في وصفات بمجرد ما تشوفها لأول مرة أو تسمع عنها بتوقع في غرامها و ما بتروح عن بالك لحتى تجربها , هل الحالة صارت معي بكذا وصفة , واحدة منهم وصفة أيس كريم الزبادي بالفواكهة و واحدة تانية هل الوصفة .
ليه يا بنفسج بتبهج و انت زهر حزين ؟ البنفسج زهر جزين لأن الظاهر ما عرف ان بيعملوا هل الشوربة و بيسموها على اسمه , شوربة لون و ريحة و طعم , و كمان اسم حلو و فوائد لا تعد و لا تحصى , بعد سلطة الأثوثة اكتشفت شوربة الأنوثة .
مين بيتوقع من شو محضرة ؟
شوندر ؟
نو , المفاجأة أنها محضرة بالملفوف الأحمر و الوصفة شفتها بموقع أطباق سهلة لأخت منال و كانت أول مرة بزور البلوج تبعها و لما شفت الوصفة عجبتني كتير و هي مسميتها شوربة البنفسج للونها الرائع . و هلا بدينا وصفات الربيع على لقمة طيبة و ما في أحلى من البنفسج بلونه البنفسجي و الأبيض لزين فيه هل المنيو و لزين فيه طاولتي . .
الوصفة سهلة كتير و مقاديرها بسيطة و عملت عليها تعديلات بسيطة عن الوصفة الأساسية , أول تعديل اضافة الطحين لأن بحب الشوربة تكون سميكة نوعاً ما و التعديل التاني اني اضفت بالأخير عليها كريما سائلة لأن حبيت تكون طعمتها أغنى شوي , كمان استعملت مرق حقيقي عوض عن المكعبات الجاهزة و أخر تعديل أن ما أضفت البقدونس , خليته بس للزينة .
استخدمت الأوراق الخارجية من حبة الملفوف و تركت الورق الداخلي للسلطات . و طول ما حضر هل الشوربة عم اتنغم فيها و بريحتها و كنت محمسة كتير لدوق أول لقمة , كتير طلعت طيبة و تغير شكل و العيلة كلها عندي حبتها , مروان كعادته على أي وصفة بتعجبه و بكون محضرتها لأول مرة قالي : ماما هي أطيب شوربة بتعمليها بحياتك . و أنا قعدت فكر , كيف ما خطرتلي ؟ يعني عرفت ان الملفوف بيطلع طيب كتير بالطبخ , ليه ما خطر ببالي ان حضر هيك شوربة ؟ المهم الحمد لله اني " وجدتها "و اتمنى ان الشوربة تعجبك و تجربيها .
بالصحة و الهنا
2 ملعقة كبيرة زيت زيتون حبة متوسطة بصل مفروم ناعم ثلث حبة ملفوف أحمر ( ما يعادل كوبان و نصف تقريباً ) 2 ملعقة كبيرة طحين 2 ملعقة كبيرة جبن كريمة 5 كوب مرق القليل من البقدونس المفروم ( اختياري ) 3 ملعقة كبيرة كريما سائلة
·يوضع الزيت مع البصل و الملفوف على نار متوسطة و يقلب لمدة 10 – 15 دقيقة .
·يرش الطحين و يقلب لمدة دقيقة ثم يضاف المرق بالتدريج مع التقليب بعد كل اضافة .
·تضاف الجبنة و البقدونس في حال استخدامه و تترك على نار هادئة لمدة 15 دقيقة , الشوربة ألذ إذا بقيت بعض القرمشة في أوراق الملفوف .
·تبعد الشوربة عن النار و تضاف الكريما ثم تقدم فوراً .
تعليقات (22)
