متل السنة الماضية و كل سنة قبلها , خال زوجي خالو تقي المغترب في فرنسا من اكتر من 55 سنة بيجي لسوريا و بتكون زيارته اسبوعين و خلال هل الاسبوعين بيزور كل العيلة و اكيد نحنا في المقدمة ..

هلا رح ابدأ بالأخبار المنيحة , العزيمة كانت بتجنن و الطبخات الحمد لله كلها ناجحة و ما نسيت شي هل المرة كعادتي بفضل الله

يالنجي

سلطة الجبنة و الزعتر الأخضر

أوزي

شاورما دجاج

و معها بطاطا مقلية قليلة السعرات الحرارية 

جنب الأوزي فريكة

تحتها شوكي محشي باللحمة و االخضرة غراتان

سلطة الدجاج بالكاري

سلطة الفول المدمس على طريقة أهل حلب و هي على طلب أبو الشباب

كبة مبرومة

رز مفلفل

سلطة الجرجير

لقمة تشكن


فخدات الدجاج

كبة صينية بس نيو لوك

سلطة الزيتون

 محمرة , طلعت حدة لأن دبس فليلفلتي لهل السنة ناار

بازلاء

و سلطة الجرجير بالفطر , حضرته بالفطر المعلب لان ما لقيت تازة

الوصفات كانت كلها ناجحة الحمد لله و من فضل الله بس الي كان أكتر من رائع بشهادة الضيوف اليالنجي الي عم يدوب دوبان بالتم و الشوكي لأن كتير تغير شكل و ملون و طعمته طيبة كتير و في سلطة الدجاج بالكاري عملت ضجة و أول صحن خلص , و لقمة تشكن أكيد طار عقلهن فيها  و طارت الصينية كلها ,  فخذات الدجاج الي يا دوب انقذت كم واحدة من بين ديات الاولاد لحتى خلي الكبار يدوقوها , و سلطة الجرجير بالفطر حبوها كتير كتير , و أخر الشي الكبة المبرومة لأن الظاهر خالو تقي أول مرة بيشوف هل النوع !

ترايفل بشوكولا مارس , الصورة مو واضحة بس هي الصورة الوحيدة للترايفل

كيك التوفي

تارت الفريز

أطيب كاتو شوكولا



كمان الحلويات كانت طيبة كتير كتير بس كان الي غصة واحدة : ما كان عندي وقت و لا كنت مرتاحة وقت تزيين كيك الكراميل لهيك صار شكله شوي مخربط بس طعمته بتجنن

الي حضر  السلطات , طبعا تحت اشرافي , و للمفاجأة هي بنوتي جودي زينة الصبايا , اتفاجأت من همتها خليلي عينها و لقيتها يوم الجمعة فايقة بكير و يا ماما شو ساعدك ؟

هلأ الأخبار الي مو منيحة أو بالأحرى بعد ما خلصت العزيمة فيني قول الأخبار الي بتضحك , المنيو اتغير كذا مرة و لقبل بيوم حتى استقريت على كل الوصفات , قبل بيوم من العزيمة الصبح اتصل فيني زوجي و خبرني أن اللحام ما فيه يعطينا قطع لحمة طرية للكويسات بنفس اليوم و كان القصة بدها توصية قبل بيومين على الأقل ..

أنا هون ما بعرف شو صار الي , انعبطت و ما بقى اعرف رتب أموري , وصيت مباشرة على هبرة للتعويض عن الطبق الرئيسي  و قلت بحضر كبة مبررومة و كبة بصينية و حضرت معهم أطباق كتير و النتيجة ان كان كمية  الأكل كانت زيادة عن عدد المعزومين 


كمان أخبار من وراء الكواليس , كنت ناوية حضر كيك على شكل كرة القدم لمروان و فرحه فيها , بس الكيك ما نجح معي مع ان المقادير عاملتها قبل هلأ كتير , عدت المحاولة بمقادير تانية و نفس القصة , و زوجي عم يدخل و يطلع للمطبخ و عم يقول الي الا ما يجيني يوم و اعمل فيه موقع مضاد للقمة طيبة و احكي فيه الحقيقة و الي عم يصير في المطبخ ,  بعد المحاولة التالتة قلت اكيد في مشكلة في الفرن . الحمد لله على كل شي المحاولة التالتة للكيك صاحبتها اول حالة طيران غريبة من نوعها في مطبخي , بعد ما حطيت البيض في وعاء الفود بروسسر و بعد 5 دقايق طار الوعا بالي فيه و انا فاتحة عيوني و تمي و عم اتفرج متل أفلام كرتون و البيض صار على الحيطان و على خزن المطبخ و على الارض كمان , يلا لميت البيض و بديت الفرك بصابون الغار لحتى نضفوا متل ما بدي ... ما فكرت بالقصة , أصلا ما كان عندي وقت دوبي كنت عم اشتغل و عقلي مشغول بالتخطيط للخطوة التانية .. و الي كانت تحضر الكيك و خبزه عند أية على اعتبار ان بيتها قريب كتير علي .




نقعت البرغل للكبة , رن التلفون و كان على الخط  صديقتي الصدوقة ,
 
- منى بتروحي تتمشي ؟

طبعا ضحكت و شر البلية ما يضحك , قلتلها ما الي فاضية حك شعري شو اتمشى و ما اتمشى ؟

طيب انا حابة احكي معك , عندي شغلة لازم تعرفيها و مو جاي على بالي احكيها بالتلفون , بستقبليني عندك ؟

- ايه تفضلي مية السلامة بس الاستقبال بالمطبخ و بشرط لازم تنتفيلي الجرجير و الزعتر الأخضر .

و بعد ضحكتها الحلوة قالتلي موافقة

شربنا القهوة و انا عم دير البرغل و كنت حطيت اللحمة على النار لأسلقها و هديت النار و كان الأمن لساعتها مستتب , بعد شي ساعة صرت شم ريحة حريق اتفقدت الفرن و شفت ان كل عيون الغاز مطفية , رجعت لشغلي , بعد شي 5 دقايق قالتلي رفيقتي: منى في شي عم يحترق , طلعت على الفرن مرة تانية قلتلها ما في شي , النار كلها مطفية أكيد هدولة جيراننا عم يشوى لحمة أو كبة , طيب !


بعد نص ساعة اكتشفت ان الشوي من عندي و من طنجرة اللحمة تحديداً و اللحمة احترقت حيف عليها و احترق معها دمي


في نفس يوم العزيمة , و قبل ما يجي الضيوف بشوي , طلبت من بشورة أخي يستلم التصوير و بعد كم صورة خبرني ان الذاكرة مليانة , لان كان صار الي اكتر من اسبوع ما فرغتها و كان لازم ضحي بشي و الضحية صور الخطوات المصورة لكتير وصفات على الطاولة , يعني هدولة طاروا بس بايدي و ما كان عندي حل غير اني طيرهم    .. 


 الموعد كان الساعة 3 و الساعة 3 تمام كان كل شي جاهز و على الطاولة , طلعت نظرة أخيرة فشفت ان الفولات زيتهم قليل , و كانت قنينة زيت الزيتون خالصة فطالعت القنينة الكبيرة اللترين و نصف و ما كنت بوقتها فاضية فضيها على قناني أصغر , المهم حطيت شوية زيت على الفول و كانت جودي جنبي , عطيتها القنينة و قلتلها الحقيني لنلحق الصلاة قبل ما يجوا الضيوف . و لسا يا دوب درت ظهري و بعدها اسمعت صووووت طش .....

سادت بعده لحظة صمت و اندرت و اذ بالزيت في كل محل .على الحيطان و على الكراسي و على الشوفاج و على الأرض

الحمد لله اتأخروا الضيوف لعشر دقايق و بهل العشر دقايق تم حشد جميع القوات المسلحة البرية و البحرية و الجوية لمكان الاصابة و لميت الزيت و ليفت كل شي بصابون الغارشي 200 أو 300 مرة و بعدها غسلنا الأرض و راحت كل أثار الزيت

أخر فصل صار وقت خلصنا الأكل و لمينا الطاولة و خالة حسونة جابت البازلا من غرفة السفرة للمطبخ و هونيك حدا من دون ما يحس دقر ملعقة السكب ...

أكيد عرفتوا شو صار , طارت المعلقة مع البازلا على حسونتي أول الشي و بعدها على خزن المطبخ الي صارت على الموضة و منقطة بالأحمر ..

هادا كان كل شي لعزيمة اليوم و ان شاء الله عقبال العزيمة التانية بسلامة و هي سفرتنا من الطرف التاني و بكاميرا خالو تقي

تعليقات (64)

2  الكاتب منى, on 19-05-2009 14:22 فكرة ممتازة ميسون و انا ما كان عندي فكرة للتميز بين العزيمتين و لسا الخير لادام     الله يعافيك و نورتي يا قمر

5  الكاتب تورتاية بالكريز, on 19-05-2009 16:13 تسلم ايدك منمون ياقمر الله يعطكي الصحة والعافية يارب من كل قلبي عزومة غير شكل فعلا مبهرة والترتيب والنظام رائع واسعدني جدا انك اشركتيينا معاكي خلف الكواليس والاحداث الكرتونية اللولبية اللي دايما بتضبط وقتها على توقيت اخر لحظة مجهود كبير منك بجد الله يقويك ويجعل مناسباتكم كلها فرح وسرور وسعادة بجد نفسي ازور سوريا الله يكتبها ليه في يوم من الايام يارب بجد بلد رائع واهله رائعين ماشاء الله عليكم يسعدك ربي ع هالسفرة الملوكية الرائعةو يديمك يارب لكل حبايبك احلى ست بيت منورة ومبدعة دايما ان شاء الله ويحميك من عيون شياطين الانس والجن قادر ياكريم ( عوذتك بكلمات الله التامة من كل شيطان وهامة ومن كل عين لامة يامنى ياغالية )

6  الكاتب سارونات, on 19-05-2009 16:31 السلام عليكم و رحمة الله و بركاته    اختي منى انا احتج و اعارض ))) فاصل - ما شاء الله السفرة كتير حلوة كالعادة بيضتي وشنا )))  و نعود بعد الفاصل اختي منى مو قلتيلي بدك تحطي وصفة كيكة جوز الهند خليتيني شوف صورتها و انتظر كمان وصفة الشوكي مبيتها كتير حلوة و ناطرتها منك قريبا يسلم ايديك     بالتوفيق  سلام

7  الكاتب بشرى, on 19-05-2009 16:39 منوشة القمر .. يسلم إيديكي ربي .. شي بياخد العقل وكلو فن وذوق وترتيب .. تعيشي وتعملي عزايم والله يخليلك أهلك كلون ويديم المحبة والألفة ..  ذكرتيني بالعزايم اللي بعملها كمان بيكون في طيارات بس على مستوى أخف .. والله أنا عم اقرأ وقول واخخ وييييي ويعلى قلبي .. لو كنت محلك كنت قعدت ابكي من قهري ..    منوشة مشان تارت الفريز أنا اشتريت القالب وجبت اكتر من وصفة لتحضير العجينة بس مشتهية اعرف وصفتك انتي يا أم الذوق مشان جربها عالمضمون لانو زوجي كتير بيحب التارت بكافة أنواعه وأشكاله وأنا مسافرة بعد شي عشر تيام عسوريا بقى حابة فاجأو فيها قبل ما روح   وإذا بتوصيني شي من هون من عيوني بجبلك ياه .. لو تعرفي شو متمنية شوفك .. بكل الحوال جايبتلك معي مفاجأة رح تعجبك والله وقت كنت عم اشتريا قلت يمكن منى بيعجبا هيك شغلات وجبتلك وحدة     طولت عليكي حقك علي بس والله مشتهية احكي معك كتير ..

9  الكاتب رنا, on 19-05-2009 18:08 الله يعطيكي العافية ياست الستات يعني سفرة 2008 كانت بتجنن بس سفرة 2009 اروع واروع وماشاء الله حولك من تقدم لتقدم   بس بتعرفي لحقتي حالك قبل مايعمل زوجك موقع مضاد للقمة طيبة وحكيتيلنا شو صار وراء الكواليس ..بس الله يعينك بيض = زيت ...وبازلاء وزفرررررررر يعني ماحدا خطرله يكب كاسة ماء بس   بس شو بدك بالحكي عزيمة بتشهي والله يقويكي يارب كمان وكمان ..بس بدنا التارت يامنى ...التارت ياعزيزتي ولا بيجي من قلبك تاكليه ونحنا عيوننا عم تطلع   اكيد صرتي تبكي ..عم بمزح معك ...بصراحة كل الحلويات الي عاملتيهن بيجننوا ومامنعرف طرق تحضيرهن بقا خليكي على راحتك وحسب وقتك ومزاجك

10  الكاتب رنا, on 19-05-2009 18:11 بس وين صورة الشاورما كنت مشتهية شوفك كيف مقدمتيها

11  الكاتب غيث, on 19-05-2009 18:25 يا على قلبي يا منى مأساة والله وجعتي لي قلبي على العموم الحمد لله النهاية على خير وصحة وهنا على قلوبكم كلكم شي بيشهي الله يعطيك العافية هي دوما بتصير بالضد وقت العزايم بتطلع كل الفصول ولحقي اذا بتالحقي انا من اسشبوعين كنت عازمة اختي وبدها تجي من السفرحوالي ست ساعات بيني وبينها المهم حضرت كل شي بقي اخر شي عملت صحن كباب المفاجات وانا عم اقليه طافت السيفونة(عفوا)بجنب الغاز والاهم انهم دخلو الرياض ورح يوصلو كل الاكل جاهز وساخن بقيان الكباب عبعمله وخدي فيضانات بارض المطبخ للمر والابشع التصريف مرتبط بسيفونة الحمام وبديت تطوف والممر موكيت عندي وخدي حرات ويوم جمعة ما بتلاقي سباكين فاتحين الاحلى تعلمنا السباكة بعد اختصاص الطب عملنا تحت اختصاص بالسباكة وظبطنا االامر انا وزوجي ويا مستعجل وقف لقلك هو عبيصلح السيفونات وبالجمع وانا عبقلي الكباب من طرف والسطل والمساحة عبعصر من طرف حتى ما توصل على الممر والماء ينابيع كانت حرة غير شكل وعذاب الحوسة النظيفة كله اعدته مرة تانية والحمد لله مشي الحال ومع دخول الضيوف كنت مخلصة بس شو تعب وشو حرة اركض ما اخلص وعفوا على اطالتي بس يعني مقدرة وضعك بس هيك دايما العزايم بتكون اما بفصولة او حتى بعدم نجاح اكلة بيكون الواحد عاملها ميت مرة وناجحة وقدام الناس بتطلع عادي يالله الحمد لله على السلامة

14  الكاتب منى, on 19-05-2009 19:05 هلا ام فايز   ردك و كلامك خلاني حس بهمك , بس و الله ربي بيسر و الامور ان شاء الله كلها بتكون تمام التمام باذن الله بس كل شي باوله صعب شوي   نصيحتي الك اول الشي تصفي النية و يكون قلبك مع الله و باذن الله رب العالمين بيسر الامور كلها , و تاني الشي ان تبدي بكل امورك و شغلك الصبح بكير لان ربنا مبارك لامة محمد في بكورها ..    بالنسبة للعزايم عندك الموقع الحمد لله فيه افكار كتيرة و ممكن تستفيدي منها و تكون عون و ممكن تحاكيني عن طريق اتصل بنا و اي خدمة أو سؤال عن ايا شي بيخطر ببالك انا تحت امرك .و فصة منيو برمضان فكرة حلوة بس بتاخد وقت كتير , ان شاء الله بحاول نفذها لرمضان الجاية     بدي ياكي تكوني قوية و متماسكة و ان شاء الله ربنا بيبارك بعيلتك كلها و بتكوني احلى ست بالعالم بعيون جوزك و بيت احماكي

15  الكاتب منى, on 19-05-2009 19:05 هلا ميسونة   الكويسات هي وصفة حلبية فخمة عبارة عن قطع لحمة طرية و ممتازة تنحشى لحمة و مكسرات و تقلة و تطبخ بمرقة البندورة , وصفتها مو صعبة بس شي مفتخر

16  الكاتب منى, on 19-05-2009 19:14 هلا ام ياسمين   بتعرفي دعائك ليا و ردك بيدخل لقلبي فوراً ربي يبارك بكل عيلتك و احبابك و انا كمان اتمنى تزوري سوريا و حلب و لافرشك الارض ورد و فل و ياسمين يا احلى ام ياسمين   منورة و الف الف شكر الك للتواجد الطيب و الكريم دوما

17  الكاتب منى, on 19-05-2009 19:14 هلا سارونات   وصفة كيك جوز الهند بدها صور تفصيلية لهيك لسا ما نتزلتها بس مو نسيانتها و كل الوصفات في السفرة رح نزلها واحدة وراء التانية باذن الله

18  الكاتب منى, on 19-05-2009 19:14 هلا بشرى   و الله و انا بعد ما خلصت و راحوا الضيوف قلت , شو هل الأعصاب القوية يا منى , عيني ما تصيني الهي ربي   بشورة حبيبتي القلب على القلب , ريتو خليلي الزوء و اللطف كله , ان شاء الله بتوصلي سالمة و غانمة و نشرب قهوة مع بعض شي يوم     تكرم عيونك الوصفات رح نزلها كلها باذن الله و ما رح اتاخر فيها متل كل مرة

19  الكاتب منى, on 19-05-2009 19:14 هلا ام كريم   ما انا جبت المبيض لعندي و فركت الأرض و الحيطان بايدي لحتى قالوا ارحمينا مشان الله   الله يخليك و يسلمك و نورتي مرة تانية ام كريم و ربي يخليك كريمك و كريمي و يباركالنا فيهم و في اخواتهم يا حق

22  الكاتب منى, on 19-05-2009 20:57 هلا رنونة   هادا بس من زووءك يا عسل و الله حضرت تارت الفريز خصوصي لعيونك لنفذ وعدي الي اكل عليه الدهر و شرب     و انا كمان قلت لحالي للحق حالي قبل ما يطلعوا الفضايح و كل شيء يبكشفن و يبان اتذكرت رية و سكينة     صورة الشاورما باينة باخر صورة و تكرم عيونك الحلويات كلها رح نزلها الواحدة وراء التانية باذن رب العالمين

23  الكاتب منى, on 19-05-2009 20:58 هلا غيوثة   وووولي شو هاد , صحي الي بيسمع او بيقرا مصايب غيره بتهون عليه مصيبته , كل شي الا البلاليع ما الها حل   و متل ما قلتي اما بيصير مع الواحد فصل مرتب او بيحرق او ينزع شي وصفة او بينسى شي وصفة .    الحمد لله كل شي بالخير مشي الحال بعزيمتك و عزيمتي و أخر الشي الف هنا و عافية على كباب مفاجات

24  الكاتب منى, on 19-05-2009 21:03 هلا لين   نورتي و شرفتي و ان شاء الله جازة الدهر كله أختي و ان شاء الله كمان ترجعي لسوريا سالمة و غانمة باذن الله   هل الكلام بس من زووءك اختي و شرفتينا مرة تانية

25  الكاتب منى, on 19-05-2009 21:06 هلا هيا   اتفضلي حبيبتي و الاكل على قد المحبة , بتشرفي و يتنوري و الله   الوصفات مو كلها موجودة و انا رح نزلهم الواحدة وراء التانية باذن الله و تكرم عيونك اختي , من دون سؤال

26  الكاتب منى, on 19-05-2009 21:08 هلا سمسومة   الحمد لله اني نسيت و لما شفت الضيوف و كيف كانوا مبسوطيين نسيت كل تعبي و كل الفصول الي صارت فيني     كلك زووء سمسومة و كتير انبسطت ان السفرة عجبتك

30  الكاتب ام دانية, on 19-05-2009 23:27 الله يحميكي من العين ويسلم دياتك بس بيني وبينك تمنيت اكون بدل خالك بالعزيمة لانو والله فرط قلبي من منظر الطاولة ايه مالك علي يمين بدي شي خمسين سنة تانية لاحسن اعمل نص هل السفرة الي عاملتيا

31  الكاتب نور الأسلام, on 19-05-2009 23:44 السلام عليكم عيوني صاروا هيك لما شفت السفره الله يعطيكم العافيه وريتو الف صحه وعافيه للجميع شو هدا الي صاير معكم انا لما اطبخ طبخه بتلبك مية تلبيكه كيف اذا هيك سفره الله مين الاموره الطالعه بالصوره الله يديم عليكم الصحه والعافيه وتحياتي الك

33  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 20-05-2009 07:26 ييييييييي يا منى له له له على هالفصول يلي صارت معك الله يعطيي العافيه. والله انا عم بقراء و صدقيني انو ارتفع ضغطي و تقريبا عرقت و حسيت فيكي و خاصه قبل ما ييجوا الضيوف و الله انو اشي بيكركب بس وينك يالالا هادا خزات العين عنك. بسم الله ما شاء الله. ربنا يحميكي و يقويكي. و الله انو سفره بترفع الراس. بس كلو كوم و البيض كوم و زفاره البيض يييييي. منى عنجد اسم الله عليكي حبيبتي سفره بتشهي و قولي لخالو تقي ما يبقى يطول الغيبه علشان تتحفينا بهيك سفر. و مثل ما بيقولو بالخليج بيض الله وجهك يا منى. و الله يخليلك بنتك انا كتير مبسوطه انو عندها حب للمطبخ الله يرضى عليها. انا بموت و اشوف بنتي زينه داخله معي عالمطبخ بس وين مثل ما بيقولو عشم ابليس بالجنه هههه. على قد ما بحب المطبخ على قد ما هي ما الها خلق. علشان هيك بفرح كتير لما بشوف بنوته صغيره بتحب الطبخ مع مامتها. ان شاء الله بتشوفيها عروس و بتفرحي فيها يا رب. سلام.

36  الكاتب منى, on 20-05-2009 12:14 هلا ام جود   الحمد لله على كل شي و الله يخليلي ياكي و يسلمك أختي , ان شاء الله بتعيشي لحبابك بالصحة و العافية و الهنا و التقى

37  الكاتب منى, on 20-05-2009 12:56 هلا ميوسة حبيبتي   خليلي عينك على هل الرد الحلو و الدعوات الغالية و الكريمة , ربي يفرحك باحبابك و بكل الغوالي عليك و يكونوا الك و تكوني الهم متل ما ربنا بده   تكرم عيونك الوصفات كلها على الطريق و اولهم الكبة الصاجية

38  الكاتب منى, on 20-05-2009 12:57 هلا ام دانية   مية السلامة بهل القامة و بتشرفينا و بتنورينا و الله ..    ان شاء الله بس ما تاخد ايدك على الشغل بتعملي أحلى العزايم , مو 50 سنة حرام عليك , جوعتينا

39  الكاتب منى, on 20-05-2009 12:57 هلا نور   معك حق و الله الواحد بيتلبك و بيصير معه فصول و السبب كله العبطة و الشغل اخر دقيقة   الله يخليك و يحفظك حبيبتي و نورتي و شرفتي

40  الكاتب منى, on 20-05-2009 12:58 هلا ام عمر   هادا بس من زووءك يا عسل , ان شاء الله بتوصلي بالسلامة على الشام و بتشرفي و الله حلب و بتنوريها

42  الكاتب لارا مينا, on 20-05-2009 20:25 مساء الخير أخت منى ...والله تسلمي على الصور وعلى العزيمة وشكرا كثير كثير,, بتعجبني كثير صور العزايم وخصوصا المرتبة ويمكن تفرحني أكثر من الوصفات وأجلس أفتح على نفس الصفحة عدة مرات ... و لو غيرك ومع كل إلي صار يمكن يحرم العزايم على نفسه أقل شيء سنة.. بس المهم النتائج في الآخر والحمد لله كانت 100% وربي أعطاكي على قد نيتك الطيبة... وياترى وين يخنة البازلاء هي بالوعاء الأبيض المغطى ؟   وكمان فيه صينتين بايركس وحدة جنب الكبة المبرومة والثانية جنب الكبة بالصينية, وحدة منهم لقمة تشيكن والثانية شو ؟ ( كأني محقق وعم إستجوب المتهم )  وشكرا على المقدمة تسلينا كثير وإحنا عم نقرأها وكل سطر بيروح أتحمس للسطر إلي بعده وكأني أشوف مسلسل أو أقرأ قصة وأبغى أعرف نهايته بسرعة . الله يبارك لك في أولادك وعقبال إن شاء الله يارب مانشوف وصفات يكتب فيها فوق الوصفة مباشرة الكاتب / جودي...تحياتي

43  الكاتب منى, on 21-05-2009 11:15 هلا امونة   خليلي عينك أمولة على هل الرد المزوء و الحلو و الي ما بيطلع الا من قلب طيب   ابوس عينهم جودي و فرح التنتين بيحبوا المطبخ كتير , و هي فرح من امبارحة لليوم عم تطلب مني ان تعمل خبز , بس بشرط لحالها و عم تقلي و الله يا ماما بعرف أعمله لحالي     ان شاء الله تشوفي زينة متل ما بتحبي و تملى قلبك فرح و سرور بالدنيا و الأخرة يا حق

45  الكاتب منى, on 21-05-2009 11:16 هلا رنوشة   الله يعافيكي حبيبتي كله الا المرض , ان شاء الله معافاية و كانت مرضة معداية   سبحان الله , الا ما يصير الواحد معه شي شغلة بالعزايم , الحمد لله ان بالخير كانت على خير     ربي يخليلك اولادك و تشوفيهم شباب و صبايا و يكونوا متل ما بتحبي و بيحب الله

46  الكاتب آرام, on 21-05-2009 14:29 لا تصدقي أختي .. والله ما ببيع الموقع بكل مواقع النت أصلاً ما بسترجي! بعرف أنو بكبسة زر بترميني برا وساعتها بموت من الجوع .. وبصير أتحسر على أيام الفول لقمة طيبة الو فضل كبير علي .. صار لي أكتر من شهرين عم آكل من طيبات هل الموقع .. وصرت مجرب أكتر من 25 وصفة معظمها جديدة علي تماماً .. وبعض الوصفات الي بعرفها من زمان صرت أعملها على طريقتك!  بس عندي سؤال أختي .. بوصفة الكنافة أم النارين ذكرت أنك بتعملي النابلسية بنوع مختلف من الكنافة، شو هو هل النوع؟ وشو الفرق بين أم النارين والنابلسية غير الحشوة (جبنة حلوة بدل اللبة)؟

47  الكاتب نوارة, on 22-05-2009 16:42 ما شاء الله عليكي يا منى  الله يعطيكي الف عافية   بتعرفي كنت حاطة ماما مثلي الاعلى بالعزايم الهيئة لازم اغير (لا تقوليلها)  تخيلي بلشت افكر انو حلمي اعمل هيك عزيمة ومشان افلام الكرتون اللي صارت معك بالعزايم ضروري هيك افلام  وقت بنزل على سوريا بحكيلك على افلامي

48  الكاتب منى, on 22-05-2009 18:55 هلا لارا     كتير انبسطت ان السفرة عجبتك و كمان انك اتسليتي بأحداث ما وراء الكواليس ., ربي يديم الصحة و العافية و يديم نعمة علينا و يديم الحبايب و يبقى الواحد يعمل دوما احلى عزايم     الطبق المطلوب هو الرز المفلفل و هلا لعيونك رح عدل الوصفات و اذكره مع رابطه و الوعا الأبيض فيه البازلاء     ألف شكر الك للدعوة الغالية و ربي يبارك باحبابك و الغوالي عليك و جودية محضرة كم وصفة رح تنزلهم بالصيفية ان شاء الله و هنن وصفات خاصة بالأطفال

50  الكاتب منى, on 22-05-2009 19:02 هلا نوارة   لا هيك رح يكبر راسي كتيرررر , ما انا بعد حفلة تخرجك ما بقى تعجبي ايا عزيمة بقى كيف تقارنيني بست غيثاء خانم     ان شاء الله توصلي بالسلامة و تحكيلي كل قصصك , و نحنا عم ناكل همبرغر باباي

52  الكاتب منى, on 31-05-2009 20:01 هلا نسرين   الوصفات الناقصة عم نزلهم واحدة ورا واحدة , بعرف اتاخرت عليكي بس لسا اليوم خلصوا الامتحانات وز ما كنت فاضة الا يا دوب شيك على الموقع كل يوم كم دقيقة     الله يسلمك و يحفظك و ان شاء الله رح نزل الوصفة هل اليوميين باذن الله

54  الكاتب منى, on 08-06-2009 09:52 هلا وداد   يا ستي بتنوري و بتشرفي , اامين ربي يديم نعمة و يعرفنا اياها بدوامها مو بزوالها , اامين يا رب .    الاقتراح وصل , بس انا ما رديت على الريالة لان كنت مسافرة و لسا امبارحة رجعت , , ان شاء الله وداد , فكرة وصفات للريجيم عم حضر الها من فترة , اما أكل الاطفال لسا ما عندي اله أفكار , ربي بيسر ان شاء الله     نورتي وداد و الف شكر الك للردود و التواجد

55  الكاتب ام احمد الغالي, on 10-06-2009 01:09 يسلمو ايديكي يا منى   تعيشي وتعملي عزايم بس بخسائر اقل عن جد لو كنت محلك ما بعرف شو كان صارلي

56  الكاتب منى, on 10-06-2009 11:30 هلا ام احمد   ااامممين اختي ,الله يسلمك و يحفظك .  لو كنت محلي بيعين الله و ما بتعرفي من وين بيجي التيسر

57  الكاتب بدور, on 11-06-2009 01:49 يا سلام على هالعزيمة وهالسفرة الروعة والله هي للنظر مو للأكل..     عبمزح طبعا مو تصدئي.. هي للنظر وللاكل كمان وين نتركلك كل هالاكلات الطيبة     بس عنجد ما شاء الله عليكي على هالاعصاب القوية والله لو كنت محلك كنت تركت كلشي و ئعدت ابكي     وكمان في مفاحئات وبآخر وئت لتحدد نوع الأصناف يلي رح تعمليها؟!    يا سلام! الله يحميكي و يباركلك بجودي الشطورة أبوس روحها ويباركلك بكل اخواتها يارب.

58  الكاتب منى, on 11-06-2009 13:47 هلا بدورة   شو اعصاب قوية , ما على عينك يا تاجر , كم مرة حرقت صوابعي و انبحتت     خليلي عينك بدورة على الدعوة الحلوة , ااامين يا رب و اشوف منهم خير كتير و انت كمان من كل احبابك و عيلتط

59  الله يسلم ايديكي الكاتب زيد, on 13-09-2009 13:06 ياريتني خالو تقي بس لهل سفرة

61  مــــا شـــــــاء اللــه الكاتب lolli, on 28-11-2010 18:30 سلامات اخت منى   عن جد انا برفعلك الشبو متل ما بيقولو هيك هون ببروكسل لما بيعجبو بحدا و بيقدروه  و بتشكرك كنير انك مخففة علي الغربة و محسستيني اني بحلب و بين رفقاتي و العزايم و الجمعيات الغير شكل  بس بصراحة لما شفت هالعزيمة شعرت اني مو من هالعالم و اني بعيدة الاف السنين الضوئية عن اني اعمل هيك سفرة شي يوم حتى لو عندي كل الوصفات      بالغربة مافي قرايبين كتير يزورونا و نزورهم لذلك العزايم اللي عملتهم بينعدو ع اصابع اليد الواحدة    و مع ظلك اخر عزيمة كانت برمضان ل4 اشخاص بس  بس متل كل مرة .... هنن الضيوف بيروحو من هون و انا بفلت من البكا من هون   كنت بدي اعمل بايلا بالسمك و شوكي ورز و سمبوسك اللحمة و تبولة و سلطة يونانية و طبعا لانو رمضان فاخترت شوربة الحريرة المغربية    لقبل الافطار بساعة كان كلشي خالص و بقيان علي  اطبخ الرز ليكون خالص مع موعد الاذان و تسخين الشوربة ما بدي اطول عليكي  بس الرز البسمتي ما استوى و علقو بالتالي ما صار في بايلا و شوربة الحريرة علق الحمص و العدس و احترقو و طلعت طعمة الحرق فيها  و كلنا اكلناها بالزور وكانت عزيمة فاشلة و نهايتها بكا من قلب محروق    و جوزي بيصير يقلي هي اخر مرة منعمل عزيمة  ما بكفيني اني مابشوفك يوم قبل العزيمة و يوم العزيمة و يوم بعدها بالتنضيف و الجلي و بالاخير بتكوني زعلانة و بتبكي    و انا بحس اني مضيعة الحل و ان شاء الله انتي ح تكوني السبب بإنك تعلميني السر او الاسرار للنجاح    وبينوبك مني الثواب و انا رح ادعيلك الله يوفقك و يجعل حياتك و عيلتك و اطفالك حياة سعيدة فيها من القناعة و الرضى الكتير     لذلك ياريت تقليلي كيف ترتيب تجهيزك لهالسفرة من اول يوم  و شو بتتركي لاخر ساعة  و كيف الاكل بكون كله سخن للحظة وصول الضيوف؟    اسفة اني عم تقل عليكي بس منتظرة منك الحل

62  الكاتب منى, on 28-11-2010 20:22 هلا لولي   و لا يهمك و لا تزعلي على الي بيصير , لا تفكري ان انا بكون رايقة و هادية كتير قبل هيك عزيمة كبيرة , بصير من عبطتي ما بعرف حالي و مع اني عندي خبرة 14 سنة , بقى انتي هلا لسا جديدة على المطبخ و الا ما تغلطي كم غلطة لحتى تزبط معك ..    شو بعمل بهيك عزيمة , خليني احكي عن هل الوصفات     قبل اسبوع , بلف اليالنجي بحطه بالفريزر , قبل بيوم من العزيمة اطبخه و اخليه بمرقه لتاني يوم , بحبه كتير هيك و بحسه بيشرب حمض غير شكل     قبل يوميين بجهز الكبة و بخليها بالفريزر     قبل بيوم هو اهم يوم و هو الي بخلص فيه الشغل , بجهز حشوة الاوزي , بطبخ البازلاء كلها خالصة , بجهعز المحمرة , بسلق الدجاج للفريكة و فخدات الدجاج و السلطة و بتبل جاج الشاورما, لقمة تشكن و الشوكي بجهزهم للأخر بس من دون الخبز و على التغليف و على البراد , المحمرة كمان بجهزها . بجهز قوالب الكيك بس من دون تزيين . و بجهز عجينة التارت و بالفريزر . و اخر الشي بجهز كل خضرة السلطة و بكياس نايلون على البراد , بعدها بكون خلص النهار و بكون انهد حيلي برتب السفرة , بمد المفرش و الصحون و الكاسات و الملاعق , خلصنا     يوم العزيمة الصبح بجهز الكاتو , بحشي الأوزي , و بخبزه , بخبز الكبة و الشوكي و اللقمة تشكن , و لازم احسب حساب كل طبخة شي ساعة بالفرن و فكر ان لازم خلص قبل العزيمة بساعتين . و على هل الاساس بحمي الفرن و ببدى بالخبز .    الفريكة بطبخها بكير و بتركها بطنجرة الضغط لحتى تتهدى و بتبقى متل النار     القلي كمان قبل ساعتين على الاقل من العزيمة لازم يكون خالص , اخر الشي تتبيلة السلطات ..    بهيك عزايم ما بكون لوحدي ابدا , على الاقل في ماما و واحدة من خواتي عم يساعدوني , ما عدى واحدة بيومها خاصة للجلي و التنظيف , اكيد ايد وحدها ما بتصفق     شو كمان , ايه , بالنسبة للرز دوما خليه يكون خالص قبل ساعة من الموعد , منها بتكوني رايقة و منها بيتفلفل     اخر ساعة بس تسخين بسيط للأطباق و انا ما بحب تسخين الميكروويف لهيك بتغلب شوي لان كله بده شي عشر دقايق تسخين من اول و جديد     هادا كل شي , لا تزعلي ابدا لان صار معك فلم ناقص , انا برمضان الي مرق عزمت ام زوجي على لحمة بالصينية مع شوربة و سلطة , في اسهل منها , ما زبطت و لا استوت و كانت طعمتها سايطة , بقى وصفة واحدة و شخص واحد معزوم و ما كانت العزيمة ناجحة , بتصدقي بحس ان كل شي توفيق من رب العالمين . طبعا التخطيط المسبق مهم , بس كله بالاخير توفيق     ايا سؤال من عيوني انا دوما بالخدمة و الف شكر الك للدعوات الحلوة الكريمة من اخت كريمة

63  الكاتب lolli, on 01-12-2010 11:02 صباح الخير اختي منى    انا مو حابة اني اتقل دمي و حل ثقالتي بس حابة اني اعرف شو رأيك باقتراحاتي     مافيني اقلك غير انو ماتنسيني و انا ناطرة ردك

64  الكاتب منى, on 06-12-2010 07:46 لا مو نسيانتك , بس انشغلت شوي     بس بدي خبرك شي , ان انا بس بجهو الخضرة تبعة السلطة من دون فرم , يعني بنضف الخس و الزعتر انتفه و اجهز الجرجير , و يو العزيمة بقطعهم لحتى يبقوا فريش و تازة    طبخ الرز موجود بقسم اساسيات , فيك تشوفيهم بالتفصيل     رح ابعتلك ايميل لحتى ترجعي تبعيلي الوصفات , شو رايك هلا شيل ايميلك من ردك     بالنسبة للموقع , هلا في شي لتحديثه و ان شاء الله منحط الميزة الي ذكرتيها فيه    شكرا كتير لدعواتك و ايا خدمة تانية من عيوني

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved