الوصفة من وصفاتي المفضلة اتعلمتها من عمتي رغيدة الله يخليلي ياها و يحفظها بصحتها و عافيتها . هي واحدة من الي بيحبوني متل أمي و أبي و كل ما روح لعندها لازم تطعميني كأني بنت صغيرة بضفاير . طبخها طيب كتير و اتعلمت منها كم وصفة من الوصفات المميزة بالموقع متل الفروج بطاطا و كمان هل الوصفة . كنت كل ما زور عندها و أنا صغيرة تقلي شو حضرلك على الغذا أطلب منها هل المعكرونة , تقلي ولي على المعكرونة قولي فروج قولي لحمة مو معكرونة !!
هي خلصت أول قصة , القصة التانية أن لما كنت صغيرة كنا ننعزم على مزرعة عند ناس من معارف بابا الله يرحمه . المهم كل ما نروح نقضي اليوم عندهم في أخر الليل كانوا يجهزوا عشا فيه ما لذ و طاب من الأصناف بس الصنف الي كنت ماا اشبع منه و أأقعد دايما جنبه هو هل المعكرونة , كان الها طعم مميز كتير كتير و مع اني بموت بمعكرونة عمتي بس هل المعكرونة كانت أطيب .
خلصنا من القصتين و هلأ رح احكيلكم شو صاير معي . أنا هلأ عم حاول استبدل السمنة بالطبخ بزيت الزيتون و صار حضرت كتير وصفات باستخدام زيت الزيتون و كانت و لا أروع , ببقى بخبركم شو هي الوصفات الي نجحت مع زيت الزيتون و شو ما نجح . من كم يوم حضرت هل المعكرونة و الصراحة اترددت ان جربها بزيت الزيتون لأن عمتي أكتر الشي أكدتلي عليه و هي عم تعطيني الوصفة أن استعمل إما سمنة أو زبدة طيبة كتير و لازم يكون في دعم بالكمية . سميت بالله و قليت البصل بالزيت . و بعدها لما دقت أول لقمة و الله كأن رجعت بنت صغيرة عم تلعب بالبسكليت الأصفر و عم تطلع من طرف باب المطبخ على الستات جوى و عم استنى ايمتى رح تجهز معكرونتي . نفس الطعمة الي كنت حبها و ما أعرف شو هي بالوصفة التانية الي خبرتكم عنها .
بتجنن لازم تجربيها
بالصحة و ألف هنا
500 غ معكرونة سباغيتي نصف كوب زيت زيتون بصلتانكبيرتان نصف كيلو لحم مفروم 2 - 3 ملعقة كبيرة صلصة البندورة كيلو بندورة ناضجة 6 كوب ماء أو مرق نصف ملعقة كبيرة بهار مشكل رشة قرفة ملح
·يفرم البصل ناعماَ ثم يقلى بالزيتحتي يشقر لونه .
·تضاف اللحمةو تقلب مع البصل و تفكك بالملعقة أثناء تقليبها كي لا تتكون كتل كبيرة حتي يحمر اللحم و يجف كل مرقه ثم يتبل بالبهارات ثمتضاف صلصة البندورة و تقلب مع اللحمة لمدة 5 دقائق .
·تقشر البندورة و توضع في خلاط العصير حتى تصبح بيوريه ناعمة ثم يضاف العصير إلى قلية اللحمة و البصل مع الماء أو المرق و تترك الصلصة على النار حتى تتسبك لمدة 20 دقيقة تقريباً . إذا لم تتوفر البندورة الطازجة تضاف ملعقتين أو أكثر إضافيتان من رب البندورة لتقلية اللحمة. تسبيك الصلصة سر من أسرار هذه الوصفة لأن إذا لم تتركيها تتسبك أصبحت معكرونتك بلا طعم أو نكهة .
·أثناء تسبيك الصلصة تسلق المعكرونة لمدة عشر دقائق ثم ترفع من ماء السلق و تضاف للصلصة من دون غسل و تقلب ثم يغطى القدر و تترك المعكرونة على النار الهادئة حتى تمتص المرق ثم تقدم ساخنة .
!!
تعليقات (26)
