L2ma.com | لقمة طيبة | L2ma.com | لقمة طيبة | مربى اليقطين | اليقطين, حتى, على, يترك, اليوم | L2ma.com

القائمة الرئيسية

مربى اليقطين

الكاتب/ منى

16/12/2008

مربى اليقطين

الوصفة مربى اليقطين أو متل ما بيسموه أهل حلب مربى القرعة , وصفة رائعة بكل معنى الكلمة , و رح نزلها بطريقة غريبة شوي يعني كل يوم رح نزل شو عملت في يقطيناتي .

الوصفة بدها شغل على عدة أيام و رح تجي أم زوجي بكرة لحتى نعملها مع بعض , لهيك حضروا يقطيناتكم و موعدنا بكرة لحتى ورجيكم الشغل الي عملناه . , اليقطين المناسب للوصفة هو اليقطين العدي مو السقي يعني الي شرب من مية المطر لأن هادا رح يطلع مقرمش لما بيصير مربى أما اليقطين السقي رح يبقى طري و هي يقطينتي الحلوة , شوفوا ما أحلاها

. هي مختلفة عن اليقطين الي بشوفه في الصور على النت لأن لونها كاشف نوعاً ما , و هادا هو النوع الوحيد المتوفر بحلب و هادا الي نعمل منه المربى

طريقة طبخ المربى طويلة شوي و بدها صبر بس مو صعبة . و سبب هذه الطريقة في الطبخ هو لون المربى , لان ست البيت الشاطرة ما بيكفي يكون مرباها طيب , كمان لازم يكون لونه أشقر " و عم يضوي ضوي " على قولة الحلبية . بهي الطريقة رح يدخل السكر لقلب المربى من دون ما يتغير لونه و كمان لحتى يحافظ على قرشته و يبقى كريسبي و أخر حلاوة .

بالصحة و الهنا

كيلو من اليقطين المقطع جاهز
400 غ كلس
كيلو و نصف سكر مقسم على ثلاثة أقسام
نصف برتقالة
نصف ليمونة
3 كوب ماء
ØÑíÞÉ ÇáÊÍÖíÑ

اليوم الأول :

اليوم إن شاء الله طريقة تقطيع اليقطين و بعدها تكليسه , و هي المرحلة قليل كتير من ستات البيوت اليوم تعملها , الأغلب بتشتري اليقطين مكلس و جاهز و هو متوفر بس المشكلة أن أحياناً بيكون التكليس مو منيح و بيطلع المربى مو طيب و لا مقرمش .

يقطع اليقطين لحزوز كبيرة و بعدها يقشر و يقطع بأدلة خاصة كتلك الظاهرة بالصورة و إذا لم تتوفر الأداة يمكن تقطيعه حسب الرغبة , بعدها يحفر بمحفرة صغيرة حتى يصبح فيه نفق صغير . أداة التقطيع الظاهرة بالصورة هي لأم حماتي الله يرحمها , يعني عمرها على الأقل 60 أو 70 سنة .

بعد تقطيع اليقطين و تجهيزه ننتقل لمرحلة التكليس , نحتاج لما يسمى كلسة أو كلس . و هي متوفرة في حلب في الكلاسة و عند بعض البائعين في الخالدية و كنا من زمان ما نشتريها الا من عند أبو نديم الي بالجميلية قبل ما يتسكر محله , لكمية كيلو من اليقطين بعد تقطيعه , نحتاج لكلسة بحجم حبة البرتقالة الكبيرة , و بعد وزنها طلعت ما يقارب 400 غ .

توضع الكلسة في وعاء كبير بلاستيك و لازم يكون بلاستيك حتى ما ينتزع . يصب الماء المغلي عليها بحذر حتى لا يصل لأطراف الأصابع . ستلاحظين ظهور فقاعات و كأن الماء يغلي بشدة و هذا دليل على أن الكلسة منيحة أو " شاطرة " على قولة حماتي .

الكلس يفور و يغلي بعد اضافة الماء المغلي عليه

نحرك باستخدام ملعقة خشبية حتى يذوب الكلس تماماً ثم يترك جانباً حتى يبرد الماء و يصفى الكلس في قاع الوعاء .

بعد أن يرقد الكلس في قاع الوعاء يصب الماء الأبيض في وعاء أخر بحذر و ببطء حتى لا يمتزج بالكلس الراقد . هذا هو الماء الذي سنستخدمه للتكليس أما الكلس الراقد فيوضع في كيس و يرمى , لا يرمى أبداً في المجلى أو الحمام و إلا فإنه سيسده .

يغمر اليقطين المقطع بماء التكليس و يترك لمدة 24 ساعة مع ضرورة تحريكه كل فترة و أخرى , لاحظي كيف لون المي مايل على حليبي نوعاً ما .

اليوم الثاني :

اليوم التالي هو يوم تحلية اليقطين أي نقعه بالماء للتخلص من الكلس قبل البدء بطبخه . بعد بقاء حبات اليقطين لمدة 24 ساعة على الأقل في الكلس , يغسل اليقطين جيداً و يوضع في ماء بارد و يغير عليه عدة مرات حتى يصبح الماء شفافاً , بالنسبة لي احتاج اليقطين حوالي أربع ساعات مع التغير كل تلت ساعة تقريباً .

يغطى اليقطين بأول نصف كيلو من السكر و يترك لمدة 8 ساعات أو طول الليل حتى ينزل من ماءه , موعدنا غداً ان شاء الله لمتابعة بقية الخطوات .

اليوم الثالث
يصفى اليقطين من مائه ثم يمزج مع باقي الماء و يوضع العصير على النار و يترك حتى يغلي لمدة عشر دقائق ثم يترك حتى يفتر . يضاف اليقطين و يترك لليوم التالي مع التقليب بين كل فترة و أخرى .

اليوم الرابع

في اليوم التالي يرفع اليقطين من القطر و يضاف القسم الثاني من السكر و يغلى لمدة 5 دقائق يترك بعدها ليفتر و يضاف اليقطين مرة أخرى و يترك لليوم التالي مع التقليب بين وقت و أخر .

اليوم الخامس

في اليوم الثالث و الأخير من نقع اليقطين بالسكر , يرفع اليقطين من القطر و يضاف أخر قسم من السكر . تقطع البرتقالة و الليمونة لأرباع ثم تضاف للقطر و يترك ليغلي حتى يصبح أرق من القطر العادي بقليل . أضفنا البرتقالة و الليمون لإضافة نكهة مميزة للمربى و بعض صديقاتي يضفن حبات الهال عوضاً عن نكهة الحمضيات و هذه المرحلة تبقى حسب الرغبة .

بعد أن يغلي القطر مع الليمون و البرتقال يضاف اليقطين و يغلى على نار هادئة لمدة عشر دقائق تقريباً أو حتى تختم القطع أي تصبح شفافة و يجب عدم زيادة فترة الطبخ حتى يحافظ المربى على قرشته .

بعد أن يبرد المربى يحفظ في قطره في البراد , و ليس في الفريزر , حتى وقت التقديم و عند التقديم يرفع من القطر و يترك حتى يصفى و يقدم في أطباق صغيرة و يمكن حشيه بالمكسرات حسب الرغبة أما أنا فأفضله من دون حشوة .

أضافة إلى المفضلة (0) |

أقتباس | مشاهدات : 1580

تعليقات (38)

1 الكاتب المغتربة, on 17-12-2008 10:52
والله والله والله

شاعرة بسعادة لاتوصف بسبب طرب هل الواطي بوش

والله الجزمة كتيررررة عليه

2 الكاتب الدمشقية, on 17-12-2008 11:33
رائعة كلك يا غالية يا منى وكلامك رائع :grin

3 الكاتب سلاف, on 17-12-2008 11:52
كيفك حبيبتي منى 000 عجبتني مقدمتك اليوم كتير 00 الله يكون معك يامنتظر ويتقبل دعوتك يامنى 000
والله يخليلك فرح00 وأولادك كلهن ويحميهن يارب‘‘‘ عنجد هالاسم كتير بحبه ** فرح ** اذا الله طعمني بنوته بالمستقبل باذن الله رح سميها فرح :zzz

هلأ جينا للمهم
واخيرا رح نساوي مربى القرع 00 اول سؤال منى كيف فيني اعرف اذا القرعا عدي أو سقي ؟؟ نحن عنا القرع متل اللي بالصوره وفيه نفسها بس لونها اخضر اذا كنتي تشوفي افلام كرتون منزمان سالي كانو لما يساوو حفله يستخدموها كقناع هيك شكلها مدور ولونها اخضر غامق

منتظره الخطوات منك منامينوو على فكره امبارح حضرت مربى السفرجل طلع بجنن كتير طيب ولونه بعقد بس تعذبت كتير بتعيير المقادير لازم اشتري ميزان للمعايير اكتشفت انه كتير بيلزم :roll

كنت بدي اسألك شغله كمان المخلل لما بكون مرتخي شو بكون السبب هل بكون الملح قليل ؟؟؟ ولا شو برأيك؟
بعرف اسألتي كتيره الله يعينك بس بدك تتحمليني

4 الكاتب منى, on 17-12-2008 18:08
هلا مغتربة

كلنا و الله طايرين من الفرحة , لان هل البوش وطى راسوا ادامنا , و لو بشكل رمزي :zzz

5 الكاتب منى, on 17-12-2008 18:09
هلا دمدومة

هادا بس من زووءك يا عسل
ان شاء الله مبسوطة على طووول :grin

6 الكاتب منى, on 17-12-2008 18:09
هلا سلوفة

انت بيطلعلك تسالي ألف سؤال لان وعدتك و ما وفيت , ان شاء الله تساويها و تظبط معك

و هلا خلينا بالاسئلة : اليقطينة لحتى تعرفيها عدي أو سقي ما في الك غير البياع هو الوحيد الي بيعرف يقطيناته, سألتها لحماتي نفس السؤال و هيك جاوبتني

يعني ما في فرق بالشكل , التنتين الهم نفي اللون و نفس الشكل

الف الف صحة و هنا على مربى السفرجل و الله زكرتيني لازم نزل مربى السفرجل المبروش , صار محضرته من أكتر من شهر :roll

اذا ارتخى المخلل معناه ان خله قليل و ممكن يكون الملح , بس الأهم هو الخل , إذا بدك شوفي وصفة تحضير المخلل , كتير بتطلع معي ناجحة

7 الكاتب kuwaiti_girl, on 18-12-2008 06:51
ههههه عجبني هالمجلس وان شاء الله دوم

لاكون صريحه انا مرح اعمل هالمربى لان اولا لا يتوفر هذا النوع من اليقطين عندنا ... وثاني شي لا يتوفر الكلس
بس بقعد وبراقب الحلقات لانها ممتعه
سلامي للجميع

8 الكاتب منى, on 18-12-2008 10:51
:grin

و انا كنت عم احكي لنفسي هل الكلام أول ما فكرت نزل الوصفة
ان ما رح الكل رح يقدر يعمل هل المربى ! يلا ما الك غير تزوريني و ببقى بدوقك اياه :zzz

لان عن جد روووعة

9 الكاتب ميساء, on 18-12-2008 10:57
عزيزتي منى يسلم فمك ونحن لن ننسى بعد اليوم هذا التاريخ الذي ضرب فيه عدو الله والانسانية وشكرا كتير على هالوصفة من زمان حابة اتعلمها بس بدي اسأل هالخطوات يمكن تطبيقها على مربى الباذنجان ويسلمو يا أحلى مرشدة ومعلمة طبخ والله انا باشعر انك بتعطي الوصفة والمعلومة من قلبك وهذا سر أكلاتك الطيبة :zzz

10 الكاتب سلاف, on 18-12-2008 12:14

شكرا كتير منى عم عزبك معي بس المخلل اللي ارتخى هو مخلل لفت ومابينحطله خل 00 انا جربت مخلل خضار عطريقتك والله طلع بجنن الاختلاف كان انه انتي بتستخدمي خل التفاح وانا الخل العادي واضافه عنجد كانت روعه بالمخلل هيه حبات الحمص00 كل شيئ باضافاتك عم يطلع بجنن00 انا اللي كنت عم اسأل عنه مخلل اللفت الصراحه لما ساويته كنت صايمه ب10 ذي الحجه بعد 15 يوم فتحته لقيته مرتخي قلت اكيدبدو يكون الملح لان مامنضيف خل مزبوط؟ قلي زوجي ملحه كويس قلت بركي هالمره نوع اللفت :upset

مابعرف المهم مازبط معي وزعلت كتير مع انه ساويته اكتر من مره ونجح معي بس رح ارجع ساويه مره تانيه ان شاء الله
بنرجع لموضوع القرعا اليوم رح روح دور على قطاعه للقرع تعمل اشكال حلوه لان ماعندي وبعدها بشتري القرعا وبلش شغل فيها بس بركي مالقيت هيك قطاعه لان بعتقد مافي منها هون00 شلون بدي قطعه ؟؟؟؟؟ :zzz

شكرا منى ناطره ردك

11 الكاتب رنا, on 18-12-2008 16:13
مابدي مابدي مابدي انا كتير بحبه وحامل والله حرام عليكي :cry

شو بدي اعمل ؟؟؟
على فكرة انا كتير بحبه بس امي كانت تجيبه مقطع باكياس بعدين تساويه بس مو دائما بينجح معها ؟؟؟...
ياستي ماعلينا الوصفة كتير بتجنن بس هون مافي لا كلسة ولا هي الاداة يلي بتعملهن مزكزكين :grin

لذلك بعد اسبوع رح دق بابك واجي اكل منه :grin

اما بالنسبة لبوش والوداع الحافل يلي صار اله بالعراق ...كتير انبسطت بس زعلت عالصحفي وتمنيت لو العرب تصير ايد وحدة مرة وحدة بس وكل الموجودين يشلحوا من رجلهن ويضربوه ...بس للاسف ...ضربوا الصحفي المقهور واخدوه لما وراء الشمس ...بس الله معه

12 الكاتب منى, on 19-12-2008 11:40
هلا ميوسة

اكيد نفس طريقة التكليس نعملها مع مربى البانجان , كنت ناوية نزله هل الصيفية بس ما صحلي .
ان شاء الله اذا ربنا راد رح نزله الصيفية الجاية :zzz

هل الكلام بس من زووءك و طيبتك أختي , مية هلا

13 الكاتب منى, on 19-12-2008 11:44
هلا سلوفة

معناه أما الملح قليل و ممكن كمان يكون الجو كان حار و كان لازم تحفظيه بالبراد :roll

اذا ما عندك من هل القطاعة ممكن تقطعيه لمستطيلات بسماكة نص سنتيمتر تقريباً

يلا خبريني شو بيصير معك

14 كتر وغلبة وسقلة
الكاتب أم الهدى, on 19-12-2008 12:24
حبيبتي الله يعطيك ألف عافية وتسلم دياتك الحلوة على كل الوصفات يلي بتقدميها شو زاكية
عندي كم سؤال رح تقل عليك شوي، بع دبوكرا ان شاء الله عيد ميلاد بنتيوأنا ما عندي خبرة كتير بالكاتو ، الصنف الوحيد يلي جربتو كاتو التمر وطلع رائع كتير وناجح من أول مرة ، بس هلق بدي تنصحيني بنوع تاني جربو يكون سهل ومابدو شغل كتير ونجاحو مضمون متل كاتو التمر (شحاد ومشيرط) :grin

أعمل (كاتو بسيط ومميز ) ولا في نوع تاني أسهل
وتاني شي كريما التزيين الأطيب الكريما السائلة ولا كريما البودرة وطريقة تحضيرهم
عنجد خجلانة منك من كتر أسئلتي بس أنا بوثق فيك كتير

15 الكاتب منى, on 19-12-2008 15:17
رنونة مشان الله غمضي عيونك , لتجي على عين البي بي

مية السلامة بهل القامة , مية السلامة بالحامل و المحمول :grin

بتنوري يا قمر

16 الكاتب منى, on 19-12-2008 15:02
هلا ام هدى

الله يسلمك و يحفظك و يخليك و يخليلك كل قططك الحلوة :zzz

النوع الي ممكن أنصحك فيه هو كاتو شوكولا كولا و في كمان كاتو الشوكولا بتلات خطوات , هدولة سهليين و جاهزيين مع كريماتهم

الكريما السائلة أطيب أكيد بس البودرة أسهل , السائلة بتخفقيها شوي و بعدها بضيفي سكر بودرة و ممكن رشة صغيرة فانيليا لحتى تجمد , بس ما بتزيدي الخفق و الا صارت متل الزبدة :roll

البودرة لكل علبة بتخفقيها مع تلات ارباع كوب حليب بارد كتير لحتى تجمد :zzz

اي سؤال تاني من عيوني و انا تحت الخدمة حبيبتي

17 الكاتب الدمشقية, on 21-12-2008 07:31
حبيبتي منى نحن ماما بتساوي مربى اليقطين وبيطعلع طيب ومثل المرايا

وتقريباً مثل طريقتك

بس حبيت هاأداة يلي عم تقطعي فيها يعني منين ممكن نشتريها أو شو اسمها بعد اذنك يا قمر :zzz

لأني كمان حابة هالمرة ساوي المربى أنا وبطريقتك تمام إن شاء الله

18 الكاتب منى, on 22-12-2008 10:14
هلا دمدومة

هل الالة ممكن تشتريها من محلات الادوات المنزلية ,بس ما بعرف اذا في منها بالشام

فيك تقطعيها باي طريقة و اتمنى انك تجربيه و يعجبك

19 الكاتب em layal, on 22-12-2008 22:24
hi ana amani men venezuela u bys3dny kter eny kon ma3kon be hal mawke2 el ra2e3 kel shy hon tayeb u ne7na ely bl gorba be 7aje la hek mwake3.

20 الكاتب منى, on 23-12-2008 05:47
مية هلا أماني

ان شاء الله تعجبك الوصفات و تجربي منها شي و يكون على زووءك

نور الموقع أختي و انا دايما ان شاء الله بالخدمة

21 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 23-12-2008 17:43
Dearest Muna,
I'm sorry I have to write in English. I couldn't log to Lakii to use their Arabic Keyboard. I just wanted to thank you for this wonderful recipe. It has been so long since I had the chance to check out your location . I feel so happy when I check it out. I feel as if I found what I've been looking for . As for the kils for people who live abroad (bil gurbe) they can find it in home improvement stores where they sell concrete and sand. I love the way you cut them. first i thought this is corn but when I checked the recipe I found your cutter. I really love the way you appreciate everything old. God bless you. Lots of love

22 الكاتب منى, on 24-12-2008 05:36
هلا أمونة

بعد زمان القمر ما بان , كتير انبسطت ان الوصفة عجبتكو ان شاء الله تجربيها و تكون على زووءك
كمان منيح كتير ان عرفتي هل الكلس من وين بينجاب , يا ريت لو تعطيني اسمه بالانكليزي

حبيبتي القلب على القلب , الك مني بوسات كبيرة و الف شكر الك للرد و التواجد

23 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 24-12-2008 07:11
Dear Muna, Kils is called Lime in English. And it's usually available in powder form here in the USA. I don't know about other countries. But it's called Lime

24 الكاتب الدمشقية, on 24-12-2008 09:04
إن شاء الله حجربها

وامبارح قلت لماما هي السنة أنا يلي بدي ساوي مربى اليقطين على طريقة حبيبتي منى

إن شاء الله ينجح معي ما أطلع بخيبة الأمل :cry

بس حبيبتي ياريت تكملي بقية المراحل الله يوفقك ويقويكي

25 الكاتب منى, on 24-12-2008 11:54
ممم للأسف أمونة هدا الكلس ما بيصير الواحد يستعمله للمربى , قصدي الكلس البودرة , بس ما بعرف ليه ما بينفع :roll

على كل الف الف شكر الك للمعلومة يا عسل

26 الكاتب منى, on 24-12-2008 18:16
هلا دمدومة

ان شاء الله بتجربيه و بتحبيه , انا ام زوجي علمتني اياه و هي مشهورة بمربياتها عالمياً :grin

و الله عن جد أطيب مربيات بدوقها عندها و هي الله يعطيها الف عافية بتعلمني بقلب و رب

و الله حقك علي ان شاء الله بكرة بصور المربى بشكله النهائي و بنزل بقية الوصفة

على فكرة غداي اليوم عندك , عملت ابو بسطي و ياامييي شو انبسطت , بيجنن طلع :zzz

27 الكاتب سلاف, on 25-12-2008 14:52
كيفك منى000 منيح ماشتريت اليقطينه وبلشت شغل فيها 000 كانت لهلأ مسترخيه ومستمتعه بحمام الكلس او كانت مع هالسكر ونشفت ميته :zzz

عم امزح معك بس ماتكوني مابتلقي مزح :roll

عم تابعك انا ومستنيتك تخلصي منشان جرب انا باليقطينه اللي عندي
منى كنت بدي قلك شغله منشان الكلس البودره
هون ماعنا كلس قطع او حجر بقى كل اللي بعرفهن بساوو مربى القرع او اي مربى بده كلس كانو يستخدمو الكلس البودره ومنهن ماميتي الله يخليلي ياها
بيطلع المربى بجنن وعم يقرش بس الصراحه مو متل لما يكون حجر
انا ماما بعتتلي تنتين من سوريا اللي بده بعطيه وحده

والمقدار بتذكر كانت تحط كاسة كلس لكل 6 اكواب مي بعدين بتصفيه وباخد بس المي
يالله ناطرتك تخلصي هالمربى وشوف النتيجه النهائيه0000

28 الكاتب منى, on 26-12-2008 09:50
:grin

هي عواض ما تقوليلي يااا كسلانة قلتيها بطريقة مهذبة

خلص ما دامها من مجرب أكيد معناها بيصير , انا هون سألت الخبرات و أقصد فيهم مركز الدعم الفني المتمثل بامي و حماتي و قالولولي ما بيصير :zzz

غمضي عيونك و لا بقى تدخلي للموضوع الا لما تشوفي الصورة النهائية معلقة على الصغحة الرئيسية :grin

29 شكر
الكاتب أم الهدى, on 27-12-2008 12:08
عزيزتي منى يعطيك ألف عافية على الجواب الشافي والوافي والله يجزيك كل خير تأخرت بالرد لأنو النت كان عطلان ولهيك ما قدرت أعمل كاتو الشوكولا وكان عندي مقادير كاتو بسيط ومميز عملتو وطلع روعة وزينتو بالكريما والفواكه وطلع كتير حلو
تسلم دياتك ومشكورة مرة تانية

30 الكاتب منى, on 28-12-2008 07:43
نا و الف عافية و صحة على قلبك و قلوب العيلة واحد واحد

31 الكاتب سلاف, on 30-12-2008 20:07
منى وين المربى بقى؟؟؟ عالقليلقه بس حطي باقي الخطوات والله اليقطينه رح تخرب

32 الكاتب منى, on 31-12-2008 10:32
تكرمي

33 الكاتب الدمشقية, on 31-12-2008 07:50
ألف هنا وعوافي على قلبك حبيبتي منى ونحن امبارح كان غدانا أبو بسطي والحمص تمر هندي ممممممممم :grin

حبيبتي أكيد المربى بيطلع ظريف طالما على طريقة الغالية منىوربي يخليلك أمك وحماتك يارب ويمد بعمرهن بقوة وعافية

34 الكاتب منى, on 31-12-2008 10:19
الف شكر الك دمدومة , ان شاء الله تجربي المربى و يعجبك
و الك ان شاء الله متل هل الدعوات الحلوة و أكتر

35 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 31-12-2008 19:33
وااااااااااااو منى شو هالشي الفخم ولك يا عيني على حلب و ستات حلب

يعني بصراحه بتستاهل كل النطره يسلموا ايديكي و ايدين حماتك يلي بينلفوا بحرير
تاني مره بتشوفيها عطيها بوسه مني و قوليلا هاي جاي من اخر الدنيا من الغربه و طبعا وحده متلا الك حبيبتي
المنظر و الون اسمالله بيعقد و اكيد الطعم كمان يعطيكون العافيه ويحميكون يا ربي

36 الكاتب منى, on 01-01-2009 11:00
هلا أمونة

هادا بس من زووءك يا عسل , خليلي عينك
ان شاء الله شي مرة يصح الك و تدوقيه لان كتير طيب

بوساتك بيوصلوا ان شاء الله , نورتي حبيبتي :zzz

37 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 05-01-2009 18:36
يا الله يا منى هالمربى شو اخد عقلي بشكل تقطيعه المميز و لونه البراق الشفاف
عنجد كل يوم الصبح لازم ادخل و اشوفه بدي قول للستات يلي عايشين باميركا انه لقيت كلس مخصوص للمربيات و المخللات بيلاقوه في السوبر ماركت بجانب ادوات عمل المخلل و ادوات عمل المربيات و المراطبين وهوكلس معالج مخصوص للاكل و اسمه بالانكليزي بيكيلينج لايم و مكتوب عليه لاعطاء قرمشه انا اشتريته و اليوم راح اشتري اليقطينه و راح اعمله على يقطين و نوع من انواع الشمام القاسي الاصفر اللون انشاء الله ببعتلك لصوره التطبيق النهائيه
على فكره هذه القطاعه تستخدم لتقطيع عده ساندويشات فوق بعض مره واحد لعمل اشكال بالخبز يستعمل كمقبلات ممكن عمل بحث على جوجل عنها وشرائا عبر النت واللي بيلاقيها ارجو ان يقولنا من وين ومره تانيه شكرا يا منى

38 الكاتب منى, on 07-01-2009 05:53
هلا امونة

لو تعرفي ردك قديه فرحني و اتمنيت من جوى قلبي دوقك هل المربى

ان شاء الله تشتري اليقطينة و تجربي هل المربى و يضبط مع الكلس الي لاقيتيه , ان شاء الله لازم يظبط و بانتظار الصورة حبيبتي

الشكر الك أمونة و ان شاء الله حدا يشوفها و يخبرنا لحتى يستفاد الكل

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 31/12/2008 )

< السابق		التالى >

[ عودة ]