متبل الفول الأخضر

أكيد عم تقولوا لحالكم شو بها هل المخلوقة ؟ هلكتنا بالفول ؟ ما عم تطبخ غير فول بفول بفول ..

صح , و لهل الشهر ما عم اطبخ غير فريش و من خضرته , يعني بازلاء , شوكي و فول و منعيد بازلاء و شوكي و فول و منعيد بس طبعا اشكال و الوان و الطبخة الوحيدة الي عم تتكرر هي سلطات الفول الشامي و الحلبي ..

اليوم عندنا متبل الفول , شو يا جماعة حكاية , من لونه الي طابق على الموقع و طالعيين أخر حلاوة , لطعمته الطيبة فيها شي من القرمشة لأن الفول مو مطبوخ مع الزعتر الأخضر و الليمون , طيبة كتير .

كتير تحضره سهل و اذا عندك فول أخضر طازة و حابة تطبخي منه رز و فول أو شي تاني , ارفعي منه كاسة و جربيها و ان شاء الله بتدعيلي .

أنا بقدمه مع شرايح خبز محمص بزيت الزيتون و ممكن تقدميه على شرايح توست محمص ,اذا حابة يكون نوع من السندويش أو الوجبة الخفيفة .

بالصحة و الهنا

كوب فول أخضر طازج مقشر
2 ملعقة كبيرة زعتر أخضر طازج مفروم
فص ثوم
ملح
رشة كمون
رشة فليلفة حمراء ناعمة
2 – 3 ملعقة كبيرة عصير ليمون
3 - 4 ملعقة كبيرة زيت زيتون





·          يدق الثوم بالهاون ثم يضاف الفولو يدق حتى يصبح ناعماً و لكن مع بعض القطع الخشنة .

·          تضاف بقية المقادير و يعدل الحمض حسب الرغبة ثم يقدم فوراً .


فكرة سريعة :

يمكن أن يحضر المتبل قبل وقت التقديم بعدة ساعات , تضاف كل المقادير  ما عدا الليمون لأنه سيجع الفول يفقد لونه الشهي .

تعليقات (10)

1  الكاتب freesoul, on 17-05-2009 13:11 يا سلام على هالفولات شي كتير بيشهي . راح انزل على السوبرماركت بلكي بلاقي فول اخضر وزعتر   اكيد بتعرفي انو بالسعودية مو دايمن منلاقي هالخضرة التازة

2  الكاتب منى, on 17-05-2009 15:51 هلا ام جوود   ان شاء الله بتلاقي هل المرة و تجربي الوصفة و تكون على زووءك و متل ما بتحبي

3  الكاتب غيث, on 17-05-2009 16:12 الله يسلم ايديك منى والى الاخت اللي في السعودية اقول انا بالرياض اشتريت فول اخضر نازل بالعثيم وعرض كمان لا تزعلي وانا رح اجيب كمان ان شاء الله منشان هالاكلة ومنشان اعمل برغل بفول لاني والله الخميس جبت الفول ولما جيت ا لجمعة لاعمل البرغل بفول انصدمت ما بقيان عندي برغل وابو الشباب بيوم عطلته ماله نفس يطلع من البيت وخصوصي اني الخميس كان يوم تسوق عالمي المهم عملت ارز بفو ل و سلطات الفول الحلبي والشامي وخيرها بغيرها لسع بدي جرب البرغل بس هاليومين قولة منى هلق موسم هالاكلات اذا راد الله وشكرا منى على فولاتك السورية (الشامية والحلبية)لذيذين واليوم كمان غيرت شكل عن الفول عملت المعكرونة بصلصة البيزا على طريقتك كمان كتير احبوها ولاقت استحسان علما انني للمرة التانية بعيدها وكانهم عباكلوها اول مرة وهم ممنونين من لذتها شكرا منى الله يعططيك العافية

4  الكاتب سارونات, on 17-05-2009 17:25 السلام عليكم و رحمة الله و بركاته    شو هالالوان و لا المكسيك     انا يمكن جرب هالوصفة بس مو متأكدة لان بخاف ما ياكلو الفول ني يلا راح منشوف    اختي منى بدي الرز بفول اللي عم تحكي عنه و كمان يا ريت تقوليلنا طريقة تحميص الخبز يعني بس منقطعو مثلثات و ندهنه بالزين من فوق و تحت و نحمصه لان مو مجربتها من قبل    بالتوفيق  سلام

5  الكاتب منى, on 17-05-2009 17:57 هلا غيوثة   الف هنا على السلطات , ان شاء الله يكونوا عجبوك و عجبوا الباشا و بقية العيلة و مية الف صحة و هنا على المعكرونة ريتو مطرح ما سرى مرى     ان شاء الله تجربي هل الوصفةو الفول مع البرغل و يعجبوك و يكونوا على زووءك و اكيد بتخبريني

6  الكاتب منى, on 17-05-2009 21:04 هلا سارونات   بالعكس لشو تخافي في كتير خضرة طعمتها بتجنن و هي خضرا و مو مطبوخة و هي وحدة منهم , تكرم عيونك على الرز بفول أكيد باذن الله رح نزلها مع وصفات هل الربيع و كمان رح نزل الك وصفة الخبز بالتفصيل

7  الكاتب سلاف, on 18-05-2009 20:01 سلم ايدكي منى00 والله طلع هالفول مو قليل ابدا وبينعمل فيه وصفات اشكال وألوان00   منى ياليت تنزليلنا وصفة الشوكي بلحمه جاي عبالي ساويها وبما انه هلأ موسمها الله يعطيكي العافيه  بس لاتطولي كتير لاني بعد 20 يوم ان شاء الله بكون بسوريا بدي ساويها لزوجي قبل ماسافر   الله يعينك علي بعرف طلباتي كتير بس مالنا غنى عنك ولا عن اكلاتك اللي منشم ريحتها على بعد 3000 كيلو متر00  ثانكس يااحلى منى بالدنيا

8  الكاتب منى, on 19-05-2009 11:11 هلا سلوفة   تكرم هل العيون و الله كل فكري منزلة الوصفة   و لا يهمك أختي و ان شاء الله بتوصلي بالسلامة انت و كل عيلتك

10  الكاتب منى, on 09-10-2010 13:05 هلا كراميلا   لا تزعلي مني لان اتاخرت بالرد عليك , حقك علي    هلا انا بما بدي اطبخ الفول فورا بس ما قطعته بحطه على النار , بس هي الاكلة بطبخها مع لحمة و مرقه .  اما الرز بفول فاستعمل بس قلب الفول و هادا رح يسود على الطبخ ما في مجال لو شو ما عملتي .    اما اذا حابة يبقى الفول بلونه الاخضر الحلو ففيكي تستعملي بس اللب و هادا رح يبقى محافظ على لونه الحلو     طريقتي كتير سهلة , ااقلب مكعبات لحمة مسلوقة بالسمنة و بعدها اضيف الفول و اقلبه شي 10 دقايق لحتى يستوي و بعدها بغمرهم بمرق سلق اللحمة و اركز الملح و البهار و اضيف رشة قرفة و هال و اتركه لحتى يستوي الرز     يا ترى هادا هو الي عم تقصديه و الا في شي تاني ؟

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved