اليوم الوصفة مو تابعة للمنيو التركي , لأن خلال الفترة الماضية صار حضرت كتير اشياء و ما عم ااقدر نزلها لوقت ما يخلص هل المنيو , بس هيأته مطولة لهيك رح نزل وصفات تركية بجنب باقي الوصفات .
اليوم الوصفةواحدة من الوصفات الي بس ما حطيت ايدي في الصحن ما بترتفع الي لأخلصه و بعدها لجوسهم اذا كان في شي علقان فيهم , يمم
ماما كانت دوما تعملنا اياها , و كانت غدانا في اليوم الي اتحجبت فيه , هلأ كيف بذكر ما بعرف , بس بذكر أن كان يوم من ايام شهر شباط وكانت عم تمطر طول الصبح . بعد الغداء طلعت الشمس فاستأذنا ماما و بابا أن نطلع للتمشاية أنا و آية , بذكر بابا الله يرحمه لمن شافني اول مرة مججبة و نظرته وتطليعته , ربي يرحم ترابه و يكون هلأ عم يتطلع علي من الجنة .
كيلو بطاطا ثلث كيلو لحمة مفرومة ملعقة كبيرة سمنة أو 5 ملعقة كبيرة زيت زيتون حبة كبيرة بصل مفروم ناعماً 4 – 5 حبة بندورة مقشرة و مفرومة ناعماً ( استعملت البندورة المحفوظة من الصيف ) معجون البندورة حسب الحاجة ملح نصف ملعقة صغيرة بهار مشكل رشة صغيرة قرفة
·يقلى البصل بالسمنة أو الزيت حتى يطرى , تضاف اللحمة و تقلب على نار متوسطة حتى تنضج و يجف مرقها ثم تتبل بالملح و البهار و القرفة .
·يضاف معجون الطماطم في حال الرغبة في استعماله و يقلب لمدة دقيقتين أو ثلاثة ثم تضاف البندورة . يترك المرق حتى يغلي ثم تهدى النار و يترك لمدة عشر دقائق , يضاف بعدها المزيد من الماء , حوالي كوبان و يترك ليغلي .
·تضاف حبات البطاطا المقلية و بعد أن يغلي الصوص مجدداً يغطى القدر و تهدى النار و تترك حتى تمتص البطاطا أغلب الصوص , كمية المرق لا يجب أن تكون كثيرة حتى تبقى حبات البطاطا محافظة على شكلها .
·تقدم المسقعة ساخنة أو فاترة مع الخبز العربي و الفليلفة الحرّة و الفجل .
تعليقات (13)
