L2ma.com | لقمة طيبة | L2ma.com | لقمة طيبة | مافن الشوكولا | · , كوب, صغيرة, ملعقة, راح | L2ma.com

القائمة الرئيسية

الأكثر تصفحاً

مافن الشوكولا

الكاتب/ سارونات

20/04/2009

اول شي تفاجأت ان الوصفة بتنعمل بس بمضرب السلك اليدوي يعني ما بدها لا خلاط و لا شي )) فيكي تساويها و هنن نايمين و ما راح يحسو عليكي )) كمان ما بتاخذ وقت و مكونات متوافرة و الوصفة لشيف كتير بحبها و تعلمت منها كتير هي حورية

اتمنى تنال الوصفة اعجابكم

نبدا ببسم الله

250 غ طحين ( كوب و نصف أو كوب و تلات ارباع طحين )
2 ملعقة صغيرة بايكنغ باودر
نصف ملعقة صغيرة بايكنغ صودا
نصف ملعقة صغيرة فانيلا
2 و نصف ملعقة كبيرة كاكاو بودرة
150 غ سكر ( ثلاث أرباع كوب سكر أو أقل حسب الرغبة )
2 بيض
ربع لتر حليب = كوب
ثلث كوب زيت
100-120 غ شوكولا مقطعة لقطع صغيرة )) اختياري
شو أعمل

·          يجب ان تكون المقادير بحرارة الغرفة لافضل نتيجة , توضع اوراق البليسيه في قوالب الكاب كيك .

·          نشغل الفرن على 200 درجة , ننخل الطحين+البايكنغ باودر+البايكنغ صودا+ الفانيلا + الكاكاو ثم نخلطهم بملعقة عادية و بعدها نضيف السكر و نخلط بنفس الملعقة .

·          نكسر البيضتين مباشرة في الحليب و نخلطهم بمضرب السلك اليدوي قليلا حتى يمتزجو ثم نضيف الزيت و نحرك قليلا .

·          ثم نضيف خليط البيض و الحليب و الزيت الى الطحين المنخول و نخلط بمضرب السلك اليدوي اما اضافة قطع الشوكولا فاختياري و انا عن نفسي ما ضفتها هالمرة بس اذا بدك تضيفيها عندنك طريقتين اما تضيفيها اخر شي للخليط او ترش فوق القوالب قبل ادخالها الفرن , الخليط راح يكون سائل و سهل لسكبه في القوالب .

·          ندخل القوالب الفرن المحمى على 200 درجة ل 5 دقائق ثم نخفض درجة الحرارة ل 180 درجة لمدة 15 دقيقة و اذن الوقت الاجمالي لنضوج المافن هو عشرون دقيقة .

ملاحظات هامة :

·          أهم شي بهالوصفة هو التقيد بدرجات الحرارة و المافن راح ينفش كتير حتى انا اتفاجات من كتر ما نفش ما شاء الله و ظليتني عم اتأملو .

·          حورية تقول بأن اي مافن لا يخفق كثيرا و يكون الخلط بمضرب يدوي و بسرعة .

·          هالكمية بتعمل اكتر من 16 قطعة من الحجم المتوسط انا ساويتلي ستة قطع من الجحم المتوسط و ستة كمان من الحجم لكبير على شكل قلب متل ما راح تشوفو بالصورة

أضافة إلى المفضلة (1) |

أقتباس | مشاهدات : 4877

تعليقات (31)

1 الكاتب منى, on 20-04-2009 12:21
هلا سارونات

الصراحة وصفة مميزة , بالأول لانها منك و انت عاملتيها و التاني لان من وصفات حورية و هي كتير بتعجبني , و بالأخير لا نها سهلة

عجبتني كتير هي ان نعملها من دون ما يفيقوا , هي قصة بتصير معي كتير :grin

سلم دياتك يا رب

2 الكاتب سمسمة, on 20-04-2009 12:22
يسلموا ايديك سارونات ان شاءالله هاليومين بجربه وبردلك شلون طلع معي وبالنسبة لحورية استفدت منها بكتير شغلات وماشاء الله عليها كتير حبابة

3 الكاتب منى, on 20-04-2009 12:30
يا ترى ايمتى موعد برنامج حورية و ناجيلا على التلفزيون ؟ انا ما عم يفتح معي موقع فتافيت صار اله اكتر من شهر ! شو المشكلة ؟ و الا بس من عندي

4 الكاتب غيث, on 20-04-2009 13:31
اله يعطيك العافية سارونات ماشاء الله ما عم نلحق شو بدنا نعمل من اكلاتك الطيبة والسهلة الله يجزيك الخير ما بعرف اذا شفتي تعليقي على اكلة لازانيا الرز واخبرتك فيه اني جربت الاكلة وكتير طيبة ولذيذة الله يسلم ايديك يا حق

5 الكاتب رنا, on 20-04-2009 13:34
شي حلو والله وعن جد وصفة سهلة ...بس انا ماعندي قوالب كب كيك تكفي ....يمكن عندي الصينية فيها 12 حبة بس صغار
رح جرب اقسم الكمية وشوف شو ح يصير

6 الكاتب سارونات, on 20-04-2009 17:26
السلام عليكم و رحمة الله و بركاته

يخليلي ياكي اختي منى ان شاء الله تجربيها و تكون على ذوقك

شو وصلت الصورة او لسه

لان اول مرة بصور و حط الصورة على النت :grin

سلام

7 الكاتب سارونات, on 20-04-2009 17:29
السلام عليكم ورحمة الله و بركاته

و ايديك سمسمة فرحت ان عجبتك الوصفة و ان شاء الله تجربيها و تكون متل ما بدك

بالتوفيق
سلام

8 الكاتب نور الأسلام, on 20-04-2009 17:36
مرحبا سارونات

يسلم هالديات باين انها وصفه طيبه رح حاول جربها بس لسا ماعندي قوالب الكيك لانو لسا ماجربت وصفات الكيك :sigh

ويسلمو اديك مره تانيه سلاممممممممم :zzz

9 الكاتب سارونات, on 20-04-2009 17:49
السلام عليكم و رحمة الله و بركاته

انا هلأ دخلت على موقع فتافيت و عم يشتغل بالاول ما فتح بس بعدين فتح بعد ما اخد وقت طويل

برنامج نايجيلا عم يكون على الساعة 17:00 بتوقيت السعودية و الاعادة الساعة 01:00 بعد منتصف الليل و الساعة 9:00 الصبح
اما حورية المطبخ فأعادو الحلقات اكتر من مرة و هلأ ما عم يعرضوها

بالتوفيق
سلام

10 الكاتب سارونات, on 20-04-2009 20:25
السلام عليكم و رحمة الله و بركاته

يخليلي ياكي اختي غيث كتير فرحت بردك و ان شاء الله تجربي الوصفة و تعجبك و الله يخليلنا اختي منى و الموقع اللي عم يجمعنا و يعفنا ببعض
انا هلأ قريت ردك في موضوع لازانيا الرز و كتير فرحت فيه و ان شاء الله كل وصفة بتجربيها انت و الاخوات تضبط معكم

بالتوفيق
سلام

11 الكاتب سارونات, on 20-04-2009 20:30
السلام عليكم و رحمة الله و بركاته

اهلين اختي رنا ايه جربي نصف الوصفة و خبريني بالنتيجةو ان شاء الله يطلعو متل ما بدك و احسن

بالتوفيق
سلام

12 الكاتب سارونات, on 20-04-2009 20:34
السلام عليكم و رحمة الله و بركاته

اهلين اختي نور الاسلام كتير فرحت ان الوصفة عجبتك و ان شاء الله تجربيها و تطلع متل ما بدك
و يلا بدنا ياكي تبلشي تساوي وصفات الكيك و الكاب كيك خصوصا ان وصفات الحلو بالموقع كتير طيبة و ناطرتك تخبرينا بس تجربي شي يلا تشجعي

بالتوفيق
سلام

13 الكاتب لارا مينا, on 20-04-2009 21:27
مساء الخير للأخت سارونات وللجميع.. وبصراحة اشتقنا لك كثير ولوصفاتك وتعليقاتك وأنا بيني وبين نفسي مقررة أعمل كل وصفاتك بس لما تبدأ إجازتنا وهي راح تبدأ بعد يومين بإذن الله وأكيد رح خبرك بالنتيجة أكيد فانتظري ردودي على الموقع.
وعندي سؤال بالنسبة لنا في القياس نستخدم الكوب والملعقة وما نستخدم الميزان لأن بالكوب أسهل وأسرع وعملي أكثر .. فكبف توزني المقادير يعني إنتي تستخدمي الميزان في كل مرة تعملي فيها الحلويات أو أي أكلة أخرى ولا إنتي مثل الشيفات الشاطرين يلي بيعرفوا وزن المقادير بالنظر فقط بدون مايرجعوا للميزان ياليت تخبريني للإستفادة أكثر .
الأخت منى إن شاء بألف خير ..بالنسبة لموقع فتافيت بيفتح معي كل يوم عادي لأن أختار البرامج يلي بتناسبني من الجدول لأن ماعندي كثير وقت لمتابعة التلفزيون وبالنسبة لحورية حاليا ماعم يعرض أي شيء لها أما نايجيلا تطلع كل يوم بتوقيت السعودية وبرامجها هي وليمة نايجيلا - صيفية مع نايجيلا - نايجيلا والمشاهير - نايجيلا عالسريع - روائع نايجيلا المواعيد هي : الحلقة الأصلية تكون الساعة 17 عصرا ثم الإعادة الساعة 1 بعد منتصف الليل والإعادة الثانية في الغد الساعة 9 صباحا. وتحياتي لك .

14 الكاتب منى, on 21-04-2009 11:29
هلا لارا

الف شكر الك للايضاح , ان شاء الله بتابعها الصبح , احسن موعج بالنسبة الي

و موقع فتافيت ما عم يفتح لهلأ و كنت حابة شوف وصفات شيف نسيت شو اسمه , هادا الي عم يعمل برامج عن الهند :roll

مصيره يفتح ما دامه عم يفتح مع الكل

سارونات , الصور شي بياخد العقل , ان شاء الله رح عدل الموضوع و ضيف الصورة , بعد اضافة اسم الموقع عليها من بعد اذنك :zzz

15 الكاتب سارونات, on 21-04-2009 12:28
السلام عليكم و رحمة الله و بركاته

اهلا و سهلا اختي لارا كتير بفرح بالردود الطويلة كتري منهم :grin

كتير فرحت انك راح تجربي الوصفات اللي حطيتها شكرا كتير على ثقتك و ان شاء الله تطلع متل ما بدك و أحسن و ناطره ردودك

الله يسمع منك و صير شيف شاطر ان شاء الله و ان شاء الله كلنا نصير هيك
للاسف انا ما عندي ميزان بس عندي كأس قديييييم من البلاستيك فيكي تعيري فيه الطحين و السكر البودرة و الرز و الكاكاو بالغرام و كمان في جزء للسوائل هو صغير بحجمه بس كبير بفائدته
بس ما فيه جزء للسكر العادي و ريقي نشف و انا عم قيس و احسب كأنها حصة رياضيات بس انا بحب الرياضيات :grin

المهم انا قستهم كمان بالكوب و راح حطهم بس حبيت حطهم بالغرام متل حورية مشان يكونو دقيقين تكرم عينك هلأ راح ابعث لاختي منى المقدار بالكوب و قلها تحطو جنب الكقدار بالغرام

بالتوفيق
سلام

16 الكاتب سارونات, on 21-04-2009 13:10
السلام عليكم و رحمة الله و بركاته
فرحت كتير ان الصورة عجبتك واكيد حطي عليها اسم الموقع اصلا كان بدي قلك تحطيه هذا شرف لصورتي :zzz

و راح نفرح كتير انا و الصورة :grin

اختي منى انت قصدك على الشيف الانجليزي فلويد
هلأ راح شوفلك المواعيد بالموقع
رجعت :grin

موعد البرنامج يوم الخميس الساعة 00:30 بتوقيت السعودية و الاعادة الجمعة الساعة16:30 انا هيك لقيت بالموقع

بالتوفيق
سلام

17 الكاتب منى, on 21-04-2009 19:34
شكرا كتير سارونات

و هي حملت الصورة ان شاء تكوني انت و اياها مبسوطين دايما :zzz

18 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 21-04-2009 20:39
مرحبا يأخت سارونات. الله بسلم هالايدين .هم استنى الاجازه حتى ساوي المافن وخصوصا لانو بالشوكولا. والله ياست منى انتزع الريجيم من هالاكلات الطيبه .الله يعطيكن العافيه جميعا

19 الكاتب سارونات, on 21-04-2009 23:10
السلام عليكم و رحمة الله و بركاته

يخليلي ياكي اختي منى هلأ كلنا صرنا مبسوطين :grin

ها هي المقادير بالكوب يا ريت اختي منى تحطيها جنب المقدار بالغرام

كوب و نصف او كوب و ثلاثة ارباع طحين

ثلاثة ارباع كوب سكر او اقل حسب الرغبة

ثلث كوب زيت

بالتوفيق
سلام

اختي منى اشتقنا للحزازير شو في واحدة جاية بالطريق او لساتها بالمحطة :grin

20 الكاتب سارونات, on 21-04-2009 23:14
السلام عليكم و رحمة الله و بركاته

اهلا و سهلا اختي سكر مرحبتين و ان شاء الله تجربي الوصفات و يعجبوك و اضم صوتي الى صوتك بالنسبة للريجيم احسن شي الواحد ياكل اللي بدو ياه و
يمارس رياضة عقد ما بيقدر و هيك بيصير في توازن )) يا ريت :grin

))

بالتوفيق
سلام

21 الكاتب mayada, on 21-04-2009 23:38
السلام عليكم اختي منى انا بعتون بتعليقات الفطور السوري على كل حال مو مشكلة سؤالي هو بدي طريقة البسبوسة متل يلي عند سلورة يم يم يم ما الذا ياسلام وشغلة تانية بدي وصفة المجوقة طبعا الحلوية كمان من عند سلورة وبس هدول ارجوكي تفيديني ويعطيكي الف مليون عافية يا ست الستات سلام ميادة

22 الكاتب ام دانية, on 21-04-2009 23:51
يعطيكي العافية ياست سارونات منظرها حلو واكيد طعمتها اطيب لانو بالشوكولا رح جرب اعملها انشاءالله لعلى وعسى الكتكوته الي عندي تاكلها :grin

23 الكاتب سلاف, on 22-04-2009 11:17
يسلم هالايدين سارونات الوصفه كتير سهله وانا من عشاق الشوكلا يعني لازم نساويها باقرب فرصه ان شاء الله
والصوره كتير حلوه اشتهيت مد ايدي واخد وحده :zzz

يسلمو سارونات كل وصفاتك اللي بتضيفهن سهلين وشكلهن بشهووووووو

24 الكاتب منى, on 22-04-2009 11:27
هلا سارونات

هلا رح عدلهم ان شاء الله و كانك قاعدة بقلبي , هلا رح حط كم وصفة للاخوات على الصفحة الرئيسية لان صار زمان باعتينهم و بعدها عندي حزوورة :zzz

بس لذيذة كتير

25 الكاتب منى, on 22-04-2009 11:34
هلا ميادة

ان شاء الله بضيف البسبوسة و المعجوقة و نصير نتعجوق على سلورة :zzz

26 الكاتب سارونات, on 22-04-2009 18:43
السلام عليكم و رحمة الله و بركاته

اهلا و سهلا اختي ميادة و اضم صوتي الى صوتك و اطلب وصفة البسبوسة من اختي منى لما تقدر

*****

اهلين ام دانية الله يعافيك و يحفظلك الصغنونة و ان شاء الله تساويها و تعجب الكتكوتة لان رايها مهم و الوردة اللي بالصورة لالها من خالتها سارونات

*****
يخليلي ياكي اختي سلاف كتير فرحت ان الصورة عجبتك و لو اتفضلي خدي اللي بدك ياه و ان شاء الله تجربي الوصفة و تعجبك

*****

اختي منى ناطرين وصفات الاخوات و بعدها الحزورة الطيبة اللي حكيتي عنها و لا تنسي البسبوسة :grin

بالتوفيق

سلام

27 الكاتب لارا مينا, on 22-04-2009 20:23
مساء الخير للجميع .. الظاهر أنا والأخت سارونات بنتنافس مين يلي بيكتب عن برامج قناة فتافيت :grin

المهم أختي منى اسم البرنامج ( من الهند) وهو للشيف الإنجليزي كيث فلويد ومواعيد البرنامج يوم الخميس الساعة 12:30 بعد منتصف الليل والإعادة يوم الجمعة الساعة 8:30 صباحا والإعادة الثانية بنفس اليوم الساعة 16:30 عصرا -- ويوم السبت الساعة 12:30 بعد منتصف الليل والإعادة يوم الأحد الساعة 8:30 صباحا والإعادة الثانية بنفس اليوم الساعة 16:30 عصرا وأنا مثلك أخت منى البرنامج عاجبني كثير كثير وأفكر أسجله فيديو لأن التفاصيل بداخله كثير وما بلحق أكتبها. وكمان عاجبني برنامج صحبة طيبة وبرنامج مع جدودنا على القناة لأن بتشبه كثير موقع لقمة طيبة وتحياتي للجميع.

28 الكاتب منى, on 23-04-2009 07:41
هلا سارونات

تكرم عيونك وعيون ميادة , ان شاء الله قريب بس مشان الله لا حدا يزعل مني على كتر ما عم اوعد و اتاخر بالوفي :roll

29 الكاتب منى, on 23-04-2009 07:42
هلا لارا حبيبتي

الف الف شكر الك , تعبتك معي خليلي عيونك , البرامج الي قلتيها كلها حلوة
هادا بس من زووءك يا قمر و تسلميلي على عزابك

30 الكاتب سارونات, on 23-04-2009 14:01
السلام عليكم و رحمة الله و بركاته

:grin

كنتناطرتك تحط مواعيد فلويدز انديا لان ما اقتنعت باللي عندي جازاك الله خيرا

بالتوفيق
سلام

31 هذا البريد محمى من المتطفلين , تحتاج إلى تشغيل الجافا سكريبت لمشاهدته
الكاتب Jassy, on 24-01-2011 00:37
السلام عليكم ورحمة الله

كان ببالي إعمل شي معجنات اليوم بس أكيد مو مافن هههههه لكن لما شفت الوصفة تنشطت وقمت عملتها فورا بدون تأخير :zzz

. وبدون استعمال المضرب الكهربائي هي إلي :grin

لأن تبعي خربان وآخر فترة عم بخلط بخلاط الكوكتيل.

صحي الصورة هون مو طالعة، بس كمان القالب عندي قلوب، عملت نص الكمية، طلعوا 9 حبات بيجننننننوا، وفعلا نفشوا كتير (بس بنص القلب نفش عشكل دائرة)، ومن جوا كتير كتير شغلة كبيرة !
مع إني حاولت قدر المستطاع حط المكونات عالحجم المطلوب، لكن السكر فيون طلع قليل (رشيتون آخر الشي بسكر بودرة من فوق فانحلت القصة)، وطلعت شوي طعمة الصودا قوية.
هلئ البيكينج صودا هي نفسها بيكربونات الصوديوم ما. ممممم أنا بستغرب كيف هيك بتنحط بالمعجنات عادي، لأن بروسيا بيطفوها بالخل !. يعني بياخدوا ملعقة صودا وهي بالملعقة بيكتوا عليها خل فبيتفاعل وبتطلع أصوات وفقاعات، بعدين بيحطوها بالمكونات.
ما كتير لسه فهمت التفاعلات

وليش هيك بتنعمل.

سرنوتة يسلمو كتير

صارت وصفة معتمدة !!!

والسلام عليكم ورحمة الله

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 24/01/2011 )

< السابق		التالى >

[ عودة ]