L2ma.com | لقمة طيبة | L2ma.com | لقمة طيبة | تشكن اسكالوب | صغيرة, ملعقة, · , على, حتى | L2ma.com

القائمة الرئيسية

الأكثر تصفحاً

تشكن اسكالوب

الكاتب/ منى

11/03/2009

تشكن اسكالوب

قديه وصلتني رسائل و طلبات لطلب وصفات متل الاسكالوب و الكوردون بلو و الستيك و غيره من وصفات المطاعم و اليوم تالت وصفة في الموقع لتلبية هل الطلبات بعد وصفة المكسيكانو و البيف ستروغونوف .

الوصفة نوعاً ما سهلة و ممكن تتبيل الدجاج و تغميسه من قبل بيوم و تركه بالبراد لتاني يوم و بيتقدم مع الخضار السوتيه و البطاطا المقلية و المعكرونة السباغيتي أو الفيتوتشيني المسلوقة و المقلبة بالزبدة , و أنا بحضر معه صوص كريم أبيض بحبه كتير و بيخلي الوصفة اسا أغنى و ألذ .

الدجاج اللازم للوصفة هو صدور مخلاية من العظم و الجلد و ممكن تطلبي من المسؤول عن قسم الدواجن أن يدق صدور الدجاج الك و يجهزها لحتى تصير شرائح رقيقة و ممكن تعلمي هل الخطوة بنفسك . بتحطي الشرائح المخلاة بين ورقتين نايلون و بتدقيها دق خفيفة بالمطرقة الخاصة حتى تصير رقيقة حسب ما بتحبي مع ضرورة الانتباه لحتى لا تتمزق القطع معك .

بالصحة و الهنا

كيلو صدور دجاج مخلاة من العظم و الجلد و مطروقة لشرائح رقيقة

التتبيلة :

نصف ملعقة صغيرة بهار مشكل
نصف ملعقة صغيرة زنجبيل مطحون
نصف ملعقة صغيرة فليلفة حمراء حرّة
نصف ملعقة صغيرة كركم
نصف ملعقة صغيرة قرفة
نصف حبة صغيرة مبشورة طازج جوزة الطيب
ربع ملعقة صغيرة فلفل أبيض
2 ملعقة كبيرة خل
2 ملعقة كبيرة زيت زيتون
نصف ملعقة صغيرة خردل

للبانيه :

كوب طحين أو أكثر
3 بيض
رشة ملح و بهار
ملعقة صغيرة زيت زيتون
كوب بقسماط أو أكثر

الصوص :

4 كوب حليب أو مرق دجاج
4 ملعقة صغيرة طحين
كوب كريما سائلة
ملح و فلفل أبيض
direction

·          تمزج مقادير التتبيلة جيداً ثم تفرك بها صدور الدجاج و تترك لمدة ساعتين حتى تمتص النكهات , إضافة الكركم اختيارية و ستعطي بعض اللون للشرحات عند تقطيعها .

·          يخفق البيض مع الملح و البهار و الزيت . يوضع الطحين و الكعك , كل نوع على حدة , في طبق مسطح ثم ترتب الأطباق بالشكل التالي : طحين , بيض , كعك . يمكن تنكيه الطحين و الكعك بالبهارات التي تحبيها .

·          ترفع الشرحات من التتبيلة ثم تلت بالطحين ثم بالبيض ثم بالكعك . يضغط على الشرحات جيداً عند لتها بالطحين أو بالكعك ثم ترفع و تهز بلطق للتخلص من الطحين أو الكعك الزيادة .

·          توضع الشرحات الجاهزة في طبق واسع مسطح و توضع في الفريزر لمدة ساعة .

·          تستخدم مقلاة غير لاصقة للقلي , يوضع الزيت فيها بحيث يغمر أول طرف من الستيك فقط بدون أن يصل للطرف الثاني , يستخدم للقلي زيوت عادي مثل زيت زوار الشمس أو الذرة و لا يستعمل زيت الزيتون لأن له نكهة قوية لا نرغب بها لطبقنا . يمكن اضافة ملعقة صغيرة من الزبدة لاضافة طعم ألذ للاسكالوب .

·          يوضع الزيت و يترك حتى يحمى على نار متوسطة , لا تضاف قطعة الاسكالوب قبل أن يحمى الزيت و الا فانها ستمتص الزيت و تصبح ثقيلة و غير مقرمشة .

·          ترتب قطع الاسكالوب في المقلاة و تترك لبضع دقائق من دون أن تقلب حتى تنضج من أول طرف , تقلب على الطرف الثاني و تترك حتى تنضج أيضا و يصبح لونها أشقر و جميل . ترفع القطع على ورق ماص .

·          يدوب الحليب مع الطحين ثم يوضع على النار و يتبل و يقلب حتى يغلي و يسمك قليلاً . تضاف الكريما و تترك حتى تغلي مجدداً .

·          تغرف المعكرونة في جانب طبق التقديم و البطاطا المقلية في جانب أخر و الخضار السوتيه في جانب أخر . تصب الصلصة على المعكرونة و في منتصف الطبق .

·          ترتب قطع الاسكالوب فوق الصلصة و تقدم فوراً .

فكرة لذيذة :

لتحضير صوص بالفطر يقطع الفطر لقطع صغيرة ثم يقلب بالقليل من الزبدة و يضاف لصوص الكريم .

أضافة إلى المفضلة (0) |

أقتباس | مشاهدات : 8966

تعليقات (35)

1 الكاتب رنا, on 11-03-2009 12:39
شي لذيذكتيييييييير ووصفة سهلة كمان
ياستي اليوم عم قول بدي اسألك على هالوصفة وعالكوردون بلو وسبحان الله لقيت الوصفة قدامي ..وكمان عالليدي فنجرز وعدتيني بالصور وعم بستناهن مشان الكاتو جلاس ..لانه هون صار شوب كتير :grin

ياستي منجي للسؤال المهم
هلأ انا بجيب صدور مشفاية بس كل صدر مقطوع قطعتين تقريبا يعني سميك نوعا ما ..اقسمه بالنص ولا استخدم المطرقة ليصير رقيق يعني قصدي كل قطعة يلزمها صدر كامل ؟؟؟
وشكرا الك يااحلى شيف

2 السلام عليكم ورحمة الله وبركاته
الكاتب omtasneem, on 11-03-2009 17:16
السلام عليكم ورحمة الله وبركاته. ياسلام اسكالوب يم يمي مافي مرة بنزل فيها عاسورية الا وبحب اكلا رح جربها بغداي الي جاي بس سؤال الخردل ضروري ماعندي هون فيني استبدلو هو والخل لاني انا وجوزي مامنحب طعمتو ناطرة جوابك ويعطيك الف عافية ويسلم دياتك

3 الكاتب ام نور, on 12-03-2009 21:52
شو هالوصفة يممممممممممم غير شكل سلم دياتك يا احلى منى انا بعملا هالاكلة بس بستيك لحمة واحيانا بدل الكعك بحط سميد وسط بس الصراحة التتبيلة عندك غنية وبتعطي كتير طعمة طيبة انشالله رح جرب طريقتك مع دجاج هالمرة

4 الكاتب منى, on 13-03-2009 07:57
هلا رنونة

يا ستي القلب على القلب , ان شاء الله تجربيها و تكون على زووءك و اول ما حضر الليدي فنجرز رح صورهم بالخطوات باذن الله , ان شاء الله الاسبوع الجاية عندي ضيوف و ناوية حضرهم

لهل الوصفة رح نستخدم الصدور الي بتكون مقطعة لنصفين و كل نص نطرقه لحتى يصير رقيق , يعني كمل صدر كامل رح يعطينا قطعتين , ان شاء الله تكون وضحت الفكرة و اي سؤال تاني من عيوني حبيبتي

5 الكاتب منى, on 13-03-2009 07:58
هلا ام تسنيم

ان شاء الله تجربيه و يعجبك و يعجب العيلة كلها
الخردل فيك تستغني عنه بس الخل نو , لان هو رح يشيل زفارة الدجاج و يعطيها الطعم الطيب :zzz

6 الكاتب منى, on 13-03-2009 07:59
هلا ام نور حبيبتي

ان شاء الله تجربيها و تعجبك , و كمان السميد رح يعطي الوصفة قرمشة يممي
الستيك انا لمن بحضره ما بلته بالكعك و البيض , بس بقليه لحاله , سبحان الله كله مع العافية ما في اطيب منه

7 الكاتب رنا, on 13-03-2009 16:08
خلص وصلت الفكرة شكرا كتير كتير وبس جربها رح قلك النتائج :grin

8 الكاتب منى, on 14-03-2009 19:42
عم استنى

9 الكاتب غيث, on 15-03-2009 06:06
الله يسلم دياتك منى وبدي اخبرك انو الكبة مشي حالها الله يجزيك الخير على ملاحظاتك الرائعة وكان عندي الجمعة عزيمة والامور تمام الحمد لله الله يبيض وجهك وهالكبة المقلية رائعة طلعت وخاصة بقرمشتها شكرا لك ميمو من القلب اشكرك

10 الكاتب سلاف, on 15-03-2009 09:04
يسلم ايديكي منى هالاكله شو بحبها 00 الموقع امبارح مارضي يفتح معي مدري كان فيه مشكله مدري من النت عندي00 كان رح يغط عقلبي بس اليوم من الصبح فتحته ومشي الحال

انا جربت مره ساويها بس كانت تطلع مو مقرمشه وكتير تغب زيت طلع المشكله متل ماذكرتي بطريقة القلي معنا ها 00 الله يجزيكي كل الخير عطول بتنبهينا لشغلات وبتعطينا اسرار نجاح الوصفات ربي يجزيكي كل الخير
هل من الممكن الاستغناء عن الكريما ووضع بديل الها قشطه بالصوص ؟؟؟؟

11 الكاتب منى, on 15-03-2009 10:10
هلا غيوثة

عافية و الف صحة و هنا على الكبة و على كل شي كان على الطاولة , الحمد لله ان مشي حالها

12 الكاتب منى, on 15-03-2009 10:25
هلا سلاف

الله يسلم و يخليك , ان شاءالله تجربيها و تطلع معك متل ما بتحبي و اكتر يا رب
ممكن الاستغناء عن الكريما و اضافة القشطة مكانها اكيد و كمان طيبببة :zzz

13 الكاتب سمسمة, on 15-03-2009 18:23
حبيبة قلبي منى بدي أسألك ليش طبقة البقسماط بتفصل معي وقت القلي ومابتمسك بقطعة اللحمة

14 الكاتب منى, on 15-03-2009 18:57
هلا سمسومة

هي المشكلة الها عدة اسباب و حلها بالملاحظات الصغيرة بالوصفة
أول الشي الزيت مع البيض
التاني الضغط على القطعة بعد ما تلتيها بالبيض و الكعك و الطحين و هزها بلطف للتخلص من الطحين أو الكعك الي ما علق
و اخر الشي انك تحطي القطع بالفريز لمدة ساعة قبل القلي

جربي هل الوصفة بتفاصيلها و ان شاء الله رح تععجبك النتيجة

15 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 18-03-2009 11:24
ست منى فينا نستعمل شرحات الدجاج وما نتسي وصفة دجاج بالفطروشكرا

16 الكاتب منى, on 18-03-2009 18:54
اختي قصدك الدجاج الي بيجي شرحات و جاهز ؟
اذا هيك اكيد فيك و مو منسيانة الوصفة , من عيوني ان شاء الله

17 الكاتب نوارة, on 29-03-2009 18:29
اناعملتو اكتر من مرة بس مالي مجربة الصوص شكلو بيطلع طيب وصراحة الخلطة للتوابل والخردل مالي مجربتها شكلها هون رح يطلع التميز بالطبخة جوعتيني
مرة جربت فتحت الصدر وحشيتو جبنة وسبانخ وفطر(قليتهم بشوية زيت وتبلتهم) بعدين كملت بنفس الطريقة (تغطيس بيض طحين,,,,) كمان طلع طيب وتغير شكل

18 الكاتب أم الهدى, on 30-03-2009 12:31
تسلم دياتك منى بس بدي أسألك إذا حبيت أستعمل بدل الدجاج شرحات بقر مدقوقة بينفع
وشكرا كتيرإلك

19 الكاتب منى, on 31-03-2009 06:24
هلا نوارة

صح الصوص هون طيب و الخلطة كمان و ممكن تستخدمي البهارات الي بتحبيها

يممم طيبة فكرة الحشوة و فيها كل الشغلات الي بحبها :zzz

20 الكاتب منى, on 31-03-2009 06:25
هلا ام هدى

اكيد بس بشرط تكون الشرحات من النوع الطري كتير لحتى تستوي معك , انا لمن بحضرها بالشررحات بحب ما غطسها و اتركها على حالها , بس هي اكيدة شغلة زووء

21 الكاتب سارونات, on 15-05-2009 01:27
السلام عليكم و رحمة الله و بركاته

اختي منى بالنسبة لصدور الدجاج منخليها من العظم و على طول مندقها او منفتحها بالأول و يا يت اذا فيني تصوري لنا طريقة دق صدور الدجاج

بالتوفيق
سلام

.P.S سؤالي المشهور هل يمكن استبدال الكريما بالحليب او الاستغناء عنه تماما

22 الكاتب منى, on 17-05-2009 11:22
هلا سارونات

الصدور بتكون مخلاية من العظم و بعدها نشقها بالنصف و ندقها

و كمان جوابي المعهود , الكريما رح تعطي غنى للوصفة و اذا حابة تلغيها فعلى مسؤوليتك :zzz

23 الكاتب dado, on 04-06-2009 04:19
السلام عليكم
من وقت شفت الوصفة بالصفحة الرئيسية وانا حابة حضرها.. بس سافرت وما صحلي.
مع إني ما باكل لحم بس الاسكالوب إلو معزة خاصة عندي.. دائما بيذكرني بالطلعة والغدا براة البيت... لأنو دائما أهلي كانوا يطلبوا اسكالوب ويجيبولي بيتزا

المهم سنحت الفرصة أخيرا وحضرتها أول مبارح ونجحت وكانت ظريفة جداً.. وكانت أول مرة بحياتي بتشجع وباكل لقمتين جاج.. ما تساليني عن وقع التجربة علي

يسلموا إيديكي منى.. الوصفة كتير مرتبة والملاحظات كتير مهمة

24 الكاتب منى, on 04-06-2009 10:14
هلا دالو حبيبة قلبي

كيف ما اسالك , هادا اول سؤال خطر ببالي , طيب يا ترى رح تعيديها و الا نو :roll

قصدي انك تدوقي اللحمة طبعا مو الوصفة .

الف صحة و هنا على قلبك و قلب العيلة و عقبال ما تاكلي قطعة كاملة :zzz

25 الكاتب dado, on 05-06-2009 06:08
مرحبا مرة تانية..
والله يا منوش.. ما كانت كتير تجربة مسرة وسعيدة.. يعني كنت مع كل لقمة عم حط مليون شغلة لغطي الطعم.. بطاطا وسلطة ومخلل وكريم توم.. وخليها لربك.
وبالليل بلشت حس بتانيب الضمير وشفت إنو في جاجة عم تنقرلي بطني لأني أكلت لحمة :sigh

من الممكن إني عيدها بس على مضض.
سألتيني عن لقمة تشكن.. والله نو.. ما حسنت جربها.. لسة بدي وقت لإسترجي آكل قطع واضحة من اللحم.. بالخطة الخمسية القادمة انشالله :grin

تسلمي منى على اهتمامك وسؤالك

26 الكاتب سارونات, on 05-06-2009 12:02
السلام عليكم و رحمة الله و بركاته

اختي منى هل راح تنفع الوصفة بشرائح الديك الرومي
و هل اي وصفة فيها اسكالوب دجاج ممكن نحط بدالها شرائح لحم الديك او الديك الرومي

بالتوفيق
سلام

27 الكاتب منى, on 07-06-2009 19:57
هلا دالو

عم استنى خطتك الخمسية , بس ما دامك مرتاحة بنظامك فلشو التغير , خليك على راحتك و على طبيعتك و خلي الدجاجات نايمات , و خليهم ينيموك احسن :zzz

28 الكاتب منى, on 08-06-2009 12:17
مممم اتوقع بتنفع , بس مرة تانية انا مو مجربتها لحتى قلك اكيد مية بالمية

29 الكاتب آرام, on 10-06-2009 14:19
البارحة جربت الوصفة وكانت أكثر من رائعة .. بس استخدمت فيليه سمك بدل الدجاج، وقليتها بالزيت الغميق مو بالمقلاية، خفت ما تستوي. وما عملت معها الصوص الأبيض، عملت طرطور وسلطة يونانية وبطاطا مقلية وبرك جبنة (جاهزة معدة للقلي) .. والله دعيتلك بالخير من كل قلبي.

30 الكاتب منى, on 11-06-2009 13:16
مممم , فكرة استعمال السمك و الله .

اخي لا تخاف من القلي في طواية, اذا حابب فيك تجرب و على مسؤوليتي , ايه بيستوي و بينزل نيفا و خصوصا السمك

ربي الك متل الدعوات الي دعيتها و اغلى اخي الكريم , شرفت الموقع و نورته

31 الكاتب بشرى, on 14-09-2009 17:54
منوشة , هلأ قمت من عالسفرة .. طيبة كتير كتير كتير .. كنت مشتهية جربها من زمان بس ما كان في وقت ومراق .. :roll

جوزي عجبتو كتير لدرجة قلي إنو تكرر وبشدة

وهي حالات نادرة .. :grin

يسلم إيديكي يا قمر ..

32 الكاتب منى, on 15-09-2009 00:06
هنا و الف الف عافية على قلبك و قلب ابو الشباب , هياتو الباشا عندك متل باشاني , بيعين الله :zzz

33 first comment
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 18-01-2010 09:58
السلام عليكم مدام منى
الله يعطيكي ألف عافية يارب على الموقع المتميز والله أنا أول مرة باكتبلك من زمان بجرب أكلات من الموقع ماشالله كلو ظريف بس دايما باستحي اكتب تعليق وبادعيلك كتير لأنك فعلا بتشرحي بطريقة كتير حلوة
واليوم ساويت الاسكالوب ويارب يطلع ظريف بس نسيت حط ملعقة زيت زيتون مع البيض يارب يكون ما بأثر
واشتريت مدقة لحمة خصوصي وزوجي صار يضحك عليي بس ان شالله هلا بدوقو وبيعرف ليش :grin

شكرا الك من كل قلبي لأن هالموقع حلو كتير بحس كأني ببلدي وبين اهلي وناسي وكل مابكون مشتاقة للشام(سوريا)بتلاقيني عم قلب بصفخاتو

34 الكاتب semo, on 13-04-2010 12:34
بتجنن منوشة الله يعطيكي العافية

بس بدي اقترح شي بسيط البانيه لو كان باشاميل وفيه فطر رح يكون أطيب وغير هيك كلو ممتاز

35 الكاتب Heba Abu Shaaban, on 25-01-2011 18:40
احلا شيء اسكالوب الدجاج
تسلمي

اطيب اكلة عندي من المفضلة

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 11/03/2009 )

< السابق		التالى >

[ عودة ]