مربى مبشور البرتقال و الليمون 

أو مرملاد البرتقال و الليمون , مربى سهل جداً و لذيذ جداً كله ألوان و نكهات طعمة . حموضة مع حلاوة مع نكهة بسيطة من المرار متل طعم الغريفون . حضرته من يومين لما نزل التلج أول مرة بحلب و عن جد دفى المطبخ بريحته و بلونه .

ممكن تقدميه مع التوست و الزبدة و ممكن تدهنيه على خبز عربي مع جبنة كريم و هلأ أنا عم أكل هل السندويشة , , ييمممي  بتجنن مشتهيتكم كلكم معي .

لحتى يطلع المربى ناجح معك لازم تكون الفواكة الي استعملتيها ناضجة كتير

بالصحة و الهنا

كيلو برتقال ( تقريباً برتقالتين كبار )
حبة ليمون
2 كوب و نصف سكر
3 كوب ماء





·          يغسل البرتقال و الليمون و يفرك جيداً ثم يبشران على المبشرة على الطرف الخشن , لا يقشر البرتقال أو الليمون قبل بشرهما .

·          يوضع السكر و الماء و البرتقال و الليمون المبشور على نار متوسطة و يترك حتى يغلي ثم تهدى النار و يترك حتى يعقد مع التقليب كل فترة و أخرى . احتاج المربى ما يقارب 15 إلى 20 دقيقة .

·          يصب المربى في مرطبانات و يحفظ في البراد .

 فكرة سريعة :

بعد بشر البرتقال و الليمون تبقى قطع يصعب بشرها , وضعت هذه القطع مع كوب من الثلاثة أكواب من الماء في الخلاط و مزجت الكل حتى أصبح المزيج ناعماً  ثم وضعته مع باقي المقادير في القدر و تابعت الوصفة كالسابق .  

تعليقات (25)

2  الكاتب منى, on 03-01-2009 15:38 مية هلا فرح   معك حق لان بيعطي طعمة راائعة .    أختي شوفي بتغسلي البرتقالة و بتبشريها كلها مع قشرها و قلبها و لبها بس بتبعدي البذر و نفس الشي بالنسبة لليمونة

4  الكاتب منى, on 03-01-2009 17:55 هلا سمسومة   و الله معك حق , هلا فايتة بفترة السبات الشتوي , يعني بتعدي علي فترة كل شهرين أو تلاتة بكسل فيها و ما كتير بشتهي فوت للمطبخ و هلا انا عم مر بهل الفترة     سالت عليك العافية دايما سمسومة و ان شاء الله برجع متل قبل بعد ما تخلص امتحانات الاولاد

6  الكاتب منى, on 04-01-2009 05:23 ان شاء الله دايما بيتكم عامر , ما في احلى من لمة الاهل و الاصحاب و الحباب     ان شاء الله تجربي هل المربى منونة كتير كتير بحبه , و ما بده شغل كتير

8  الكاتب منى, on 04-01-2009 15:38 الله بعافيكي ام ناصر هادا بس من زووءك حبيبتي

9  الكاتب الدمشقية, on 05-01-2009 07:51 منى شهيتيني من غير شي أنا بالوظيفة وجوعانة بدي شي سندويشة أكلها   حبيبتي باين عليه لذيذ كتير إن شاء الله بدي جربه رغم أنه الكل عم يقلي هاليومين صحانة بس مو عرفانين أنه السبب هي منى وأكلات منى   تسلم ايدك يارب

10  الكاتب منى, on 05-01-2009 09:49 هلا دمدومة   و الله لو كنت قريبة كنت بعتلك سلة سندويشات مشكلة , خسى الجوووع     مشان الله ديري بالك , هي الصحة بتجي بس ما بتروح بسرعة , و هنااا على قلبك يا رب على كل شي

11  الكاتب سلاف, on 05-01-2009 13:45 شيئ بشهي  يسلم ايدكي منى00 انا حاطه بالاولويه كنت جرب مربى الفريز بما انه هلا فيه فريز وبعده البرتقال00 بتعرفي منى يسلم ايديكي مقاديرك كتير بتعجبني كميتها مابتكون كبيره يعني اذا فشل شيئ لا سمح الله مايزعل الواحد كتير لان الكميه قليله  منشان مربى القرع القرعا ساويت فيها اكتر من اكله من مهرجان القرع وماساويت المربى00 مابعرف بس لما خلصتي الطريقه شفتها بدها شغل كتير لان ماما ماكانت تساويه هيك بقى الشغله بدها ترويييي رح جربه ان شاء الله عالاسبوع الجاي وبقلك النتيجه  سلام ياغاليه

12  الكاتب منى, on 05-01-2009 15:22 هنا على قلبك على كل الاكلات الي جربتها , و متل ما قلتي انا بقصد تكون المقادير قليلة لان كل شي تجربة و ممكن ما ينجح من اول مرة   ان شاء الله تساوي القرعة و تعجبك و تبقى تخبريني شو بيصير معك

13  الكاتب souha, on 09-01-2009 22:09 هلا منونة تسلم دياتك وصفات لذيذة و بتشهي   بس بدي إسألك إذا بشرنا البرتقال مع القشرة يلي بتلمع يعني ما بيعطي طعمة مرار لأني بعرف أنو مربى الرتقال القشور بس بيبشروها لأني بدون بشر ما بتحلى  سلام

14  الكاتب منى, on 10-01-2009 06:47 معك حق و انا فكرت نفس الشي لما اتعلمت الوصفة , بس المهم في الوصفة شغلتين ان تكون البرتقال و الليمونة مستويات و الشغلة التانية ان يكون عندك شجاعة تجربيها و خصوصا ان الكمية مو كبيرة , انا بالبيت بيموتي عليه و هو فيه طعمة مرار بس خفيفة كتير و طيبة كتير , شو رايك دوقك الي عاملته احسن

15  الكاتب souha, on 10-01-2009 10:04 تسلميلي منونة أكيد طيب   أنا سألتك هالسؤال لأني مرة تعلمت كاتو بالبرتقال منستعمل فيه كل البرتقالة القشر بالكامل مع اللب فقالتلي إمي إلو طعمة مرار خفيفة كتير و في ناس ما حسو بهالطعمة و هو طيب كتير   أنا حابة جرب المربى لأنو خطرلي بينفع نحشي فيه الكاتو و السويسرول بدال الكريما   سلام

16  الكاتب منى, on 10-01-2009 10:54 تمام , بينفع و بيعطي طعمة طيبة , ان شاء الله تجربيه و يكون على زووءك و لامات و بوسات لماماتك

17  الكاتب souha, on 12-02-2009 22:42 هلا منونة   المربى حاليا عالنار و لسى ما طفيت تحتو طعمتو طيبة كتير تسلم دياتك بس أنا غشيت شوي بالوصفة لأنو حطيتلها قطر زايد عندي من مربى الكباد بس ياترى لازم القطع الكبار شوي بالمربى يختمو و لا ما بيأثر   إنشاء الله برجع بخبرك شو النتائج   سلام

18  الكاتب منى, on 13-02-2009 06:49 هلا ام السوس     ان شاء الله كون لحقتك لان لازم خبرك ن ل المربى ما بيصير يبقى كتير على النار و الا رح يعطي طعمة مرار     مو ضروري يختموا المهم انك تحسي ان المبرى صار سماكيته منيحة , بس ما صار متل المرملاد او المربى العادي بتبعديه عن النار , انا منالمرات خليته كتير قام صار متل الجيلو بسماكيته و قلت يا عيني شي منظوم , بس لما دقته طلع مر فظيع فرجعته للنار مع شوية مي و هيك انحلت المشكلة

19  الكاتب souha, on 15-02-2009 20:29 هلا منونة   أنا تركت المربى شوي أكتر ع النار بس كنت عاملة حسابي من فبل و بشرت المربى ع الخفيف حتى اضمن إنو مايكون مر زيادة   بالنسبة للسماكة طلعت كويسة و أصولية هلأإلو طعمة مرار خفيفة كتير متل ما قلتيلي من قبل بس الحمد الله نجح   الله يعطيك العافية سلام

20  الكاتب منى, on 16-02-2009 08:25 هلا سهى   منيح ان ظبط معك و حبيتيه و الف صحة و هنا على قلبك

22  الكاتب منى, on 16-02-2009 16:52 اختي اسئلتك كلها رح تنحل بالصور و انا حابة ارجع حضر الوصفة لان رح تخلص من عندي , شو رايك تستني علي يوميين لحتى نزل الصور     الليمونة حجم وسط و اهم الشي بالنسبة للمرار انك ما تخليه كتير على النار و انا ماااااا ببره , كله على بعضه بحطه

25  الكاتب منى, on 26-02-2009 19:04 هلا اختي   ما بتفرقر شو ما عملتي , الاحسن اكيد ترفعيه فورا بس انا احيانا بتركه و ما بياثر

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved