خلص الشتي و انا مبسوطة كتير بالشمس و النسمات الحلوة الي بتفيقني كل يوم الصبح , اشتقت للربيع , و هو فصلي المفضل لان فيه كل شي أخضر كل شي جديد و كل الأمل .

و مع اني مبسوطة بالربيع كتير , و بخضرته الي بتحير الواحد شو يطبخ من تنوعها , بتلاقيني زعلانة على البرتقال و الجزر و الشمندر , و عم جيب منهم اكتر و اكتر كأن عم خزن لسنة الجاية , طبعا تخزين معنوي لان ما بحب الفريزر كتير ..

طيب شو بدكم بكل هل القصص و وجعة الراس , الخلاصة اني رحت لسوق الخضر و جبت هل الجزرات الحمر لأعملهم محشي , و هو من المحاشي الطيبة كتير كتير و كمان كتير , فيه شي بسيط نكهة حلوة و انا بحب هل الطعم بالأكل , قصدي الحلو مع المالح و السويت اند سور . يمكن ما كتير منكم بيحب هل النكهة . شو نعمل ؟؟ طيب أي واحد ما بيحب النكهة الحلوة بالأكل خليه عم يتفرج على هل الأحمر بأحمر و الي بيحب هل الطعمة يلحقني على الوصفة .

الوصفة لازملها جزر أحمر و هو اله نفس شكل الجزر العادي بس أقسى و لونه أحمر , حفره صعب شوي لهيك نحنا متوفر عندنا محفور و خالص و انا بكسل احفره بنفسي لهيك بجيبه محفور , شو و الله مو كسل بس عم خبي قوتي لغير شي .

هل المحشي ممكن ينطبخ لوحده و ممكن ينطبخ مع الملفوف بنفس الطنجرة , تلاقي الملفوف أخد من لون المحشي و صار لونه على زهر و طعمته بتجنن .

بالصحة و الهنا

2 كيلو جزر أحمر
عظام خاروف


الحشوة :

كوب و نصف رز مصري
ربع كيلو لحمة غنم مفرومة مدهنة
نصف ملعقة صغيرة بهار مشكل
1 ملعقة كبيرة رب البندورة
رشة قرفة
رشة فليلفة حمراء ناعمة


المرقة :

4 فص ثوم مهروس
ملعقة كبيرة نعناع يابس
عصير حصرم أو دبس رمان
ملعقة كبيرة رب البندورة
ملح و بهار


·          يغسل الجزر و يبشر ثم يحفر و يفرغ لبه . يغطى قاع طنجرة كبيرة بعظام الخاروف .

·          يغسل الرز حتى ينظف ثم يخلط مع باقي مقادير الحشوة و يضاف القليل من الماء للحشوة لتسهيل الحشي .

·          تحشى حبات الجزر بالرز و ترتب في الطنجرة المجهزة ثم يغطى المحشي بثقل مناسب لمنع خروج الحشوة منه أثناء الطبخ .

·          يذوب رب البندورة بالقليل من الماء ثم يوضع فوق المحشي مع الحمض و الثوم و النعناع و ما يكفي من الماء لغمر المحشي .

·          توضع الطنجرة على نار متوسطة و بعد أن تغلي تهدى النار و تترك لمدة ساعة و نصف أو حتى ينضج المحشي .

·          يقدم المحشي فوراَ مع الصلصة و الفليلفة الحرّة و الفجل و النعناع .

تعليقات (24)

1  الكاتب ام نور, on 18-04-2009 22:45 السلام عليكم كيفك منى سلم هالديات محشي بيشهي شكلو ولونو بس سبحان الله اول مرة بسمع بنوع هالجزر يا ريت لاقي منو لا جربو

2  الكاتب منى, on 19-04-2009 08:39 و عليكم السلام و رحمة الله و بركاته ام نور     لو فيك تدوقيه أو ابعت الك كم محشية , حتى ممكن يصير مسقعة و أخوتنا المسيحية بيعملوا معه كبة حيلة , بيطلع لونها تحفة

3  الكاتب سلاف, on 19-04-2009 10:01 يسلم هالايدين يارب 00   سبحان الله بتلاقي كل شيئ طيب بسوريا ويكون بموسمه نحن بهالغربه محرومين كتير شغلات00 ياسلام هلأ عالجارنك وعالعقابيه 00 والجزر الاحمر يا امي شو طيب مع الملفوف  منى انتي عم تعذبينا بهالصور المغريه 00 عم تعملي فينا شم ولا تدوق     المشكله هون غالبا كل شيئ عنا بلاستيكي بهالغربه فيه شغلات بتشتهي عليها مابتلاقيها هون ولما مننزل بالصيف بكون راح وقتها وبنتحسر على حالنا   هلأ المهم بدي اسألك هدا الجزر ممكن يتيبس او ينحفظ بالفريزر ولا مابصير هيك شيئ ؟؟؟   عم اكتب الرد وكل شوي اطلع لعند الصوره  تسلمي يأاحلى منى بالدنيا هالبقدونسه شو عاطيه جمال للصوره وللصحن كمان اشتهيت عليها هههههه ماشاء الله عليكي فنانه

4  الكاتب رنا, on 19-04-2009 14:14 ههههههههه يسلموا ايديكي انا امي لهلأ بتجيب جميع انواع المحاشي محفورة بس متل ماقلتي انا امي كتير شطورة ومو شغلة كسل بس مدرسة انكليزي وبتجي صوتها مبحووووووووح وخلقها ضيييق   ياستي هالجزرات بياخدو العقل وشهيتينا عليهن لانه هون مافي جزر احمر ابداااا مدري ليش مابيلتقى لاهو ولا التوم الاخضر ...سبحان الله   بس اكلة كتير طيبة يسلم دياتك

5  الكاتب نور الأسلام, on 19-04-2009 16:51 السلام عليكم كيفك منى والله انك اخت عزيزه وغاليه اي والله هلا الربيع بسوريا بيكون غير شكل الخضار والورد والهوا والنسيم هنيالك والله اشتقنا لسوريا ولربيع سوريا ولهوا سوريا وكلشي بسوريا تحياتي الك ويسلم دياتك

8  الكاتب ميساء, on 19-04-2009 22:21 انشا الله بيعيشوا هالايدين يا رب والله اشتهيت مد ايدي واخد شي محشية أنا كتير بحبو لمحشي الجزر بس مابشوف بالشام ابدا جزر أحمر بس الأصفر موجود وبينباع محفور خالص بسوق التنابل أكيد سمعانة بهالسوق والله أنا مو تنبلة ابدا بس متل ما قلتي أحيانا الوحدة بتضطر تشتري هيك شغلات شكرا حبيبة قلبي يا سفيرةو رائدة المطبخ السوري في عالم النت ياقمر أنت بس طلب أخير اذا في مجال تنزلي وصفة الكبة الصاجية لو بدون صورة لأن بدي اعملها وبدي ياها على أصولها من تحت دياتك الحلوين وشكرا لكل جهودك

9  الكاتب ام دانية, on 20-04-2009 00:16 يعطيكي العافية شكلو مغري بس انا ولامرة دايقتو بتذكر لما كنت صغيرة كانت ماما تعملو مسقعة وكنت حب هل الاكلة كتير بس بالمانيا مافي جزر احمر ياترى ممكن تصير المسقعة بالجزر العادي واذا بتصير ياريت تعلمينا طريقتا هاد من بعد اذنك طبعا

10  الكاتب ام كريم, on 20-04-2009 01:45 مرحباللجميع بلموقع واصدقاء الموقع والست منى يسلمو هلايدين بس شكلنا يلي بلغربة بهلموقع اكتر من يلي بسوريا فتت عماقرأ الوصفة طبعا بلحلم التطبيق لان هون مافي جزر احمر ليش شو في شي ينشها عكل حال خليا بلقلب تجرح من كتر ماقرأت التعليقات عنجد غصيت لسوريا ولكل شبر بسورياطولت عليكم عكل حال ست منى كتري من هل اكلات مشان نشتاق اكتر وننزل علبلاد اسرع مرة تانية يسلمو ايديكي ويخليلنا هلموقع الحلو لان بلنسبة الي انا بلاه بضيع   :

11  الكاتب منى, on 20-04-2009 11:52 هلا سلوفة   الله يسلمك و يحفظك و يخليكيو ترجعي لسوريا و انت محملة بالخير و البركة عليك و على كل عيلتك .    الجزر ما بيتيبس و لا بينحفظ بالفريزر , معلش لا تزعلي , بس ما بدنا شي اش منكان       هادا بس من زووءك يا قمر و الصحن كله و اكبر باقة بقدونس لحسابك

12  الكاتب منى, on 20-04-2009 11:53 هلا رنونة   كلامك صح و احيانا لازم الواحدة تستعين بشي جاهز لضمان و سلامة عقلها بأخر النهار     الله يسلمك و يخليك

13  الكاتب منى, on 20-04-2009 11:57 هلا نور   الله يخليك و يسلمك و يباركلك بعيلتك و ترجعي لسوريا و انت سالمة و غانمة و مبسوطة و باحلى صحة و عافية يا حق

14  الكاتب منى, on 20-04-2009 12:00 هلا فروحة أحلى الصبايا   شكلها هل الوصفة الي قلتيها بتجنن , انا رح استناها و لو فيك تبعتيها من دون صور لان عندي جزر و حبيت حضر فيه هل الوصفة , يممي

15  الكاتب منى, on 20-04-2009 12:03 هلا سمسومة   و الله ما بعرف اذا متوفر بالشام او لا , و على كل هدا الجزر مو موضة جديدة عندنا بحلب , هادا متوفلر من وقت ستي و جدي     الجزر الاصفر بيعملوا اللبنانية محشي , بس انا مو مجربته , بيحفروه و بيحشوه لجمة و صنوبر و بصلة و بعدا يطبخوه بالمي مع عصير الحصرم , اتوقعه طيب كتير

16  الكاتب منى, on 20-04-2009 12:09 هلا ميوسة     اكيد سمعانة فيه و كل ما روح للشام لازم افتل فيه 4 او 5 مرات لشوف اذا شي مو موجود بحلب عندنا لحتى اخده معي     كلك زووء يا قمر و فهمت من كلامك ان ممكن نعمل محشي بالجزر الاصفر العادي ؟    تكرم عيونك رح نزلها بركي هل اليومين او اسبوع الجاي بالكتير

17  الكاتب منى, on 20-04-2009 12:12 هلا ام دانية   عوافي على قلبك وربي يخليك ماماتك بصحتها و قوتها     ما اتوقع بتصير المسقعة بالجزر الاصفر و على كل رح اسالك فريق الدعم الفني

18  الكاتب منى, on 20-04-2009 12:31 هلا ام كريم   متل ما قلتي كتير هون من الاخوات مغتربات و في كتير من سوريا بس هدولة على المخفي , يعني بيدخلوا و بيقروا و بيمشوا     خليلي عينك ام كريم ان شاء الله بترجعي لسوريا و انت حاملة و محملة الخير و الصحة و العوافي و الهنا

20  الكاتب منى, on 21-04-2009 11:37 هلا ميادة   ما وصلني شي , يا ترى وين بعتيهم ؟

21  الكاتب ام دانية, on 21-04-2009 23:58 والله ياست منى موكل الاخوات المغتربات بيدخلو وبيطلعو على الماشي والله انا يوميا بدخل واذا انا ما صحلي بيدخل زوجي وبقلي وكتير من الوصفات انا عملتها وكانت طيبية لانو الوصفة من دياتك بس للاسف بنوتاتي الله يخليلي ياهن مو مخليني اعمل شي لذلك ما بفضى دائما اكتب

22  الكاتب منى, on 22-04-2009 11:25 له يا ام دانية   اناما عم ااقصد الخوات الي عم يردوا , انا عم ااقصد عن ناس متل رفقاتي و قريباتي بيدخلوا و بياخدوا الوصفات و مو مشتركات و لا بيعلقوا     الله يخليلك البنوتات و تشوفيهم عرايس بيسروا القلب و الخاطر يا حق

23  الكاتب Eman, on 24-04-2009 16:37 يسلمو منى على الوصفة .. أنا دقت الجزر البنفسجي مدري الأحمر .. بس ما دقته على شكل محشي ،وقتها ما كان محفور وماما ما بتقدر تحفره لقساوته ،لذا ما صرلي قسمة دوقه ..  بس بيني وبينك ، أفضل أكون من قسم المتفرجين على قولتك؛ مو بس لأن ما عنا عنا جزر ،بس ما دخلت مخي فكرة حلو وحامض وما بتخيل رح آكلها هلأ بحملي .. ممكن بعد ما يروح الوحام وأرجع لطبيعتي   بس سؤال : متى آخر وقت لتواجد هذا الجزر؟ رح أنزل آخر شهر خمسة وما بعرف هل بكون موجود وقتها ؟وبوسيلنا القطاقيط الحلوين ..

24  الكاتب منى, on 25-04-2009 13:27 هلا امولة   في كتير ناس ما بتفضل هل الطعمة , انا عني بحب التغيير هل الطعمة بالذات بموت عليها     الجزر لا ما بقى متوفر متل قبل و يمكن كمان اسبوع ما بقى نشوفه , حتى امبارحة كنت بالمول و ما لقيت منه يعني لاخر خمسة اتوقع مستحيل يبقى     بوساتك بيوصلوا و نورتي حبيبتي و ربي يقومك بالسلامة

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved