برغل بفول

مع كمالة وصفات الربيع وصلنا لوصفة سهلة و طيبة و مفيدة كتير : البرغل بالفول . أتمتع بكل لقمة فيها و بكل النكهات الموجودة فيها و لمن أتغدى هيك طبق , أزعل على كل الي ما بيقدر الوصفات النباتية أو الي ما فيها لحمة و بيعتبر حالو ناقصه شي أو مو شبعان  اذا اتغدى هيك غدوة .

أكيد أنا مو نباتية , و لما أكل سندويشة همبرغر من تحت دياتي أو طبق روستو غير شكل كمان أزعل على الي حارم نفسه الطيبات , بس شو المانع ان نعتبر وجبة متل البرغل بالفول مع صحن سلطة فريش و شهي وجبة محترمة و كاملة ! حلو تقدير النعمة و الاستمتاع فيها و لو كانت رغيف خبز سخن مع زيت و زعتر .

البهارات المستخدمة كميتها قليلة ما عدا الفليلفة الحمراء و هاد المطلوب , ان ما تحسي بنكهة الكزبرة أو القرفة مثلاً لأن نكهتهم ما لازم تكون طاغية على طعمة البرغل أو الفول بس رح تحسي بطعمة طيبة و مو محددة .

الوصفة بتتحضر هي أو شي بيشبهلها بكل بلاد الشام و تركيا كمان و ممكن استبدال الكزبرة الخضراء بالشبت للي بيفضل طعمته و بالأخير تقدم مع لبن الربيع و سلطة خضراء و وقفوا إذا فيكم توقفوا .


مثل اليوم :

الرز اذا اتهدى للملوك بيتودا و البرغل اذا اتهدى للديوك بيتودا


معناها لمن تفلفلوا برغلاتكم اليوم ما تكون النار وااطية كتير لحتى ما تضحكوا نسوان الحارة عليكم و تفرحوا ديوكها     


 

بالصحة و الهنا

تعليقات (16)

1  الكاتب نور الأسلام, on 11-05-2009 13:20 السلام عليكم طبق غيرررررشكل انا جربت الرز بالفول بس لسا ماجربت البرغل اي والله الله يديم النعمه يارب اللهم ما اصبح وما امسى بي من نعمة فمنك وحدك لا شريك لك فلك الحمد والشكر الله يديم النعمه والصحة على الجميع يارب

2  الكاتب منى, on 11-05-2009 13:30 ااامين اممين نور دعاء رائع , و ربي يعرفنا نعمه بتمامها مو بزوالها أممين يا رب ..    ان شاء الله تجربيها و تحبيها و هي بتفرق عن الرز بفول , غير طعم و غير نكهة

5  الكاتب تورتاية بالكريز, on 11-05-2009 18:01 تسلم ايدك ياقمر ويسلملنا حكيك وامثالك الروعة اللي زي العسل ودقة تصويرك للنكهات ينم عن ذكاء وانسانة ذواقة فعلا تسلم ايدك ياقمر احنا بالعادة بمصر عندنا اطباق رائعة من غير لحوم زي الكشري المصري الشهير والكشري الاصفر مع الباذنجان والفليلفة المقلية والتحابيش الحلوة اللي بتدوخ الراس الله لايضحك علينا نسوان الحارة ابدا طالما بنتبع وصفات منمون بدقة والبرغل الصراحة مستخدمتوش غير مع الكبة والتبولة واضيف القليل منه لبعض انواع المحاشي باذن الله بجرب الوصفات دي اعتقد يناسبها سلطة زبادي او صحن لبن بنعنع ع قولتكم ياقمر

6  الكاتب منى, on 11-05-2009 19:53 هلا غيوثة يا أحلى دكتورة في موقعنا   هي غير الرز و فول و طعمتها ما بتشبهها , و خليه الرز يطق , اصلا من طول عمرن جوددنا بياكلو برغل و الرز هو الدخيل , اجا مع الاستعمار يعني     الف الف شكر الك للمعلومات القيمة جدا و المفيدة , و الاطالة فيها المنفعة و الافادة ان شاء الله .  الله يعطيكي الف عافية و ان شاء الله تجربيها و تكون على زووءك

7  الكاتب منى, on 11-05-2009 19:54 هلا هيا   نستعمل الحب المقشور الي ظاهر بالصورة و وصفتنا بدنا كوبيين منه   ان شاء الله تجربيه و تكون على زووءك

8  الكاتب منى, on 12-05-2009 06:47 هلا يا سكرة يا ام ياسمين   الله يسلمك حبيبتي و يخليلي ياكي منورة بالموقع و بقلبي كمان ..    من الاطباق الي ذكرتيها ما بعرف الا الكشري , يمممي شو كشري اصفر ؟ ليكون قصدك الكشري الاسكندراني , و كمان التحابيش , يييمممي , عقبال ما دوق الكشري شي مرة من ديات مصريية حقيقة     البرغل كتيررر طيب و كانه طبق تاني و نكهة تانية ما اله علاقة لا بالكبة و لا بالتبولة و البرغل الي المفروض نستخدمه هو برغل خشن   كلام صح , اكتر الشي نقدم مع هل الطبق لبن بخيار أو لبن سادة أو سلطة خضراء حسب الرغبة     ان شاء الله تجربيه و يكون على زووءك و متل ما بتحبي حبيبتي نورتي و انستي و شرفتي

10  الكاتب منى, on 12-05-2009 10:09 مممم هلا سمسمة   و الله شكلها هل السلطة تغيير شكل معها , رح جربها اسمي بمووت على هل الأكلة

11  الكاتب ميساء, on 12-05-2009 22:17 مرحبا ميمو أنا جربت شوربة البنفسج وكتير طلعت طيبةأما سلطة الفول المدمس الحلبية والبرغل بفول طلعوا كتيركتيررررررررررررررررر طيبين وعملوا ضجة بالبيت وصرنا نتخاطفهن أنا وبنتي وأكلنا أصابعنا وراهن والله حرام عليك هلق صار رايح لنا اصبعين يعني 8 وصفات من هالعيار الطيب رح نصير بالبيت كلنا بلا أصابع يسلمو دياتك ويخليلنا ياكي يا رب

13  الكاتب منى, on 13-05-2009 18:41 هلا ميوسة   عواافي يا ستي و مليون صحة على قلبك و قلب الاميرة الصغيرة , لا تنسي تلبسي كفوف تاني مرة             الله يسلمك و يحفظ و نورتي يا قمر

14  الكاتب منى, on 13-05-2009 18:44 هلا هيا     الله يسامحك و الله اسئلتك على عيني و راسي من فوق البرغل من دون نقع و الوصفة ممكن تكفي شخصين تقريباً     الف شكر الك للوصفة , غمرتيني بكرمك اختي

16  الكاتب منى, on 14-05-2010 18:50 مية هلا فيك اختي   انا كمان بحبها كتير كتير , يا ترى ممكن تخبريني شو الاختلاف لحتى جربها مرة متل ما بتعمليها     نورتينا اختي مية السلامة بهل القامة

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved