فولكينو كوب
 

من وقت ما اجا وقت الفريز و أية عم تقلي يااي يا منى عم حضر عصير بيجنن , فريز مع برتقال , جربيه , و انا عم ااقول الها إن شاء الله , و كل يوم بيطلع الي مية شغلة و بجي لأخر اليوم و بتكاسل حضره و بترجع تحاكيني اية بعد كم يوم و تقلي يمممي لسا ما جربتيه !

قرب وقت البرتقال يخلص و انا لسا ما جربت عصير لولو , و من كم يوم جابلي أبو الشباب برتقال عصير و قال لي كل سنة و انت سالمة , هي أخر برتقالات بجيبهم لان البرتقال قرب ينشف !!
لااا طبعا وين يروح علي عصير لولو , لازم لحق حالي . حضرته و جهزت ورشة التصوير و بعدها  سكبته بالكاسة , واااو ما بقى أعرف ركز أفكاري و قعدت و أتأمل و قول لحالي , ايه شو هل الزووء يا أية , ايه شو هل البتك و الفن كله , ريتو يسلملي ريتو , لو يعرف هل العصير شو حبيتو ..

شو رأيكم الاسم لابقله و الا نو ؟

على فكرة العصير بث حي و مباشر من أأقل من عشر دقايق صورته و  هلأ عم اشربه و اكتب وصفته , و الله نيالي و كمان شي , الصورة من اخراج جودي , أقصد البوز الي قاعدة فيها الكاسة و كمان  الرسمة الظاهرة من وراء هي الي متل الموساييك هي رسمها : جودي أحلى صبية بحلب و ما يحيط بها
 

بالصحة و الهنا

كوب عصير برتقال
ثلاث أرباع كوب فريز مقطع
ثلث أو نصف كوب ماء
1 – 2 ملعقة كبيرة سكر





·          يوضع الفريز و السكر و الماء في خلاط العصير و يمزج حتى يصبح بيورييه ناعمة .

·          يصب عصير البرتقال في كوبي عصير بحيث يملأ نصفهما .

·          يصب فوقه عصير الفريز و يقدم فوراً .

تعليقات (27)

1  الكاتب رنا, on 11-05-2009 19:09 ماشاء الله شو هالنشاط يامنى كله لسه من ربع ساعة كنت عالموقع وماكان في شي  شو هالكوب الي بيجنن وانا بعرفه تقريبا لان سلفتي كمان الها مراء بتحضير كذا نوع عسير فوق بعضهن وبيطلع معها شي كتيير كتير حلو وكل كوب كأنه لوحة فنية وماشاء الله عليها كله اختراع وبدون مقادير كمان   بس هالفولكانو اللي عندك شكله حلو وعن جد بيبل القلب يسلمووو ايديكي الحلوين وسلاماتنا لايوشة

3  الكاتب منى, on 12-05-2009 06:31 هلا رنونة  ايه و الله معك حق , الحمد لله رب العالمي الله يديمها نعمة هلا حاسة بنشاط , كان الجو اله علاقة بالمزاج كتير     سلامك وصل و ان شاء الله تجربي هل الفولكينو و يكون على مزاجك و يناسب روقانك

4  الكاتب منى, on 12-05-2009 06:51 هلا غيوثة   حبيبتي لو فيني احضره الك و انت تبقي مرتاحة لحتى تشدي منيح     الف شكر للمعلومات , قرأتها اكتر من مرة لحتى احفظها مننيح بذهني ,. الشكر الك يا قمر و ان شاء الله تجربي العصير و يعجبك

5  الكاتب MeshMesh, on 12-05-2009 11:20 هلا منى وشكرا على استجابتك السريعة في حل مشكلة التواصل معك..ها العصير شكلة رائع وعندي هلأ الفريز والبرتقال ورح جربه بعد الغدا..أنا كمان بعمل موز مع الحليب لحالهن وبجيب بيوريه الفريز متل اللي سويتيه وبصبهن في كاس طويله من على جنب لأقل من ثلث الكأس وبعدين بصب الموز المضروب مع الحليب لحتى قبل الحافة ب 2سم وبعدين برجع زيد عليهن الفريز من منتصف الكاس حتى يصير باين الفريز من النصف وحوله الموز بحليب (من فوق) وإن شالله رح أبعتلك صورته..وشكرا على استضافتي بهاي الموقع الرائع

6  الكاتب نور الأسلام, on 12-05-2009 12:19 اي اشو هادا خيتو عصير روووووووعه تسلم دياتك وديات ايه واكيد احلى الصبايا جودي اكيد رح جربو ان شاء الله والله اشتقنا لربيع بسوريا

7  الكاتب منى, on 12-05-2009 14:05 هلا مشمش   ما داعي للشكر هادا الواجب و اسفين للازعاج     ممم , فكرة حلوةة كتير ان شاء الله بجربها المرة التانية و اكيد بتطلع طيبة     نورتي و شرفتي و مية اهلا و سهلا فيك

8  الكاتب منى, on 12-05-2009 14:06 هلا نور   خليلي عينك و لا تبكي مشان الله , ان شاء الله بترجعي سالمة و غانمة حبيبتي     الله يخليلك احبابك كلهم نور

9  الكاتب سلاف, on 12-05-2009 17:47   يسلم هالايدين يارب 00 على حظي مابقى يمكن فيه فيرز خلص وقته رح استبدله بالمثلج المهم دوق هالطعمه واتمتع بهالالوان اللي كلها جاذبيه   كتير حلو اسمه للعصير وهلأ بالصيف مافي اطيب من العصيرات وتكون بارده الله يعينا عالصيف بلشو الشوبات   وشكرا لغيث اللي عم تقلنا معلومات مفيده وشكرا لصاحبة العصير ايه والك منوش الف شكر والله يخليلك جودي واختها واخويها ويحفظهن يارب وتشوفيهن متل مابتحبي 00

10  الكاتب منى, on 12-05-2009 19:16 هلا سلوفة   و انا رح شيل شوية فريز لخاطر هل العصير .    الله يعينكم بالسعودية عندكم فرن مفتوح , نحنا الجو احسن شوي و انا بيعدي علي وقت بشتهي اطلع من جلدي     الف شكر الك للدعوات الحلوة و ربي يخليك اولادك و تشوفيهم ملو العين و القلب

11  الكاتب بشرى, on 12-05-2009 23:47 منى الحلوة .. قريت الوصفة ورحت طبقتا بعد العشا ما أطيبها .. هلأ شربت كاستي وزوجي وبنت حمايي شو حبوه .. يسلمو إيديكي يارب يا أم الأفكار ..    وحتى عملت كريب وزينتو بالشوكولا البيضا والسودا .. طلع منظرو بيشهي .. يسلم إيديكي يارب ..

12  الكاتب ام محمد, on 13-05-2009 07:56 صياح الخير منمون   كنت محتارة وين اكتب تعليقي بصفحةمفركة الفول  ولاكاتوايس كريم ولاايس كريم الفواكه   فقررت اكتبها هون ليش مابعرف يمكن العصيرله تاثير   المهم ياستي عملت المفركة من يومين وعجبت زوجي كتيروقلي عن جد نغم وكاتوايس كريم ماحدا صدق انوشغلي طلع مثل الجاهز واطيب والبوظة ياعيني  على البوظةكان في عندي مانجومستوية قلت لحالي   قومي وجربي الايس كريم وانا عم اساويه دخل زوجي على المطبخ وقلي ليش العذاب مليان ايس كريم بالسوق   قلتلوحابه اجرب وعينك يا منى تشوفي ولادي كل ما اروح على الفريزر احرك البوظة يلحقوني ماما طعمينا هيييييييييك لصار نص الصحن فاضي وبعد ماجمدت سكبت لزوجي ومن اول لقمة قلي خلص انسي بوظة السوق ماتوقع انو هالموكونات البسيطة تطلع بوظة بجنن يعني عن جد يامنى الله يعطيكي الف عافيةويسلم دياتك  طولت عليكي سامحيني

13  الكاتب منى, on 13-05-2009 18:38 هلا بشورة   الف هنا و عافية على قلبك و قلوب العيلة الحلوة فردا فردا على العصير و على الكريب , بالهنا أختي و مشكورة تجربتك وصفاتي

14  الكاتب منى, on 13-05-2009 18:39 هلا ام محمد   الله يسامحك شو طولتي , بالعكس شو شهيتيني دوقها بالمانجا , و لا مرة ما جربتها فيها لسا , ايه صحة و الف الف هنا على القطط الصغيرة ذكروني باولادي كل ما بعمل بوظة , بس انا اولادي صاروا في مراحل متطورة اكتر و ممكن اجي اشوف الصحن فاضي على اخر بس متروك بالفريزر درءأ للشبهات , و الكل ينكر الجريمة     الف هنا على قلبك و قلب اولادك و زوجك و مطرح ما يسري يمري

17  الكاتب منى, on 13-07-2009 12:28 الله يسلمك سمورة و يا ريت تجربيه و يطلع معك لسا احلى

19  الكاتب منى, on 28-07-2009 12:56 الله يتقبل صيامك يا رب , ولي على البي الدني حراقي . ربي يسر عليك    ان شاء الله تجربيه دمدوم و يكون على زووءك

21  الكاتب منى, on 08-12-2009 11:18 ما شاء الله , الف هنا يا رب على البك و الب ضيوفك و لو تعرفي شو انبسطت انك جربتيه للضيوف و انه نال الاعجاب     الله يعافي البك و بدنك و نورتي و نور الموقع فيك ميوسة

22  الكاتب رامو, on 13-12-2009 18:16 السلام عليكم انا مشتركة جديدة بالمو قع وبتمنى تقبلوني معكن اخت في الله وبحب قلك ياخت منى انو اكلاتك كلها بتجنن وانا عم جرب اكلة وراء اكلة وكلها عم تطلع بتجننننننننن والكل عندي عم يحبوها والله يعطيكي الصحة والعافيةدائما وتنوري المو قع بكلماتك واكلاتك الرائعة

23  الكاتب lalosh, on 14-11-2011 20:33 مدام منى أنا حزينة العصير ما طلع متل اللي بالصورة ليه؟؟

25  الكاتب lalosh, on 15-11-2011 15:23 لون الفراولة طغى على لون البرتقال

26  الكاتب lalosh, on 15-11-2011 15:23 لون الفراولة طغى على لون البرتقال     يعني اللون متل لون الفراولة

27  الكاتب منى, on 16-11-2011 11:27 اها , هل المشكلة بتتصير اذا كنتي مرقتي عصير الفريز , يعني اذا كان مريق زيادة بيختلط مع البرتقال و بيصيروا كانوا لون واحد     يلا ازرعيها بدقني هل المرة و ان شاء الله المرة التانية بيطلع على زووءك     صحتين و الف هنا على كل شي جربتيه و منور الموقع فيك يا عسل

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved