برغل بالسبانخ Ispanakli Bulgur Pilavi

 

من المطبخ التركي وصفة سهلة جداً و لذيذة جداً و خصوصاً لمحبي الأطباق الخفيفة أو النباتية , و أنا كتير بحب هل النوعية من الوصفات . لما كنت عم أتغدى منها امبارحة اتذكرت ايام الحمل و الوحام لما الواحدة فينا بتاكل اللقمة و بتتلمض بعدها .

من أعواد السبانخ جهزت سلطة كمان تركية سهلة و تغيير شكل , إن شاء الله بتكون وصفتها الوصفة الي بعد هي .

الوصفة هي أطيب أن تكون حرّة و هي بتتقدم أكتر الشي كوجبة رئيسية خفيفة مع اللبن و ممكن كمان تتقدم مع اللحوم حسب الرغبة و بما أنها مطبوخة بزيت الزيتون ممكن تتقدم سخنة أو باردة , بس أنا بحبها سخنة أكتر .

ممكن كمان تزيني الطبق بالبصل المقلي و بتطلع كتير طيبة , انا ما بزينها لأن بحسها هيك أخف على المعدة .

في وصفة قريبة سورية قديمة كتير من هل الوصفة  اسمها زريقة السطوح , اسماء غريبة الصراحة , نفس المبدا تقريبا بس باختلاف طريقة التقديم . رح نزلها باذن الله هل الشتوية قبل ما يخلص موسم السبانخ .

شو كمان ! اي نفس الوصفة ممكن تتحضر اما بالسبانخ أو بالسلق حسب المتوفر و الوصفتين كتير طيبات .

حكيت كتير , ان شاء الله تعجبك الوصفة و تجربيها و بالف صحة و هنا

كوب برغل خشن
4 – 5 ملعقة كبيرة زيت زيتون
نصف باقة كبيرة سبانخ ( ما يقارب ربع كيلو بعد التنظيف )
حبة بصل متوسطة مفرومة خشناً
ملعقة صغيرة دبس فليلفة
ملعقة صغيرة فليلفة حمراء ناعمة
رشة بهار مشكل
رشة قرفة
نصف ملعقة صغيرة كمون
2 كوب ماء مغلي أو مرق





·          ينظف السبانخ و تقطع العيدان و تحفظ جانباً لتحضير سلطة عيدان السبانخ , يفرم السبانخ ثم يغسل عدة مرات للتأكد من خلوه من الأوساخ و الأتربة .

·          يقلى البصل بالزيت على نار متوسطة حتى يشقر قليلاً .

·          يضاف البرغل و يقلب لبضع دقائق ثم تضاف البهارات و دبس الفليلفة و الماء المغلي و بعد أن يغلي مجدداً تهدى النار  و يغطى الوعاء .

·          عندما تظهر ثقوب على وجه البرغل يضاف السبانخ و يقلب بلطف ثم يغطى القدر مرة ثانية و يترك حتى يمتص البرغل كل الماء و تنتفخ حباته و تنضج .

·          يبعد القدر عن النار و يترك ليتهدى لمدة عشر دقائق ثم يقدم مع اللبن و يمكن أن يزين وجهه بالبصل المقلي .

تعليقات (17)

2  الكاتب منى, on 02-02-2009 18:36 هلا سمسومة   بالفعل نفس مبدا البرغل بالبندورة بس الطعمة مختلفة ,, طيببة .    فكرة حلوة كتير , ان شاء الله بكرة بتشوفيها على الصفحة الرئيسية

3  الكاتب غيث, on 03-02-2009 04:22 الله يسلم ايديك على هالاكلة وعلى سندويتشات السجق الطيبات كتير بتعرفي منى انا جدو الله يرحمه من زمان كان كتير بيحب هالاكلة برغل بالسبانخ وكانو يعملو له ياها بس من وفاته ما عاد حدا ساواها انا كنت صغيرة ما بتزكرشكلها وطعمتها بس بسمع بالبرغل بالسبانخ بقى طلعت هيك الاكلة وكمان انا محسبتها اكلة حلبية بحتة وقديمة معتقة بقى طلعت تركية الاصل شكرا لك منى ومنكم نستفيد

4  الكاتب منى, on 03-02-2009 05:24 هلا غيوثة   حسب حكيك اتوقع ان الاكلة الي كان جدك يحبها , الله يرحمه و يرحم اموات المسلمين أجمعين , هي زريقة السطوح الي ذكرتها بالمقدمة , ما أتوقع ان هل الوصفة معروفة بحلب على الرغم من ان في كتيررر وصفات مشتركة بين مطبخنا و المطبخ التركي     الف هنا و صحة و عوافي على سندويشات السجق

5  الكاتب أم علي, on 03-02-2009 17:24 مممممممممممممممممممممم والله شكلها لذيذ وطيب تسلم ايدك يا مبدعة

6  الكاتب منى, on 04-02-2009 11:03 هلا ام علي   الله يخليك يا قمر و ان شاء الله تجربيها و تكون على زووءك

7  الكاتب سلاف, on 04-02-2009 12:56 على قد مابحب كل شيئ اخضر صايره عم اكرهه هالفتره بشكل مو طبيعي وبالذات السلق والسبانخ   اول ماشفت الصوره غمضت عيني لا ارديا بعدين قلت لحالي مو معقول ماشوف الوصفه كل وصفاتك غير شكل انا دقتها قبل بمره بالسلق طيبه كمان     منى اذا ممكن فيه عندك عصيرات او كوكتيل يدخل فيها الحليب او شي عصير جديد ببل القلب لاني ماعم اقبل غير عصيرات بقترة الحمل بقى ياليت تنزلي بقسم العصير كم واحد جديد كلهن جربتهن اللي منزلتيهن وعم عيد الدور وعندي طلب بتعرفي شلون بيعملو عصير الكيوي اللي بالمطاعم ؟؟؟؟  شكرا كتير غلبتك معي بس مالي غنى عنك حبيبة قلبي انتي

8  الكاتب منى, on 04-02-2009 15:39 ووواخ الله يعينا من الحمل و الوحام الواحدة شو بيصير فيها , انا كنت بحملي اكره القهوة و الكولا و أأكل     احم خليها سر و الا بلا    يلا بلا كنت أكل رغوة الصابون و كل ما كان الصابون غار من نوعية مفتخرة يعجبني اكتر , لكنمن قليل صرت من بيت الصابوني       تكرم عيونك , كم عصير جديد خصوصي الك و من بينهم ان شاء الله عصير الكيوي , بس كممان لونه اخضر , بقى شو بتغمضي عيونك و بتشربي

9  الكاتب سلاف, on 04-02-2009 17:28 والله ضحكتيني من قلبي من جوا لما قلتلي غمض عيوني واشرب العصير   انا كرهانه كل شيئ خضار اخضر يعني من السبانخ البقله والسلق وحتى الجرجير والكوسا مدري ليش   بس معدتي شاذه بتكره الخضار بس  بما ان الكيوي من الفواكه معلش تكون خضرا بشربه وانا مفتحه عيوني التنتين   بتعرفي والله العظيم جاي عبالي عصير الكيوي كتير بس نسيانه بالاصل انه لونه اخضر  ومنيح ماصرلك شيئ وانتي عم تاكلي رغوة صابون عم قول لحالي منى قلبها ابيض متل التلج وشو القصه ماكنت اعرف وماخطرلي شو السبب اتاري في بالحكايه صابون وغار ونوعيه ممتازه كمان (( عم امزح معك مو تزعلي وتبطلي تنزليلي العصير ))   ياستي انا بابني الكبير توحمت عالصابون حب ريحته بس روح واجي وشمه وحط اللوح جنبي لما بدي نام بس ماخطرلي اكله ابدا ههههه  منى بدي اسألك فيه بالسوبر ماركت عصير ليمون مع كيوي مخلوط عنجد طعمته بتجنن كمان بس انا حابه اعمله بالبيت لان فيه كتير مواد حافظه هيك مبين من المكونات اذا بتعرفي المقادير كمان بكون شكرا كتير :  يالله ناطره العصير مو يطلع بعين البنت ومانشربه

10  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 05-02-2009 20:15 منى وصفه بتجنن كالعاده احلى شي بهالوصفات انها سهله و بسيطه بدون تعقيد و الاهم انها مغذيه كتير    عنجد منى من احب المواقع الى قلبي الله يعطيكي الصحه و ينولك اللي في بالك

11  الكاتب منى, on 06-02-2009 06:59 هلا سلاف   ان شاء الله مبسوطة على طول و دايما , و معك حق الحوامل بيصير معهم اشيا عجيبة     قولتك صار البي ابيض من كتر الصابون الي اكلته ما خطرتلي هل القصة الصراحة     ما عرفت هل العصير الي قلتي عليه , و ان شاء الله عصير الكيوي اول ما يخلص المنيو التركي و ما دام فاقس كيفك علىالحامض محضرتلك وصفة عصير من المنيو التركي على زووءك تمام ان شاء الله

12  الكاتب Eman, on 27-02-2009 05:40 يسلمو منى حياتي عالوصفة الحلوة .. جاي عبالي أعمل أكلات بدون لحمة.. وعندي سبانخ وما عرفت شو ممكن ينعمل وهلأ لقيت طريقة جديدة للسبانخ بدون لحمة .    نسيت أقلك إني رجعت من اسبوعين من سوريا ..وخلصت تقديم موادي وطلعلي لهلأ 3 مواد نجحت فيهم ..وعقبى للتمام ..وكمان زوجي بيشكرك كتير على الموقع اللي ساعده بالطبخ بغيابي

13  الكاتب منى, on 27-02-2009 06:26 الف الف مبروك للنجاح و ان شاء الله عقبال البقية و شي يرفع الراس و كمان الحمد لله على السلامة     اخبارك حلوة كتير اليوم       ان شاء الله تجربيها و تعجبك و هنا و صحة و عوافي على قلبك و قلب احمد بكل لقمة يا رب

17  الكاتب منى, on 18-04-2010 13:40 هلا قمر   الف الف صحة و هنا على قلبك و قلب ابو الشباب , الحمد لله انها عجبتكم     اضافات لذيذة و كله مع العافية طيب , الف شكر الك لاغناء الوصفة بردك و تعليقك

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved