أول ما ابتدينا   على النبي صلينا

سفرتنا مدينا   و الصورة حطينا 

الرابط عليكم    و الوصفة علينا

شو رايكم بهل العراضة   ؟



الوصفة الأولى حبوب متل ما حزرت ميوسة و هي رابط الوصفة و هي لابسة لبس العيد , قصدي مع صورتها الجديدة 

الوصفة التانية  متل ما حزرت ام سما و سارة هي صينية كرات اللحمة بالبطاطا و هي من الوصفات القديمة كتير بالموقع , اتمنى تشوفوها و تجربوها

الوصفة التالتة القرنبيط بصوص اللحمة و الي عرفت الوصفة و وضعت الرابط أم السوس و هي وصفة لذيذة كتير من المطبخ التركي 

الوصفة الرابعة لشوربة بحبها كتير شوربة الكراث و البطاطا و هي من المطبخ الفرنسي , حضرتها مع خبز السبانخ و جبنة الفيتا و كانت بتجنن و هي الوصفة بحلة جديدة  و الي حزرتها أختي ام محمد

الوصفة الخامسة  بازلاء باللحمة و هي أول طبخة بطبخها بحياتي , فيك تدخلي و تقري قصتي و كمان تشاركينا بقصتك  و الي عرفت الوصفة أم الهدى  .

الوصفة السادسة يا سادة يا كرام , شي فخم و معتبر و اخرر حلاوة و كل الستات حزروها ما هي سوراتهم : سوارة الست و الي سبقت و لبستها اول واحدة ام دانية 


الوصفة السابعة  وصفة طبقها لسارونات و كانت يممي , غراتان القرنبيط الفرنسي و الي حزرت هي ام محمد و بهيك بيكون صار عندها نقطتين ..

الوصفة التامنة كمان حزرتها ام محمد بزمن قياسي , خلال دقيقتيين بس من تنزيل الوصفة و هيك صار عندها 3 نقاط و الوصفة  هي حلى الزبادي بالفواكة , حلى خفيف و أنا بمووت عليه .

الوصفة التاسعة حزرتها ام السوس بظرف دقيقتيين كمان و هيك صار عندها نقطتين و هي الحراء اصبعو , في أطيب منها ؟؟ في حدا منكم لسا ما جربها ؟ يا حرام ..

الوصفة العاشرة هي الرز الأصفر بالبهارات , شي مرتب كتير و طيب كتير و حتى ما في داعي الواحد يطبخ شي جنبه و الوصفة بصورتها الجديدة هون و الي حزرتها أول الشي ام محمد و صار عندها 4 نقط .

الوصفة رقم 11 وصفة هيا البقطين المقلي بالتتبيلة , سهلة و طيبة و مفيدة كتير .و الي حزرتها ام السوس و صار هيك عندها 3 نقط ..

الوصفة رقم 12 من اسبانيا , دولتشي دو ممبريلو , يلا على الفلامنجو , و الي ربحت المرة هي ريم و هي أول نقطة الها

الوصفة رقم 13 سهلة كتير و من وصفات عيلتي المفضلة , الفاصوليا البيضاء ملكة الوصفات الشتوية و الي حزرتها ام الهدى و هيك صار عندها نقطتين

الوصفة رقم 14 مخلل الخضار المشكلة , قرنبيط و ملفوف و جزر و يا عيني على الحامض ما أطيبه و هي خلطتي السرية الي بحضر فيها كل المخللات تقريباً . و الي أخذت النقطة لارا 

الوصفة رقم 15 شوربة سهلة كتير و طعمتها فاجأتني لمن حضرتها , شوربة كريم اليقطين بالكزبرة لكويتية و الي اخدت النقطة لارا و هي تاني نقطة الها

الوصفة رقم 16 وصفة من وصفاتي المفضلة و هي وصفة لنورا الله يذكرها بالخير , بس ما مديت ايدي للصحن ما بشيلها الا و هو فاضي , جزر بزيت و الا حزرتها ريم و هي تاني نقطة الها

الوصفة رقم 17 هي المخلوطة , اكلة شتوية طيبة كتير كتير , و الي حزرتها بنت حلب ام محمد و أخدت فيها 5 نقط ..


الوصفة رقم 18 وصفة بيحبوها الكبار و الصغار و من أكتر الوصفات الي انسألت عنها بزمناتي و الفضل لباب الحارة . الشاكرية و الي عرفتها اول واحدة مع رابطها لارا و بهيك صار عندها 3 نقط

أخر وصفة الوصفة رقم 19 و كان لازم نختمها بحلو لعيون كل الصبايا الي شاركوا و حركوا المسابقة و عملوا هل الجوى الحلو , حلى اليقطين على الطرريقة التركية  و الوصفة لمنامينو , جربتها و كانت طيبة و الي أخدت نقطتها كمان لارا و هيك صار عندها 4 نقط .


خلصت مسابقتنا و الي أخدت أكتر عدد من النقط ام محمد , برافو عليك و الف مبروك يا عسل , بعدها لارا و أخدت 4 نقط , و بعدها سهى بـ 3 نقاط يعني منافسة كانت قوية كتير , الف مبروك لكل الي فازوا و الي فاز عن جد هو نحنا بهل الجو الحلو و الجمعة الحلوة كلنا بنفس الوقت و متل ما لاحظتوا أن الوصفات كانت بأغلبها شتوية , و ان شاء الله اذا عجبتكم الفكرة رح نعمل غيرها كمان بأخر الصيفية و قبل رمضان الكريم ..

أولادي عم يقولوا ماما ما بيصير مسابقة من غير جوائز , لهيك الي فازوا يطلبوا و يتمنوا مني وصفة جاية على بالهم و أنا رح حضرها و نزلها الهم , هي فكرتي , شو رأيكم ؟