السلام عليكم و رحمة الله و بركاته :

صار لي تقريباً سنة من وقت ما نزلت أول سفرة الي , و مع ان العزايم كتيرة و الحبايب أكتر الحمد لله رب العالمين  بس بيكون صعب كتير وقت العزيمة أن توقفي المعازيم و تقوليلهم اسمحولنا نصور البوفيه !

اليوم عزيمة لرفقة ماما و السفرة حضرتها ماما و أختي أية و انا معهم , و أغلب الوصفات موجودة بالموقع و الي مو موجودة رح تنزل قريب .

السفرة من فوق و اليمين و نحنا نازليين

كبة دراويش ( كبة مقلية )

لازانيا

كبة سوار الست

ضفيرة الزيتون

و ملك كل سفرة اليبرق

سلطة الجبنة و الزعتر الأخضر ( يممممم كبيرة )

كبة صاجية

لقمة تشكن

سلطة الطون

السلطة المقلمة

بيتزا و لا أطيب

سلطة الزيتون



الحلويات و هي ظاهرة في أعلى الصورة بس مو كتير واضحة :


كاتو جلاس

قدرة قادر

كيك بالجيلو و الكاسترد

كيك بجوز الهند



السلطات كان الها حصة كبيرة لان كتير من المعازيم عاملات ريجيم , و تكتير السلطات كان على رغبة ماما

 أنا عملت كاتو جلاس و لقمة تشكن و السلطة المقلمة و ظفيرة الزيتون .

الحمد لله كله كان كتير طيب و من أحسنه , و  الي أكلت منه أكتر الشي سلطة الزعتر مع الكبة الدراويش و هي شغل أية و بتعملها و لا أروع و على حلب  .

و الحلو الي عجب الكل و حكوا عنه كتير هو كيك جوز الهند و هو كمان وصفة من اختراع لولو الحلوة .

اتفضلوا كلكم يا جماعة و الاكل على قد المحبة .


نورتونا و شرفتونا و مية هلا بالكل  

تعليقات (31)

2  الكاتب غيث, on 25-02-2009 01:54 صحة وهنا على قلوبكم كلكم والله يعطيكم العافيةشي بيشهي والله طب الجرة على تمها منشان هيك الحلوة طالعة لامها يالله ميمو بدي طريقة الكبة بالصاجية دخيل عيونك كتير بحبها بس ما عندي طريقتها وشكرا لك كنتو عملتو هالعزيمة لما كنت باجازتي بحلب الله يصلحكم يعني شوقتينا وما دوقتينا ههههههه عبمزح الله يعطيك العافية والله طعميتينا كتير من تحت دياتك ويالله بانتظار باقي الموجود على السفرة على احر النار

4  الكاتب نوارة, on 25-02-2009 08:47 ميمو شهيتيني على سفر حلب   جد جد غير  بس متل دائما ورح تبقي دائما تشجعيني انو اصير احسن صرلي فترة ما عم بجرب شي جديد ومشتهية اعمل سفر بتفتح النفس متل هي   رح اتم احاول واتشجع منك  الله يسلم دياتك

5  الكاتب سارونات, on 25-02-2009 09:55 السلام عليكم و رحمة الله و بركاته    بسم الله ما شاء الله عنجد سفرة كتير مرتبة الله يخليلك امك و اختك يا رب   بما اني ما قدرت اجي على العزيمة بقى بدي وصفة كيك جوز الهند و سلطة التونة و الجبنة بزعتر )) ما خليت شي ))    بالتوفيق  سلام

6  الكاتب نور الأسلام, on 25-02-2009 11:41 ياسلام يممممممم شي بشهي ريتو ان شاءالله الف صحه وعافيه للجميع والله يعطيكم العافيه والله يديم المحبه واللمه الحلوه يا رب تحياتي للجميع

8  الكاتب منى, on 25-02-2009 13:17 هلا لفلي   الله يعافيكي نورتي الموقع أختي , مية هلا فيك

9  الكاتب منى, on 25-02-2009 13:22 هلا غيوثة حبيبتي   و الله و الله من عيوني , احلى عزيمة لاحلى و اغلى اخت .    تكرم عيونك على الكبة , ان شاء الله بنزلها مع صورها    ان شاء الله كله بينزل و ان شاء الله يعجبكم

10  الكاتب نادين, on 25-02-2009 13:57 امممممممممممم واضح انو كلو لذيذ ومرتب وانا سمعت عن هالعزيمه الفاخرة من جهاتي المختصه   اللله يعطيكي الف عافيه واكيد رح جرب الشغلات الي مو عاملتها من قبل

12  الكاتب منى, on 25-02-2009 20:26 هلا سمسومة   و الله بكسب هل الوش الحلو على فنجان قهوة كل صبحية , شو بدي احلى من هيك   سلامك بيوصل ان شاء الله و ربي يحفظ هل الديات الي ردت و كتبت

13  الكاتب منى, on 25-02-2009 20:27 هلا نوارة   سبحان الله كل يوم الا ما تخطرلي على بالي انت و النون الصغنون الي بده عضوضة من هلأ   خليلي عينك نوارة حبيبتي , الله يرحم ايام الهمبرغر الساعة 2 بالليل , ااااااايه

14  الكاتب منى, on 25-02-2009 20:28 هلا سارونات   هيك بتنطرينا و بعدها بتغطي ما بتبيني حتى من دون اعتذار       تكرم عيونك ان شاء الله رح نزل الوصفات قريب باذن الله

15  الكاتب منى, on 25-02-2009 20:32 هلا نور   عوافي كمان على قلبك و بدنك  الف شكر الك للدعوات الحلوة و بالفعل اللقمة ما بتطيب الا باللمة الحلوة

16  الكاتب منى, on 25-02-2009 20:42 هلا ندوشة حبيبتي   ان شاء الله المرة الجاية يتموني انتي مع مصادرك الاصة منوريين باحلى عزيمة     ان شاء الله تجربي ويعجبك و مية هلا فيك ندوشة

17  الكاتب منى, on 25-02-2009 20:47 ميوسة يا قمر   خليلي مايا و عليا , شو حلوة اسمائهم , كتيررر كتير و الله ربي يحفظهم من كل شر و يبعتلهم ايام حلوة و يكونوا من المسعدات في الدنيا و الاخرة ,ااامين     بوسات كتيرة الهم و من بين عيونهم , ريتو عوافي على كل شي جربتيه او حابة تجربيه     تكرم عيونك ميوسة رح نزل الكبة قريب باذن الله

18  الكاتب رنا, on 26-02-2009 08:37 ووواووووو   شو هالصور قبل الغدا بصراحة تعذيييييييييب  بس بدي كاتو جوز الهند حبابة حبابة   يسلمو ايديكن والله كله بده شغل وطالع شغل حلو ومتكتك يسلمو ايديكن وهنا وعوافي على يلي اكل   بس بدي اسألك بعد كل هالاغراءات ضل حدا عامل ريجيم مابعتقد

21  الكاتب منى, on 26-02-2009 19:00 رنونة يا حلوة غمضي عيونك مشان الله , أو بتركبس اول طيارة لعندي لحتى مدلك اخت هل السفرة     تكرم عيونك رح نزل الوصفة باذن الله ..    الصراحة ما بعرف بس ما اتوقع ان بقي حدا ماسك اعصااب

23  الكاتب رنا, on 27-02-2009 13:21 والله يامنى انا صايرة شغلتي شغلة مع الوحام ...يوم جبس ...ويوم جانرك ...ويوم عقابية وماعم نلحق قرووصة بهالبطن   ياريت اجي لعندك خلص انشالله السفرة الجاية لازم اجي

24  الكاتب dado, on 01-03-2009 16:38 مرحبا   شو هالسفرة هي !!   صار معي صعقة حضارية   صرلي هلأ أسبوع عاملة ريجيم وقسيانة على حالي كتير.. وكل يوم بفوت عالموقع.. وبتسلل عصفحة السلطات وبتجاهل الصورة بالصفحة الرئيسية.. بس يا أختي ما حسنت.. منظر السفرة بيشلع القلب فتت قريت كم شغلة ما كنت شايفتن من قبل وهلأ أنا عم صارع حالي .. خصوصاً بالحلويات .. بس خليني هلأاشبع بالفرجة وبعدين التجريب.

25  الكاتب منى, on 07-03-2009 06:29 هلا عيوني ام تسنيم   الله يخليك و يحفظك اختي , ان شاء الله ما رح باخره , نورتي اختي

26  الكاتب منى, on 07-03-2009 06:31 هلا رنونة   يلا لكن حضري حالك على 22 بالشهر عندي فطور لرفقاتي , بس ما اكدتي حجز الطيارة تبيقى حاكيني لادلك على البيت

27  الكاتب منى, on 07-03-2009 06:33 هلا دالو   انت شو , بتتقرمشي و الله , دمك عسل و دايما ردودك الها نكهة غير , فقعتيني ضحك     شغلتنا شغلة مع الريجيم يلا ان شاء الله بس ما عدا بيتجربي و بتدوقي و ان شاء الله كل شي عجبك و نوويتي تجربيه يطلع معك يميي

29  الكاتب منى, on 12-03-2009 14:48 هلا دمدومة   هادا بس من زووءك يا قمر , اامين يا رب كل بيوتنا وبيوت المسلمين

31  الكاتب منى, on 24-07-2010 12:28 شكرا الك شيمو من زووءك يا عسل و انا كتير مبسوطة في و بهل الطلة الحلوة

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved