اي شي , طريقة التقديم متل ما واضحة بالصورة و قبل ما تبدوا بالاكل تحرك السلطة و بعدها بتاكلوها , يعني قصدي التحريك باخر دقيقة لحتى يبقى الخس مقرمش , هلا اذا حركتهم قبل بخمس دقايق مثلا معلش , بس انا كتبت الوصفة بهل الطريقة لحتى تبقى هل الشغلة علاقانة بذهن الي حابب يجربها , مو يجهزها و يحركها و بعد شي ساعة ساعتين يضيفه   اخر كلمة خطا مطبعي , عوض ما اكتب خلط الدجاج و الخس , كتبت مايونيز , هلا بيتم التعديل باذن الله

12  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 08-10-2010 05:04 السلام عليكم ورحمة الله    إمممممممممممم إمممممممممممممممم لك إمممممممممم  شو طييييييييييييييبة    من زمااااان بدي اعملها بس عطول في شي ناقص ، امبارح قلت خلص لازم اعملها لو عقطع الرقاب هههه  طلعت بتجنننننننن .. مع أن خلطة الكاري يلي شاريتها ما كتير عجبتني .. فحلب بيبيعوها أطيب بكتير.  وكمان حسيت الطعمة ناقصها حمض هي من وحي الحمل ... أمت عصرت نص ليمونة. وما قدرت قاوم أكلتون كلون     يسلم دياتك يا رب الله يخليلنا ياكي إلهي يا ست منى.      والسلام عليكم

13  الكاتب منى, on 25-10-2010 09:39 هلا jassy   ممممم , فكرة كتير لذيذة الحمض , ناوية جربها ان شاء الله المرة التانية على طريقتك     شو اخبار الحمل , تمام و الا لسا ظارب الوحام براسك ؟ الله يقومك بالسلامة انت و البي بي     يا ستي هل السلطة بالذات دايما بحضرها بالعزايم و كتير الها معجبين صحتين و الف عافية مرة تانية, ممنوتك لردودك الحلوة الي دوما فيها شي مميز

14  عراسي حارتك الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 06-11-2010 02:21 السلام عليكم ورحمة الله    منوش كيفك ؟ .. لا طريقتي ولا شي ههههه انتي أم الطرق وست الستات هي بس إضافة حتمية لطبق حامل !!!  يا جماعة يا حلوات هي السلطة بتجننننن صارت طبق أساسي عندي !  صايرة ما عم فوق عالموقع كتير لأن عم بتدرب عالأكلات يلي تعلمتها هههههههه يعني صايرة بطبقها بدون ما إرجع لهون مشان إحفظ الطريقة بس أحيانا المقادير بتنتسى. وبما أن ما عندي فرن فللأسف يمكن نص الأكلات لسه ما بمقدوري اتدرب عليها... قريبا قريبا هانت هههههه. الله يعطيكي العافية.  البيبي بيبوس راسك .. والوحام صار عادي بس الحمض بعدو لازم بكل أرنة.  نازلة إجازة عسوريا بعد كم يوم وآكلة هم السفر، وبما أن صرلي 4 سنين ما كنت بحلب سمعت أن كل شي متغير، آل صاير عندكون باصات (هي لحالها بدها أسبوع ليتعرف الواحد على خطوطها - إذا كانت بعدها زحمة التكاسي متل من 5 سنين الواحد بيوقف بالجميلية ساعة وما يجيه تكسي فاضي !!!!!!). وآل صار عندكون مولات وقصص ..... مين قدكون !  صحي كيف بيتك الجديد ؟ وين آخدينو ؟؟ ان شاء الله (ما) تهروه بالهنا .. والله يجعلها سكنة الأفراح.    والسلام عليكم

15  الكاتب منى, on 08-11-2010 13:21 الله يقويك على الحمل و على التجارب و ان شاء الله كل مرة تطلع معك اطيب من الي قبلها     يا ستي اكيد حلب اتغيرت كتير , مولات و باصات و طرق جديدة و توسيعات , بس الزحمة هي الزحمة و الناس كترانة , ان شاء الله ربي يبارك فيهم بالكيف مو بالكم بس    بيتي مو جديد , صارلي عشخمسطاعش سنة فيه     كل سنة و انت بالف خير و ينعاد عليك بالبر و الرحمة و الخير

17  الكاتب lalosh, on 23-11-2011 15:35 مممم عنجد بتشهي اليوم عملناها وكتير كانت طيبة شكرا الك مدام منى

18  الكاتب منى, on 23-11-2011 19:10 هنا و الف صحة و هنا و عافية   شكرا الك علا لثقتك في و تجربتك وصفاتي

19  الكاتب منى, on 23-11-2011 19:13 الف صحة و هنا زينة , كتير حبيت فكرة انو نقلي الدجاج لان دوما الدجاج لما بيتقلى بيطلع اطيب , شكرا كتير للاضافة و الف صحة و هنا يا عسل

20  الكاتب lalosh, on 24-11-2011 20:38 حبيبة ألبي منوووشة مو معقول شو بتحبي تناديني علا خلص يا ستي بتموووني وناديني الإسم اللي بتحبيه     أما بخصوص ثقتي فيك والله يا مدام بجرب الوصفة وأنا متأكدة انها رح تكون طييبة

21  الكاتب منى, on 24-11-2011 23:36             خلص وجي اسود     رايحة اكتبه عشرين مرة جزى لحتى ما ارجع اغلط         خليلي عينك لا تزعلي مني الاء و حقك علي احلى لولو

22  الكاتب lalosh, on 25-11-2011 19:24 حبيبة قلبي والله :* قلتلك بتمووووني ناديني الإسم اللي بتحبيه .. يا الله شو حبيتك يا منووووشة ياريت اقدر أزورك بسوريا .. الله يهدي بالكم يارب

23  الكاتب منى, on 26-11-2011 00:28 و الله يا ريت لولو     امين يا رب عاجلا غير اجل

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved