L2ma.com | لقمة طيبة | L2ma.com | لقمة طيبة | صينية الرز على طريقة البلقان | · , الرز, على, لمدة, يغسل | L2ma.com

القائمة الرئيسية

صينية الرز على طريقة البلقان

الكاتب/ منى

16/02/2009

رز على طريقة البلقان
صينية الرز على طريقة أهل البلقان Balkan Pirincli Guveci

كمان من المطبخ التركي و بالتحديد وصفة أصلها من منطقة البلقان , طيبة و سهلة و تغير عن وصفات الرز العادية و هلأ وقتها بما أن البصل الأخضر هلأ عم نشوفه عند الخضرجية بموسمه .

الوصفة فيها فكرة بتشبه فكرة الرز المعمر و هي ممكن تتقدم ساخنة من الفرن أو فاترة شوي حسب الرغبة , و ما الها سر لتحضيرها بس ما بينفع تزيد لتاني يوم , يعني الكمية لازم تعمليها على القد تمام .

الوصفة ممكن تتحضر بالرز و كمان بالبرغل حسب الرغبة و التنتين طيبات .

بالصحة و الهنا

3 – 4 حبة بصل أخضر
كوب رز
كوب و ربع كوب مرق أو ماء
كوب حليب
بيضة كبيرة
رشة بيكربونات الصوديم
جبنة مبشورة ( ممكن استعمال جبنة بيضة أو صفراء و الأطيب مزيج من النوعيين )
3 ملعقة كبيرة زيت زيتون
ملح و رشة بهار

للوجه :

المزيد من الجبنة الصفراء
فليلفة حمراء ناعمة
direction

·          يغسل الأرز ثم ينقع لمدة ساعة بالماء و الملح ثم يغسل و يجفف من الماء .

·          يغسل البصل الأخضر جيداً ثم يفرم مع الجزء الأخضر منه .

·          يقلب البصل بالزيت حتى يطرى , يضاف الرز و يقلب لمدة 3 -4 دقائق على نار هادئة .

·          يضاف الماء المغلي أو المرق المغلي مع القليل من الملح و البهار ثم تغطى الطنجرة و تترك حتى ينضج الرز و يمتص كل الماء .

·          يخفق الحليب و البيض و بيكربونات الصودا جيداً . تضاف الجبنة و الرز المطبوخ و يقلب بلطف باستعمال شوكة .

·          يصب مزيج الرز في صينية بايركس مدهونة و يرش بالجبنة الصفراء المبشورة مع الفليلفة الحمراء الناعمة .

·          تخبز الصينية في الرن المحمى على 180 درجة لمدة 15 – 20 دقيقة أو حتى يحمر الوجه ثم تقدم ساخنة أو فاترة .

أضافة إلى المفضلة (2) |

أقتباس | مشاهدات : 6529

تعليقات (23)

1 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 16-02-2009 10:00
روعه احنا السعودين نتفنن بالرز واكل الرزمستحيل يمر يوم ما ناكل فيه رز ممكن مرتين في اليوم وهذه الوصفه اختي مني مميزه الحين عالمطبخ جري واو رز وحليب وجبن ومحمره ومقمره ما خليتي شئ

2 الكاتب منى, on 16-02-2009 10:18
هلا منونة حبيبتي

يلا عم استنى رايك و يا رب تكون على زووءك و تعجبك :zzz

3 الكاتب سارونات, on 16-02-2009 11:43
السلام عليكم و رحمة الله و بركاته

شو هالوصفة اللي بتجنن كتير بحب هيك وصفات بتكون خفيفة و ما فيها لحوم و سهلة و سريعة التحضير خصوصا للصيف
راح حطها على قائمة التجربة السريعة و راح جربها قريبا ان شاء الله
بالتوفيق
سلام

اختي منى انتبهت انك قلتي اننا نغسل الرز بعد ما ننقعه و نصفيه انا عادة بس بصفيه من ماء النقع و ما بغسله يا ترى بشو بتأثر هالخطوة هل بتأثر على كمية الملح او على نضج الرز
بالتوفيق
سلام

4 الكاتب منى, on 16-02-2009 12:41
هلا سارونات

ان شاء الله تجربيها و تعجبك و تكون متل ما بتحبي و اكيد رح تخبريني

اختي ما في فرق ابدا و الصراحة اذهلتيني من كتر ما عم تنتبهي على التفاصيل , يعني انا كتير كتير باخد بالي من الاشياء الصغيرة بس انتي سيقتيني باشواط :grin

5 الكاتب muna.g.7, on 16-02-2009 21:34
اختي منى جربتها وما بقي بالصحن حبة رز واحده وايش اخبرك بعد كل اهل بيتنا طالبينها بكرة :c

6 الكاتب منى, on 17-02-2009 08:11
الف هنا و عافية و رزق على كل حبة رز

كتير انبسطت انها عجبتكم منونة , عوافي يا قمر

7 الكاتب سارونات, on 22-02-2009 12:48
السلام عليكم و رحمة الله و بركاته
طيب اختي منى بينفع تسخن يعني تتحضر للغدا و تسخن في الفرن للعشاء و لما نسخنها هل في طريقةمعينة يعني نغطيها بورق المنيوم و درجة الحرارة بتكون 180 او اقل عند اعادة التسخين

بالتوفيق
سلام

8 الكاتب منى, on 22-02-2009 17:24
أختي سخنيها بالطريقة الي تناسبك و انت متعوديتها , بس انا هل الطبق بحسه مو طيب الا تازة , يعني بس ما اتسخن ما عم حبوا كتير

9 الكاتب الدمشقية, on 24-02-2009 09:21
باين عليها وصفة طيبة إن شاء الله بجربها يوم الجمعة على الغدا لأن بنكون كلنا مجتمعين بغذن الله :zzz

10 الكاتب الدمشقية, on 24-02-2009 09:22
بس عذراً حبيبتي منونة شو هي فائدة بيكربونات الصوديوم بهالوصفة

11 الكاتب منى, on 24-02-2009 10:27
هلا دمدومة

ان شاء الله تجربيها و تعجبك و تكون متل ما بتحبي , و البيكربونات لحتى تعطي البيض خفة و هشاشة :zzz

12 الكاتب سارونات, on 25-02-2009 10:02
السلام عليكم و رحمة الله و بركاته

مو معقول هالوصفة شو طيبة و خفيييييييييفة كأنك عم تاكلي سحابة مو رز كتيييييير طيبة و خفيفة و ما بينشبع منها انا ساويت نص الكمية و بعد ما كنا نحكي عن الموساكا اتحولت السيرة لغراتان الرز انا كتير بحب هيك وصفات خفيفة و ساويتها بس بمي و طلعت طيبة كتييير فمابالك لو ساويتها بمرق كمان نسيت حط فلفل احمر مع اني كنت حاطته جنبي :grin

و كمان الوصفة اخذت معي وقت اطول بالفرن اكيد لان الافران تختلف
و شو كمان انا دقت الرز بعد ما انطبخ مع البصل و طلع كتير طيب يعني ممكن حتى هيك يتاكل لحاله

جازاك الله خيرا اختي منى
بالتوفيق
سلام

13 الكاتب ام نور, on 01-03-2009 09:40
شهوني الاخوات جرب هالوصفة عندي سؤال منى الرز كيف بيطلع بالاخير مهروس ولا محافظ على شكله

14 الكاتب منى, on 01-03-2009 10:17
هلا سارونات

الف الف عافية يا رب على كل لقمة و عجبتني كتير كلمة سحااابة :eek

الشكر الك سارونات و عافية و هنا يا رب

15 الكاتب منى, on 01-03-2009 10:18
هلا ام نور

الرز رح يبقى شكله عادي بس اطرى شوي , و ان شاء الله تجربيه و يعجبك

16 يسلمو
الكاتب كنودة, on 04-03-2009 07:27
شكلها بتجنن
و احلى ما فيها انها سهلو و جديدة
انا على اعتبار اني موظفة :upset

فبشجع كل وصفة
سهلة

17 الكاتب منى, on 04-03-2009 10:28
هلا كنودة

و الله معك حق , الواحدة فينا كتير احيانا بتكون ملحوقة من شغل البيت ,كيف كمان اذا كانت موظفة .

ان شاء الله تجربيها و تعجبك و تعتمديها

18 الكاتب ام نور, on 06-03-2009 16:58
سلم دياتك يا منى على هالوصفة جربتا عالغدا كتير طيبة وسهلة بس المشكلة الوحيدة اني عملت الكمية كلا فطلعت عندي صينية كبيرة :sigh

خطرلي كوب قليل تاري مع باقى المقادير بيكتر يالله خير مرة تانية رح اعمل نصف كوب مشكورة حبيبة قلبي

19 الكاتب منى, on 07-03-2009 05:48
هنا و عوافي ام نور على قلبك و قلب الكتاكيت الحلوة

يلا ان شاء الله المرة التانية تعمليها على قدر عيلتك

20 الكاتب سارونات, on 25-06-2009 16:21
السلام عليكم و رحمة الله و بركاته

اختي منى هلأ ما عم يتوفر البصل الاخضر فهل فيني ساوي الوصفة بالبصل العادي او ما بينفع لان طعمته قوية

بالتوفيق
سلام

21 الكاتب منى, on 25-06-2009 20:19
يمكن بالبصل الاخضر اطيب بس اذا مو متوفر اكيد فيك تستبدليها و خصوصا ان رح ينطبخ , بس ما تكتري كتير الكمية , ممكن بصلة صغيرة تكفي

22 الكاتب semo, on 13-04-2010 12:28
شو هالاكلة الطيبة يامنوشة ماتوقعتا هيك أبدا

بتعرفي من شي شهرين حكت معي اختي وقالتلي شوفي صينية الرز شو رأيكك جربها ؟؟ لما شفت حليب وبيض ورز وجبنة قلتلا انا مستحيل جرب هيك وصفة

ومن باب التنويع قررت أعملها وعملت أكلة تانية جنبا وقلت لجوزي قبل ما يدوق مو مجبور تاكلها اذا ماعجبتك حتى ما اسمع شي كلمة

بس لما دقناها قلي كتير طيبة وتكرر بشدة

الله يرضى عليكي ويحرم وجهك عن النار

23 الكاتب منى, on 14-04-2010 14:15
خليلي عيونك على هل الدعوة الي بتبل القلب , ان شاء الله انتي كمان و كل واحد عزيز على البك

الف الف هنا و صحة و عافية , كتير مبسوطة انك تشجعتي و جربتيها و وصفة طيببة كتير :zzz

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 16/02/2009 )

< السابق		التالى >

[ عودة ]