الأفوكادو مو من الخضار الي أستعملها كتير بمطبخي , بس لما أجيب كم حبة أفوكادو بيصير عندي مهرجان من الوصفات , و كل وصفة أطيب من التانية ..
الأفوكادو فيه طعمة بحسها قريبة على طعمة الفستق الحلبي , كيف ما بعرف , بس هادا هو الاحساس الي بيجيني لما أدوقه , نكهة فيها شي كريمي طيب و هو من الخضار المليئة بالفوائد .
حضرت أقراص البطاطا و كانت وصفة شهية كتير و سهلة ومنظرها ملفت للنظر , بس حسيت ناقصة شي لتصير وصفة مميزة أكتر و كان بالبراد عندي أفوكادو فخطر الي زينها بصلصة غواكامولي بس من نوع تاني و كانت لمسة حولت وصفة عادية لوصفة راقية .
قدمت معها سلطة خضراء و زينتها بالفريز المفروم . كانت نيتي مجرد زينه , بس طلعت طعمة الفريز طيبة مع الوصفة و مكملة لكل النكهات الي فيها , ما أنا بحب النكهة الحلوة بالطبخ , ايه انا حلبي و اه يا نيالي !
مثل اليوم :
وجع الفلس و لا وجع الضرس
بالصحة و الهنا
2 حبة بطاطا متوسطة الحجم بصلة متوسطة الحجم رشة ملح و رشة صغيرة فلفل أبيض ملعقة كبيرة كزبرة خضراء مفرومة بيضة ملعقة كبيرة زبدة
صلصة الأفوكادو :
حبة كبيرة أفوكادو ناضجة 2 ملعقة كبيرة قشطة بضع نقاط عصير ليمون ملح و رشة فلفل أسود فص ثوم صغير جداً مهروس
·تقشر حبة البطاطا ثم تبشر مع البصلة و تعصر بين راحتي اليد بشكل لطيف للتخلص من ماء البطاطا الزائد .
·تخفق البيضة بالشوكة مع الملح و الفلفل الأبيض و تضاف مع الكزبرة الخضراء للبطاطا .
·تقشر حبة الأفوكادو و تهرس بالشوكة حتى تصبح ناعمة .
·تضاف القشطة للأفوكادو مع عصير الليمون و رشة الملح و الفلفل الأسود و الثوم المهروس , أصبحت الصلصة جاهزة .
·تذوب الزبدة في مقلاة غير لاصقة على نار متوسطة ثم تدهن كل المقلاة بالزبدة المذوبة باستخدام فرشاة .
·تصب ملعقة من مزيج البطاطا في الصينية و يفرد المزيج لتشكيل دائرة مسطحة نوعاً ما و بسماكة بضعة مليمترات , و تترك حتى ينضج أول وجه و تصبح البطاطا ذهبية و مقرمشة .
·تقلب على الوجه الأخر و تترك حتى تنضج ثم تقدم فوراً مع صلصة الأفوكادو .
أفكار و تنويعات :
يمكن أن تحضر أقراص البطاطا و تحشى في صمون مع أقراص الهمبرغر و شرائح البندورة و المخلل و المايونيز .
تعليقات (12)
