L2ma.com | لقمة طيبة | L2ma.com | لقمة طيبة | يخنة البازلاء باللحمة | البازلاء, صغيرة, · , بعد, البندورة | L2ma.com

القائمة الرئيسية

الأكثر تصفحاً

يخنة البازلاء باللحمة

الكاتب/ منى

31/03/2007

لما كنت صغيرة , كانت هي الأكلة من الأكلات الي بموت عليها , و كل ما حدا يسالني شو حابة تتغدي جاوب رز و بازلا , لهيك لما طبخت أول طبخة بعد ما اتزوجت كانت البازلاء , و بعد السؤال و الاستفسار عن الطريقة من ماما و حماتي و عمتي و جارتي , و الله مو مبالغة سألت الكل , المهم قررت على طريقة و باشرت العمل ..

كان ابو الشباب جايب الي كيلو لحمة مع كيلو بازلاء و جزر و بطاطا و بندورة , سلقت اللحمة بأصغر طنجرة عندي بعدها عصرت البندورة و صفيتها و ضفتها . الطنجرة صارت صغيرة فنقلتها للطنجرة الأكبر منها بشوي . بعد ما قربت اللحمة تستوي حطيت البازلاء , الطنجرة صارت صغيرة قمت نقلت الطبخة للطنجرة الأكبر . بعد ما غلت البازلا و اللحمة مع بعض شوي بعدا أضفت الجزر كله , كمان الطنجرة صارت صغيرة فنقلت للطنجرة الأكبر , أخر الشي أضفت البطاطا و كمان كلها .

أكيد عرفتي الي صار , صارت الطنجرة صغيرة , نقلبت الطبخة لأكبر طنجرة عندي و صار عندي حلة كااااملة من البازلاء

. بس الله ستر ان طلعت طيبة كتير و بقينا عم ناكل فيها اسبوع طبعا بعد ما سكبت للحبايب و القرايب لحتى ورجيهم شطارتي .

هي قصتي بأول طبخة , يا ترى انت شو قصتك .

حبة بطاطا كبيرة
3 حبة جزر متوسطة
نصف كيلو لحمة مقطعة مكعبات
بصلة متوسطة مفرومة ناعماً
نصف كيلو بازلاء مفروطة
كيلو بندورة ناضجة
ملعقة صغيرة فليلفة حمراء ناعمة
نصف ملعقة صغيرة بهارات مشكلة
ملعقة كبيرة سمنة

direction

·          يقطع الجزر إلى بكرات , تقشر البطاطا و تقطع إلى مكعبات متوسطة الحجم , يفرم البصل ناعماً .

·          تقشر البندورة ثم توضع في الخلاط مع القليل من الماء و تمزج حتى الحصول على مزيج ناعم .

·          يقلى البصل بالسمنة حتى يطرى , تضاف اللحمة و تقلب حتى يختفي اللون البني و يجف كل مرقها .

·          يضاف عصير البندورة و البهارات و المزيد من الماء و تترك اللحمة على النار لمدة نصف ساعة تقريباً أو حتى تقارب من النضج .

·          تضاف البازلاء و تترك لمدة ربع ساعة , أخيراً يضاف الجزر و البطاطا و تترك على نار هادئة حتى تنضج كل الخضار .

·          بعد أن تنضج الخضار و تتسبك الصلصة تسكب البازلاء باللحمة في طبق التقديم و تقدم ساخنة مع الأرز الأبيض أو الأرز بالشعيرية .

أفكار و تنويعات :

·          عندما لا تتوفر البندورة الطازجة استخدمي المرق الممزوج مع صلصة البندورة .

·          اذا كانت البازلاء مجمدة فتضاف في نصف الطبخة لأنها تسلق قليلاً قبل تجميدها , و يمكن تقليب الخضار بالزبدة أو السمنة قبل اضافتها للمزيد من النكهة .

أضافة إلى المفضلة (1) |

أقتباس | مشاهدات : 5098

تعليقات (6)

1 الكاتب سارونات, on 29-09-2009 02:00
السلام عليكم و رحمة الله و بركاته

كل مرة بكتشفلي وصفة و كان اول مرة بشوفها

و انا عم اقرأ قصتك كنت عم اتخيل قديش كنت متوترة لان اول طبخة بتساويها و شوفي كيم مرقت لسنين و صرت طباخة بتاخد العقل و بيفخر فيك زوجك و امك و حماتك و كل من يعرفك

منوووش بدي اعرف اذا فيني ساوي الوصفة بلحمة مفومة او نص لحمة شقف و نص مفرومة المهم اذا بتنفع بالمفرومة فهل بيضفلها شي و امتى ضيفها

- كمان بدي ياكي تنزلي وصفات شتوية و يخنات بأقرب فرصة اذا فيكي

- اخر شي بدي اسأل هل ممكن تؤكل اليخنات مع الخبز بس
او ضروري يكون معها رز او شي تاني

بالتوفيق
سلام

2 الكاتب منى, on 29-09-2009 07:50
هلا سارونات

ما كنت متوترة , بالعكس كنت محمسة كتير لباشر اول طبخة و خصوصا ان ماما ما كانت تسمحلي فوت على المطبخ نهائيا و اي شي كنت ساويه كنت اعمله من غيابها و بعدها حاول اخفي اثار الجريمة :grin

الوصفة فيكي تعمليها باللحمة الناعمة , بس بصراحة الفرق بالطعمة كبير كتير بين اللحمة الشقف و الناعمة , بتقلي اللحمة بعد البصلة و بعدها بتابعي الوصفة بشكل عادي , ما في داعي لايا اضافة , و كمان اطيب الشي تقدميها مع الرز , ما جربت قدمها لوحدها مع الخبز و ما اتوقع ح تطلع كل هل الاد طيبة من دونه

ان شاء الله محضرة كتير وصفات للشتوية , ربي يسر و نزلها كلها و تكون كلها يميي

3 الكاتب gsm, on 20-10-2009 23:49
بتعرفي يا منى وانا عم اقرا المقدمة عن جد تذكرت حالي وقت عملت اول طبخة بحياتي كنت وقتها سنة اولى جامعة وما بعرف كيف شكل المطبخ لأنو ماماتي ما كتنت تخليني ادخل على المطبخ كمان بس بتذكر وقتها عملت اول طبخة كانت وقتها ملوخية بس الله ستر وطلعت معي طيبة ومشي حالها بس كان الرز مخبوص شوي ما كنت بعرف اطبخ رز لسى :upset

بس هلق مشي الحال :grin

انا كمان بعمل هي الاكلة لما اكون محتارة شو اطبخ وبعمل نفس طريقتك بس بضيفلها ذرة بتطلع طيبة وبتعطي لون حلو للطبخة واهم شي عم تعجب الجماهير :grin

يسلموا ايديك يا فنانتنا حتى باول طبخة معلمة وطلعت معها مزبوطة من اول مرة :grin

لكان شي بالفطرة

4 الكاتب منى, on 21-10-2009 10:44
ملوخيو و طلعت طيبة من اول مرة , ايه و الله برافو عليك و اذا عل الرز مو مشكلة المهم الالة طلعت بتتاكل :grin

مممم , حلوة فكرة الذرة , من هلا عم اتخيل الاولاد شو رح يصير فيهن اذا شافوا هل المنظر , رح يحبوني كتير و انا رح حبك اكتر و اكتر :zzz

5 كشخة ... !!!
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 31-01-2011 04:09
السلام عليكم ورحمة الله

بأول الأسبوع عم بتفتل بالموقع لحط لائحة لطبخات هالأسبوع لجبلون الغراض. واحترت كتير

لأن في كتير شغلات طيبة. قلت ببلش بهالقسم من أول الشي

.
عملت هاليخني وطلعت كتير طيبة، كنت خايفة كالعادة تطلع قطع اللحم قاسية بس الحمد لله طلعت بتدوب بالتم.

يسلمو منى الله يجزيك الخير

والسلام عليكم ورحمة الله

6 الكاتب آرام, on 21-10-2011 09:27
أكلة لذيذة وسهلة وشهية والكل بيحبها، ما شفت حدا حتى الآن ما بيحب يخنة البازيلا. ومن أوائل الطبخات اللي تعلمتها بحياتي، نفس طريقتك بالضبط بس بفرم الجزر والبطاطا بحجم أصغر شوي.

أما أول طبخة بحياتي فكانت تجربة مريرة كتير :sigh

من صغري مغرم بأكلات الزيت وبحبها كتير، يمكن لأن أهلي متل كل الحلبية، ما بيعملوا أكلات الزيت إلا بحالات الطوارئ يعني، فبالنسبة إلي لما يكون الغدا مجدرة أو مكمور أو عدس بحامض، وخصوصاً عدس بحامض، يكون عندي عيد.
ولذلك كانت أول تجاربي في المطبخ مع العدس بحامض، اشتريت عدس وحطيته بالطنجرة وغمرته بالمي وتركته يغلي، ساعة وساعتين وتلاتة والعدس ما استوى، تتبخر المي وأزيدها، وتتبخر المي وأزيدها، والعدس على حاله بكعب الطنجرة متل البحص. ما كان عندي حدا أبداً أستنجد فيه، ولا كان في تلفونات وموبايلات وإنترنت، بعد شي عشر ساعات فقدت الأمل وكبيت العدس.
عرفت بعدها أن العدس ممكن تكون نوعيته سيئة كتير وما بيستوي، وطريقتي بالسلق كانت غلط. ولما نجح معي بعدها العدس بحامض طار عقلي من الفرح. وشوي شوي صرت أتعلم الطبخ. بس بيضل العدس بحامض دائماً إله مكانة خاصة عندي

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 21/10/2011 )

< السابق		التالى >

[ عودة ]