L2ma.com | لقمة طيبة | L2ma.com | لقمة طيبة | كبة اليقطين | · , الكبة, حتى, السلق, أكتر | L2ma.com

القائمة الرئيسية

كبة اليقطين

الكاتب/ منى

01/12/2008

كبة اليقطين و وراها كبة الرز و صحن مخلل مشكل

كبة البقطين

أول وصفة في الموقع لكبة الحيلة أو الكبة الي ما فيها لحمة . من زمان كان لازم يفكروا بوصفات تتحضر من دون لحمة أو أي شي تاني برة البستان أو المونة لأن الامدادات كان ممكن تنقطع بالأشهر بسبب المجاعة أو الحروب .

هل الوصفة مشهورة بلبنان أكتر من سوريا و بيحضروها أكتر الشي بوقت صيام أخوتنا المسيحية . ممكن بعض الستات الكبارية يلفظوها كبة اللقطين . مبدأ الكبة واحد بس كل منطقة إضافة بالحشوة أو بالبهارات . هي الطريقة بحبها أكتر الشي و بتطلع حامضة و مقبلة , يمممي . بالنسبة لعيلتي حبوها و كانت خفيفة و تغير عن الكبة العادية . و لأن أنا عارفة أن أولادي ممكن ما يتقبلوا الكبة المقلية من دون اللحمة يقلبها لهيك حشيت تلات حبات من الكبة مع حشوة السلق بفرط رمان . و قلت الهم لكل واحد فيكن اله قطعة محشية بالرمان إذا أكلها و طلعت من نصيبه رح يكون حظه حلو شريرة أنا . المهم عينكم تشوف السباق بيناتهم , ألف هنا و عافية الصحن أكلوه لوحدهم و يا دوب تركت كم قطعة النا .

بالصحة و الهنا

عجينة الكبة :

3 كوب و نصف يقطين مقطع لمكعبات صغيرة
2 كوب و نصف برغل ناعم أبيض
بصلة وسط
ملح و رشة بهار و رشة قرفة
ملعقة صغيرة نعناع ناشف
نصف رغيف خبز مقطع

الحشوة :

3 ملعقة كبيرة زيت زيتون
بصلة وسط مفروم ناعماً
2 فص ثوم
2 كوب سلق مسلوق
كوب حمص حب مسلوق
نصف ملعقة صغيرة سماق ( أو أكتر حسب الرغبة )
نصف ملعقة فليلفة حمراء ناعمة
حبة كبيرة ليمون
رشة ملح
نصف كوب بقدونس مفروم
ربع كوب صنوبر محمص أو جوز مجروش
2 – 3 ملعقة كبيرة فرط رمان ( اختياري )
ØÑíÞÉ ÇáÊÍÖíÑ

الحشوة :

·          يفرم السلق و يغسل و يسلق ثم يترك حتى يصفى من مائه , تحتاج الوصفة لكوبان من السلق .

·          يقلى البصل بالزيت حتى يشقر ثم يضاف السلق و الثوم و يقلب لبضع دقائق .

·          يضاف الحمص و عصير الليمون مع الملح و الفليلفة و السماق و يترك على نار هادئة من دون غطاء حتى يمتص كل العصير , تذاق الحشوة للتأكد من الحمض ثم يعدل حسب الرغبة و تبعد عن النار .

·          تترك الحشوة حتى تبرد ثم تقلب مع البقدونس و الصنوبر و فرط الرمان .

الكبة :

·          ينظف اليقطين و يقشر و يقطع لمكعبات صغيرة ثم يسلق بالماء حتى ينضج لمدة 20 دقيقة تقريباً و يترك حتى يبرد .

·          يغسل البرغل عدة مرات ثم يوضع في طبق عميق مع البصلة و الملح و يغمر بالقليل من ماء سلق اليقطين و يترك لمدة ربع ساعة أو حتى تنتفخ حباته و يمتص أغلب الماء .

·          يعصر البرغل و اليقطين المسلوق بين أصابع اليد للتخلص من أكبر كمية من الماء ثم يدعك باليد مع بقية البهارات و الخبز العربي .

·          يدار البرغل و اليقطين على ماكينة فرم اللحمة مرتان ثم تدعك العجينة حتى الحصول على كبة طرية .

·          تقطع عجينة الكبة لكرات ثم تقرص لأقراص بحجم متوسط باستخدام السبابة و كلما كانت العجينة أرق كلما أصبحت الكبة مقرمشة أكتر . تحشى الأقراص بحشوة السلق و الحمص .

·          تقلى الكبة على نار عالية حتى تشقر بمعدل بضع حبات في كل مرة , ترفع على ورق ماص و تقدم ساخنة أو فاترة .

فكرة سريعة :

·          يمكن تحضير الوصفة بشكل سهل و سريع بنفس طريقة الكبة بصينية . تمد نصف العجينة في الصينية ثم توزع الحشوة فوقها و تمد طبقة ثانية من العجينة فوقها و تقطع لمعينات ثم تدهن بالسمنة و تخبز في الفرن حتى تنضج .

·          يمكن استبدال السلق في الحشوة بالسبانخ و يمكن استبدال عصير الليمون بدبس الرمان . و ممكن استبدال البقدونس بالكزبرة الخضراء .

أضافة إلى المفضلة (0) |

أقتباس | مشاهدات : 2715

تعليقات (18)

1 الكاتب souha, on 01-12-2008 12:38
ريتن يسلمو هالديات

شي بيشهي عالتجريب القريب إنشاء الله بس لحدا يحن علي و يجبلي يقطينة :roll

بدي إسألكم منونة اليقطين بعد السلق ما بتعصري لأنو بيشرب مي كتير بخاف إذا ما عصرتو ينزعلي الوصفة

2 الكاتب منى, on 01-12-2008 12:56
هلا سهى

بعصره هو و البرغل مع بعض لحتى ما يبقى فيهن مي زيادة , اكيد لان هو متل السفنجة بتحسيه بيصير مجقجق ميات :grin

3 الكاتب ام نور, on 01-12-2008 16:17
يا سلام يعني اسا الكبة بتنعمل من اليقطين

شو هاليقطين هاد رهيب حرام يكون عالهامش ولازم كل العالم تاكل منو ويعطوا اهميتو وشو هاي كبة الرز منى رح تنزليا عن قريب مهاك

4 الكاتب منى, on 01-12-2008 17:11
اي و الله ام نور

انا الصراحة ما كنت حب اليقطين ابدا , لحتى اهلي ما بقى يطبخوا منه , بس هلا بعد ما عرفت فائدته صرت اكله و عم فتش دوما على وصفات جديدة لحضر اليقطين منها

هي كبة الرز وصفة كانت طالبتها مني سلاف و هي من ايمتى مجهزتها بس ما عم يصحلي نزلها , ان شاء الله رح حاول خلص كل هل الوصفات الي عندي و نزلهم قبل العيد

5 الكاتب منامينو, on 02-12-2008 05:42
وااوو :eek

شكلها حلو وحشوتها غريبة :roll

. تركيبة جديدة يعني. صار عندي فضول أجربها :roll

قريبا ان شاء الله..

تسلم هالأنامل المبدعة وهالأفكار الحلوة وصاحبتها يا رب :zzz

6 الكاتب Eman, on 02-12-2008 07:29
ما بعرف .. قلبي ما ارتاح للوصفة ،بمكن لأنها غريبة علي .. ، و بخاف إذا غيرت على شي تاني ما نحبها ..يا ستي ومنكم نستفيد .. ويسلمو على هالابتكار أو التجديد للوصفة

7 الكاتب سلاف, on 02-12-2008 07:47
امممممممم شيئ بشهي يامنى
يسلم ايديكي انا كنت بدي اسألك شغله السلق والسبانخ ليش بتسلقيهن ياترى؟؟ أنا بالعاده بغسلهن وبحطهن فوق البصله والزيت فورا بدون سلق ثواني وبيدبلوو،، ليكون السبانخ والسلق هون غير سوريا؟؟ نحن الورق كتير صغير وبعدين انا بعرف انه اذا انسلق راحت فائدته كلها بالمي تبعت السلق منشان هيك مابسلقه وهو فورا بيستوى خلال ثواني لشو السلق ؟؟؟
:eek

ناطره جيب اليقطينه تبعت المربى يبقى بجرب هالكبه روح قلبي السبانخ والسلق
هون بساوو كبة الدجاج وبيحشوها دجاج كمان طيبه تغير شكل عن اللحمه وحماتي بتساوي كبة السمك كمان طيبه وخفيفه اممممممممم شهتينا عالكبه ولساتي ناطره كبة الأرز والمربى
يسلم ايدكي منى

8 الكاتب الدمشقية, on 02-12-2008 08:16
الله يسلم ايدك حبيبتي منى

بس بصراحة نحن ماما لما بتعمل كبة اليقطين بتحشيها مثل حشوة الكبة العادية وممكن تساوي منها كبة مشوية بس نحن بالبيت ما نشويها عالفحم بنرجع وبنقليها بس الحشوة طبعاً بتكون غير

وممكن ماما تستبدل اليقطين بالبطاطاالمسلوقة

9 الكاتب أم الهدى, on 02-12-2008 11:47
يا سلام شكلها بشهي ومعهم حق ولادك يتسابقو عليها
ان شاء الله رح جربها قريبا،بس حبيبتي منى آسفة لأنو عم نق عليك بس شو صار بوصفة البروكلي لأنو بلش يتغير لونه يلي عندي لا تواخذيني عم نق عليك بس عنجد مالي ثقة غير بذوقك الحلو

10 الكاتب منى, on 02-12-2008 17:36
هلا منامينو

كلامك مظبوط , هي ما بتيه الكبة العادية الا بمنظرها
و ممكن تحشي القلب باللحمة و المكسرات كمان بتطلع طيبة

ان شاء الله تجربيها و تعجبك و مية هلا حبيبتي

11 الكاتب منى, on 02-12-2008 17:37
هلا امولة

يا ستي القلب و ما يحب :grin

, و على فكرة هي مو وصفتي
هي وصفة لبنانية قديمة كتير بس نحنا ما نعرفها :zzz

مية هلا أأختي

12 الكاتب منى, on 02-12-2008 17:38
هلا سلوفة

يمكن معك حق , هنن ما بياخدوا وقت بس انا هيك اتعودت حضرهم من امي و ستي , و كلامك مزبوط ان الفوائد كلها بتروح
طيب المرة التانية رح جهزهم من دون سلق

اليوم جبت اليقطينة و ان شاء الله بكرة أو يوم الخميس رح اشتغل فيها انا و حماتي الله يخليلي ياها و بعدها فورا على الوصفات , اذا الله راد الجمعة او السبت بنزل الوصفة

13 الكاتب منى, on 02-12-2008 17:39
هلا دمشقية

اكيد الطريقة الي بتعملها ماماتك تناسبنا أكتر و بتطلع يممي

الوصفة الي منزلتها انا تناسب النباتين أو الي ما فيهن ياكلوا لحمة .

ممم عجبتني فكرة البطاطا , الله يخليلك الماما و اخواتك و يديم عليكم النعم يا حق

14 الكاتب منى, on 02-12-2008 17:39
هلا ام الهدى

مشان الله لا تواخديني و الله معك حق حبيبتي كنت واعدتك بالوصفات صار الي فترة , بس هلا ما بقى في حضرها و نزلها قبل العيد :roll

انا كنت فاكرة عم تسالي عن وصفة مو لحتى تحضري فيهم بروكولياتك .دخيلك لا تأخذيني و ان شاء الله ببقى بعوضها الك مرة تانية

15 الكاتب أم الهدى, on 02-12-2008 21:29
ولا يهمك حبيبتي ، لابقى تعتذري والله خجلتيني ان شاء الله تسلميلي يا رب ، بس بصراحة وكلمة حق إنو موقعك غير شكل والله جد وشدني لإلو من بين كل المواقع يلي كنت زورها عدة أمور
أولها إنك سورية وخاصة حلبية يعني ذوقك في الأكل قريب من ذوقنا ولما بتقولي على وصفة غريبة عنا إنها طيبة وقريبة لذوقنا بثق فيك ( مع احترامي طبعا لكل الأذواق وكل البلدان بس سبحان الله كل بلد وإلها طابعها الخاص والأكل تعويد)
والسبب التاني إنك مزوقة كتير بتجاوبي على كل استفسار عنا إياه وما بتتأخري مو متل غير مواقع الطاسة ضايعة ومافي مين يجاوبك على بعض اسئلتك
والسبب التالت إنو وصفاتك مجبرة وطيبة ( طبعا بعد ماجربت نسبة كبيرة منها )
فالله يجزيك الخير فعلا ويخليك لأهلك وعيلتك

16 الكاتب منى, on 03-12-2008 05:53
هادا بس من زووءك يا قمر

الف شكر الك لكل الكلام الطيب الي قلتيه و ربي يديم المحبة و الخير دايما
ان شاء الله الك متل هل الدعوات و اغلى أختي و منورة دايما
:zzz

17 الكاتب muna.g.7, on 13-12-2008 18:40
كبة روعه صحيه ولذيذة يعملونها في لبنان بالخضار او بالحمة مع الجوز ودبس الرمان ومعجون الفليفلة تسلمين اختي منى على تنوعك بالوصفات والدقة بالمقادير

18 الكاتب منى, on 14-12-2008 05:08
هلا منونة

الشكر ليك لتواجدك الطيب دوما حبيبتي , ان شاء الله تجربيها و تحبيها

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 19/01/2009 )

< السابق		التالى >

[ عودة ]