مفركة الفول

صبايا بعد المسابقة في موقعنا حسيت بنشاط و همة قوية كتير , كتير محمسة و انبسطت فيها كتير , و هلأ الحماس ما عم ينيمني , اتصوري هلأ الساعة 1 بالليل بس أنا طافية كل الأضوية و عم اشتغل على العتمة متل الحرمية و عم طرطق شوي شوي على الكي بورد أحسن ما أفيق الحارة ..

و الا شو رأيكم خلي الكل يفيق و يتفرج علي شو عم اطبخ , و شم و لا دوق يا جاري و الطبخة اليوم شامية و ربيعية و شي طيب كتير و سهلة ما بتاخد وقت , و هل الوصفة اتعلمتها من واحدة شامية و صارت وصفة لازم نحضرها كل ربيع ..


شو رايكم مع الطبخات ابدى حط من أمثالنا السورية و انا بحب كتير الأمثال و عندي موسوعة الأسدي لازم اقرأ منها كل يوم .

مثل اليوم : يا مسترخص اللحم عند المرق تندم



ششششششششش



دقيقة شوي ابن عمي خليني كمل حكيي , أخر الشي رح حاول ارجع حط وصفة كل يوم و انتو عليكم ان ما تزعلوا مني اذا اتأخرت بالردود .


ششششششششش يا بنت الحلال


طيب طيب ,  يلا تصبحوا على خير 


بالصحة و الهنا

كيلو فول مفروط
ملعقة كبيرة سمنة
حبة كبيرة بصل مفروم ناعم
ربع كيلو لحمة ناعمة
نصف ملعقة صغيرة بهار مشكل
نصف باقة كزبرة خضراء مفرومة ناعم
ملح

تعليقات (18)

1  الكاتب بشرى, on 07-05-2009 03:37 يسلم إيديكي الحلوين يارب ..    منيح لحقتي تكملي قبل ما تفيق الحارة     وكتير عجبتني فكرة الأمثال مع كل طبخة ..     بس منوشة روحي بدي اقلك انو الصورة اللي بالصفحة الرئيسية لهالأكلة عم تدل على شوربة العدس بالبرغل بقى مشان تصلحي الخطأ

2  الكاتب سارونات, on 07-05-2009 11:26 السلام عليكم و رحمة الله و بركاته    ما شاء الله على النشاط ان شاء الله دايما     فرطت من الضحك و انا عم اتخيلك عم تكتبي بطراطيف اصابيعك لان صارت معي من قبل     اختي منى ما بينفع يكون الفول مطبوخ بالبخار من قبل مو هيك لان نحنا منطبخو بالبخار و بعدين منفرزه قصدي لازم الفول يكون ني او لا  بالتوفيق  سلام

3  الكاتب منى, on 07-05-2009 11:35 شايفة بشرى   خلص ان شاء الله رح جهز أمثالي و هي فكرة بتغني الوصفات و خصوصا الوصفااات السورية     الف شكر الك للتنبيه بشرى , هلا تم التعديل

4  الكاتب منى, on 07-05-2009 11:54 و عليكم السلام و رحمة الله و بركاته سارونات   ان شاء الله مبسوطة و فرحانة دايما و قلبك عامر بالايمان و الخير     بينفع تحضريها , بس هي اكلة طيابتها تازة و هلا وقت الفول , شو رايك تجربيها تازة بالاول

5  الكاتب ام دانية, on 07-05-2009 13:40 يسلم دياتك يارب على هل الاكلة انا بحب الفول كتير كتير وفرحت كتير لما شفت الاكلة ان شاءالله رح جربها باسرع وقت بس ليجبلي زوجي الفول لانو ما عندي فول بس في سؤال هلا لما منضيف المي للفول ومنتركووووو لحتى يستوي بتكون المي نشفت ولا لازم يكون فيو مرقة لانو بالصورة مبين انو ناشف بس بدك الصدق منظرووووو بشهي كتير كتير وانا حابة من بعدك اذنك اشارك باكلة بس ما عم بعرف كيف ابعتلك ياها والصورة كمان كيف بدي حطي هاد طبعا اذا ما عندك مانع

6  الكاتب منى, on 07-05-2009 13:52 هلا ام دانية   ان شاء الله تجربيه و يعجبك , امبارحة اتغديناه و كتير كان طيب , اتفضلي     المرقة على كيفك وبالمرقة بالصورة مو واضحة كتير ,هولازم يكون فيه مرقة متل الفاصوليا و البامة و هيك     الوصفة فيك تبعتيها باي رد أو على ايميلي و انا بانتظارها مع الصورة , يا ستي دا احنا ننول ناخد وصفة منك

7  الكاتب نور الأسلام, on 07-05-2009 19:07 مرحبا منى كيفك يسلم دياتك بدي اسالك عن فتة المكدوس وصفتها اذا مافي ازعاج

8  الكاتب رنا, on 07-05-2009 19:46 كتير بحبها ماما كانت تعملها ووقت يزيد لتاني يوم تفقس فوقها بيضتين وكان بابا كتير يحبها   بس بدي قلك لوتنزليلنا الفول المقلى الشامي تبع الكزبرة الخضرالا..يالله شو بحبه   يسلم هالايدين

9  الكاتب منى, on 08-05-2009 09:21 هلا نور     فتة المكدوس من الوصفات الي رح حضرها هل الصيفية باذن الله و ببقى نزلها مع خطواتها

10  الكاتب منى, on 08-05-2009 09:40 هلا رنونة     الف هنا على قلبماماتك و باباتك و كل عيلتك الحلوة   رنونة ليكون قصدك هل الوصفة ؟

11  الكاتب رنا, on 08-05-2009 13:22 صح هي الوصفة بس انا اللي بعرفها نفسها تمام بس بدون سلق بس كزبرة وتوم وزيت ...بس فكرة الملح فوق الفول هي سبب تغيير لونه فكرة جديدة علي يسلمو ايديكي

12  الكاتب منى, on 08-05-2009 15:54 الله يسلمك رنونة   ان شاء الله تجربيها و تكون متل الي بدك اياها

13  الكاتب Eman, on 09-05-2009 07:03 هلأ صحيح المثل اللي بقول يا حيف عاللحمة بالفول ؟؟     أنا بحب أكلة رز بفول ، بحسها متل الرز ببازيلا وكمان تغيير شكل .. المشكلة اهلنا ما عودونا ناكل الفول غير مدمس يا بحمض يا بطحينة ..    بس أنا من النوع اللي بحب كلشي جديد وطيب متل هالأكلات ..    يسلم منوشة على وصفات الفول وعم نستنى سلطة الفول لاهل حلب ، مع اني مو سمعانة فيها من قبل ..يمكن هي لأهل حلب المعتقين

14  الكاتب منى, on 09-05-2009 13:17 هلا أمولة   هادا مو مثل هادا بينادوا فيه البياعيين على الفول و انااا ااكد ان هل البياعيين عندهم نسوان ما بتعرف تطبخ     ماما الله يخليها كانت تطبخ الفول اشكال و الوان و مو بس فول مدمس , و ان شاء الله تطبخي شي وصفة و تعجبك

16  الكاتب منى, on 12-05-2009 19:17 هلا حنان     هادا بس من زوءك و لطفك و تكرمي على عيني , ان شاء الله احاول دوما اكتب الامثال الي أعرفها, نورتي أختي

17  الكاتب DOUHA, on 24-05-2010 18:32 منى بكرة رح جربا ان الله راد  سؤال: انتي مو عاملة وصفة رز بالفول؟؟ انا ما شفتا

18  الكاتب منى, on 24-05-2010 19:02     و الله مو معقول , هلا دورت بالموقع و ما شفتها , لازم نزلها خصوصا لعيونك , طريقتها نفس الرز و كماية     ان شاء الله تجربي هل الوصفة و تحبيها

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved