كاتو بأيس كريم الفريز

السلام عليكم و رحمة الله و بركاته .

متل اليوم من سنتين تم افتتاح موقعنا لقمة طيبة ..

البداية كانت صغيرة نوعا ما , كنت منزلة فيه 83 وصفة و بعدها يوم عن يوم صار الموقع يكبر أكتر . و في الأول كنت نزل وصفة يومياً , بس هلاً ما بقى الي همة متل أول و عندي أسبابي , بس أهم سبب هو السرقات الي عم تصير و عم شوفها و الي بتحسسني بــــ ....و هي بحث طويل اله حكايات و قصص كتير و ان شاء الله عم دور على حل و ادعولي لاقيله حله قريب ..

الفكرة بالأساس ولدت قبل بكم شهر  من افتتاح الموقع , كنت أنا جايبة ابني الرابع الله يخليه و يخلي اخواته و يخلي اولادكم أجمعين  و يبارك النا فيهم باذن الله و كانت طلعتي صعبة من البيت لأن شتوية و هو صغنون . لهيك كان بدي شي مفيد اعمله بدل ما ضيع وقتي هون و هون ؟

كنت سهرانة لحالي و عم أقرأ بمجلة و ما لاقي الا الفكرة لمعت براسي , خلقت بلحظة و لمن خطرتلي ابتسمت متل لمن بتخطر ببالي أفكار مجنونة تانية كتيرة متل لف العالم على البسكليت أو عمل رحلة مطبخية في كل سوريا , يعني فكرة و بس ..

بس سبحان الله , لمن ربنا بيكون مقدر شي , بتتيسر كل أموره ..

خلال كم يوم كان العيد الكبير و مع لمة العيلة حاكيت ابن خالي , محمد , و هو مختص بقصص المواقع  و تصميمها و الحجز و هل الحكي الكبير . وعدني ان يبدأ بتنفيذ الفكرة و طلب مني ان فكر باسم مناسب مع تجهيز وصفاتي . و اتفقنا أن تكون خلفية الموقع بلون أبيض لحتى تريح العين و انا طلبت منه أن تكون ألوانه تفرفح و تنعنش القلب و غير عن اللون الزهري الي معروفة فيه كل المواقع النسائية , كنت حابة تكون ألوانه مرتكزة على الكيوي , الأصفر الفاقع , التركواز و الفوشي

تجهيز الوصفات أخذ مني وقت كبير , يعني كنت كل يوم بس خلص شغل البيت و مسؤولية زوجي و اطفالي ,  انكش بهل الوصفات من السهل للصعب , لان موقع كامل المفروض يكون متنوع و فيه كل شي , و كنت محمسة كتير لأن بهل الموقع رح حط فيه كل هوايتي , الأولى و الأهم الطبخ و التانية الكتابة , التالتة التصوير و الرابعة النت

جهزت عدد من الوصفات و كان ذهني دوما مشغول بقصة الاسم و ما كان عندي و لا فكرة أو ما عم تخطر ببالي أي افكار تغير شكل اذا فينا نقول . سبحان الله  كمان الاسم اجا لعندي هو

حاكتني سيما على التلفون و قالتلي ياااااا يا منى فاتحة قناة جديدة اسمها فتافيت , و ما تسألوني كيف أو شو العلاقة بس لمن سمعت كلمة " فتافيت " خطر ببالي فورا اسم لقمة طيبة , يمكن شبه بين الفتفوتة و اللقمة و انا اتحمست كتيبر و قلتها لسيما لقتيه لقيته . لقمة طيبة شو رايك بالاسم ..

قالتلي اسم شو ؟

قلتلها اسم موقعي

قالتلي حلو بس المفروض تفكري ان يكون لفظه حلو بكل اللهجات , يعني باللبناني و الخليجي و المغربي و غيره ..

بس انا بوقتها ما بقى بدي فكر , لان عرفت انو هل الاسم هو الي بيلبق لموقعي  ..

عرضت الاسم على  محمد , صاير يقول لقمة لقمة حلو كتير و صغير

و نوارة صارت تنط متلي , ما أحسن و أقرب صديقة الي لازم يكون في توارد أفكار و توارد حركات

كنت حابة يكون افتتاح الموقع بتاريخ مميز متل 7 – 7 – 2007 , بس بعدها ما حبيت ااخر الافتتاح لكل هل الوقت و تم افتتاحه بتمام الساعة 12 من يوم 5 – 5 – 2007

الحمد لله رب العالمين , الموقع ماشي منيح و متل ما بدي , بيت صغنون فيه الكل بيحب بعضه و بيحترم التاني و العيلة عم تكبر يوم عن يوم و قربنا نصير ألف فرد فيها و الوصفات صاروا اكتر من 600 وصفة . 

 بعد سنتين , بيسألوني كتير , شو استفدتي من الموقع ؟

أول الشي استفد ان عرفني على أخوات غاليات كتير و عزيزات , دعائهم الي هو احلى هدية بفتحها منهم كل يوم

الشي التاني أن الموقع بيفرض علي تقديم اشيا جديدة , أو التمكن من وصفات كانت تظبط معي نص نص , يعني الموقع أدخل التجديد اليومي لمطبخي و صرت اكتشف اشيا جديدة و نكهات ما ممكن اتخيلها و كمان صرت دور على أدق التفاصيل بكل وصفة لحالها و الي ممكن تخلي الوصفة ناجحة أو لا , يعني حملني مسؤولية و كل وصفة بتشوفوها في الموقع و خصوصا وصفات الحلويات و المعجنات بيكون على الأقل في خلفها تجربتيين فاشلات لحتى نجحت الوصفة معي متل ما بدي

أخر الشي  طريقة تصويري  اتطورت و اتحسنت عن قبل بكتير , يعني ممكن صور عندي من سنة و كنت شايفتها تحفة , هلأ ما بقى تعجبني و لا بقى شوف فيها شي مميز  . و نوع كاميرتي للأخوات الي سألوا هو canon G9  كاميرا منيحة و خدومة و حبابة ما شاء الله لا قوة الا بالله و انا عم اطور معها و يمكن بعد فترة تصير طموحاتي أكبر منها ..


شو كمان ..

من أصحاب الفضل علي بتيسر أمور هل الموقع بعد الله ,  محمد , لان هو مسؤول عن أمور الموقع و بيشتغل من وراء الكواليس , و كمان نوارة رفيقتي لأن أمنتلي الكاميرا الي عم استعملها من دبي بوقت بسيط , و أكيدة فريق الدعم الفني المتمثل بأمي و خواتي أية و سيما و حماتي , هنن أصحاب كتير وصفات ممكن تشوفوها بالموقع ..



هادا كل شي عن الموقع و كيف انولد و لو تعرفوا ان الموقع غالي علي و حتى انا بسميه ابني الانترنتي , فيه تعبي و بحثي و خلاصة تجربتي و تجارب المحيطيين فيني , لهيك لعيد ميلاده حضرت اله هل الكيك المميز ...

بعد كل هل الحكي السابق الي فيكم تعتبروه فضفضة , فيكم تعتبره رد لكتير اسئلة بتدور ببالكم و كتير اسئلة أنسألها , ان شاء الله ما تكونوا مليتوا , خلونا ندخل على وصفتنا و الي هي قد ما قلت مميزة ما بكون عم اعطيها حقها , يعني هل الوصفة لازم و اكيد و حتما تجربوها و الا رح تخسروا . الأولاد عندي عملوا مظاهرة و بنوتي حبيبة قلبي فرح صارت تقلي يا حرام يا ماما رفقاتي , ما عندهم أطبخ و أحلى ماما بالعالم ..

الوصفة سهلة كتير و اذا كنتي محضرة الكيك الاسفنجي قبل بيوم أو جبتيه جاهز فخلال عشر دقايق بيكون الكيك جاهز و في الفريزر . و الأيس كريم رح يكون ناعم و سلس و بيدوب دوبان و متل أطيب محلات بوظة .

أنا حضرت الكيك و بعد أربع ساعات تقريباً قصيته و حشيته و حطيته بالفريزر لتاني يوم , و كمان لتحضير الأيس كريم  استعملت الكريما البودرة و انت فيك تستعملي الكريم فريش اذا متوفر عندك و بيكون طعمتها طيبة كتير . و نفس الوصفة فيك تحضريها بالموز أو الكيوي أو التوت أو أي نوع فواكهة بتحبيه المهم انك تتحكمي بكمية السكر حسب الفواكة و طعمتها .


بالصحة و الهنا

 

قالب كيك إسفنجي

الأيس كريم :

نصف كيلو فريز
2 باكيت جيلو فريز
نصف كوب سكر
علبة كريما بيضاء بودرة
نصف كوب حليب

·          يحضر الكيك و يقلب و يترك حتى يبرد .

·          تخفق الكريما مع الحليب البارد جدا جدا حتى تسمك و تصبح جاهزة .

·          يدوب الجيلو في مقدار ربع كوب ماء مغلي حتى تذوب حباته تماماً ثم يترك حتى يبرد .

·          تنقى بضع حبات فريز و يحتفظ بها جانباً مع الجزء الأخضر للتزيين ثم يطحن باقي الفريز مع نصف كوب سكر حتى الحصول على بيورييه ناعمة , يطحن الفريز من دون اضافة الماء .

·          يقلب الفريز مع الكريما و الجيلو حتى الحصول على كريما متجانسة و ذات لون واحدة .

·          يغلف نفس القالب الذي خبز فيه الكيك بورق ألمنيوم أو ورق نايلون شفاف حتى يتغطى كله .

·          يقص قالب الكيك الي قسميين , يوضع أول قسم في قاع القالب المغلف . يمكن أن يسقى بشكل بسيط بالحليب لمن يفضل الكيك طري جداً , أنا لم أسقي القالب الظاهر بالصورة .

·          يوضع ثلاث أرباع مزيج الأيس كريم فوق أول شرحة كيك ثم يغطى بالشريحة الثانية و يضغط بلطف للتخلص من الفراغات .

·          تغطى ثاني شرحة من الكيك بباقي الأيس كريم ثم يوضع القالب في الفريزر لمدة 8 ساعات و يمكن اعداده قبل بيوم .

·          عند التقديم يوضع القالب في طبق التقديم و يزين وجهه ببضعة خطوط أو يترك بدون تزيين .

·          تغسل حبات الفريز الباقية جيداً ثم تلت بالسكر الخشن الاكتساب المظهر المجمد و ترتب فوق القالب و يقدم الكيك فوراً و هذا شكل القالب بعد القص و الاختلاف باللون عن الصورة الأولى سببه اختلاف في الجو , بعد ما قصيت الكيك صار ينزل مطر الربيع  .

تعليقات (78)

1  الكاتب ام دانية, on 05-05-2009 20:47 ان شاءالله الف الف الف مبروك والله بتستهالي لانو هيك موقع بيستاهل انو الواحد يباركلوووو لانو بصراحة الموقع كتير حلو وخصوصا انك بتلاقي فيو كلشي ماشاءالله يعني تعبك واضح تمام وان شاءالله الله مارح يضيعلك تعب لانو بعتقادي انو الكل استفاد من هل الموقع يغزي العين عليه بصراحة انا اول مرة اكتشفت الموقع عن طريق الصدفة وفرحت كتير فيو لانو بتلاقي كلشي فيو مافي داعي تتعذبي هون وهون لحتى تلاقي الوصفة ولاهم من هيك انو الموقع محترم ابتداء من حضرتك وانتهاء بالاخوات المشاركات وبكفي انو الواحد بيفتح على هل الموقع بدون ماتنط بوجه ميت صورة وصورة وما بعرف شوووووووو انا صرت فعلا من عشاق الموقع وما بمر يوم الاما افتح وشوف شو في جديد حتى زوجي كمان يمكن طولت عليكي معلش تحملينا هي ضريبة الموقع وعلى فكرة منظر الكاتو بشهي هاد بينعرض بس للنظر مو للاكل حرام بيتشرك منظرو

2  الكاتب رنا, on 05-05-2009 21:01 انشالله بيصير عمر هالموقع ميتين سنة وللامام اكتر واكتر ...بداية بموقع ...بعدين برنامج بعدين قناة كاملة تلفزيونية لصاحبة احسن ذوق ونفس بالعالم   يمكن انا من الناس يلي لقمة طيبة بالنسبة الهن اكتر من موقع انترنت ...بحس انه مابدخله بس للطبخ والتخبيصات الي مابتخلص بس كمان بحس انه فيه جو عائلي حلو وبيذكرني بقعدة رفقاتي كل وحدة بتحكي قصتها وشو ساوت وشو عملت ...الله يخليلنا ياكي بصحتك وقوتك لحتى تضلي جامعتينا   اما بالنسبة لاختيار الاسم فكان اختيار اكتر من ائع وانا بصراحة لما شفت لينك الموقع بمجلة زهرة الخليج اكتر شي جذبني اله اسمه لانه مختصر بنفس الوقت وحلو وبيحكي عن حاله     امااااااااااا بالنسبة للكيك ف مابعرف شو بدي قلك ...كتير اشتهيت جربه لانه شكله بيجنن بس خايفة من مطب اسمه الكاتو الاسفنجي بس الا ماتجي لحظة جنون وادخل عالمطبخ وخبرك شو صار معي     بس بدي قلك شغلة هلأ انتي قلتي انه بعد ماتقسمي القالب بتحطيه بالقالب يلي انخبز فيه طيب بعد مااحشيه شلون رح ينقلب معي ..؟؟؟قصدي مابيخرب شكله بيصير الي فوق تحت والي تحت فوق ولا يمكن من فرحتي بعيد ميلاد الموقع مافهمت شو المقصووود؟؟؟

3  الكاتب نور الأسلام, on 05-05-2009 21:27 السلام عليكم اختي منى الغاليه انشاء الله الف الف الف الف مبروك والله انك بتستاهلي كل خير وربي من عالي سماه يعطيك العافيه والصحه وكل الي بتتمنيه وياربي يخليلك عيلتك واولادك وشوفي منهم الخير الكتير وكل احبابك وانا سعيده كتير اني تعرفت على الموقع واكيد عليك انت والله اني احبك في الله ومره تانيه الف مبروووووووووووووووووووك

4  ورد وحب وبوالين الكاتب rose reem, on 05-05-2009 23:02 غاليتي منى..لك تهنئة مليانة ياسمين وبوالين... انا كنت غاطة غطة طويلة لاني ربنا رزقني فتفوتة عسل وسميتها راية بس كنت كل يوم عم افتح، وحتى ابسط شغلة باخدها من الموقع،صدقيني لما كنت بدي اعمل اي اكلة ابل الموقع كنت افوت بميت حيط واذا اضطريت لعزيمة كنت اختصار(اصفرن).. بس هلا انا بفضلك شطورة وبذكرك كل يوم وبحكي عن موقعك للكل انا ممنونة الك كتير،لك المودة والدعاء.

7  الكاتب أم الهدى, on 06-05-2009 01:00 أول الشي كل عام ولقمة طيبة وصاحبتة منوش بألف خير  ماش اء الله عليك وعلى كلامك الحلو وهواياتك وأفكارك الأحلى ، والله يوفقك وتحققي كل يلي في بالك والله يعطيك على قد نيتك وكرمك وسخائك ، يعني بصراحة قد ما الواحد حكا عنك وعن الموقع قليل ما شاء الله عليك  عنجد الموقع لازم كل يوم أفتحو وشوف شو في جديد وبحب كتير أقرأ المقدمة لكل وصفة بحس فيها بنبض وحيوية حلوة كتير   وسبحان الله الموقع تعرفت عليه يمكن بعد افتتاحه بشهر  ولما شفت كل مميزاته الحلوة صار مصدري الأول والوحيد لوصفات جديدة ومميزة ومضمونة  ما عدا عن معرفتك الطيبة ومعرفة أخوات كريمات  حكيت بس ما بعرف إذا قدرت أطالع كل يلي بقلبي عنجد الله يجزيك كل خير يارب لأنو أنا كمان بعد ما تزوجت وتعرفت على موقعك اكتشفت اني بحب الطبخ وبحب أتفنن فيه      هلق بقى بجي للكيك الروعة يلي بشهي وبفرط الريق أكيد ان شاء الله عالتجربة القريبة جدا   بس كالعادة لا بد من الإزعاج في حال استعملت كريما فريش أديش المقدار  والله يعطيك العافية وتصبحي على خير حاج صدعتلك راسك

8  الكاتب بشرى, on 06-05-2009 02:40 السلام عليكم أختي منى ..  ألف ألف مبروك عيد ميلاد هالموقع وإن شاء الله بيكبر أكتر وأكتر ..  حسيت قلبي عم يضحك لما قريت كلامك والله شي بيشهي وبيرفع الراس ..  أنا متل أخت أم دانية كنت عم دور على تشكن مكسيكانو ولقيتا هون .. طلعت يا الله في موقع طبخ حلو ولماعرفت إنو انتي صاحبتو طار عقلي من الفرح وصار ما يعدي يوم إلا وشوف شو جديد .. بس الفحص والله ما بيترك وقت ..    المهم من شي تلات تيام كنت فوت عالموقع لاقي صورة القالب حاول انقر عالصورة ما يطلعلي رابط بس هلأ وقت شفتا زق زق عقلي من الفرح ..    رح جربها قريباً إن شاء الله .. يسلم إيديكي والله شي بيشهي ..    الله يخليلك هالصغار الحلوين وتفرحي فين .. والله قلبي بيحبك من جوا ..    تسلمي يارب وإن شاء الله بتحققي كل أحلامك ..    تسلميلنا يارب ويخليلنا ياكي ..

10  الكاتب قطة, on 06-05-2009 13:07 منى يا روحي أنشالله كل أحلامك بتتحقق بتعرفي أنو أنتي دايمابتشجعيني وبحس أنو مافي شي صعب من أيام البكالوريا أنا بحبك كتير

11  الكاتب لارا مينا, on 06-05-2009 17:14 كل عام والموقع بألف خير إن شاء الله ... وأكيد محتفلين بعيد الموقع وكأنه شخص موجود معنا وصار التاريخ من التواريخ المحفوظة عندنا والمهمة مثل تاريخ التخرج وتاريخ استلام الوظيفة وتاريخ أول حج إلي ... وبصراحة مهما كتبت ماراح أوفيكي حقك وحق الموقع ويمكن مشاعري إلي بداخلي هي بتوفيكي حقك وبس والله يحفظ جميع الأعضاء والموقع وإنتي وعيلتك وزي ماقالوا الأخوات يلي مخلينا متمسكين فيه إنه موقع محترم والموجودين فيه محترمين ومنظره بيريح العين مش مثل الباقين بحس عيني بتروح يمين ويسار ألف مرة بظرف ثانية من كثرة الإعلانات يلي حاطينها... وكمان الأعضاء كأن إحنا مع بعض بنفس البيت صرت أعرف هاذي شو طابخة والثانية بكرة جايينها ضيوف وهي صار عندها بيبي جديد وهي نزعل معها لأن مازبط معها شيء او عندها ظرف مو منيح والي صار لها فترة مادخلت الموقع سبحان الله بنفتقدها وبيني وبين نفسي أسأل عنها, وهكذا وهالشئ نفتقده في باقي المواقع أكيد   ملاحظة كثير مهمة :  سبحان الله اتفسر منامك أخت منى والله والله يمكن ماتصدقي أو تقولين يمكن أبالغ مجرد ماقرأت حلمك وكتبت التعليق اتصلت علي صاحبتي تخبرني صار لنا والحمد لله زيادة في المرتب والله يرزقنا بالحلال دائما وهي يمكن تكون البيضة والشئ الثاني صار لي أكثر من شهرين اشتريت   ipod touch والجهاز رفض يشتغل معي لأن برمجته صعبة شوي ولفيت به أكثر من محل وما أحد عرف يحل لي مشكلتي وكنت زعلانة ومعصبة كثير لأن صار مركون بالبيت وماستفدت منه بشئ, والبارح بالصدفة وبعد البحث الطويل في النت لقيت الحل وصار تمام التمام وهي يمكن تكون السلطة وسبحان الله جاتني كلها بنفس اليوم وحتى الوقت متقارب , بس حبيت أخبرك وعقبال ماتخبريني إذا جاتك السلطة والبيض إنتي كمان والجاتوه شي خيال وأكيد ومن غير حلفان راح أجربه أكيد ومقدرين مجهودك ومجهود الأخ محمد وحماتك وأهلك و كنت بس بأدعيلك لوحدك ومادام هم كمان بيتعبوا راح أوسع نطاق الدعوات الحلوة لتشملهم لأن بجد يستاهلون

14  الكاتب منى, on 06-05-2009 19:36 هلا ام دانية   الله يبارك بعمرك و يحفظك و يخليك و الف شكر الك على الكلام الحلو و الطيب و الف هنا و عافية كمان على قلبك و قلب زووجك و دانية القطة الحلوة     يا ستي هل الكيك للحبايب بيتظيف و انتو اغلى الحبايب لهيك قطعته الكم , نورتي حبيبتي

16  الكاتب نوارة, on 06-05-2009 20:56 اه نسيت الكيكة مع العلم ما بتنسى بس صراحة اخدتني الذكريات ( الجامعة والدراسة والافكار المجنونة ووومياووووو)  يعني شكلها يمي يمي يعني شكلها من الشغلات اللي رح يحبك اي حدا اذا طعميتي منها  بعدين اكيد رح اجربها لانو هي كيكة ميلاد لقمة

18  الكاتب منى, on 07-05-2009 11:36 هلا رنونة   هيك خليتيني اسرح باحلامي , بس انا متواضعة جدا و برنامج تلفزيوني بيكفيني     الكيك الاسفنجي مو صعب , لازم تجربيه , او و الا ااقلك استني شوي انا محضرة موضوع ان شاء الله بيفيدك و بيفيد كل الاخوات عن الكيك الاسفنجي و لوقتها ممكن تجربي الوصفة بالليدي فنجرز الجاهز بس لازم تبليه شوي بالحليب     بعد ما اقلب الكيك و الي كان فوق بيصير تحت برجع بقليه مرة تانية لحتى الي صار تحت يرجع يصر فوق     اي سؤال تاني انا بالخدمة

19  الكاتب منى, on 07-05-2009 11:54 هلا نور   الله يحفظك و يخليك يا قمر و ربي يبارك بعمرك و ببدنك كله , الف شكر الك للدعوات الغالية

20  Happy Birthday L2ma الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 07-05-2009 18:23 كل سنه و احلى منى و اطيب لقمه بخير ان شاء الله. لقمه طيبه من اقرب المواقع لقلبي و زي ما قالوا الكثيرات لازم اول ما ادخل النت اول شي امر على لقمه طيبه لحتى شوف شو في شي جديد اما ليضيف لما نعرفه او طبق قديم كانت تعمله التيتا و نسيناه فياتي ليذكرنا بالماضي الجميل الذي ارتبط به. انا يا منى و كثير من الاخوات مش بس نساندك على ما تعملين بل نحن فخورين بك لانك اصريتي و تابعتي حلمك. ربنا يباركلك في كل شيء في حياتك و حدسي يقول لسه فيه كتير لقدام هذا مش تخمين بل لانو ما شاء الله عندك كل المقومات يعني كل التوليفه على بعض مثل الشخصيه و فن الروايه و التصوير و الذوق و الصدق. ربنا يحميكي و يبارك لك في عملك وفي اهل بيتك.     لك كل الحب     امونه

21  الكاتب سارونات, on 07-05-2009 21:18 السلام عليكم و رحمة الله و بركاته    لقمة طيبة هو بيتنا اللي منلتقي فيه كلنا تنحكي و نتعلم من بعضنا     اول مرة شفت الموقع كنت عم دور عمواقع طبخ و كنت جديدة على النت و بلشت شوف صفحة ورا التانية و كل ما يخلصو الصفحات في قسم معين حس اني بدي شوف كمان و مر الوقت و انا عم استكشف الموقع و لا الجولة اللي بيعملها المفتش كان في شي سحري عم يجذبني تحتى استمر في رحلة الاستكشاف و بتذكر اني ساويت نسخ لبعض الوصفات مشان الصقهاو احتفظ فيها فما اشتغلت معي هالخاصية بهاداك الوقت المهم اول وصفة جربتها من الموقع هي كيكة شوكولا كولا و اخدت وقت طويل تحتى جربتها يمكن ترددت لان الوصفة جديدة و غير عن العادة المهم حطيتها بملف لحالها و اخترتلها ايقونة البيت سبحان الله و صرت كل مرة روح عالملف و طل على صورة الكيك عقد ما عجبتني المهم بعد فترة خرب كمبيوتري و وديتو مشان يتصلح و ضاعولي ملفات كتير بس ما بتصوروا فرحتي قديش كانت لما لقيت انو هالملف ما ضاع المهم محسوبتكم جديدة على النت و ما بتعرف شغلة التسجيل و المشاركة و هيك اشياء و كنت مفكرة ان هالموقع ما فيه الواحد يسجل يعني بس للوصفات و بعدين اكتشفت الاكتشاف الخطير و هو انو فيني سجل فسجلت و ما كانت بعرف انه بتسجيلي عم كون انضممت لعائلة كبيرة     اكيد كلكم انتبهتو اني بطرح اسئلة كتيرة بس اختي منى ما قصرت معي و مع الكل و صرت اسأل و اسال و اسال كاني عم اسال اختي و يمكن لو كانت اختي كانت قالتلي حلي عني بس هي عطول كانت بقلبها الكبير و خبرتها عم تساعدني تحتى اتعلم اكتر و اكتر و عن جد اتعلمت كتير و اخدت كتير من هالبيت و بتمنى اني اقدر شارك و لو بشي بسيط في توسيع هالبيت الدافئ   مع توجيهات و نصائح اختي منى صرت عم فرح العائلة باطباق طيبة و ترفع الراس و اكبر انجاز بعتبر اني انجزتو هو روستو الخضار لان كنت مفكرة ان طريقته صعبة بس اختي منى قدمت الوصفة بكل حب و خلتها كتير بسيطة و عن جد هي كتير بسيطة     اسم منى صار ينذكر في البيت متل اسم فرد من العيلة و كل ما بسمع هالاسم بقول انه اسم غالي جدا على قلبي و اله مكان خاصة لان صاحبته انسانة عزيزة جدا و جوهرة نادرة     ما فيني ساوي شي غير اني ادعيلها بالصحة و العافية هي و كل من يعزها و تعزهم و الله يحفظلها كل افراد عيلتها و الله يجازيكم الجنة     كالعادة حكيت كتير بس صرتو تعرفوني وتعودتو علي و على حكياتي وانا بعزكم كلكم يا احلى اخوات و كمان عم اتعلم منكم كل يوم    ربنا يوفقكم و يسهل دربكم    سلام

24  الكاتب منى, on 08-05-2009 09:22 هلا ريم و لا شو رايك نسميك ام راية الحلوة , ما شاء الله اسم حلو كتير كتير , رح قلها لاختي عليه لان هلا حامل و بانتظار بنوتة سكرة     هادا بس من زووءك و كتير كتير انبسطت ان الوصفات فادوك و لو انت مو شطورة ما كانوا ظبطوا معك     بوسات كتيرة و كبيرة لراية و لاتنسي تلحمسيلها على خدها الصغير و تشميلي ريحته ريحة الملايكة

26  الكاتب منى, on 09-05-2009 11:56 هلا ميسون   الشكر الك للكلام الجميل و المرتب , و معك حق الوصفة من دون صورة تفقد كتير من أهميتها مع ان أحيانا الوصفة تكون ممتازة ..    سعيدة جدا برأيك و ردك الطيب و سعيدة أكتر بدعواتك الغالية الك متلها و أغلى ان شاء الله

27  الكاتب منى, on 09-05-2009 12:06 هلا zsoukar     نورتي و انستي و دايما بيتك أختي , و الحمد لله اني منزلة هل الوصفة , و لو من دون صور , لحتى اتشرف بمعرفتك و زيارتك الحلوة

28  الكاتب منى, on 09-05-2009 12:09 هلا ام هدى   بالعكس ما حكيتي كتير و انا انبسطت كتير بقراة ردك , و انبسطت اكتر انك اتعرفت على الموقع بعد فترة قليلة من افتتاحه , و الي بيطلع من اقلب بيوصل للقلب فوراً     الكريما كميتها cl 50 و أتوقع مقابلها كوبيين بس مو متأكدة   ان شاء الله تجربيها و تكون متل ما بتحبي و اطيببببب

29  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-05-2009 17:32 السلام عليكم ورحمة الله وبركاتة     كل عام والموقع بخير وانت كمان يا منى تكوني بألف خير انا بصراحة ما بعرف شو بدي اكتب لك لأنه بصراحة الاخوات ما قصروا بالكلام والشكر لك وللموقع أنا بدوري ما بقول لك غير تسلم هالأيادي يارب وتفرحي اكثر واكثر بهالموقع يارب وان شاءالله نحن دائما معك وراح نساعدك ومرة ثانية بقول لك كل عام وهالموقع وصاحبته بألف خير

31  كل سنة وانت طيب يا لقمة طيبة الكاتب freesoul, on 09-05-2009 21:18 هي اول مشاركة الي بها الموقع اللطيف لقمة طيبة وحبيت انو يكون معايدة للموقع وصاحبته ييللي حسيتها متل اخت الي في هالغربة  الحلو انو عيد ميلادي بيصدف بنفس اليوم 5/5 وهادا يللي شجعني اكتر انو اسجل بالموقع   انا ساويت اكلات كتير من هون معتمدة على وصفات منى اللذيذة  نحنا بالغربة مافي حدا يدلنا على الطريقة الصحيحة لطبخات كتير وانا وجوزي كتير منحب اكلاتنا الحلبية وما منستغنا عنها بالاضافة لكتير كاتويات وحلويات  ماشاء الله عليكي يا منى شي بيرفع الراس واش ها الاكلات شي كتير طيب  بتمنى لموقعك المتميز دوام الاستمرار ولعيلتك الصغيرة تكبر اكتر واكتر ويا ريت تقبليني فرد من هاالعياة الانترنتية   كمان  كل سنة وانت بخير يا لقمة طيبة

32  الكاتب منى, on 10-05-2009 07:43 هلا بشرى   الف شكر الك للكلام و الرد الحلو و الصاحة ما عم اعرف شو اكتب لرد بس و الله المشاعر بالقلب و ما بيعرفها غير الله     كتير انبسطت ان الوصة عجبتكصورتها و ان شاء الله تجربيها و تكوون مستاهلة و على زووءك , و اي سؤال انا بالخدمة و تحت الامر

34  الكاتب منى, on 10-05-2009 15:46 هلا ام محمد   ان شاء الله دايما مجتمعين على المحبة و الخير الكتير لكل البنات   هادا بس من زووءك و طيبتك أختي , و ربي يديم المعروف , و كمان الف الف شكر الك للدعوات الكريمة و الغالية

35  الكاتب منى, on 10-05-2009 15:53 هلا يا قطة يا مقطقطة يا حلوة   مين الي بيشجع مين , و مين كان الفضل اله على التاني ؟   الحمد لله على هل التفيقة الي فيقتيني ياها شي يوم من تموز و كانت السبب بتغير كتير اشياء بحياتي , و انا بحبك اكتر و اكتر

36  الكاتب منى, on 11-05-2009 10:44 هلا لارا   دايما ردودك فيها المحبة بكل كلمة , ربي يديم المحبة و المعروف دوما علينا و على كل الاخوات الغاليات في الموقع, الأخوات الأخوات حقيقة و مش مجرد كلمة   يا ستي كتيرررر انبسطت انك اكلتي سلطتك و البيض معها و عقبالي , بتعرفي هل الاسبوع عم استنى البيض و السلطة و صرت ناطرة اخرته ,و حاسة بالامل و الترقب , ان شاء الله ما يصير شي حلو , الف ألف مبروك الترقية و كمان ان مشي حال الجهاز و هي ما بتمرء هيك , بدنااا طقة     الدعوات الغالية عم توصلني و انا بحسها و الله بتيسر كل أموري , الف شكر الك لارا و ان شاء الله الك متلها و اغلى يا حق

37  الكاتب منى, on 11-05-2009 10:45 هلا غيوثة   ابدا حبيبتي مو مأخرة , ربي يشافيك و يعافيك و مرضة صغيرة و بترووح لحالها و الحمد لله ان ربنا هلا قدر الك المرضة مو قبل بعشر ايااام   لو تعرفي ان دمعت عيوني على الدعوة الي دعيتيلي ياها بالعمرة , ربي يطعمني و ادعيلك متلها و ربي يخليلي ياكي أخت غالية كتير و كريمة كتير   ان شاء الله تشدي و بعدها تجربي الكيك و لا تنسي تخبريني شو بيصير معك

38  الكاتب منى, on 11-05-2009 10:47 هلا نوراة قلبي و احلى رفيقة و الله   لحبيتي وانت كمان ان شاء الله احللمك كلهااا تتحقق قريب و تكوني احلى عيلة مع محمد و ربي يباركلكم ببعض و بكل القطط الي جاية على الطريق .    مممم , شو رايك شيل كم فريزة في الفريزر لحتى وقت تنزلي على سوريا ساويلك منه ؟ لحتى تزيد المحبة اكتر و اكتر

39  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 11-05-2009 20:19 كيفك يا ست منى عنجد وصفات الفل شكلها بشهي وانا حفضتها لاطبقا . سالتك المرة الماضية وما جاوبتيني وبتمنى تجاوبيني وبدي اسالك عالمرة كمان على طريقة الغريبة ازا ما في غلبة .

40  الكاتب منى, on 12-05-2009 06:40 هلا ام لين و مية السلامة بكل أهل الأردن أصحابنا و حبايبنا انتو     الف هنا و عافية على كل الوصفات الي جربتيهاو عجبتك و نورتي و انستي أختي .    الصينية الي عندي حوافها سميكة , يعني كل الكيك الظاهر بالصورة مع الايس كريم تبعه كان فيها و بعد ما نجهزه نحطه بالفريزر لحتى يجمد منيح و ممكن تحضرييه قبل بكم يوم اذا عندي ضيوف و تتركي اللمسة النهائية لاخر وقت     ان شاء الله تجربيه و يعجبك و رح نزل طريقة الغريبة قريب باذن الله , بس لا تزعلي اذا اتأخرت , مو نسيانة       مية هلا و سهبلا مرة تانية و ان شاء الله تبقي منورتينا على طول

41  الكاتب منى, on 12-05-2009 19:16 هلا أمونة   و انت أطيب و أحلى أختي , مالعادة ردودك قليلة بس دوما بمحلها و دوما غالية على قلبي ..    أمين أختي , ان شاء الله يكون بكرى احلى علينا و عليكم و كله خير و بركة باذن الله و الكلام هادا كله من زووءك و لطفك با بنت الأصول

42  الكاتب منى, on 13-05-2009 20:34 هلا سارونات   انبسطت كتير بقراءة ردك و كيف اتعرفت على الموقع و كل التفاصيل الصغيرة الي ذكرتيها و خصوصا لمن فرمتي الكمبيوتر أو لمن اشتركتي لاول مرة     الف هنا و الف عافية على قلبك و قلب كل العيلة على كل وصفة جربتيها و كتير بكون مبسوطة لما تنجح معك اي وصفة , احس انا الي ساويتها لاول مرة     الف شكر الك للكلام الحلو و الدعوات الاحلى و منورة دايما

44  الكاتب منى, on 17-05-2009 12:12 هلا ضحى   هادا بس من زووءك و لطفك حبيبتي و ربي يديم المحبةو المعروف دوما   الصور القديمة بصير بقى اخجل حطها لان بحسها بتسود الوج , بس اذا كانت الصورة ماشي حالها رح اتركها لخاطرك ان شاء الله

45  الكاتب سارونات, on 22-05-2009 12:18 السلام عليكم و رحمة الله و بركاته    اختي منى ناطرتك تجاوبي على اسئلتي ما في داعي تركبي المصعد بس اطلعي بالدرج و راح تلاقيهم فوق ناطرينك و بما اني كريمة فراح ضيفلك سؤال كمان )) شو هالكرم )) هل ممكن نستعمل الايسكريم العادي يعني اللي منشتريه او ايس كريم الفواكه اللي وصفته بالمنتدى و قديش الكمية و اكيد اذا استعملناه بيصير لازم نحطها بالفريزر مو البراد   ناطرتك لان الجو صاير حر و بدي ساوي هالوصفة و في نفس الوقت راح كون عم عيد وصفة الكيك الاسفنحي مشان تطلع احسن و احسن ان شاء الله    بالتوفيق  سلام

47  الكاتب منى, on 24-05-2009 20:23 هلا ام ياسمين أحلى توتاية و أطيب تورتاية بكل مصر   ألف شكر الك للرد الحلو و الكلام الطيب الي ما بيطلع الا من قلب طيب و روح جميلة و نفس حلوة .  كتير مبسوطة بأخوتك و انت واحدة من الاخوات الي اعتز و اتشرف بمعرفتهم   الله يخليلك ياسمين و يبارك فيها   ألف شكر الك للدعوات الكريمة و نورتي يا ام ياسمين

48  الكاتب منى, on 24-05-2009 20:24 هلا فرح   الف هنا و الف عافية على الكيكة , كتير انبسطت انك جربتيها و عجبتك

49  الكاتب منى, on 04-06-2009 11:37 هلا هيا   الف شكر الك للكلام الحلو و الرد الجميل , هادا بس من زووءك و لطفك أختي و انت من أهل البيت و بتشرفي و بتوري دوما  الكريما كميتها cl 50 و مقابلها كوبيين و نصف , ان شاء الله تجربيه و تكون على زووءك

50  الكاتب منى, on 25-05-2009 10:28 هلا سارونات   الكيك بالفريزر بقسم التجميد و لا تخافي لان هو ما بيصير ينحل , بتاكلي منه و بترجعييه للفريزر لحتى تبقى البوظة مجلدة   ممكن تستبدليه بالجيلو الغير منكهه أما النشاء فنو .  ممكن تستعملي الايس كريم العادي ,و الكمية تقريبا نصف كيلو و اكيد في الفريزر بكل الاحزال سواء حضرتي الايس كريم على ايدك او اشتريتيه جاهز و أيس الكريم الزبادي مو منيح كتير لهل الوصفة,  ان شاء الله تجربيها و تكون متل مابتحبي و أطيب

51  الكاتب منى, on 24-05-2009 20:29 هلا ام الهدى   الف صحة و الف هنا , كتير انبسطت انه عجبك و ظبط معك , اتوقع ممكن تستعملي كيك الزبادي , بس هادا اذا ظبط فأحسن بكتير   لاحقتك , بس لحط ايشاربي

52  الكاتب منى, on 24-05-2009 20:29 هلا ام جود   كل سنة و انت سالمة و بخير و عافية , و مية اهلا و سهلا فيك بالموقع نورتي و نور الموقع بأخت جديدة و كريمة و عيلتنا نورت بهل الخت الحلوة    الف هنا و الف عافية على كل شي جربتيه , على قلب عيلتك الحلوة واحد واحد

53  الكاتب سارونات, on 24-05-2009 20:55 ألسلام عليكم و رحمة الله و بركاته    اختي منى هلأ صار لازم تطلعي بالمصعد لان الاسئلة صارت فوق   انا ناطرتك   بالتوفيق  سلام

54  الكاتب منى, on 25-05-2009 10:28 شو سارونات جاوبت عن كل اسئلتك

57  الكاتب منى, on 25-05-2009 12:39 و لا يهمك ان شاء الله تجربي الوصفة و تكون طيبة و على زووءك

58  الكاتب سارونات, on 25-05-2009 22:35 السلام عليكم و رحمة الله و بركاته    اختي منى هل ضروري تكون الفواكه ناضجة جدا متل اللي منستعملها للمربى او بيكفي تكون متوسطة النضج او بس ناضجة  كمان بالنسبة للموز ما راح يسود بعدين     - هل ممكن نستعمل التفاح او الاجاص و هل منقشرهم او لا     اخر سؤال قلتي اننا نطحن الفريز مع السكر هل منستعمل خلاط الكوكتيل     كمان اختي منى بالنسبة للجيلاتين قديش بشتعمل انتي استعملتي القطع او البودرة و اذا استعملت ايا منهما فيكي تقليلي الكمية بالقطع او بالغرام او بالملعقة  بالتوفيق  سلام

59  الكاتب منى, on 26-05-2009 07:02 هلا سارونات   الفواكة لازم تكون ناضجة و الموز ما رح يسود لان رح تخلطيه مع الجيلو و بقية المقادير .  ما اتوقع بيصر مع التفاح أو الاجاص , بس لا مانع من التجربة اذا حابة و اكيد بدهم تقشير    لما نطحن الفريز نضيف معه السكر ونستعمل خلاط الكوكتيل   الجيلاتين حوالي 4 ملاعق و اذا حابة تستعملي الورق فبيعادله 3 ورقات

60  الكاتب شفاء, on 28-05-2009 11:10 السلام عليكم  اول شي مبارك مرور سنتين عالموقع مع انها متأخرة  انا لقيت الموقع بالصدفة(ياريت كل الصدف حلوة متل هي من شي اسبوعين    ومن يومتا صرت مجربة شي عشر شغلات (خربنا الميزانية )  كنت عمدور عالسماقية  وحسيت حالي كأني عمبسأل حدا قريب مني امي او خالتي  من كتر ماشعرت انك بتحبي الشي اللي عم تعمليه وبتشتغليه بضمير     ولما رحت عالصفحة الرئيسية وشفت منظر هالكاتو     فقررت انو لازم اجربوا  واخيرا جربتوا وطلع راااااااااااااائع وبشبه قالبك مو كتير شوي    ورح احاول انزلك الصورة

62  الكاتب منى, on 09-06-2009 07:44 هلا شفاء   الله يبارك بعمر و ببدنك و نورتي الموقع أختي   الف صحة و هنا على كل الوصفات الي جربتيها من الحلو و المالح و بكل لقمة   يا ريت لو فيك تنزلي الصور و بكون كتير ممنونة و مبسوطة

63  الكاتب منى, on 09-06-2009 07:45 هلا فوفو   الله يخليك اختي , الف شكر الك للرد و الدعوات الحلوة   ان شاء الله يحقق كل الي في بالك و تكون أمورك كلها ميسرة

64  الكاتب بدور, on 11-06-2009 00:45 نشالله سنة عن سنة بيكبر الموقع اكتر وبيكبر حلمك معو وبتحئئي كل احلامك يارب..    الموقع الو معزة كتير كبيرة بألبي رغم طلاتي البسيطة..  تعلمت منو كتير شغلات غير الطبخ:  هاللمة الحلوة و جو العيلة الوحدة يلي فيه..  ذوئك بترتيب صور الوصفات واللمسات الانثوية المميزة..  المقدمة العفوية يلي بتضيفيها لوصفاتك بتعطيني احساس اني موجودة معك بنفس الجو..  الجهد والتعب والاصرار يلي عبتئدميه لهل موقع حتى كبر وتميز..    كتير حبيت قصة موقعك والاسلوب يلي ذكرتي فيه بداية عمر الموقع       الله يبارك بعمرك وعلمك وعملك ولا يحرمنا هاللمة الحلوة يارب..    هالوصفة بتستاهل تنزل الموقع بهيك مناسبة لإنو فعلا كتير مميز و أنا بموت باللون الزهري

65  الكاتب منى, on 11-06-2009 13:33 هلا بدورة   الله يبارك بعمرك و بدنك و أهلك و كل عيلتك حبيبتي .  و انا متل حكايتك , نقطة ضعفي الزهري و الفوشي   ان شاء الله تجربي هل الكيك و يعجبك و يكون على زووءك

66  كل عام ولقمة طيبة واصحابها اطيب واطيب الكاتب رضاب, on 19-10-2009 17:13 مرحبا منا انشالله يكون الرد وجد لاني من زمان بحاول ابعث ومدري ليش ما بينضاف   المهم من زمان حابة اتشكرك من الاعماق وبقلك ربي يوجهلك كل خيرر وتشرف بمعرفة صديقة مثل ومتشوقة لاتعرف عليكي ومن فترةتعرفت ع جارة ببنايتي اسمها منى وحلبية كمان قبل ما يعرفوني عليها اقول يا رب تكون هيي بس ع كل حال يسعد لي عيونو" تيم برنرز الي اخترع النت وسمحلنا نتعرف عليكي ربي يجزيكي كل خير

67  الكاتب منى, on 21-10-2009 11:44 هلا رضاب   شرفتي و نورتي و انا كتير اسفةى على المشكلة الي صارت و الحمد لله انها هلا انحلت   الله يخليلي ياكي و ربي يزيدك شرف و نعم و نعيم انت و كل اهل بيتك يا قمر   اكيد ما طلعت انا , فهمت من كلامك انك برة سوريا و انا بحلب , بس ان شاء الله اتعرف عليك قريب اختي     مية اهلا و سهلا فيك و ربي يديم المعروف و المحبة دوما

68  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 15-12-2009 23:24 انشاء الله عقبال المية سنة صحيح متأخرة شوي بس انا اليوم انتبهت لللوصفة الجميلة والمناسبة الاجمل واكتشفت ان بنتك اسمها على اسمي وانتي اسمك على اسم أختي انا والله حسيتك متل أختي من قبل ما احكي معك   بس مو تحسيني متل بنتك يمكن اطلع اكبر منك   يا ستي الله يسعدك ويعطيكي ليرضيكي وتكبري بهالموقع للمستوى اللي بتتمنيه واكتر

69  الكاتب منى, on 16-12-2009 07:46 هلا فرح   الله يديم المحبة و الخير و المعروف دوما , الف شكر الك للدعوات الحلوة , ان شاء الله ربي يحققلك كل الي تتمنيه     ان شاء الله تجربي الوصفة و تكووون يممي و لا تنسي تخبريني

70  الكاتب شفاء, on 10-03-2010 23:35     هي صورة القالب اللي ساويته  وكتير نجح معي  وساويته مرتين  وان شاء الله برجع بساويه  كل الشكر لك ويعطيك العافية

71  الكاتب منى, on 10-03-2010 23:38 بيشهي   الف صحة و هنا و عافية على البك يا قمر     الشكر الك للصورة و الرد و ابداء الراي و اهم الشي لثقتك في

72  الكاتب شفاء, on 10-03-2010 23:43

74  الكاتب منى, on 08-05-2010 11:35 هلا ارام   الحمد لله ان هادا السبب ورا هل الغيبة ,شكرا كبير الك للرد و انك اتذكرت هل اليوم .    كمان الف صحة و هنا على البك على كل شي جربته و كمان على كل هل الدعوات الكريمة و الغالية    شكرا مرة تانية

76  الكاتب منى, on 17-05-2010 13:05 الف صحة و هنا و عافية يا رب     ان شاء الله وجك ابيض على طول

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved