سلطة الشوندر بالزبادي

متل ما زكرت قبل استعمال الزبادي بالسلطة فكرة شوي جديدة , احنا متعوديين على الزبادي مع الخس أو الخيار و ممكن البقلة . بس مع غير خضار متل البطاطا أو الجزر أو الملفوف قليل نحضرها ..

انا هلأ عم حب الزبادي أكتر من المايونيز لأن أخف و فيكي تاكلي منه و انت مرتاحة . كنت جربت من فترة  سلطة  بتشبه الكولسلو بس على الطريقة التركية و عجبتني كتير و كان الصوص تبعها محضر من الزبادي . لهيك لما شفت الوصفة للأخت أم سنان من منتدى لك جربتها فوراً . عن جد يمكن هي أكتر سلطة مغرية بشوفها بحياتي   , سلطة فيها أنوثة .


بالصحة و الهنا

6 حبة شوندر مسلوق
2 – 3 ملعقة كبيرة لبن زبادي
ملعقة كبيرة طحينة
عصير نصف حبة ليمون ( أو أقل )
ملح و رشة فلفل أسود
زيت زيتون





·          يقطع الشوندر لمكعبات ثم يخلط مع عصير الليمون و الطحينة و الملح .

·          يضاف الزبادي و تقلب السلطة بلطف ثم ترتب في طبق التقديم .

·          تزيين السلطة بزيت الزيتون و تقدم باردة .

تعليقات (25)

1  الكاتب Eman, on 26-11-2008 23:34 عجبتني هي سلطة الأنوثة !  يسلمو هالديات .. أخيرا وجدت وصفة حلوة للشمندر وأنثوية كمان ..

2  الكاتب منى, on 27-11-2008 06:53 هلا انا اتوقعت ان الكل رح يعلق على هل الكلمة و حتىاترددت اكتبها بس عن جد هيك حسيت هل السلطة     جربيها و ان شاء الله تعجبك

3  الكاتب ام دانية, on 27-11-2008 07:23 صباحك عسل ياعسل و يعطيكي العافية على هل السلطة شكلها طيب رح اعمل منها اليوم ان شاءالله لانو عندي شوندر مسلوق وخصوصا ان زوجي بحب الشوندركتير ان شاءالله يحبها تغير شكل عن باقي السلطات

4  الكاتب الدمشقية, on 27-11-2008 07:32 فعلاً حبيبتي هي السلطة كتير طيبة وأنا شخصياً بحبها كتير يمكن لأني بحب الشوندر بس جربي كمان حطي مع اللبن معلقة طحينة يمممممممممم

5  الكاتب سلاف, on 27-11-2008 08:30 سلطه سهله كتير 00 ومنى صايره عم تتغزلي بالاطباق كمان   هو لون الشوندر لحاله بجنن00 والله احترنا شو بدنا نجرب00 على كل حال كل شيئ من تحت ايدكي غير شكل وبخلينانبدع بالمطبخ و نبين كلنا انوثه متل السلطه بالزبط    انا بعملها بطريقه مشابهه بس بضيف طحينه مع اللبن وشوية نعناع يابس كمان طيبه وبزينها بالنعناع الاخضر وزيت الزيتون بحس اللون الاخضر بيعطيها لون بجنن مع لون الشوندر يعني بصير أكتر انوثه هههههه   يسلم ايدكي منى

8  الكاتب منى, on 27-11-2008 10:48 هلا أم دانية يا عسل بشهده   ان شاء الله تجربيها و تعجبك و لا تنسي تعطيني رايك فيها

9  الكاتب منى, on 27-11-2008 10:49 هلا دمشقية   رح جربها اليوم بالطحينة ان شاء الله و ببقى بخبرك شو بيصير معي و الف شكر الك على الاضافة

10  الكاتب منى, on 27-11-2008 10:51 هلا سلاف   لازم تشوفيني و انا عم ااكل كل لقمة مدللة و بتنغم فيها شكل , طبعا هادا اذا حبيت الاكلة     مم كمان لذيذة بالطحينة شجعتوني على هل الطريقة و مع الأخضر كملت الله يسلم دياتك على الاضافة اللذيذة

11  الكاتب منى, on 27-11-2008 10:53 هلا سلاف   لازم تشوفيني و انا عم ااكل كل لقمة مدللة و بتنغم فيها شكل , طبعا هادا اذا حبيت الاكلة     مم كمان لذيذة بالطحينة شجعتوني على هل الطريقة و مع الأخضر كملت الله يسلم دياتك على الاضافة اللذيذة

12  الكاتب منى, on 27-11-2008 10:55 هلا سارونات   هنا على الكولسلو و رح نزل الوصفة هل كم يوم اذا الله راد , سلطة الخيار بلبن موجود أختها في الموقع سلطة البقلة باللبن , نحضرها بنفس الطريقة بس باستبدال البقلة بالخيار و لعيونك بس ما حضرها اكيد ببقى بنزلها بوصفة لحالها

13  الكاتب منى, on 27-11-2008 10:56 هلا كوكو   ممم ما خطر ببالي ابدا الرمان , الشكر ليك على الفكر الطيبة , ان شاء الله تجربيها و تكون على زووءك

14  الكاتب ام دانية, on 27-11-2008 12:54 السلام عليكم من جديد حبيت قلك انو السلطة كتيررررررررررررر طيبة وزوجي حبها كتير مع اني عملت صحن صغير بس كانت كتير طيبة والهم من هيك انها خفيفة وقررت اعمل منها صحن تاني على العشا وعلى فكرة زوجي صار يحتزر شو حاطة فيها ومزحت معو وقلتلو هي انا اخترعتا بس الكذبة ما دامت لانو كشفني بسرعة وقلي هي اكيد من وصفات الست منى السحرية

15  الكاتب منى, on 27-11-2008 14:01 هنا ام دانية على قلبك و قلب زوجك , ردك ضحكني كتير .    الله يخليكم لبعض و يديم المحبة دايما , و الف هنا على العشا مقدما يعني

16  الكاتب الدمشقية, on 17-12-2008 11:39 حبيبتي منى عملت صحن شوندر مع اللبن والطحينة والحمض وحطيت على وش الصحن بقدونس وفوق البقدونس رمان فرط وطلع رائع ومنظر بشهي وصورته بالموبايل بس للأسف خرب الموبايل قبل ما نزل الصوره على الانترنت   إن شاء الله المره الجاية

17  الكاتب منى, on 17-12-2008 17:13 ووووواخ   يلا في المال و لا الابدان , ان شاء الله المرة التانية     و انا كمان بدي خبرك ان جربتها بالطحينة و طلعت بتجنن , سلم ديااتك على الفكرة

18  الكاتب الدمشقية, on 05-01-2009 12:21 ألف صحة وهنا على قلبك حبيبتي منى

19  الكاتب منى, on 05-01-2009 15:18 و على قلبك يا عسل

21  الكاتب منى, on 28-01-2009 13:17 هلا سارونات   هنا و الف عافية , هيأتك متل حكايتي من مناصري السلطات     اللون بيكون حسب كمية اللبن وأكيد نستعمله مقشر.  الشوندر بياخد وقت طويل و ما في حل غير استعمال طنجرة الضغط

22  وصفة انثويــــــــــــــــــــــــة ! الكاتب روح الجمان, on 05-05-2009 18:12 ما شاء الله حلوة أكيد .. التنوع مفيد وخاصة لو كان التنوع فيه لمحة أنثوية ..   تسلم ايدينك

23  الكاتب منى, on 05-05-2009 18:33 الله يسلمك و خليك جمان اكيد يا ستي شو العالم كله بلا لمساتنا و بصمتنا

25  الكاتب منى, on 19-02-2010 10:52 ايه صح , بالمتبل الطحينة اكتر و المتبل مبشور بيكون , ممم طيب . عندي شوندر قايمة ساويلي شو على الغدا

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved