فطيرة السلق و الطحينة

هي الشغلة كتير طيبة , هيك قالي أبو الشباب  بعد ما أكل أول لقمة من هل الفطيرة .

فطيرة طيبة كتير و فكرة ممتازة لحتى تخلوا الاطفال ياكلوا من الخضار بطريقة محببة و بتعجبهم و كمان أحسن ما تشكلي الفطاير العادية كل واحدة بواحدة هيك بدقيقتيين بتكون فطيرتك بالفرن .

طريقة العجينة احفظيها عندك لان من نفس العجينة ممكن نعمل فطيرة بحشوات مختلفة متل الدجاج او التونة . أما فكرة الحشوة شفتها بكتاب أناهيد , جربتها متل طريقتها تمام طلعت منيحة بس مو واوووو , المرة التانية عملت عليها كم تعديل  لحتى تطلع على زووءي و طلعت يم يم يممممم . , نصيحة جربيها

بالصحة و الهنا

عجينة اللبن :

3 كوب طحين
ملعقة كبيرة لبن
ملعقة كبيرة سكر
ملعقة صغيرة ملح
ملعقة صغيرة خميرة حبيبات
كوب حليب فاتر
6 ملعقة كبيرة زيت عادي

الحشوة :

5 ملعقة كبيرة زيت زيتون
حبة بصل أحمر كبيرة
2 فص ثوم مهروس
3 كوب سلق
نصف ملعقة صغيرة دبس بندورة
نصف ملعقة صغيرة فليلفة حمراء ناعمة
نصف ملعقة صغيرة دبس فليلفة
نصف ملعقة صغيرة بهار مشكل
ربع ملعقة صغيرة قرفة
4 ملعقة كبيرة بقدونس مفروم ناعماً
4 ملعقة كبيرة طحينة
2 ملعقة كبيرة عصير ليمون
2 ملعقة كبيرة صنوبر محمص

للوجه :

بيضة
بضع حبات من النسكافيه
سمسم أبيض





·          تدعك مقادير العجينة مع بعضها البعض حتى تتشكل لدينا عجينة طرية و مرنة و لا تلتصق باليد , قد لا نستخدم كل كمية الحليب .

·          يجهز السلق و ينظف و يفرم ثم يسلق و يوضع على مصفاة للتخلص من الماء الزائد , للوصفة يلزمنا 3 كوب من السلق المسلوق من دون الضغط عليه أثناء تصفيته من الماء .

·          يقلي البصل بالزيت حتى يطرى , يضاف الثوم و يقلب لمدة دقيقة . يضاف السلق و رب البندورة و دبس الفليلفة و البهارات و يقلب الكل لمدة 5 – 10 دقائق على نار متوسطة .

·          يبعد القدر عن النار و يضاف البقدونس المفروم ثم تترك الحشوة حتى تبرد .

·          تضاف الطحينة و عصير الليمون و الصنوبر , أصبحت الحشوة جاهزة .

·          تقسم العجينة لقسميين متساويين . يرق كل قسم بشكل دائرة بقطر 30 سم , يمد أول قسم في صينية دائرية مدهونة بالزبدة . يغطى بالحشوة ثم يمد القسم الثاني من العجينة فوق الحشوة مع الضغط على الأطراف بشكل جيد .

·          تخفق البيضة مع بضع حبات من النسكافييه ثم تدهن بها وجه الفطيرة و يرش الوجه بالسمسم الأبيض .

·          تخبز العجينة في الفرن المحمى سابقاً على درجة حرارة 180 درجة لمدة 45 دقيقة أو حتى تنضج , يشعل الفرن من فوق لبضع دقائق حتى يحمر الوجه .

·          بعد أن تفتر الفطيرة تقطع و تقدم مع المزيد من عصير الليمون و مع كوب من الشاي الساخن .

تعليقات (53)

2  الكاتب مريوم, on 20-11-2008 22:21 ما شاء الله عليكي و على هذه العجينة الممتازة صراحة انك مبدعة. يعني اذا عندك بنت نيالها عليكي لح تطلع ست بيت من بطن امها ههههه. انا اتذكر الماما كانت تعتبر العجينة اصعب وظيفة بالمطبخ و لما كنت جرب قبل الطبخ تقلي بس قاعدة تعبي حالك بكفي شغل . بس هيدا الشي عمل عندي تحدي و ضليت جرب لحد صرت الحمدلله يعني مقبولة .   على العموم يعطيكي الف عافية و الله يزيد همتك العالية و يخليكي لابو الشباب تطبخيلو وتتفننيلو   انا يا ستي عندي منك طلب صغيور. متل ما قلتلك بامركيا بتفقدي للاكل البلدي اللي كنا ناكله تحت الشجرة ايام الربيع و نقطف حشيش من الارض و نحطوا بالخبزة متل ستي الله يطول عمرها   والله انا عمبتوحم على الكعك و ما في هون طبعا و قلت ما الي اللا الله و منى ترشدني لشي وصفة تعلمني اعمل كعك بالبيت. و مشكورة سلفا عزيزتي.

3  الكاتب ام نور, on 20-11-2008 23:09 الف شكر يا ميمو على هالطريقة بتعرفي انا كتير بعتل هم فطاير السبانغ بياخدو وقت ولازم كل قطعة تشبه التانية هالفطيرة حسيتا اسرع واكيد طيبة طالما شغلك وتغير شكل

4  الكاتب Eman, on 21-11-2008 05:04 شكلها طيبة .. بس يا ترى ممكن أعمل فطاير سبانخ فيها ؟؟ أو ممكن أستبدل السلق بالسبانخ ؟ حبابة منوشة دبريها     سبق وجربت عجينة العشر دقائق وفشلت فشل فظيع ونفشت كتير وما بقى عيدها .. قولتك هي بتنجح معي ؟

5  الكاتب منى, on 21-11-2008 07:07 الله يسلمك يا سمسومة هادا بس من زووءك أختي

6  الكاتب منى, on 21-11-2008 07:08 هلا مريومة   الحمد لله انك بقيت تجربي , لان العجائن مو صعبين , ممكن تكون عم تفشل بسبب الخميرة مثلاً أو انك اضفت السائل و هو سخن كتير أو بارد كتير     مريومة الكعك الي بتقصديه هو الكعك الي ناكله مع الشاي و الجبنة ؟ اذا هيك رح قلك اني عم جرب بس لسا ما طلع معي شي مستاهل , بس اكيد رح ابقى جرب و ان شاء الله بفيدك

7  الكاتب منى, on 21-11-2008 07:14 هلا ام نور حبيبة قلبي   كتير اسرع و سهلة و ممكن انت تحطي فيهم الحشوة الي على زووءك   ان شاء الله تجربيهم و تحبيهم

8  الكاتب منى, on 21-11-2008 07:21 هلا أمولة   اكيد بيصير انت ممكن تحشيها شو ما بتحبي ,يا ترى شو الي ما زبط معك بعجينة العشر دقايق  لا استني امولة في مشكلة معناها لان عجينة العشر دقايق كتيرر سهلة و مو مستاهلة ما تنجح معك   على كل هي كمان سهلة و جربيها بركي بتظبط

9  الكاتب سلاف, on 21-11-2008 08:49 شكلها كتير مشهيه وطيبه يسلمو ايدكي منى 000 عن جد كل شيئ من تحت ايديكي غير شكل ماشاء الله عليكي ،،، هون عنا السلق بيقطفوه صغير كتير 00 وجاي عبالي محشي السلق قولتك منى الورقه قد ورقة العنب الصغيره خرج ينعمل فيها محشي سلق أو لاء ؟؟   أنا كتير بحب السلق وكل شيئ لونه اخضر طيب  عجبتني فكرة تحطي مع البيض نسكافيه بصير لما ادهن وجه الفطاير حط للبيض نسكافيه ولا لاء ؟؟؟ ومنشان وصفة القرع منى كان عندي ضيوف امبارح وكمان اليوم عالغدا ضيوف بركي هاليومين ببعتها ان شاء الله شكرا مره تانيه منى 00

10  الكاتب منى, on 21-11-2008 10:52 هلا سلاف   الله يسلمك و يخليك حبيبتي , هادا بس لانك زووء  ممكن تصير سلاف , انت بءى بتقرري و بتشوفي حسب النظر و هي الفكرة تبعة البيض مع النسكافييه شفتها في برنامجح حورية في المطبخ, كتير كتير عجبتني , اصلا انا كنت ادهن كل شي بالحليب خوفا من رائحة البيض  بس لا صار كل شي بالبيض مع النسكافييه و شفتي كيف اللون بيطلع بيجنن, اكيد ممكن تطبيقي الفكرة على الفطاير     بانتظار الوصفات سلاف و خدي وقتك , الف شكر ليك للمشاركة

11  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 21-11-2008 19:46 يا عيني عليكي يا منى و على وصفاتك الحلوه و تطبيقاتك الاحلى. شكلا بيشهي و عجبني فيها استعمال النيسكافيه و اعتقد ذلك لاعطاء اللون الجميل اليس كذلك (حولنا لغه فصحه). يسلموا ايديكي . عم اتابع بصمت . شي بيفرح القلب اسمالله عليكي. الله يزيدك همه و صحه و نشاط.

12  الكاتب منى, on 22-11-2008 07:50 هلا أمونة يا متابعة يا تقيلة يا عسل   المهم اني اطنت عليك  و متل ما قلتي اللون الحلو هادا من النسكافييه و كمان اهم شي ما في ريحة البيض المزعجة   الف شكر ليك على الدعوات الغالية

13  سؤال؟ الكاتب souha, on 22-11-2008 14:05 السلام عليكم  منونة تسلم إيدكي عال هالوصفة إنا بحب الوصفات السريعة الله يديمك لجماعة الموظفين أمثالي   بس عندي سؤال صغييييييييير إذا بدنا نحشيها بالدجاج أو الطون شو بدنا نحط معهن منكهات   كمان بالنسبة لوصفة الكريب وعدتيني تنزلي طريقة الصوص الأبيض و الأسود و الأشقر يا ترى معقول نزلتيهم و أنا ما شفتن   من كم يوم عملت الكاتو بالمانجاكتير طلع طيب   كمان قريبتي عملت كاتو شوكولا كولا طعمتو طيبة كتير بس نفش بالفرن و بعدين هبط ٍقلتلها يمكن مكتره خفق قالتلي مزبوط لهيك منى أنا عندي جدول عن أسباب فشل الكاتو بالزبدة و الكاتو بدون زبدة بتحبي أبعتلك ياحتى يستفيدو منو الأخوات   كترت حكي صرلي من الصبح ما كريت مع حدا

14  الكاتب منى, on 22-11-2008 15:50 هلا سهى الله يسلمك يا حلو و حقك و الله علي مشان وصفة الصوص , هي من الوصفات الي مصورتها صار الي اكتر من شهر و نص و لسا ما صحلي نزلها , ان شاء الله رح نزلها مع مجموعة تانية من وصفات الصيف قبل مااا تشتي مزبوط   حشوة الدجاج اوالتون رح نزلها بالتفاصيل بس مبدائيا هي بقدونس و جزر مبشور و هيك قصص     هنا و عافية على كاتو المانجا , و زعلت على كيك الكولا , ممكن يكون القالب صغير كمان ..    اكيد اتمنى تبعتيلي الجدول , لان هي مشكلة بتواجه الكل     بالعكس سهى , انا بحب الردود الطويلة , مية هلا فيك

16  الكاتب نور, on 23-11-2008 14:48 وسؤال آخر   ما المقصود بحبات النسكافيه ؟ هل هي النسكافيه العادية ؟ سوري عذبتك معي

17  الكاتب منامينو, on 23-11-2008 17:44 ما بعرف ليش الرد مش عم ينبعت.. وهاي محاولة ثالثة وان شاء الله تكون ثابتة هالمرة. هه، بسم الله..    مراحب حبيبتي منى. آسفة للتأخير، هلأ قريت هذا الموضوع. تسلم إيدك على هالوصفة الرائعة والعملية واللي شكلها عن جد بيشهي.    مزبوط كلامك حبيبتي، هاي العجينة اللي بيستعملو فيها الحليب مع اللبن والزيت بيستعملوها بتركيا بعمل أقراص فطير بيسموها Pogaca وبتِنقرا بُغاشة. بس اللبن بيكون أكثر شوي، وحشوتها ممكن تكون جبنة مع بقدونس أو ممكن تكون معجون الزيتون الأسود اللي بينباع هون جاهز أو أي حشوة ثانية. أما فطير السلق اللي بعرفه من خبرتي القليلة جدا فبيعملوه هون بعجينة رقيقة كتير بتشبه خبز الصاج الرقيق. أسمك شوي من ورق الجلاش بيسمّوها يوفكا. بيشترو العجين هذا جاهز وبيعملوها عدة طبقات وبيحطو حشوة السلق بيناتها وبيكون السلق مخلوط بالجبنة الصفرا أو السائلة وبيدهنو وجهها وبيخبزوها بالفرن.

18  الكاتب منى, on 23-11-2008 17:47 هلا نور   السلق بيكفيه كم دقيقة و من دون ملح , و النسكافييه هي النسكافييه العادية من دون تدويب , خلطيها شوي مع البيض و الا بتلاقيها دابت و عطت لون غامق اله و بعدها رح تعطي لون بيجنن للفطاير

19  الكاتب منى, on 23-11-2008 17:48 هلا أمولة   يا ستي ما قدرت قاوم و حطيت الوصفات الي بعتيهم بصفحة منفصلة لان شكلهعم بيشهي و حرام يبقوا برد     سبحان الله انا هي العجينة بعملها لحالي و ما اخدتها من كتاب الناهيد , انا كان قصدي ان الحشوة تركية طلعت ما الها علاقة , سلم دياتك على المعلومات و الف شكر مرة تانية على الوصفات

20  ما في سلق الكاتب dado, on 24-11-2008 14:48 منى... الله يخليكي..  ارحموا من في الأرض يرحمكم من في السماء...  يمكن أكتر نوع خضرة بحبه بموت عليه هو السلق... وهون مافي سلق.. إلا ألهم شي محل عربي بيجيبه بالغلط مرة كل قرن   وإنتي بتضلي تحطيلنا أكلات سلق.. وكل طبخة منظرها بيشلع القلب ع كتر ما بيشهي   عنجد... لما فتت عالصفحة وشفت الصورة .. ضليت صافنة شي دقيقة ما عم بتحرك وأنا عم قول ما شاء الله عليكي شو فنانة ومبدعة   يالله معلش... زيدينا من وصفات السلق.. بيضلوا بالمخزون المعنوي حتى لو ما حسنت أعملهن هون... بس روح على سوريا بفش خلقي

21  الكاتب منى, on 25-11-2008 06:13 هلا دالو حبيبتي   ولي على ألبي مشان الله لا تزعلي , فيك تجربي نفس الطريقة بالسبانخ و بتطلع معك كتيرر طيبة   خليلي عينك دالو , كلامك حلو كتير و من زووءك حبيبتي , يلا ان شاء الله بس تجي لسوريا تبقى تعمليهم و تفشي قلبك

23  الكاتب سلاف, on 26-11-2008 09:46 شو بدي احكيلك يامنى   امبارح كان عندي عصريه وساويت فطيرة السلق تغيير شكل عن السبانخ طلعت فطيره بتجنن وكلمة بتجنن قليل عليها والله 000 كان فيه تنتين من الموجدات مابحبو السلق أبدا لما داقوها قالولي فطيره طعمتها طيبه كتير بس شو هيه ماعرفنا لما قلتلهم سلق تفاجئوو لان مابياكلوه بس استغربو من الطعمه الرائعه الله وكيلك أكلو صحهن وطلبو كمان 000 عنجد طعمها نغم انا ماتوقعت تكون هيك 000  يسلم ايديكي ياااااارب ويجزاكي ربي كل الخير   وكل اللي عم تعمليه ان شاء الله بميزان حسناتك     شكرا كتير كتير كتير

24  الكاتب منى, on 26-11-2008 12:22 هلا أمولة   لا تخافي أبدا من استبدال السبانخ و السلق لان فيك تستبدليهم عادي .  الطحين الي ذكرتيه ممكن تستعمليه و الخميرة كمان ..    السبب بشو ؟

25  الكاتب منى, on 26-11-2008 12:23 هلا سلاف   هنا و الف الف عافية على قلبك و قلب ضيوفك , كتير انبسطت انها عجبتك و عجبة ضيوفك  صار فيكي متل بنتي لان هي ما بتاكل سلق و حبتها كتير و قالتلي ماما هي محشية فطر   الك متل هل الدعوات و أغلى حبيبتي

26  الكاتب الدمشقية, on 27-11-2008 08:04 ربي يوفقك ويسر امورك باين عليها لذيذة ان شاء الله بجربها باقرب وقت

27  الكاتب منى, on 27-11-2008 11:33 و ان شاء الله انت كمان في الدنيا و الاخرة   بانتظار رايك بعد التجربة دمشقية

28  الكاتب Eman, on 01-12-2008 05:46 أخيرا جربتها وكسرت حاجز الخوف من المعجنات ..   الحمد لله طلعت ناجحة وطيبة كتير ،، وزوجي طول الوقت ياكل وهو يقول :نجحت معك .. كتيييير نجحانة معك ، وأنا أضحك عليه من كتر مو مستغرب ،وورجيتها لأهلي على المسنجر ،صار يقول لي بابا ابعتيلنا وحدة بالبريد .. قلت له أنا بجي بعمله أسرع من البريد     حبيت العجينة كتير ،والحشوة أكتر، عن جد هالعجينة أحسن من عجينة العشر دقائق وأسهل وما نفشت بشكل سيء متل هديك بالعكس طلعت مقبولة وحلوة وما أخدت وقت كتير ،رح سميها عجينة الخمس دقائق .. يسلمو دياتك حبيبتي منى والله يحفظلي ياك من كل شر ويجزيك خير الجزاء

29  الكاتب منى, on 01-12-2008 07:55 الف هنا و عافية و صحة على قلبك و قلب زوجك   و اخيررا ظبطت معك , هي بس اول مرة و هلا ن شاء الله رح تتفنني بقى في المعجنات لان شفتي بعينك ان مو صعبة   كنت ابعتيلي صورة اتفرج عليها لحتى افرح متل بقية أهلك .    فكرة هي عجينة الخمس دقايق , الف هنا أمولة و الك متل هل الدعوات و أغلى حبيبتي

31  الكاتب منى, on 07-12-2008 11:51 هلا مريومة   الف الف هنا و عافية على الكاتويات , و ان شاء الله وجهك أبيض على طول حبيبتي   ان شاء الله عزيمتك تمام مشيت و ان شاء الله الكل انبسط     بالنسبة للكعك , انا كل فترة بجرب وصفات بتطلع بالأخير متل الصمون العادي , ما بعرف اذا خبزنا التوست لفرتة أطول شو ممكن يطلع , اتوقع ما بيصير   , ان شاء الله تزبط معي شي وصفة و اكيد ببقى بنزلها

32  الكاتب عيون ريم, on 25-03-2009 00:34 حبيبتي منى تسلم هالايادي الحرير على هالابداع بس حبيت اسالك ايش بدي بديل عن دبس الفليفله شو بقدر احط بداله ويعطي نكهه طيبه لانه ما بيعملو عنا هون او اعطيني اسم ثاني له معروف بيكون هو نفس دبس الفليفله تسلميلي حبيبتي

33  الكاتب منى, on 26-03-2009 12:13 هلا ريومة :  دبس الفليلفة ما اله بديل , ممكن تستخدمي الفليلفة الحمراء الناعمة لاضفاء طعم لذيذ بس مو بديل   مكن يسموه معجون الفلفل كمان

35  الكاتب منى, on 07-06-2009 19:58 الف هنا و عافية وداد على الفطيرة , لو تعرفي شو مبسوطة بردودك   تغير الشكل ما بياثر على الطعم و المهم انك عدلت الوصفة لحتى تصير تطبق على زوءك و ظرفك , ان شاء الله تكوني اكلتي عني كم لقمة

38  الكاتب dado, on 18-06-2009 12:55 مرحبا منوش  حابة كتير جرب هالفطيرة ، يوم السبت عندي جماعة جايين عالغدا بس مترددة.. هلأ العجينة مو قريبة كتير على خبز بيدا؟  انشالله تزبط معي ..  برأيك إذا خبزتها قبل بيوم المسا بتضل ظريفة لتاني يوم؟   لأني مو حابة اعتمدها على سفرتي وما تزبط وتخجلني بآخر لحظة

39  الكاتب منى, on 18-06-2009 16:40 هلا دالو   ايه قريبة شوي , يا رب تزبط معك و ما تخجلك     هلا هيا اذا بنفس اليوم اكيد ازبط بس ما دامك اول مرة رح تجربيها معناها ما في ادامك غير تخبزيها قبل بيوم و بعد ما تبرد تغلفيها كتير منيح ليوم العزيمة       شو و الله الحبايب ما اكترهم و كل كم يوم عندك عزيمة

42  الكاتب منى, on 30-09-2009 08:01 هلا دالو   ريتو ان شاء الله الف صحة و هنا و مية الف عافية يا رب على البك و الب الضيوف واحد واحد ..    يمكن كلامك صح , لما بتبرد بتصير اطيب , المهم انها عجبتك

43  الكاتب منى, on 30-09-2009 08:05 هلا نهى و لا يهمك     ما في فرق بين دبس البندورة و رب البندورة و معجون البندورة و معجون الطماطم , كله نفس الشي و هو مركز الطماطم الي ممكن تشتريه بعبوات جاهزة او تعمليه في البيت و هي طريقته     و هي كل شي عن دبس الفليلفة

44  الكاتب نهى, on 30-09-2009 13:29 يعنى طلعت صلصة طماطم في الآخر   طيب الحمد لله انا عارفاها وباعملها في البيت برضه بنفس طريقتك بس على النار بس تحت اشعة الشمس   تفتكري لو حطيتها فى الشمس ماتحمض او يتغير طعمها

45  الكاتب مزهرة, on 09-11-2009 11:17 يسلموا هالايدين عزيزتي موني والله بجد كل وصفاتك رائعه وأفضل دعاء الك هو الله يجزيك الخير يااحلى منى على فكره دليت رفيقتي الاردنيه على موقعك وعجبها كتييييييييير

46  الكاتب DOUHA, on 06-02-2010 16:08 جربتا مبارح وطلعت رووووووووووووووووووووعة ياريت اذا في مجال بدي حشوات الدجاج او الطون  اذا طون احسن هههه  جد العجينة تحفة وعملتا وانا مغمضة  شكرا مناي

47  الكاتب منى, on 06-02-2010 19:10 نهى شايفة اللخبطة في الاسامي بتعمل ايه     لا اختي ما بتتغير طعمتها و بتبقى متل الفل و نحنا دايما نعملها هيك

48  الكاتب منى, on 06-02-2010 19:14 هلا مزهرة   الف شكر الك للدعوة الغالية الكريمة من اخت كريمة , و ان شاء الله ربي يديم المعروف دوما , على راسي انت و كل رفقاتك

49  الكاتب منى, on 06-02-2010 19:27 هلا ضحى القمرة   الف هنا و عافية يا رب , تكرم هل العيون الحلوة , و رح حط الك وصفة بالتون ما دامك بتحبيها     انبسطت كتير انها عجبتك , عوافي

51  الكاتب منى, on 30-05-2010 14:41 هلا فيك اختي   الخميرة هي خميرة الخبز العادية     رح تعجبك ان شاء الله

53  الكاتب منى, on 20-12-2010 08:28 الف الف صحة و هنا هاجر على البك لكل لقمة اكلتيها     كمان شكرا على الايميلات الحلوة

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved