L2ma.com | لقمة طيبة | L2ma.com | لقمة طيبة | تحضير مكعبات المرق | المرق, كبيرة, عندي, لحتى, العظام | L2ma.com

القائمة الرئيسية

تحضير مكعبات المرق

الكاتب/ منى

07/12/2008

المرق و قد تبخر معظم الماء و بقيت فيه الخواص فقط
وصفة تحضير المرق

المرق مقدار أساسي في أي وصفة حابة تعمليها و تكون مميزة بالطعم . يمكن هو المقدار السري الي بيميز نفس ست بيت عن أي ست بيت تانية لان الوصفات المحضرة بمكعبات المرق الجاهز كلها فيها نكهة بتشبه بعضها . الواحدة فينا ممكن تستسهل و تستعمل مكعبات المرق الجاهزة , بس لما يكون عندي بديل صحي و لذيذ ما بقى في داعي للتفكير . كتير طريقة سهلة و لذيذة و أهم الشي أنها مأمونة و ما فيها من المواد الحافظة . عن جد لازم تدوقي شوربة محضرة بالمرق الجاهز و نفس الشوربة الي محضرة بالمرق الي عاملتيه بايدك لحتى تعرفي الفرق . طعم غير !

الوصفة هي ممكن تحضري منها كمية تكفيك لشهر و تحفظيها في الفريزر و تستعمليها حسب الحاجة . و التحضير سهل كتير بس كان عندي مشكلتين , المشكلة الأولى الوقت لأن ممكن كتير احيان ما يتوفر عندي الوقت الازم لتحضير المرق لهيك صرت حضر كمية كبيرة و احفظها في الفريزر .أما المشكلة التانية عندي هي المساحة . لأن كنت أملئ مرطبانات صغيرة بالمرق و أحفظها في الفريزر و تأخد معي مكان كبير لحتى خطرت لي هل فكرة المكعبات . بعد ما جهز المرق أخليه يغلي كتير لحتى يتبخر أغلبه و يبقى عندي خواص , صفيها و أحفظها في مكعبات التلج لحتى تجمد بعدها طلعها من المكعبات و أحفظها بكيس عادي . و كل ما يلزمني وصفة فيها مرق , طالع مكعب أو مكعبين و أستخدمهم .

في كل كتب الطبخ يحضر مرق الدجاج بطريقة مختلفة عن مرق البقر أو الخاروف , بالنسبة للخاروف أو البقر تشوى العظام في الفرن لمدة ساعة ثم تحضر بالطريقة المذكورة في الوصفة , بالنسبة لي أحضر كل المرق بنفس الطريقة بس ناوية شي مرة جرب لحتى شوف الفرق و أكيد ان شاء الله بخبركم شو بيصير معي .

لحتى تطلع معي أطيب نكهة و طعم أستخدم القليل من العظم الذي فيه بعض اللحم , يعني خلينا نقول مثلاً لكل 2 كيلو و نصف من العظام أستخدم نصف كيلو لحم بعظمه , بس أكيد ممكن تتحضر الوصفة بالعظام و بس و الفرق الوحيد انها بتحتاج لوقت أطول على النار , تقريباً 5 ساعات على نار هادية كتير .

هلأ مكعبات المرق خالصة من عندي لهيك ما قدرت صورها بشكلها النهائي و حبيت نزل الوصفة قبل عيد الأضحى لحتى تستفاد كل الأخوات من العظام الباقية من الأضحية , و إن شاء الله رح نزل الصورة بعد الأضحى مباشرة , إذا ربنا عطاني عمر .

بالصحة و ألف هنا و كل سنة و انت من الله أقرب و أحب

3 كيلو من العظام
2 حبة كبيرة بصل مقطعة أرباع
2 حبة كبيرة جزر مقطعة لدوائر كبيرة
بضعة أعواد بقدونس ( 10 أعواد )
بضعة عروق من الزعتر الأخضر إن وجد
2 عود كرفس
6 ورق غار جاف
ملعقة كبيرة من الفلفل الأسود الحب
ملعقة كبيرة من الفلفل الحلو حب
نصف ملعقة كبيرة حب الهال الكامل
3 عود قرفة كبير
حبة زنجبيل جاف
حبة جوزة الطيب
نصف ملعقة صغيرة قرنفل كامل
ØÑíÞÉ ÇáÊÍÖíÑ

·          تغمر العظام بكمية كبيرة من الماء و توضع على نار قوية و تترك حتى تغلي .

·          يرفع الريم أو الرغوة التي تظهر على السطح عدة مرات ثم تضاف باقي المقادير و تترك حتى تغلي مجدداً .

·          تهدى النار و يغطى القدر و تترك ساعتين و نصف أو ثلاث ساعات و يضاف المزيد من الماء المغلي إذا نقصت كمية الماء عن العظام , ترفع الرغوة كلما ظهرت و يتم التخلص منها.

·          بعدها أصبح المرق جاهزاً يمكن تصفيته و حفظه في الفريزر في مرطبانات صغيرة أو حسب الكمية التي تلزمك عادة للطبخ , بالنسبة لي أرفع النار و أتركه يغلي حتى يتبخر معظم الماء و أحصل على الخواص المركزة اللذيذة ثم أصفيه و أصبه في قوالب مكعبات الثلج و أضعه في الفريزر حتى يجمد . أرفع المكعبات من القوالب و أضعها في كيس بلاستيك من النوع الذي يقفل و تحفظ في الفريز حتى وقت الحاجة . المرق الذي أعده كل مكعب يوازي كوبين من المرق .

أضافة إلى المفضلة (0) |

أقتباس | مشاهدات : 1895

تعليقات (22)

1 الكاتب abeer, on 08-12-2008 09:04
رائعة والله حابة جربها لانه اكيد افضل من الجاهزة ويسلمو ايديكي يا منى وكل عام وانت بخير

2 الكاتب منى, on 09-12-2008 07:40
و انت ان شاء الله بالف الف خير عبورة

و كل عيلتك و حبابك

ان شاء الله تجربيها و تعجبك

3 الكاتب سارونات, on 09-12-2008 14:55
السلام عليكم و رحمة الله و بركاته
جازاك الله خيرا اختي منى على الوصفة
بدي اسأل قلتي كل مكعب يعادل كوبين بدي اعرف وقت الاستعمال كيف منساوي يعني منضيف للطنجرة كوبين ماء و بعدين منحط المكعب او مندوب المكعب في كوبين ماء اذا مندوبو فهل نحطه بالماء و ننطر تيدوب او نحطهم على النار تحتى يدوب بسرعة
كمان سؤال اذا ممكن بعد ما نحضر المرق شو منساوي باللحمة هل في شي وصفات منحطها فيها او نفتتها لقطع صغار او شو
بالتوفيق
سلام

4 الكاتب ام محمد, on 09-12-2008 15:42
جعلك الله ممن تقول لهم النار
اعبر يامؤمن فْْْان نورك أطفأناري
وتقول لهم الجنة
أقبل يامؤمن فقد اشتقت ْاليك قبل ان اراك
وكل عام وانت بالف خير

5 الكاتب منى, on 09-12-2008 22:00
هلا سارونات

اختي نضيف المي و المكعب عادي من دون تدويب و هي انا بيكون المكعب مركز كتير اذا لا ممكن أعدل لحتى تطلع الطعمة الي بدي اياها
اللحمة قليلة رح تكون بس لحتى تعطي طعمة , ممكن تعملي فيها شوربة مع المرق و الشعيرية ممكن تطبخي عليها رز و فطر , شو بدك و على زووءك

6 الكاتب منى, on 09-12-2008 22:06
يعني اختي ام محمد ما بعرف كم مرة قرات ردك و قلت و ان شاء الله انت كمان
الف الف شكر الك للدعوة الصادقة , طلعت من القلب و وصلت للقلب , خليلي عينك
ان شاء الله انت كمان بالف خير انت و كل اهل بيتك :zzz

7 الكاتب سارونات, on 10-12-2008 09:55
السلام عليكم و رحمة الله و بركاته
اختي منى انا هلأ راح ساوي كأول مرة كمية اقل من المرق كل المقادير يمكن تقسيمها ما عدا جوزة الطيب فشو بساوي يعني استغني عنها او شو
بالتوفيق
سلام

8 الكاتب سلاف, on 11-12-2008 07:58
كل عام وانتي بألف خير منى وكل الاخوات اللي بالموقع وينعاد عالكل بالخير يارب
يعطيكي العافيه منى عالوصفه الرائعه00 انا كتير بستخدم مكعبات مرق سواء دجاج او لحم وصار كتير سمعنا انها بتضر بالصحه لأن فيها مواد حافظه00 هيك أضمن لصحة الانسان وأكيد الطعم رح يكون أطيب00 بكفي انها على زوقك وطريقتك وزوقك لا يعلى عليه،،،،،،
رح جربها ان شاء الله عالاسبوع الجاي بس يخلص العيد وقلق العيد :zzz

9 الكاتب منى, on 11-12-2008 08:21
هلا سارونات

اختي مو مستاهلة تعملي نص هل المقدار لان هادا يا دوب يعطيكي شوية مرق :zzz

و اذا مصممة فيكي تقسمي جوزة الطيب لنصفيين باستخدام هاون

10 الكاتب منى, on 11-12-2008 08:25
هلا سلوفة

و انت بالف الف خير انت و كل اهل بيتك يا حق .
ان شاء الله تجربي الوصفة و تكون على زوءك حبيبتي و لال تنسي تخبريني

11 الكاتب سارونات, on 12-12-2008 13:52
السلام عليكم و رحمة الله و بركاته
جربتها مبارحه و طلعت طيبة و مميزة و اكتر شي بيعجبني بالمرق هو القرفة اللي بتطلع ريحتها و هو عم يتحضر :zzz

و بتشمي الريحة من بعيد
ما حطيت جوزة الطيب بلكي المرة الجاية بحط و ان شاء الله
اختي منى بدي اسالك عن الملح انت ما ذكرتي الملح فافترضت انو بينضاف بالاخير متل اي مرقة هل هالشي صحيح او انك ما بتحطي ملح بهالمرق لان اجتني فكرة و هي اذا فينا نستغني عن الملح بالمرقة بما اننا راح نستعملها في اطباق و راح نحط مرق بس هل هالشي راح يؤثر على الطعم او لا شو قولك
بالتوفيق
سلام

12 الكاتب muna.g.7, on 13-12-2008 18:24
تسلم ايدك اختي منى والله انا مشتهيه الحين من هالمرقه تدفي في هالبرد ويا سلام لو معاها خبز ساخن يتغمس فيها اشكرك كثير على وصفاتك الصحيه الشهيه

13 الكاتب منى, on 14-12-2008 05:05
هلا سارونات

الف صحة و هنا أختي ريتو عوافي ان شاء الله
الملح سقط سهو , انا بضيقه لما تقرب المرقة تجهز لحتى ما يكون ملحها زيادة

14 الكاتب منى, on 14-12-2008 05:15
هلا منونة

ممم , وصفك خلاني جعت و بردت , قايمة دفي عضامي بكاسة كابوتشينو , اتفضلي

15 الكاتب kuwaiti_girl, on 15-12-2008 06:23
يا سلام يا منمن
تعجبني طريقتك كثير وهي تشبه الطريقه اللي استعملها ( اخذتها من موقع ديلا : شيف بريطاني اتابع وصفاتها في بي بي سي فوود من زمان)

ماما الله يرحمها مثلك بتحب ان المرقه بتحضر منزليا وما كانت تستعمل ماجي ابدا بس لان الطريقه السليمه بتاخذ وقت طويل.. حبيت اضيف لك هالمعلومه وان شاء الله تعجبك ماما كانت تستخدم عضام بقر وخاروف مع بعض منشان النكهه

وحتى السمك والربيان بنتزع الراس والذيل وبتعمل منهم مرق مركز لاطباق الرز والسمك

بس الدجاج اللي فلت من عصابه المرق المركز لانك مثل ما بتعرفي نحنا بالاصل نسلق الدجاج ونكبس فيه الرز على طول

16 الكاتب منى, on 15-12-2008 06:38
مممم , و الله فكرة هي استعمال نوعيين من العظام ,

الله يرحم ماماتك و يسكنها الجنة هي و كل أمواتنا و اموات المسلمين :roll

هنا و عوافي على كبس الرز , و متل ما قلتي ممكن تحضير مرق السمك فيها , بس يا ستي انا و لا مرة ما حضرته , بتعرفي نحنا بحلب قليل ما نحضر اطباق سمك , مو متلكم انتو ما شاء الله الكويتية عندكم غنى ..

امبارحة كنت عم اتصفح موقعك , ما شاء الله تبارك الله وصفات رائعة جداً , انفلقت على ما ابعت رد من دون فاايدة , خبرتك ان موقعك محجوب عنا بسوريا لان امتداده blogsopt :sigh

و انا عم اتصفحه بالغش :grin

17 الكاتب kuwaiti_girl, on 16-12-2008 07:05
يا بعد قلبي يا منى
مشكوووره يا قلبي والله احرجتيني... للاسف ماعرف ليش الموقع محجوب :sigh

بس والله يشرفني مرورك بموقعي حتى من غير رد

وانا باذن الله رح ابعث لك وصفتين من اكلاتنا الشعبيه
واذا بدك اي وصفه ثانيه انتي تؤمري امر

18 الكاتب منى, on 16-12-2008 07:37
في عندي فكرة ببقى ببعتلك فيها ايميل

مش بس موقعك محجوب أي موقع اله نفس الامتداد محجوب و انا كمان ما عندي فكرة ليه :roll

يلا تابعي و انا متابعتك دايما ان شاء الله

19 الكاتب Eman, on 25-03-2009 20:14
وصفة شهية ومرة جربتها واستخدمت المرقة للشوربة الفرنسية وطلعت كتير طيبة .. يسلمو هالايدين ..

بس سؤال لو سمحت ..أختي سألتني البارحة وين بينباع الكرفس بحلب ،وأنا قلت لها رح أسألك لخبرتك الكبيرة .. وشكرا لك

20 الكاتب منى, on 26-03-2009 12:28
هلا امولة

الف هنا و عافية يا حق على كل لقمة و كل شفة

اختي الكرفس بينباع في الخالدية و ممكن تلاقيه بالمولات الكبيرة بقسم الخضار

21 الكاتب dado, on 12-04-2009 04:17
مرحبا منوش..
جربت الوصفة من زمان.. بس والله ما عم لاقي وقت رد.
جربتها بدجاج كامل مو عظام.. كنت عم اسلقه لحضر المعكرونة بالبشاميل على طريقتك ويلي طلعت master piece على قولة زوجي

المهم... حضرت مكعبات المرق.. ورغم إني ما بدوق اللحومات وعادة ما بستخدم ماجي.. كتير حسيتها بتشهي.. واستعملتها مرتين.. مرة بشوربة العدس ومرة بشوربة الشعيرية وطعمها كتير كتير طيب.. وأهم شي إنك بتعرفي شو فيها وبتاكليها وإنتي مطمنة.
شكرا كتير منى على النصيحة

22 الكاتب منى, on 20-04-2009 18:33
الف هنا و عافية يا قمر انت يا ست الكل , حسيت حالي بدي دوق من هل الماستر بيس و الا رح تفرط مرارتي :eek

الشكر الك و لردودك الي بنتظرهم دايما :zzz

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 07/12/2008 )

< السابق		التالى >

[ عودة ]