L2ma.com | لقمة طيبة | L2ma.com | لقمة طيبة | سلطة الزعتر الأخضر و الجبنة البيضاء | الزعتر, الجبنة, سلطة, منها, · | L2ma.com

القائمة الرئيسية

سلطة الزعتر الأخضر و الجبنة البيضاء

الكاتب/ منى

04/04/2009

سلطة الزعتر الأخضر و الجبنة البيضاء
سلطة الزعتر الأخضر و الجبن

سلطة الزعتر الأخضر و الجبنة البيضا مع الخبز الأسمر كله ألوان و طعمات و شي بيشهي , هي سلطة اختي اية , الي حضرتها بعزيمة رفقة ماما , ما في أطيب منها و لا أحمض و ألذ منها . الجبنة مع الزعتر بتعطي طعمة طيبة و مع الليمون و رشة النعناع رح تاكلي منها و ما تشبعي .

السلطة لازم تكون حامضة و هيك طيابتها و الملح ممكن تضيفيه بعد أن تدوقي الجبنة لان إذا كان ملحها كتير ما في داعي تضيفي ملح أبداً

بالصحة و الهنا

باقة زعتر أخضر
4 – 5 كعب جبن أبيض ( أنا استعملت جبنة حلب )
عصير ليمونتان أو أكثر
5 ملعقة كبيرة زيت زيتون
رشة نعناع يابس
ملح حسب الحاجة
شو أعمل

· تنتف أوراق الزعتر عن الأعودا ثم يغسل و يترك جانباً حتى يجف .

· تفرم الجبنة لمكعبات ثم تقلب مع الزعتر و بقية المقادير و تقدم .

أضافة إلى المفضلة (1) |

أقتباس | مشاهدات : 6123

تعليقات (17)

1 الكاتب ام محمد, on 05-04-2009 09:59
تسلم دياتك يا منى

انا كتير بحبهاوبعملها مثلك بس بضيف بصلة صغيرة
ورشة سماق شهيتني اروح وساويهاوالله يعيني على تنتيف اوراق الزعتر

مرة تانية شكرا ياعسل

2 الكاتب سلاف, on 05-04-2009 13:15
يسلم هالايدين يامنى لو تعرفي اديه بحب هالاكله
من شيئ شهر وشوي توحمت عالزعتر الاخضر والجبنه والقصه مافي عندي غير الزعتر الخضر اليابس الاوريغانو وحده من قرايبيني لما عرفت جابتلي كيس زعتر اخضر مصفر ومحطوط بالفرزيه بس عنجد شيئ بجنن مافي 3 ايام ماكان بقيان ولا زعترايه
المهم سألتها شلون ساوته قالتلي انه بنات حماها بصفروه وبيحفظو بالفريزر بس هيه مابتعرف شلون
منى الله يخليكي مدام هلا يمكن بلش ينزل او نزل الزعتر الاخضر كيف فينا نحفظه بالفيزر منشان قول لماما تجهزلي ياه

يسلم ايدكي يامنى لو كنتي حنبي كنت قلتلك ابعتيلي هالصحن فرط ريقي اممممممممممممممممممم
جبنه وزعتر وليمون ياسلام

3 الكاتب غيث, on 05-04-2009 15:19
يا عيني اه اشقد بحب هالطبق وكل العائلة عندي كتير لذيذ وبيقبل بتاكلي ما بتشبعي الله يعطيك العافية منى على ترتيباتك اللي بتفتح النفس شكر ا لك صحيح متل ما سالتك الاخت سلاف عن الزعتر الاخضر افيدينا منشان انا كمان ماماتي تحضر لي ياه بتعرفي غربة ومو كل شي متوفراو من الصعب تعرفي كل شي ببلد غريب عنك انا بعتت الوصفة اللي ما وصلت اللي ارسلتها من شهر اعدت كتابتها وبعثتهاالبارحة على اتصل بنا يا ترى وصلت لانها تالث مرة بكتبها وبعتقد ان ما وصلتك خلص ما عاد عيدها لانها جننتني وانابعيد وبكتب عموما كله خير من ربنا وشكرا لك على اهتمامك

4 الكاتب لارا مينا, on 06-04-2009 21:35
مساء الخير أخت منى ولجميع الأصحاب ... إن شاء الله تكوني بخير والله يديم عليكي نعمه وخيراته يارب حبيت أسال عنك بس ..وخبرك إني عملت برغل بالبندورة , والكبة المقلية , و مكدوس الباذنجان ولحد اليوم وأنا بدعيلك ,,والحمد لله اتبعت الطريقة بالزبط ومافيه شيء اتخربط معي والكبة عملت نصف الكمية و طلعت خيال وآخر حبة كبة حشيتها بآخر ملعقة حشوة يعني عالقد تمام والباذنجان استخدمت نوع أسود حجمه صغير لأن الفاتح مش متوفر أبدا ولا نحلم حتى نشوفه بالمنام ومع ذلك تحفة فلكي كل التحايا على مجهودك ومجهود أخواتك وأمك وبصحة وعافية على طول وفكرتك رائعة جدا بتصوير عزايمك سواء فطور أو غداء أو عشاء حتى لو جلسة عصرية للأصدقاء لأن يمكن مايخطر ببالك كيف استفدنا منها بشكل كبير جدا وما أقدر أعبر عنه بالكتابة بس.. وشكرا .

5 الكاتب منى, on 07-04-2009 13:54
هلا ام محمد

الف هنا و اكيد طيبة مع البصلة , و مع السماق رح تصير لسا احمض و احمض ,. بجربها ان شاء الله المرة التانية على طريقتك

6 الكاتب منى, on 07-04-2009 14:05
هلا سلوفة

الله يعينك على الوحام و قصصه , ان شاء الله بتمضى على خير و بتقومي انتي و الببي بي بالف صحة و عافية يا حق

سلوفة هي الزعتر الأخضر ما بعرف احفظه الا بطريقتين , اما نشفه و اطحنه كل شوي بشويتها أو مع ليمون و مي و زيت بمرطبان , بس بالفريزر جربت مرة قام اسود كله و ما قدرت استفيد منه بشي :roll

و الله لو كنتي جنبي كنت بعتلك اطيب سلطة او يمكن كنت عملتها و عزمتك ناكلها مع بعض

7 الكاتب منى, on 07-04-2009 14:06
هلا غيوثة

ان شاء الله تعملي هل السلطة و تتزكريني لأن انا بحبها كتير كتير
حفظ الزعتر متل ردي على سلاف , ما بعرف كيف ممكن ينحفظ بالفريزر من دون ما يسود او يتغير لونه :roll

المربى وصل و ساويته امبارحه و اليوم كنت من شوي عم صوره , كتير طيب و تغيير شكل , سلم هل الديات يا حق غيوثة انت و أختك هناء و ربي يديمكم لبعض

8 الكاتب منى, on 07-04-2009 14:07
هلا لارا

بعد زمان القمر ما بان ,. يا ستي هنا و صحة على الكبة و المكدوس و البرغل بالبندورة , نقيتي اكلات كلها طيبة و ما بينشبع منها

خلص ان شاء الله ما بتمرق اي مناسبة عندي من دون تصوير و لو كم صورة على السريع , و ربي يديم الافراح و يديم اللمة و الجمعة الحلوة بالصحة و العافية

9 الكاتب سلاف, on 07-04-2009 16:29
أنا بعرف طريقة الزيت والليمون بس عم قلك يامنى هالطريقه عنجد تقولي هلأ قاطفتيه انا رح خلي ماماتسألي اللي بصفروه بسوريا وان شاء الله اذا زبط مع ماما وعرفت الطريقه يبقى ببعتلك ياها
والله يخليلي ياكي يامنى والله كاني اكلت الصحن كله تسلميلي شو كلامك حلو وبيوصل للقب بسرعه
هلا بما انه موسم الكمايه مابعرف اذا لسه موجوده بس كمان بتتفرز متل الشوكي مو هيك ؟؟؟سبحان الله هالحامل مابتفكر غير بالاكل
:roll

10 الكاتب منى, on 07-04-2009 19:40
ان شاء الله سلوفة و بكون الك ممنونة

الكماية تنحك منيح منيح و بعدها اما تقطعيها أو تتركيها على حالها و تسلقيها بمي و ملح , و مية السلق لا ترميها لان مفيدة كتير :zzz

11 الكاتب بدور, on 23-04-2009 00:25
يا سلام على هالسلطة ما اطيبها وما اسهل طريئتها..

بعد زمااااان والله شتئت للموقع ولكلشي فيه

الله يسلم دياتك النواعم يارب

الصيف عالبواب واطيب شي بالصيف السلطات والحلويات والعصير

الله يخليلنا ياكي ويباركلك بعملك ووئتك يارب.
شكل هالسلطة مشهي وطعمتها ولا اروع من هيك.
يسلمو كتير ميمو الحلوة

12 الكاتب منى, on 23-04-2009 07:42
خليلي عينك يا قمر , لو كنت جاية على عزيمتي كنت دقتيها :roll

خيرها بغيرها و ان شاء الله تجربيها و تكوون على زووءك :zzz

13 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 20-03-2011 13:23
هي السلطة كتير طيبة منى بس أنا بعملها بطريقة تانية وهي:
زعتر أخضر مغسول ومفروم
جبنة مفرومة
بصلة خضراء مفرومة
بندورة مفرومة ناعمآ
زيت زيتون
عصير ليمون
رشة ملح+فليفلة حمرا
جربيها ورح تدعيلي وممكن نعملها بدون البندورة والليمون بتعطي طعمة تانية كتير طيبة عالعشا مع الشاي أو بتنحط بخبزة وبتنعمل سخانة يمممي صدقيني رح تصير من الوصفات المفضلة عندك لأنه كل يلي داقوها عندي أخدوا الطريقة

14 الكاتب منى, on 20-03-2011 13:50
و الله كل مقاديرها عندي , رح حضرها اليوم على الغدا ان شاء الله

15 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 20-03-2011 14:35
عزيزتي منى بعتلك طريقة حفظ الزعتر الأخضر في الفريزر إن شاء الله تكون وصلت حتى تعم الفائدة ويستفيدوا منها الكل‎ ‎وهي طريقة مجربة ومضمونة لأني كل سنة بحفظ الزعتر الأخضر بهل طريقة أنا وكل يلي بعرفهن

16 الكاتب منى, on 20-03-2011 15:21
و الله ما وصل شي نورا ؟ وين بعتيها :roll

17 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 22-03-2011 15:27
طريقة حفظ الزعترالأخضر في الفريزر:يوضع وعاء ماء+ملعقة سكر على النار ويترك حتى يغلي ثم نضع كمية من الزعتر الأخضر في الماء لثانيتين ثم يرفع على مصفاة لدقيقة واحدة فقط ثم يعبأ وهو ساخن في كيس نايلون وعالفريزر فورآ أما إذا ترك حتى يبرد فسيصبح أسود اللون وهذا هو السر ثم توضع كمية أخرى من الزعتر وهكذا

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 04/04/2009 )

< السابق		التالى >

[ عودة ]