L2ma.com | لقمة طيبة | L2ma.com | لقمة طيبة | بزر اليقطين المحمص | اليقطين, البزر, الوصفة, · , زيت | L2ma.com

القائمة الرئيسية

بزر اليقطين المحمص

الكاتب/ منى

21/11/2008

بزر اليقطين المحمص

الوصفة بسيطة كتير و سهلة كتير بس فيها سر واحد , هو انك ما تغسلي البزر قبل تحميصه . لا تشوفيها فكرة غريبة , جربي و احكمي بنفسك . بس حاولي تبعدي أكبر كمية ممكنة من لب و قلب اليقطين و طبقي الوصفة و ان شاء الله رح تعجبك . الصراحة إني لحقت الوصفة على السريع لحتى الأخوات الي حابات يشاركوا بمسابقة اليقطين يستفيدوا من هل الوصفة لبزر اليقطين .

البزر الظاهر بالصور اتحمص زيادة لأ انا كنت عم حضر شوربة اليقطين مع اليقطين بالطحينة و مسقعة اليقطين و حطيت البزر في الفرن , بعدها اجوا خواتي لعندي و قعدنا نجكي . صرت شم ريحة قول يا ربي في شي عم يحترق , طلع على الطبخات و شوف الامن مستتب و ارجع لعند خواتي و نكمل حكي و نسيت البزر و راح عن بالي , لما اتزكرته كان اتحمص شوي بس طلع بيجنن .

زيت الزيتون رح يعطيكي طعمة لذيذة كتير و كمان الزبدة بتطلع طيبة بس مع زيت الزيتون ارتاح نفسياً أكتر .

بالصحة و الهنا

كوب من بزر يقطين
1 – 2 ملعقة كبيرة زيت زيتون أو زبدة
ثلاث أرباع ملعقة صغيرة ملح
ØÑíÞÉ ÇáÊÍÖíÑ

·          تزال القطع الملتصقة بزر اليقطين بأكبر قدر مستطاع , لا تغسل البذور .

·          يقلب البزر مع الزيت أو الزبدة المذوبة و الملح ثم تمد في طبق بايركس أو صينية فرن .

·          يحمص البزر في الفرن على درجة حرارة 150 درجة مئوية و تقلب كل 10 أو 15 دقيقة حتى تتحمص .

·          يحفظ البزر , إن بقي منه شي , في مرطبان بلوري محكم الإغلاق .

أضافة إلى المفضلة (0) |

أقتباس | مشاهدات : 2987

تعليقات (12)

1 كيفك منى
الكاتب فلسطينية بقطر, on 22-11-2008 00:51
كيفك منى شكرا على الوصفة حبيت أعرف طريقة البرازق الشامية على أصولها ومعمول الفستق الحلبي والبصمة بالفستق الحلبي وألف شكر لك حبيبتي

2 الكاتب منى, on 22-11-2008 06:58
مية هلا أختي

تكرم عيونك أختي , البرازق صار جربتلها أكتر من مرة و ما كتير ظبطت معي , بس انا حاططتها في بالي ان شاء الله
يا ترى شو قصدك بالكعك الشامي بالمحلب ؟ لان عندي بالموفع وصفة كعك العيد أظن انها المقصودة

نورتي اختي الموقع , مية اهلا و سهلا

3 الكاتب DOUHA, on 22-11-2008 10:09
هلا منى هي اسهل وصفة هههههههههه
عنجد يسلموا دياتك

ماشاء الله عليكي

4 الكاتب منى, on 22-11-2008 12:43
هلا ضحى

ان شاء الله مبسوطة و فرحانة على طول , نورتي حبيبتي

5 الكاتب سلاف, on 23-11-2008 12:07
دوما مع المكسرات لازم يكون بزر اليقطين موجود نوع محبب كتير الي ولزوجي 00 ان شاء الله رح جربه بس عندي سؤال انتي بتشغلي الفرن من فوق وتحت ولا بس من تحت ؟؟؟؟ وسؤال تاني بزر الجبس و البطيخ نفس الطريقه بنحمصه ولا بيختلف ؟؟؟

الله يسلم هالايدين منى 000

6 الكاتب منى, on 23-11-2008 14:05
هلا سلاف

هنا على قلبك و قلب زوجك يا حق , ما هو الكرش العربي ما بيجي من قليل مربى على الغالي و الجوز و اللوز و المكسرات :grin

الله بيعين
انا بشعل الفرن بس من تحت و مع التحريك لا تنسي , اما بزر الجبس و البطيخ الصراحة و لا مرة ما جربت حمصهم , يمكن الصيفية الجايية ابقى اعمل عليهم تجاربي :zzz

7 الكاتب أم جودي, on 23-11-2008 17:10
الف شكر ست منى علىالطريقة السهله انا ولا مرة جربت اعملو بالبيت بس اكيد رح جرب ان شاء الله على فكرة انا بفوت الموقع من شان اخد وصفات جديده وكمان من شان استمتع وانا عم اقرأ مقدماتك قبل الوصفة اللي بتذكرني بأيامي بسورياوبحلب تحديداً اللي صرلي سنين ما زرتا الله يخليكون لبعض انتي وخواتك ووالدتك وما يحرمكون من بعض وسلامي

ام جودي

8 الكاتب منى, on 23-11-2008 17:54
هلا ام جودي

ان شاء الله تجربيه و يكون متل ما بتحبي .
ان شاء الله ترجعي لسوريا قريب سالمة و غانمة و الله يخليلي ياكي على هل الدعوات الحلوة .
بوسات خاصة لجودي من خالة منى

9 الكاتب الدمشقية, on 02-12-2008 06:51
الله يسلم ايديك حبيبتي والله نحن منحتار بالبيت لما يكون فيه بزر يقطين

كل واحد بيعمل تجربه شكل :grin

بس سؤال ممكن حطهم على النار العادية بدل الفرن يعني وبخفف النار سو رأيك :zzz

وعندي سؤال عم فكر فيه امبارح بالليل

أكيد انت فوق هالأكلات الطيبة عندك هويات تانية صح يعني مثل شغل السنارة أو تطريز أو خياطة صح ولا انا غلطانة :zzz

10 الكاتب منى, on 02-12-2008 17:34
هلا دمشقية

اتوقع ممكن نحمصها على النار , لحتى امي لما شافتني عم حمص البزر في الفرن قالتلي ايه طول عمرنا منحمصه على النار من وين اخترعتي هل الاختراع :grin

هواياتي التانية رح تفاجأك شوي , لان مع الطبخ من هواياتي التصوير إلي هلأ حابة كتير اتعلمو على أصولو , و كمان تعلم اللغات بعد الانكليزي هلا عم ادرس فرنسي و ناوية على التركي بعدها اذا الله عطانا عمر .
شغل السنارة و التطريز اشتغلت فيهم شوي بعد ما اتزوجت , و اكتر الشي ضاينت بشغل السنارة يعني اشتغلت كم قطعة بس بعدها ما ضاينت :grin

11 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 16-12-2008 17:16
واااااااو يا منى شو هذا اللي انت عاملتيه شئ بيجنن من الصورة شكله طالع بيجنن حمستيني اروح اجيب بزر الياقطين واعمله تسلم ايدك يارب

12 الكاتب منى, on 16-12-2008 19:58
ان شاء الله تساويه و تحبيه , كتيررر نمي

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 21/11/2008 )

< السابق		التالى >

[ عودة ]