L2ma.com | لقمة طيبة | L2ma.com | لقمة طيبة | تارت الفواكهة | · , على, حتى, التارت, العجينة | L2ma.com

القائمة الرئيسية

تارت الفواكهة

الكاتب/ منى

20/05/2009

تارت الفريز , شي ناهي
تارت الفواكهة

في كتير وصفات للتارت و كل صاحبة وصفة تصر أن وصفتها الأطيب و الأسهل و الألذ . أكيد أنا كمان رح احامى لوصفتي لأن كتير سهلة و كتير طيبة , بس لاحكي الصراحة السر مو بالوصفة !

السر بطريقة تحضيرها و التكنيك الي بتتبعيه وقت عجن المقادير مع بعضهم البعض و الي هنن 60 بالمية من نجاح أي وصفة مو بس وصفة التارت .

لما تحضري أي قالب كيك أول الشي لازم تطلعي كل المقادير من البراد لحتى تصير بحرارة الغرفة , هون بالعكس كل شي لازم يكون بارد لحتى تصير العجينة سهلة لما بتحضريها و كمان لحتى تطلع مقرمشة و كريسبي و اخر حلاوة .

كل العجاين بتكون أطيب كل ما انعجنت الا التارت لازم تفركيه بين راحتين ايديك فرك , لحتى يصير عندك شي بيشبه الرمل و الفرك لحتى شبهلك اياه رح يكون متل ما كانت جداتنا و جدات جداتنا بيغسلوا الغسيل كيف كانوا بيفركوه ؟ انت كمان المفروض تفركيه بس براحة ايدك ..

طيب لو حطيتي كل المقادير بالفود بروسسر و عجنتيهم مع بعض شو بيصير ؟ ما رح يطلع التارت طيب ؟

رح يطلع طيب, بس بالفرك رح يصير بيقرش قرش و انا بشوف هل القرشة ميزة بالتارت ..

بعدها بترصيه بصينية و يا سلام لو عندك صينية من النوع الي بتنفك , لا تقوليلي ما عندي , لازم تكون هل الصينية بمطبخك على قد مو سعرها قليل على قد ما فائدتها كبيرة و الصينية الي عندي بقياس 28 سم و هادا القياس الستاندر اذا فينا نقول .

كمية الكريما شوي كتير على وصفة التارت , ممكن يزيد منها ملعقتين أو تلاتة , و عني بحشيها بالبسكويت و بوزعها على القطط الي بتكون عم تنوي جنبي و انا عم حضر الكريم .

كمان نفس الوصفة ممكن تحضريها بقوالب صغيرة و تخبزيها و تحفظيها في وعا محم الاغلاق لمدة اسبوعيين و كل ما تحبي ممكن تحشي منه و تقدميه لعيلتك أو ضيوفك .

نفس الوصفة ممكن تعمليها و تزيني وجهها بالفريز , الكيوي , العنب , البرتقال , الموز , الدراق ,أو مكن تستعملي مجموعة فواكهة يكون في فرق بالوانها و تتفنني على زوءك و مع الألوان الكتيرة التنسيق كمان مهم كتير , و ان شاء الله لما بتجي فولكهة الصيف بحضر لوحة تارتية و بنزلها لتشوفوا شو ااقصد .

بالصحة و الهنا

وصفة كريم باتيسر
فواكهة من اختيارك و انا استخدمت فريز

عجينة التارت :

2 كوب طحين حلويات
بيضة
فانيليا
ثلاث أرباع كوب سكر ناعم
قالب زبدة من نوعية ممتازة بوزن 200 غ
رشة صغيرة ملح

صلصة التلميع :

2 ملعقة كبيرة قطر مربى المشمش
2 ملعقة كبيرة جيلو
2 ملعقة كبيرة ماء مغلي
direction

·          تقطع الزبدة لمكعبات و توضع في الفريزر حتى تقسى .

·          يوضع الطحين على رخامة العمل و يعمل حفرة في وسطه , يوضع السكر و البيضة و الزبدة و الفانيليا و الملح في الحفرة .

·          يفرك الطحين و بقية المقادير بالزبدة بين راحتي الكف حتى الحصول على مزيج رملي متفتت .

·          يجمع المزيج على شكل كرة ثم يوضع بكيس بلاستيك و توضع في البراد لمدة ساعة , في هذه المرحلة يمكن حفظ العجينة في الفريزر حتى وقت الحاجة لمدة اسبوع .

·          يحضر قالب تارت دائري من النوع المتحرك و بقطر 28 سم , لا داعي لدهن القالب لان العجينة تحتوي على كمية كبيرة من الزبدة .

·          ترش العجينة بالقليل من الطحين ثم ترق بالشوبك على شكل دائري يناسب القالب , ترفع و توضع في القالب و ترص حتى تأخذ شكل القالب الجميل عند التقديم .

·          توضع الصينية في الفريزر لمدة نصف ساعة ثم تغطى بورق زبدة و يوضع على الورق حبات فاصوليا أو حمص . هذه الخطوة هدفها عدم السماح للعجينة بالانتفاخ كي تبقى مقرمشة و يمكن استعمال حبات الفاصوليا لمرة أخرى .

·          تخبز العجينة في الفرن المحمى مسبقا على درجة 170 درجة مئوية على الرف المتوسط لمدة ربع ساعة .

·          تخرج الصينية من الفرن و ترفع ورقة الزبدة مع حبات الفاصوليا ثم يرجع القالب للفرن و يخبز حتى تحمر أطراف العجينة و تنضج لمدة ربع ساعة أخرى .

·          تجهز كريما باتيسير و تترك حتى تبرد و لطعم رائع لا يقاوم يمكن مزج ملعقتان أو ثلاث ملاعق من كريما الشانتيه مع كريم الباتيسر .

·          تغسل حبات الفريز ثم تترك حتى تجف , تقطع لشرائح و يمكن استخدام حبات صغيرة من دون تقطيع و ذلك حسب الرغبة .

·          يذوب الجيلو بالماء المغلي حتى تذوب حباته تمامه ثم يمزج مع شيرة مربى المشمش .

·          قبل التقديم يغطى قالب التارت بالكريما بالكمية المرغوبة ثم ترتب الفواكة فوقه حسب الرغبة و تدهن بمزيج التلميع و يمكن الاستغناء عن المزيج ورش القليل من السكر البودرة و يقدم التارت فوراً .

أضافة إلى المفضلة (4) |

أقتباس | مشاهدات : 11485

تعليقات (64)

1 الكاتب ام محمد, on 20-05-2009 14:04
ماشاء الله تبارك الرحمن
فن وذوق وشطارةالله يحميكي
من زمان مشتهية اعمل تارت بس الصراحة كنت خوفانة ما ينجح :upset

ان شاء الله بكره بجربه وبخبرك بالنتيجة

2 الكاتب freesoul, on 20-05-2009 15:15
يسلمو هالانامل . شكل هالتورتاية متل الوردة واللون بيجنن .هي الوان فصل الربيع . بس عندي سؤال لو حبيت احط تفاح بدال الفريز اعمل التفاح بنفس الطريقة وما احط اية اضافات او نكهات وشكرا يا احلى منونة

3 hi
الكاتب لين, on 20-05-2009 15:36
من ادين ما نعدمن يا رب ما فيني كل يوم من الصبح بفتح your webحتا شوف شو جديدك كل زوجي ما اكل شي طيب بكلو من الست منى انا قاعدي لحالي :cry

ما عندي حدا ما بحب الانكليز و ما بحكيلو الا عنك وعن طبخك يازوق تسلميلي

4 الكاتب بشرى, on 20-05-2009 16:23
والله ما بعرف شو قلك بس فضلتي علي .. يسلم إيديكي ربي .. الله يعطيكي ليرضيكي .. اليوم رح ساويه وبخبرك بالنتيجة ..

تقريباً نفس الطريقة اللي عندي .. بس أنا ما عندي ثقة إلا بطريقتك ..

سؤالي بقى السكر ناعم يعني المطحون ولا حباتو ناعمة ؟

ويسبلم إيديكي حبيبتي منى .. :zzz

5 الكاتب نور الأسلام, on 20-05-2009 17:18
مرحبا منى يسلمو على هالتارت كتير بشهي :zzz

ممكن اعملو بصينية بايركس اومابينفع

حتى تحضر صينية التارت الانو مو موجوده عندي الني بدي جربو بعد شوي لاني ما رح اصبر

6 الكاتب منى, on 20-05-2009 17:42
هلا ام محمد

لا الوصفة سهلة و بسيطة و ما بدها خوفة , ان شاء الله تجربيها و تكون على زووءك و بانتظار ردك أختي :zzz

7 الكاتب رنا, on 20-05-2009 18:25
يسلم هالايدين والله خجلتيني بتنزيل الوصفة الي عم بستناها من زمان
بس شو مشان حبات الفاصوليا منحطها فوق التارت ومنحطها بالفريزر ولا بالفرن ؟؟؟ماكتير فهمت بالوصفة مكتوب تخرج من الفرن وتزال ورقة الزبدة والحبات ثم تترك لتتحمر ؟؟طيب قديش بدها بالفرن
اشغل الفرن من فوق ومن تحت ؟؟ولا بس من تحت
وبدي قلك شغلة هلأ انا عندي قالب تارت بس مابينفك ياترى مابيمشي حاله يعني مابينقلب معي ؟؟ماعندي صينية تارت بتنفك ؟؟عندي صينية تشيز كيك بس مو مزكزكة متل هي :sigh

8 من زمان عم استناها
الكاتب semo, on 20-05-2009 18:46
مرحبا
اولا انا جديدة بالموقع بالتسجيل
اما بالتصفح فانا قديمة كتير وجربت كتير شغلات من هالموقع الرائع

وبحمد الله اني وقعت عهيك موقع والله يعطيكي العافية عهالاكلات الطيبة والمجهود الكبير

ما بتصدقي اديش تروحنت بهالموقع خصوصا اني انا بالغربةولما قريت كلامكن السوري ردتلي الروح

اما بالنسبة للتارت انا كتير دورت بالانترنت على وصفات بس ما قنعتني ولا طريقة الا طريقتك ورح جربها وانا واثقة انها رح تنجح

بصراحة ثقتي كتير كبيرة فيكي

الظاهر حكيت كتير لاني انا فاضية ائما وما عندي ولاد وبدي حدا فضفض معو

بس بدي اسالك سؤال اذا مافيها كلفة

بقدر احشي التارت كاسترد بدل الباتيسر؟؟

وشكرا اسفة عالاطالة

9 الكاتب بشرى, on 20-05-2009 19:07
منوشة أنا حالياً في أرض المعركة .. عملت العجينة بس طلعت لزجة مو متل حبات الرمل متل ما قلتي .. بكل الأحوال حطيتا بالفريزر من نص ساعة وبانتظار النتائج بعد نص ساعة تانية .. بس يعني هيك صح ولا غلط ارجع عيد من الأول :sigh

10 الكاتب لموسي, on 20-05-2009 19:16
يارب يسلم هل ليدين انا سميتك ست البنات لانه صعب بهل زمن نشوف بنات معدلين متلك
الله يحميك ويحفظك من كل شر.

11 الكاتب منى, on 20-05-2009 19:30
هلا ام جود

لو حابة تحطي تفاح عندك طريقتين , أول طريقة انك بعد ما تطالعي التارت من الفرن أول مرة و تشيلي منه ورقة الزبدة , تغلفي التارت بالكريم و ترتبي فوقه شرائح التفاح المقطعة بشكل رقيقو ترجعيه للفرن حتى يكمل التارت نضجه و احمراره .
الطريقة التانية من دون كريما و هيا انك تجهزي عجينة التارت و ترصيها في القالب , بعدها تقطعي التفاح لمكعبات و ترشيها بالقرفة و السكر و تخبزيها و بعد ما تصير جاهزة تقدميها مع ايس كريم بالفانيليا

12 الكاتب منى, on 20-05-2009 19:31
هلا لين

ان شاء الله ربي بيسر عليك الغربة و تتوفقي برفيقة منيحة تكون عون الك على غربتك

الف هنا و عافية على كل طبخة بتجربيها و تعجبك و ربي يديم المعروف و المحبة دايما

13 الكاتب منى, on 20-05-2009 19:31
هلا نور

ايه اكيد ممكن تحضريه بالبايركس و انا هيك كنت اعمل قبل ما يتوفر عندي القالب

يلا ان شاء الله تجربيه و يكون على زووءك

14 الكاتب منى, on 20-05-2009 19:41
هلا بشرى

و الله بزعل منك , دا انت تامر يا جميل و الف الف شكر الك على الدعوة الحلوة و ان شاء الله كمالة الدعوة تكون في الدنيا و الاخرة :zzz

السكر بين البودرة و بين السكر العادي , ممكن تحطي السكر العادي بالخلاط و تخليه لحتى ينعم شوي :zzz

يا ترى بشرى شو قصدك بكلمة لزجة ؟ هلا نظريا كملي و بعد نص ساعة بالفريزر خبزيها و ان شاء الله بتزبط اكيد
ان شاء الله تحبي الوصفة و تبيض وجهك و تكون متل ما بتريدي

15 الكاتب منى, on 20-05-2009 19:45
هلا رنونة

بعد ما منطالع التارت من الفريزر نحط عليه ورقة زبدة و منغطيها بالفاصوليا و نخبز الكل مع بعض و هل الفاصوليا البيضا رح تضغط على التارت لحتى ما يفكر ينفش

نخبزها بالفرن ربع ساعة و بعدها نطالعها و نخبزها مرة تانية و تقريبا بتاخد ربع ساعة تانية و كمان حسب فرنك , المهم ان تشوفي اطراف العجينة اشقرت , و هل الخطوة سقطت سهوا هلا رح عدل الوصفة :roll

اذا عندك صينية تارت عادية فممكن تحضري فيها الوصفة , بس ما بعرف اذا ممكن تنقلب من دون مشاكل , مو مجربة لفيدك , ممكن تغامري و تجربي أو ممكن تستعملي الصينية و تحشي التارت بس من دون ما تقلبيه

16 الكاتب بشرى, on 20-05-2009 19:47
ولي على قامتي كل شوي بتذكر سؤال هلكتك .. منوشة الحلوة .. اديش برأيك سماكة العجينة لازم تكون ؟ والله آخر سؤال :grin

17 الكاتب منى, on 20-05-2009 19:56
بشورة العجينة مو كتير سميكة , حوالي نصف سم , اي سؤال انا تحت امرك

18 الكاتب بشرى, on 20-05-2009 20:03
ايوا حبيبتي .. مديت العجينة وكانت مريقة يعني لينة جداً بس متماسكة وحطيتا بالقالب ورجعتا عالفريزر .. هاد كان قصدي بطرية

وقت كنت عم رقها عم تشقق وعذبتني شوي .. حطيتلا طحين حتى تماسكت بس لساتها لينة كتير .. أنا حطيت نص الكمية بالنص عالتمام .. بقى شو المشكلة ولا هيك عادي ؟

حسيتا منيحة أنا بس بدي اتأكد منك ..

19 الكاتب رنا, on 20-05-2009 20:44
يسلمو كتير منى على ردك خلص رح جربه بكرا عندي كل غراضه بس موسم الفريز هون خلص ...عندي كيوي ودراق واجاص ومانجا وموز رح اعمل لوحة تارتية متل ماوصفتيها

يلا يابشرى عم نستنى التارت كيف رح يطلع هو وصورته موفقة

20 الكاتب رنا, on 20-05-2009 21:15
عندي قالب متل هاد بس زجاج يعني بايركس رح جربه فيها

21 الكاتب أم الهدى, on 20-05-2009 23:17
لك خليلي روحك شو لذيذة بتعرفي والله لما شفت موضوع العزيمة وشفت صورة التارت شطت ريالتي وكنت بدي أطلب منك تنزلي وصفة التارت لأنو زوجي صرعني وهو عم بقول لي بدو تارت وأنا على قد ما شفت وصفات احترت وقلت مالي غير الله ومنونة لانو بثق فيك
الله يسلم دياتك يارب ، بس حبيبتي بدي أسألأك في حال استعملت تفاح لازم أطبخو ولا بحطو متل ماهو لأنو على حسب ما شفت في التلفزيون وصفات تارت تفاح التفاح كانو يطبخوه مع سكر وقرفة وبعدين يحطوه ولا انت عندك طريقة تانية
وألف ألف شكر ألك والله يجزيك كل خير يارب

22 الكاتب بشرى, on 21-05-2009 11:19
وااااعععععع .. طيب كتير بس حسيت حالي خبصت أكتر من مرة ..

أول شي يسلم إيديكي منوشة .. فعلاص طيب وعم تقرش قرش العجينة .. والباتيسر يا عيييييين أكلت منها لحتى ما بقي غير شوي للتارت :grin

بعرف الصورة مارح تكون بمستوى صوة منوشة بس حبيت ورجيكن أول تجربة ..

بجد يسلم إيديكي شي ناهي وطيب كتير وزوجي شو حبو وشو انبسط لما شافو ..

أول شي العجينة ليش كانت لينة وطرية كتير ما بعرف يمكن ما تركت الزبدة تقسى منيح بالفريزر ومطبخي شوب شوي .. وحنى صارت تلزق وتتفتت وقت مديتها بالشوبك ..

حطيت نص الكمية .. كنت لازم حط الكمية كلها لانو طلعت العجينة قليلة كتير وصارت طبقة رقيقة وعالتقطيع صارت تتكسر ولا هيه هيك لازم تكون ؟

إجاني تلفون قمت نسيتو 5 دقايق زيادة بالفرن فصار أسمر شوي :eek

بس ما كتير أثر لانو بس الطراف ..

هاد اللي صار معي ..

المرة الجاية عم فكر إعملو بقوالب تارت صغيرة متل المحلات .. حسيت ممكن يفيدني أكتر ..

سؤالي بقى منوشة هاد الشي اللي صار معي طبيعي ؟

يعني العجينة لازم تتكسر وقت بقطعها ما هيك .. هك بتذكر بالمحلات إنو بتتكسر متل البسكوت يعني ؟ علماً إنها طيبة كتير وعم تهرت "بالحلبي " :grin

شو غلطي حتى هيك صار معي ؟

والله كل شوي طلع على صورة قالبك واقول ولي عليكي يا بشرى شلون بدك تحطي الصورة :cry

بكل الأحوال انتي والأخوات حبوبات وما رح تعيبو علي لإنها اول تجربة ما؟

وهي صورته .. كريت كتير متل عادتي ..

صحي نسيت قول رنا إنو قالبي كمان ما بينفك وقلبتا وما انكسرت جربيها وما رح تندمي يممييي بقي ربعا بس ..

سلام عليكم

23 الكاتب ام دانية, on 20-05-2009 23:58

ايه والله لما شفت القالب عجبني كتير وانبسطت انو الكيك منشتري جاهز ومنزينو بس لما قرات وشفت انو الكيك انتي الي عاملتي ما بعرف شو صرلي :upset

ماشاءالله عليك هون بالمانيا مليان منو جاهز مشان هيك فكرتو جاهز :eek

بس طلع شغل دياتك الحلوة الله يحمكي من العين ويخليكي لعيلتك ياحق وان شاءالله كل فائدة بتفيدينا فيا يعوضك عنا بعشر حسنات امين يارب

24 الكاتب ام دانية, on 20-05-2009 23:59

ماشاءالله عليك هون بالمانيا مليان منو جاهز مشان هيك فكرتو جاهز :eek

25 الظاهر دمي تقيل
الكاتب semo, on 21-05-2009 10:59
حبيبتي منى انا اسفة بس ما جاوبتيني بخصوص الكاسترد؟؟ :sigh

او يمكن تقلت دم ؟؟

اذا هيك انا اسفة

الله يعطيكي ليرضيكي ويجزيكي كل خير على كل لقمة مناكلها من طبخاتك الطيبين

26 الكاتب سارونات, on 21-05-2009 11:21
السلام عليكم و رحمة الله و بركاته

بسم الله ما شاء الله احلى من الكيك الجاهز كأنها وردة حمراء مفتحة
ان شاء الله راح اقرأ الوصفة بتمعن و اكتبها و راح جربها يمكن بالمشمش لان بدأ موسمه

اختي منى يسلم دياتك و هل في شي لازم ساويه للمشمش لما استعملو في الوصفة

اختي منى لا تنسي سؤالي بموضوع كيك بايس كريم الفريز

بالتوفيق
سلام

27 الكاتب سارونات, on 21-05-2009 11:58
السلام عليكم و رحمة الله و بركاته

اختي بشرى مبروك نجاح التجربة الاولى و عقبال تجارب احسن و احسن و الصورة مبينة ان التارت طالع حلو
شو نعيب ما نعيب اذا هي التجربة الاولى فهذا يعتبر انجاز لتكوني عم تحكي هيك مشان ما نصيبك بالعين :grin

لا تخافي عم قول ما شاء الله :zzz

سلام

28 الكاتب منى, on 21-05-2009 12:25
هلا سيمو

مية اهلا و سهلا فيك , نورتي أختي و نور الموقع و كتير انبسطت انك انتقلت من جمهور المشاهديين الى خط المشتركين

اختي الله يسامحك , بالعكس بس اتاخرت اليوم لدخلت النت لهيك اتاخرت بالرد عليك

احكي اختي و فضفضي على كيفك و نحنا كلنا منسمعك و رفقاتك

اكيد ممكن تستعملي الكاسترد عواض الباتيسير , بس بكريم الباتيسير اطيب بكتير

الف شكر الك للدعوات الحلوة و الغالية و ان شاء الله الك متلها و اغلى

29 الكاتب منى, on 21-05-2009 12:26
هلا لموسي

هادا بس من زووءك أختي , ربي يخليك و يديم المحبة و المعروف دايما و الف شكر الك للرد الحلو و التواجد الطيب

30 الكاتب منى, on 21-05-2009 12:26
هلا رنونة

ان شاء الله تجربيه و هو ممكن تحشيه باي شي بيخطر على بالك و هي بشورة قالتلك ان انقلب معها من دون مشاكل

31 الكاتب منى, on 21-05-2009 12:26
هلا ام هدى

خليلي عينك هادا من زوءك يا قمر و ان شاء الله تجربيه و يطلع متل ما بدك و اطيب و ينبسط فيك ابو الشباب :zzz

التفاح اله طريقتين بالطبخ , ممكن تقراي ردي لام جود , و كمان ممكن تطبخيه قبل ما تحشيه بالقالب , بس انا احضره من دون طبخ لحتى يبقى شوية قرمشة في التفاح و ما يصير كتير طري :zzz

32 الكاتب منى, on 21-05-2009 12:27
هلا بشورة

الف صحة و هنا بالاول و كتير انبسطت انك جربتيه و مبدأيا ظبط معك , و المشكلة الي صارت معك سببها انك ما بردتي الزبدة منيح و لا العجينة , و ما دام مطبخك شوب شوي معناها خليه لفترة اطول في الفريز و هو رح ينمد معك متل الصلاة على النبي , يعني الطراوة و التشقق سببها ان مقاديرك مو باردة و هي اهم الشي لسهولة تحضير الوصفة :zzz

هيا ما لازم تتكسر , و ما دام اتكسرت معناها انك خابزتيها زيادة أو لان يمكن رقيقة زيادة ,
كلامك مزبوط بالقوالب الصغرة عملي اكتر بس لما بيكون عندك بوفييه الأحلى انك تجهزي قالب واحد

بشورة الصورة ما ظهرت و السبب انها كبيرة جدا , ممكن تصغري حجمها لـ 400 لحتى نقدر نشوف تطبيقك , و اكيد رح يكون بيشهي وخصوصا انها اول مرة :zzz

33 الكاتب منى, on 21-05-2009 12:28
هلا ام دانية

انت كريمة و انا بستاهل كنتي خليتيهم مية او الف حسنة :zzz

ان شاء الله تجربيه لتشوفي شو سهل و بسيط و كمان طيب كتير

نورتي اختي

34 الكاتب رنا, on 21-05-2009 19:40
ياستي ساويته وزبطته وكل شي بس لسه مادقته بس مااستخدمت جيلي بصوص التلميع لاني مااستعملت فريز ..وماعندي جيلي شفاف
المهم ياستي استنيني انا وصورة التارت
انا خليت العجينة بالفريزر تقريبا ساعة ونص لانه الجو شوب بس حسيت لو زبدتها اقل بتساعد عالتشكيل اكتر ..ياترى ماخرج العب بعيار الزبدة :zzz

ولا خليني عم بلعب بالطابة احسن ؟

35 الكاتب منى, on 21-05-2009 19:46
:grin

هلا رنونة

ممكن تقللي الزبدة لتلات ارباع الباكيت , و بتطلع طيبة بس بعيار الزبدة الكامل بتطلع أطيب

بانتظار الصور و ان شاء الله تعجبك طعمتها , و ما دامها عزبتك بالتشكيل فممكن تخلي الزبدة بالفريزر قبل ما تستعمليها :zzz

36 الكاتب رنا, on 21-05-2009 23:12
ايه حبيبتي منووونة
جربته واكلته وياعيني عليه شو لذيذ شي فاخر عالاخررررر
طلع كتير طيب والله ومقرمش وكل شي بس بدي اسألك هلأ هو مو لازم يطلع قاسي ؟؟يعني مابينقسم بسهولة قسم الكيك ؟؟؟انا هيك طلع معي ياترى في شي تخبيص :zzz

بالنسبة لبرودة الزبدة انا جمدتها لصارت متل الحجر بس طبعا مع الفرد والعجن اجباري رح تاخد شوية حرارة ...هلأ انا رقيته وحطيته بالصينية وتابعت فردها بالصينية بايدي يعني مشان ماتتكسر وهيك
وفي شغلة كمان مشان الخبز اظن لومنخلي الفاصوليا فوقه طول الفترة افضل لان وقت شلت الفاصوليا صار ينتفخ متل مااحيانا بيصير بالكبة الصينية يعني بيرتفع ووقت بياخد هوا بيهبط فكرت فيها قلت بدي اسالك اذا ثقبتها بالشوكة مابيمشي الحال ؟؟ :zzz

يمكن حكيت كتير عن هالتارت هلأ بتشوفي تطبيقي بس رح قلك قبل ماتنصدمي ..شكل التارت مو كتير حلو لانه الفواكه الي استخدمتها مو كتير ناضجة وعنذتني لقدرت اطالع بذرها متل الاجاص والدراق لانه لسه مااستوو واولهن بس انا وقت شفت وصفة التارت قلت لازم جربه لو بلا شي من الفواكه :zzz

ياستي هلأ خلصنا من التارت صار بدي اطلب منك الكلير هالمرة انا مادخلني لاتعصبي علي بس زوجي وقت داق الباتسيير تذكر ايام طفولته وقت كان يرجع من المدرسة ومعه قطعة كلير ...اكيد دمعو عيونك :grin

ياستي خدي وقتك وع اقللللل من مهلك منضل عم نتذكر شريط الذكريات لبين ميجي وقت الوصفة

وهي صورة قالبي العجيب ...حضري حالك هو شوي فايت بالحيط :grin

37 الكاتب ميساء, on 21-05-2009 23:22
مرحبا منى أنا كمان من الناس اللي صار لي زمان بانتظار وصفة التارت من عندك لأنها الوصفة الوحيدة التي لي معها تاريخ طويل لأن مابقي وصفة من النت ولا من الصديقات ولا من الجارات و غيرها من مصادر المعلومات إلا وجربتها ولكن لحد الآن ما أعتمدت ولا وحدة منهاوبحس دائما فب شي ناقص بالطعمة أو بالشكل وكل ما أدخل عالمطبخ لأعمل تارت بحس حالي داخلة على مخبر أبحاث وتجارب وانشاء الله هالمرة مع وصفتك رح تزبط معي وببقى بخبرك النتائج

38 الكاتب منى, on 21-05-2009 23:49
هلا رنونة

اذا طلع مقرمش فهادا هو المطلوب , بس يا ترى طلع من جوى طري متل الكيك و الا بس لما قسمتيه طلع معك طري ؟
ممكن تخلي الفاصوليا فوقه اكتر و باخر 5 دقايق نرفع الورقة لحتى بس يحمر التارت و كمان ممكن تثقبيه بس ما دام غطيتيه بالورقة و الفاصوليا ما بقى في داعي لتثقيبه

التارت كتيرررر شكله حلو , الصراحة ما فهمت شو مو عاجبك بشكله و مرتب ترتيبة حلوة كتير و بعدها على صحن جهازي , شو بدك احلى من هيك :zzz

, الف صحة و هنا و عافية عليه و مطرح ما سرى مرى

تكرم عيونك على وصفة الاكلير هي محطوطة بالخطة الخمسية :grin

و كان الشعب السوري اله ذاكرة طفولية مشتركة بالعودة من المدرسة مع قطعة اكلير او راس العبد :zzz

39 الكاتب منى, on 25-05-2009 13:24
هلا ميوسة

ان شاء الله تجربي الوصفة و تعتمديها , حسي حالي رح ادخل للامتحان :roll

يا رب تعجبك و اهم الشي انك تبرديها منيح لحتى تتشكل معك بسهولة , اما الطعم فرح يكون باذن الله رائع بشرط استعمال زبدة ممتازة :zzz

40 الكاتب بشرى, on 22-05-2009 04:04
يا عيني يا رنونة شو هاد .. منظرو كتير حلو .. قال مو عاجبها

يسلم إيديكي عالتطبيق وإيدين منوشة هالطريقة.. والله خجلانة حط صورتي إيه والله خجلانة .. رح جربو مرة تانية وبحط الصورة .. قريباً إن شاء الله .. :sigh

منوشة مزبوط تحليلك والمرة الجاية رح اعمل متل ما قلتي .. وما رح اقسم العجينة بالنص ..

يسلم إيديكي وإن شاء الله كل حرف بهالصفحة إلك أجر فيه عشرات الأضعاف ..

41 الكاتب سارونات, on 22-05-2009 10:15
السلام عليكم و رحمة الله و بركاته

بسم الله ما شاء الله رنا الصورة طالعة كتير حلوة و التنسيق كمان حلو مبروك نجاح التجربة الاولى و عقبال تجارب احسن و احسن و عقبال ما جربها انا كمان

اختي منى انا حاطة تعليق من امبارحة ما بعرف اذا ما وصل او شو

بالتوفيق
سلاح

42 الكاتب منى, on 22-05-2009 11:36
هلا بشورة

ان شاء الله المرة التانية يزبط معك متل ما بدك , و بعدها على شو خجلانة تحطي تطبيقك و الله بزعل منك , منيح ما كنا عم نعطي علامات :grin

الف الف شكر الك للدعوة الغالية و ربي الك متلهم و أكتر بجاه ربك الكريم

43 الكاتب منى, on 22-05-2009 11:40
سارونات مشان الله لا تزعلي :roll

ما بعرف كيف ما رديت عليك, مع اني قرات الرد , لا تاخذيني بس من كترة الردود ما عدت ركزت :upset

انا مو مجربته الا بالمشمش الكومبوت و الي انا بحضره على ايدي , و رح نزل الوصفة هل الصيفية باذن رب العالمين .
بعد ما مد العجينة اغطيها بالباتيسير و بعدها بالمشمش الم
كمبوت و اخبزها لحتى تستوي

44 الكاتب رنا, on 22-05-2009 16:52
ايه منى ياستي على كل الاحوال يسلمو ايديكي انا التارت حبيته وكل شي بس قلتلك لانه الفواكه فوقه اسودت شوي ...مشان هيك طالع شوي شكله بائس
بالنسبة للتقطيع ماتقطع متل الكيك كان قاسي متل البسكويت وماانقطع الا بسكين منشار

ويسلمو ايديكي مسبقا على وصفة الاكلير عم نستناها بفارغ الصبر

شكرا يابشورة وسارونات عالتشجيع وانا الظاهر ماعجبني شكله لاني طالبة منى خانم وصورة هالتارت جنب صورة تارتها بتخربها :eek

يعني هي الافضل

45 الكاتب منى, on 22-05-2009 19:00
هلا رنونة

هنا و عافية و الفواكة اسودت لان ما الهما مزج التلميع و على كل الواحد بيتعلم من تجاربه

46 الكاتب رنا, on 23-05-2009 18:59
منى انا حطيت مزيج التلميع بس مربى المشمش ماحطيت جيلي معناها لازم جيب جيلي شفاف ...خلص المرة الجاية انشالله

47 الكاتب ميساء, on 24-05-2009 20:55
مسا الخير ميمو :zzz

أنا اليوم عملت تارت الفريز وطبقت وصفتك بالتمام وحبيت قلك أنو طلع بيجنن والله أطيب من الجاهز بمليون مرة ونحناعم ناكل وندعيلك بالخير والتوفيق الله يجعل هالدعوات من نصيبك وخلص لا تجارب بعد اليوم تارت ميمو وبس والباقي كلو خس

48 الكاتب منى, on 25-05-2009 13:22
هلا ميوسة

يعني نجحت بالامتحان :eek

الف هنا و الف عافية على التارت ,كتير انبسطت انه عجبك و الف الف شكر الك للدعوات الغالية , ربي الك متلها و اغلى ميوسة

49 الكاتب dado, on 01-06-2009 18:51
هيللو..
أول ما شفت الوصفة غرت كتير.. وكان بدي اعملها فوراً.. بس ما صحلي.. كان عندي دوام طويل.
وبكرة عندي عزيمة .. فلقيتها فرصة إني حضر التارت.. وبعد ما حطيت الزبدة بالفريزر.. إجى أبو الشباب وقلي.. بكرة ما تعذبي حالك كتير متل كل مرة.. ساوي أيا شي وبشتري حلو من برة.. قمت أنا انقمصت.. وبطلت إعمل التارت.. بس يا أختي ما بحسن.. خلص اشتغلت السوسة براسي.. وهلأ لمن طلع هو من البيت جهزت العجينة ورح اخبزها بعد شوي.. وبانتظار النتائج.. انشالله تكون ظريفة.

50 الكاتب مريوم, on 19-08-2009 06:48
منى حبيبتي بدي اسالك عن هيدي العجينة لمن ساويها بتطلع معي قاسية ما بعرف ليش. يعني ما بتنقص.
وكمان عملت اكلة تانية عجينتها من نفس هيدي النوع فيها كتير زبدة و كمان طلعت قاسية كتير .
معقولة اذا خبزتها زيادة بتقسى ، يعني انا بخبزها حتى يصير لونها ذهبي !!
يعطيكي العافية حبيبة قلبي :zzz

51 وصفة تارت فرنسية
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 30-09-2009 17:47
كنت أبحث عن وصفة تارت لا تحوي بيض لأنني لا أحبه وأحاول دائما البحث عن وصفات لا تحوي البيض، لذلك ترددت في تطبيق وصفتك.
ودلتني أختي على طريقة لصنع التارت موجودة في موقع فرنسي والغريب أن طريقة التطبيق مختلفة تماما عن الطريقة التي وجدتها في كل المواقع العربية والانكليزية لأن كل الوصفات تصر على برودة الزبدة والماء كما أنها تحوي صفار البيض. لكن تلك الوصفة تعتمد على السخونه، أرجو أن تعطيني رأيك فيها وهي كما يلي:
1-كوب ماء
2- 100 غرام زبدة
3-كوبين طحين
4-رشة ملح
الطريقة:
يوضع الماء على نار هادئة وتوضع الزبدة الجامدة ورشة الملح ويتم التحريك حتى تذوب الزبدة، يبعد الوعاء عن النار ويوضع الطحين ويتم التحريك بملقعة خشبية حتى نحصل على عجينة، نمدها في قالب التارت العادي بدون دهن القالب.
نشعل الفرن على حرارة 210 درجة مئوية، ثم نبدأ بالعمل على الحشوة، إما تفاح أو ليمون أو موز إلخ.... نضع الحشوة على العجينة وندخلها إلى الفرن لمدة عشرين دقيقة.
الوصفة ممتازة لأنها قليلة السكر كما أنها سهلة جدا، فما رأيك.

52 الكاتب منى, on 30-09-2009 20:25
رايي انها مشجعة جدا للتجربة , ليش لا , فكرتها بتشبه بداية وصفة الشو , انا اتشجعت اعملها و ممكن باول مناسبة حضرها , و لو منك اجربها بكمية صغيرة

على فكرة في عندنا في الموقع لعجينة تارت رائعة , او بالحقيقة كلمة رائعة قليلة عليها و هي تارت الجوز , العجينة مميزة كتير و ما فيها بيض , ممكن تجربيها

53 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 06-02-2010 16:47
مدام منى انا مابحب الكريم باتييسير شو عندك حل تاني للحشوة

54 الكاتب منى, on 06-02-2010 18:29
ممكن كريم شانتيه عادي

55 الكاتب سيدة ملعقة, on 05-03-2010 23:53
مساء الخير أخت منى

الله يعطيكي ألف عافية يا ستي أنا عملت العجينة متل ماذكرتي وبكل التفاصيل بس حبيت أتاكد منك الزبدة 200غ مو؟؟؟
لأنو طلع معي شي غلط لأنو لما حطيت العجينة بالفرن صار بقلب لبقلب زبدة دايبة وأنا عملة التارت القالب اللس بتفصل قاعدته فلما جيت عالمطبخ لقيت الدخنة والريحة يالطيف لأنو الزبدة عمتنزل على الفرن وتحترق

الله لا يدوقك تنضيف الفرن
المهم بس بدي اعرف وين الخطأ لأنو إذا ماكان بعيار الزبدة معناه الخطأ بعيار الطحين

ممكن اخت منى إذا تكرمتي تذكريلي عيار الطحين بالغرام
أنا استعملت كوب الشرب العادي بس بيجوز كوبي بيختلف عن كوبك

بليز أخت منى عمستنى ردك لني ناوية عيدها بلكي بتطلع معي متل الصورة وشششششششششكرا

56 الكاتب منى, on 10-03-2010 01:10
مية هلا فيك اختي

الزبدة 200 غرام و الطحين بوزن 330 غرام لان الكوب الي استعمله وزنه حوالي 165 غ لكل كوب طحين

لا تشكيلي ببكيلك , ما في ابشع من هل الشغلة وقت الي بيطوف الكيك و بيحترق و بتبقى الريحة بالمطبخ يومين او تلاتة :cry

ممكن يكون نوعية قالبك مو منيحة ؟؟

اتمنى تتشجعي و تعيدي الوصفة و تكون على زووءك , و الله مستاهلة

57 الكاتب سيدة ملعقة, on 10-03-2010 14:42
شكرا كتير أخت منى

بدي ارجع عيد التجربة بأقرب فرصة وإن شاء الله

بتظبط وما بتفشلني :sigh

الله يجزيكي كل الخير أختي منى على الجهد اللي بتقدميه للموقع

واللي كل الأخوات عميستفيدو منو ويدعولك

وأنا ما بحسو مجرد موقع بحسو بيوتة صغيرة

دافية بتجمعنامتل العيلة الوحدة بندردش و

وبنفيد وبنستفيد وبالاّخر بناكل أطيب لقمة

ربي ما يحرمنا من بعض

58 الكاتب منى, on 10-03-2010 20:13
ابوس عينك و هو هيك بيت صغير حلو و نضيف و الناس الي فيه كلها اخوة و عيلة واحدة :zzz

يلا رح استنى تجربة تانية و يا رب هل المرة تكون تمااام

59 الكاتب لمياء, on 08-05-2010 19:05
ما شاء الله التارت طالع رووووعه
تسلم ايديكى

60 الكاتب منى, on 08-05-2010 19:25
الله يسلمك لميا

اتمنى تجربيه و تحبيه

61 الكاتب نزيهة, on 13-10-2010 20:32
هاي مشكورة اختي عالتارت بس ممكن تعطوني وصفة تارت بالليمون و تكون ناجحة مية بالمية بس بدي مقادير العجينة بالغرام و سؤالي 2 الزبدة اللي في تارت ممكن استبدلهابالمارغرين واسفة عالاطالة

62 الكاتب منى, on 14-10-2010 09:34
هلا اختي

لا الزبدة ما فيك تستبدليها بالمارجرين لان نكهة الزبدة اساسية هون
تكرم عيونك , ان شاء الله بنزل وصفة طيبة لتارت الليمون

63 الكاتب ام لمار, on 27-03-2012 20:35
مرحبا ست منى..أنا جربت التارت وكان رائع رائع رائع

وجربتو بالدراق وكان كتير طيب...شكراً كتير ويعطيكي العافية

64 الكاتب منى, on 28-03-2012 12:42
هلا ام لمار

صحتين و مية الف هناعلى قلبك
شكرا الك لان خبرتيني رايك , منورة

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 20/05/2009 )

< السابق		التالى >

[ عودة ]