L2ma.com | لقمة طيبة | L2ma.com | لقمة طيبة | مقلوبة الزهرة | الرز, · , قطع, لمدة, يترك | L2ma.com

القائمة الرئيسية

مقلوبة الزهرة

الكاتب/ منى

25/12/2008

مقلوبة الزهرة على الطريقة السورية

مقلوبة القرنبيط

من أطباق الشتاء اللذيذة و الفاتحة للشهية مع طبق مخلل لفت أو مع سلطة شوندر و كاسة عيران , مم و لا أطيب . يمكن تحضيرها بالرز المصري أو السمتي و لكن أصولها بالرز المصري و هي به ألذ . و يمكن تحضيرها بالدجاج أو باللحمة الشقف حسب الرغبة .

في بداية دخلولي للمطبخ , كانت المقلوبة من أصعب الأطباق علي و خصوصاً حين أصل للتقديم , دائما ما كانت مقلوبتي لا تشبه المقلوبة الا بالطعم .

بعد عدة محاولات فاشلة في قلب المقلوبة صرت أقلب مقلوبتي بطريقة مختلفة عن ما تعلمته من أمي و حماتي , أرتب الرز أولا في الطنجرة و فوقه قطع القرنبيط و اللحمة ثم أصب المرق المبهر و المغلي و أطبخ الرز بشكل عادي , بعد أن يتفلفل أرفع قطع اللحمة و أرتبها في طبق دائري و أرتب فوقها قطع القرنبيط و أخيراً أسكب الرز و أضغط و أنتظر لمدة 5 دقائق و بعدها أقلب مقلوبتي في طبق مسطح كبير و أزينها بالمكسراات .... و أخيراً صارت مقلوبتي أنيقة و جذاابة .

بالصحة و الهنا

2 كوب أرز مصري أو رز بسمتي
1 حبة زهرة متوسط الحجم
كيلو لحم غنم مقطع مكعبات كبيرة أو دجاجة بوزن كيلو و نصف
ملح
بضع حبات هيل و فلفل أسود صحيح
حبة كبية بصل
2 ورق غار
عود كبير قرفة
نصف ملعقة صغيرة قرفة
نصف ملعقة صغيرة بهار مشكل
نصف ملعقة صغيرة فليفلة حمراء ناعمة
لوز أو صنوبر محمص
1 - 2 ملعقة كبيرة سمنة

4 كوب مرق للرز البسمتي و كوبان و نصف مرق للرز المصري
ØÑíÞÉ ÇáÊÍÖíÑ

·          يغسل الأرز و ينقع في ماء دافئ و ملح لمدة نصف ساعة على الأقل .

·          يقطع رأس القرنبيط لزهرات صغيرة ثم تقلى بالزيت الغميق حتى تشقر . ترفع على ورق ماص .

·          يغسل اللحم أو الدجاج يوضع في قدر متوسط و يغمر بالماء و بعد أن يغلي ترفع الرغوة عن سطح المرق ثم يضاف البصل و ورق الغار و بقية البهارات الصحيحة ثم يترك حتى ينضج و يمكن استعمال طنجرة الضغط لتقليل الوقت .

·          ترفع قطع اللحم أو الدجاج جانبا و تخلى قطع الدجاج من العظم . يصفى المرق و يضاف المزيد من الماء حتى يصبح مقدار المرق مناسباً لنوعية الرز ثم تضاف الفليلفة الحمراء الناعمة و البهار المشكل و القرفة و يمكن إضافة رشة صغيرة من الكمون حسب الرغبة .

·          في قدر متوسط تصف قطع القرنبيط أولا ثم اللحمة أو الدجاج المسلوق ثم الرز المنقوع .

·          يصب المرق المغلي بلطف و حذر كي لا تختلط المقادير ببعضها البعض ثم توضع السمنة على الوجه.

·          يترك القدر على نار متوسطة حتى يغلي ثم يغطى القدر و يترك لمدة 30 – 40 دقيقة أو حتى يمتص الرز كل الماء و تنضج حباته .

·          يترك الرز و هو مغطى ليرتاح لمدة 10 دقائق ثم يكبس بلطف بطبق بنفس حجم الطنجرة و يترك لمدة 5 دقائق بعدها يقلب في طبق التقديم و يزين بالمكسرات المحمصة , و يمكن اتباع الطريقة التي ذكرتها في المقدمة و خصوصاً للمبتدئات .

أضافة إلى المفضلة (0) |

أقتباس | مشاهدات : 3482

تعليقات (22)

1 الكاتب غيث, on 29-12-2008 14:06
السلام عليكم كيفك منى والاخوات وكل عام والجميع بخير بمناسبة السنة الهجرية وكل الاعياد التي مرت ولم يتسنى لي تعييد الموقع واسرة الموقع بسبب ظروف السفر والانشغال الشديد فيه وقد اشتقت لمنى وطبخاتها المنفنفة كتير الله يعطيك العافية وشو هالمقلوبة اللي منظرها بيجنن بقى كيف الطعمة ممموانا اموت بكل انواع المقلوبة الله يسلم هالديات يا حق انا بعملها بنفس طريقتك اللي بالمقدمة لانني لازلت بيخرب معي التطبيق دوما بس الطعمة ممتازة على كل رح جرب طريقتك لما جيب قرنبيط وبخبرك النتائج وشكرا لك

2 الكاتب سارونات, on 30-12-2008 13:45
السلام عليكم و رحمة الله و بركاته
جازاك الله خيرا اختي منى و اخيرا مقلوبة القرنبيط انا قريت الوصفة بسرعة بس بعدين ان شاء الله راح اقراها منيح و اكتبها
اختي منى بالرد الجاي راح ابعثلك وصفة غراتان قرنبيط كتير بسيطة بس طيبة )) هيك قالو :grin

)) و ان شاء الله تجربوها و تعجبكم يا رب
بالتوفيق
سلام

3 الكاتب منى, on 31-12-2008 15:38
هلا غيوثة

بعد زمان , الحمد لله على السلامة و انا اشتقت الك كتير و دايما على البال و الله

ان شاء الله الكل كان تمام و الاخبار كلها حلوة

ان شاء الله تجربيها و تحبيها , نور الموقع بوجودك مرة تانية غيوثة حبيبتي

4 الكاتب منى, on 31-12-2008 15:42
هلا سارونااات

لااا هيك تطور خطير بالاحداث :grin

, مو مسدقة وصفة منك و كمان شكلها بيشهي
الله يسلمك و يخليك و بانتظالر وصفات تانية منك

5 الكاتب سمسمة, on 31-12-2008 20:35
الله يسلم ايديك منى أنا مالي مجربة المقلوبة بالزهرة بس بسمع عنها أنها لذيذة ان شاء الله بجربها عن قريب

6 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 01-01-2009 08:45
عاشت الايادي اختي منى امس عملتها وطلعت روعه وخاصة انا اموت بطبخات القرنبيط يعطيكي الف عافية

7 الكاتب منى, on 02-01-2009 09:39
هلا سمسومة

ان شاء الله تجربيها و تحبيها ,. سهلة و طيببببة

8 الكاتب منى, on 02-01-2009 09:43
هلا منونة

ريتو مية الف صحة و عافية و هنا بكل لقمة
الله يعافي قلبك و بدنك , كتير انبسطت انك جربتيها و انها عجبتك

9 الكاتب سارونات, on 02-01-2009 12:58
السلام عليكم و رحمة الله و بركاته
يخليلي ياكي اختي منى :grin

نحنا عم نتعلم منك
انا ما حبيت حط الوصفة غير بعد ما جربتها اكتر من مرة و ان شاء الله تجربو الوصفة و تعجبكم بعتلك كمان وصفة غراتان بطاطاخفيف ان شاء الله وصلت بالسلامة :zzz

بالتوفيق
سلام

10 الكاتب ام كريم, on 05-01-2009 15:40
مرحبا حبيت من الصبح قوم اطبخ المقلوبة انا دايما بساويا بلبذنجان بس عجبتني الزهرة لان جوزي بحبا بس مقلية الله يستر اليوم لنشوف رديت فعلو من منظر وجهو ادعو يحبا لان جوزي حلبي والحلبية زويقا بلاكل

11 الكاتب منى, on 05-01-2009 19:15
هلا ام كريم

اكيد ان شاء الله بيحبها , هادا متل جوزي , زوقه صعب كتير و بيعرف لو مغيرة نوع البهار و الله :grin

12 الكاتب ام كريم, on 05-01-2009 20:01
هلا فيكي اختي منى

جربت المقلوبة وطلعت زابطة وانقلبة ولا رزة هرت عجنب اكل جوزي قلتلو طيبة قال طيبة بس شكل يعني مو عطول :grin

بس المهم طيبة واكل بدون زور الحمدالله يعطيكي العافية اختي الغالية على هلاكلة انا حبيتا

13 الكاتب منى, on 06-01-2009 08:58
الف هنا على قلبك و قلب ابو كريم , كتير انبسطت انك جربتيها و عجبتك

14 الكاتب سارونات, on 23-01-2009 15:58
السلام عليكم و رحمة الله و بركاته
اختي منى فيني اسأل ليش بهالمقلوبة شقف اللحمة بيكونو كبار يعني بس تغيير او في سبب معين

بالتوفيق
سلام

15 الكاتب منى, on 23-01-2009 16:27
لا يا اختي بكل أنواع المقلوبة الاطيب انك تستعملي لحمة مقطعة قطع كبيرة

16 الكاتب DOUHA, on 02-11-2009 01:45
اليوم رح اعملا شكرا

17 الكاتب DOUHA, on 02-11-2009 18:00
عملتا انا اول يوم باكول زهرة بحياتي

جد طيبة يسلموا منى

18 الكاتب منى, on 02-11-2009 19:09
هنا يا احلى ضحى , و عافية يا رب على قلبك بكل لقمة :zzz

19 الكاتب farah, on 07-12-2009 23:23
والله من زمان على بالي هالأكلة تخيلي أكلتها من وقت كنت مخطوبة بالاردن وطعمتها تحت سناني تسلم دياتك يا عسل

انشاء الله بدي جربي اسمي جايبة زهرا بس اكيد جبهة الاولاد بدهم يعترضوا لأنهم بيحبوا منزلة الزهرا يا ترى بتعرفوها هي كتيييييير طيبة اذا مو موجودة بالموقع ممكن اضيفها بس كيف حبيبتي منى

دليني عالطرقة والله عندي كم وصفة بتوقع يعجبوكم

20 الكاتب منى, on 08-12-2009 12:14
هلا فروحة

يا رب تجربيها و تطلع متل الي دقتيها و اطيب , شو بدنا نعمل كل الاولاد متل بعضهن و بينقوا على كتير اكلات :roll

المنزلة موجودة بالموقع , ممكن تطلعي على الوصفة و تشوفي اذا في عليها ملاحظات و الا تمام , ايا وصفة حابة تشاركي فيها ممكن تبعتيها كرد و ان ان شاء الله رح انشرها باسمك

21 الكاتب farah, on 08-12-2009 22:23
ميرسي حبيبتي عالنصيحة واكيد رح شوف الوصفة واعطيكي رأي ونزل وصفة الكيك تبع المايكروويف

22 الكاتب منى, on 09-12-2009 07:34
عم استنى ان شاء الله

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 26/12/2008 )

< السابق		التالى >

[ عودة ]