L2ma.com | لقمة طيبة | L2ma.com | لقمة طيبة | اليقطين بالطحينة | اليقطين, الله, الوصفة, على, يكون | L2ma.com

القائمة الرئيسية

اليقطين بالطحينة

الكاتب/ منى

16/11/2008

يا ترى شو الوصفة الظاهرة بالصورة ؟ يمكن تكون صعبة , رح أعطيك بس تلميح واحد أنها محضرة بنوع من الخضار هلأ موسمه ..

بعد الإعلان عن الوصفة رح يكون في مسابقة بيناتكم لتقديم وصفاتكم , أتمنى من كل قلبي من الجميع الاستعداد , يلا شدوا الهمة و أنا بانتظار إجاباتكم ..الإعلان عن الوصفة يوم الثلاثاء بمشيئة الله

في أمان الله

كتير من الأخوات حزروا أن المقدار الرئيسي في الوصفة هو القرع الشتوي و الي معروف باسم اليقطين , الأخت ميساء بس جابت سيرة الطحينة و الي هو الصوص الظاهر بالصورة , برافو عليك ميوسة

قبل الوصفة خلونا نحكي عن مسابقتنا , نحنا عم نطبخ كل يوم لعيلتنا و في أخوات بيحبوا الطبخ و بيستمتعوا فيه و في منهم الطبخ واجب عليهم .. طيب خلونا نطبخ و ناخد حسنات و هي تذكرة لاستحضار النية دوماً قبل الطبخ انك عم تطبخي لتقوي أفراد عيلتك على طاعة الله لحتى تخلقي الألفة و المحبة على طاولة الغذاء و هي أول سبب لأن نأخد حسنات عن عمل منقوم فيه يومياً بشكل روتيني . المسابقة فكرة تانية لتجميع الحسنات و اجتني فكرتها من الحديث التالي :

عن أنس بن مالك رضي الله عنه قال: إن خياطاً دعا رسول الله صلى الله عليه و سلم لطعام صنعه، قال أنس:
فذهبت مع رسول الله صلى الله عليه و سلم فرأيته يتتبع الدباء من حوالي القصعة، قال:
فلم أزل أحب الدُبَّاء من ذلك اليوم، وفي رواية أخرى:
فقرب إلى رسول الله صلى الله عليه و سلم خبزاً ومرقاً فيه دُبَّاء وقديد.صحيح البخاري في الأطعمة 5379

الدباء هو اليقطين , يعني أكله من السنة . طيب خلونا نبحث عن أطباق جديدة محضرة من اليقطين , و الأخوات الزائرات ما شاء الله مو بس من سوريا لأ من مختلف أنحاء العالم من فلسطين و السعودية و لبنان و مصر و المغرب العربي و أميركا و فرنسا و ألمانيا و غيره . أكيد كل بلد عندهم طريقة مختلفة لتحضير اليقطين . أو ممكن يكون الواحدة فينا عندها طريقة خاصة بعيلتها ..

شروط المسابقة شرطيين بس : أول الشي أن يكون الطبق مجرب و طيب لأن في لقمة طيبة كله لازم يكون مجرب و الشرط التاني أن يكون اليقطين مكون فيه .. و ممكن الاشتراك بمقبلات , معجنات أطباق رئيسية حلويات , أنت و زووءك

نحنا عم نحضر الطبق لازم نفهم عليتنا و خصوصاً الأولاد الصغار أن اليقطين من الخضار الي وصانا الرسول بأكلها و ان نحنا اليوم عم ناكله لأن نحنا نحب رسولنا و نحب نقلده ..

أخر موعد لاستلام الوصفات يوم السبت 29 بالشهر و بعدها رح أنشر كل الوصفات و نعمل عليها استفتاء بين جميع الزائرات لحتى يصوتوا أيا طبق عجبهم أكتر .. بانتظار الجميع و لو بوصفة صغيرة و الوصفات ممكن تبعوهم برد عادي أو عن طريق الإيميل

أنا محضرة الوصفات الأتية إن شاء الله :

شوربة كريم اليقطين
شوربة اليقطين بخلطة البستو
اليقطين بالطحينة ( سوري )
مسقعة اليقطين ( و ممكن تنعرف باسم يقطين شيخ محشي ) ( سوري )
كبة اليقطين ( لبناني )
خبز اليقطين ( تركي )
بذر اليقطين المحمص ( وصفة من بنات أفكاري يعني صارت الوصفة حلبية

)

و في بعدها مجموعة تانية إن شاء الله من بيناتها أبو بسطي , مربى اليقطين و كب كيك باليقطين , بدي مهرجان اليقطين على لقمة طيبة , شمروا أكمامكم و على المطبخ و الف هنا مقدماً

كيلو يقطين
نصف كيلو لحمة غنم مفرومة ناعماً
نصف ملعقة صغيرة بهار مشكل
نصف كوب طحينة
نصف كوب عصير ليمون
2 كوب و نصف مرق أو ماء
ملح
ØÑíÞÉ ÇáÊÍÖíÑ

يقطع اليقطين لمكعبات بحجم متوسط ثم يقلى بالزيت أو السمنة حسب الرغبة حتى يشقر . يرفع على ورق ماص للتخلص من الزيوت الزائدة .
تقلى اللحمة مع البهار بالقليل من الزيت و تقلب و تفكك بالملعقة حتى تنضج و يجف مرقها .
ترقق الطحينة بالماء ثم يضاف الليمون و الملح , يمكن تقليل أو تكثير كمية صلصة الطحينة حسب زوءك و رغبة عائلتك .
توضع اللحمة و البقطين و صوص الطحينة في طنجرة على نار متوسطة و تترك لتغلي , تهدى النار و تغطى الطنجرة و تترك حتى ينضج اليقطين و يمتص الصوص .
تقدم الوصفة حارة مع الأرز المفلفل و مع الفجل و الرشاد .

أضافة إلى المفضلة (0) |

أقتباس | مشاهدات : 598

تعليقات (50)

1 الكاتب قهوه مُره, on 16-11-2008 17:29
السلام عليكم ورحمة الله وبركاته...كيف حالك أختي منى ..سلامي لجميع الأخوات..أولا مبروك إفتتاح الموقع بس كيف بنفتح عليه..تانياأنا بعتئد إنه هالأكله قرع باللبن..نسيانه شو إسمها..تالتا بدي إسألك عن الكريما ..دايما بينكتب وبنقرأ كريما فريش .مابعرف شو يعني إذا تكرمتي أوليلي وين بلائيها .مع العلم أنا مقيمه بجده.وإذا كانت بالسوبرماركت وين بتكون بقسم الأجبان ولا بالتلاجات...أفيديي أفادك الله..مع خالص الشكر

2 الكاتب لارا مينا, on 16-11-2008 17:42
مساء الخير ألف ألف مبروك الموقع الجديد وعقبال اللغة الفرنسية والإيطالية وجميع اللغات بإذن الله وفكرة مميزة والله للتواصل وحتى لو كان الموقع باللغة الأمازيغية رح نتواصل مع موقعنا الحبيب أكيد (والله فرحت كثير ) ...وبالنسبة للوصفة الصراحة ما عرفتها بس دايماأحب أحاول يمكن تزبط أتوقع قرع بالكريما السائلة . وعندي يامنى مجموعة أفكار للموقع هل أرسلها على الإميل أو برد عادي حتى أضمن إنها توصلك ...تحياتي .

3 الكاتب المغتربة, on 16-11-2008 17:48
هذه اول مرة اشارك بصراحة موقع كتيررررررر حلو انا سورية مقيمة بالمملكة من 15سنة
وبحب جرب اكلاتك تسلم الايادي

الاكلة اكيد فيها يقطين (القرع ) :grin

4 الكاتب سارونات, on 16-11-2008 17:56
ألسلام عليكم و رحمة الله و بركاته
اختي منى مبروووووووووووووووووووووووووووك و ربنا يوفقك و يكتبلك النجاح في كل خطوة عم تخطيها
انا عم شوف ان الوصفة بطاطا مع شوية لحمة مفرومة و بقدونس و صوص بيشاميل هاد اللي طلع معي بس عم تقولي انها صعبة يعني معقول ما تكون بطاطا

اكيد ناطرة تفاصيل الوصفة يوم الثلاثاء ان شاء الله بس ما قلتيلي اختي منى شو قررتي بالنسبة لمصيري راح تزتيني من الشباك او لا :grin

سلام

5 الكاتب ميساء, on 16-11-2008 20:54
السلام عليكم مبروك سيدة منى على الموقع الانجليزي والله يحمي هالموقع يارب وبالنسبة للوصفة اعتقد أنها يقطين بلبن أو يمكن بحمض و طحينة وهي أكلة كتير طيبة وعلى كل حال اليقطين لذيذ ومفيد وممكن ينعمل منه متبل وكمان بينطبخ مع حمص ومرقة بندورة متل (الطباخ روحو)وشكرا كتير ست منى

6 الكاتب بدور, on 16-11-2008 22:38
الف الف مبروك ميمو الحلوة والله يتمملك بالخير يارب و يباركلك بكل فكرة جديدة وكل حركة بتعمليها

والله افكارك كتير حلوة وفيها حماس دائم وانا متأكدة من نجاحك بإذن الله ورح كون اول المشجعين الك والله لا يضيعلك تعب يارب..

اذا جينا عالوصفة الجديدة..مممممممممممممممم!
سفرجل.. قرع.. شي تاني.. الله اعلم لحد الأن ماعرفت شي بصراحة بس مبينتها مشهية :roll

وفكرة المسابقة لتقديم وصفاتنا كتير حلوة ومشجعة بس للأسف مارح ائدر اكون من الشطورين فيا بما اني ماعندي خبرة بالطبخ بس حبيت الفكرة كتير والله يبارك للجميع

7 الكاتب تورتاية بالكريز, on 17-11-2008 02:12
الف مبروك حبيبتي الموقع بالانجليزية ان شاء الله اخبارك حلوة ع طول يارب وموفقة حبيبة قلبي
الوصفة اعتقد بطاطا مع لحم مفروم بالكريمة هيا شكلها بطاطا يارب تكون صح وتسلميلنا ياقمرنا

8 الكاتب منامينو, on 17-11-2008 02:54
أهلين حبيبتي منى. أول شي ألف مبروك على تطور الموقع وإنه صار بالإنجليزي. وان شاء الله لمزيد من التطور والتوفيق يا رب.

أما عن الوصفة، فيا ستي ما دام بتقولي إنها من خضار هلأ موسمها، فبدها تكون يا قرع يا سفرجل. بس على كل الأحوال هي وصفة جديدة عليّ، وبانتظار طريقتها على أحر من الجمر. وتسلميلي شو بتحطيلنا وصفات حلوة كتير ومشهية للعين قبل الأكل.

9 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 17-11-2008 06:40
السلام عليكم اخت منى مبروك للموقع الجديد وان شاءالله للأحسن وللأمام باذن الله

الوصفة هذه على ما اعتقد انه قرع اصفر لأنه هو هلأ موسمه صح ولا انا غلطانة واعتقد انه معه كريما ولحمة مفرومة وبقدونس

اخت منى انا بعثت لك وصفة دجاج بس ما بعرف وصلت ولا لأ وشكرا لك

10 الكاتب سلاف, on 17-11-2008 08:48
السلام عليكم للجميع 000 كيفك منى والله صرلي كم يوم الدي اس ال فيه مشكله وماعم يفتح النت طلعت روحي وحسيت باكتئاب شديد لليوم الحمد لله تصلح 000 وان شاء الله مابقى تنعاد 00 المهم شايفه بالصوره قرع بس شو الاكله ما بعرف ناطرتك لنشوووف شو هالاكله اللي مبين عليها شهيه كتير 00 شكرا منىىى

11 الكاتب سلاف, on 17-11-2008 08:55
نسيت باركلك الف مبروك منى عالموقع الانجليزي والله يحميكي ويحمي موقعك عربي وانجليزي من كل هكر ومن كل الاشررررااااار :roll

12 الكاتب منى, on 17-11-2008 12:05
هلا فيك أختي قهوة

الشكر ليك و الرابط موجود فوق , الكريما فريش لازم تلاقيها بقسم التلاجات و هي على الاغلب بعلب كرتون و مكتوب عليها كريم فريش

13 الكاتب منى, on 17-11-2008 12:06
مية هلا لارا

الله يبارك فيك و بعمرك دايما أختي و ممكن تبعتي الافكار متل ما بتحبي اما بايميل او برد و ان شاء الله بتوصلني

14 الكاتب منى, on 17-11-2008 12:06
هلا اختي مغتربة

نورتي اختي و ان شاء الله تجربي وصفات و تعجبك

15 الكاتب منى, on 17-11-2008 12:07
و عليكم السلام و رحمة الله و بركاته سارونات

الله يبارك في عمرك و دينك و الف شكر ليك على الدعوات , بعدها شو زحلك و ما زحلءك , بيتك يا قمر :grin

16 الكاتب منى, on 17-11-2008 12:07
هلا ميساء

اول مرة أعرف ان اليقطين بيصير متبل , اكيد لازم تشاركي بهل الوصفة :zzz

17 الكاتب منى, on 17-11-2008 12:08
هلا بدورة

انت اول واحد علقت على المسابقة ,اتمنى ان ما يكون هادا دليل ان و لا واحدة رحة تشارك :upset

ما الي علاقة ممكن الاستعانة بصديق متل ماما , انت اول المشاركات , هو انا ما سدقت :zzz

18 الكاتب منى, on 17-11-2008 12:09
هلا ام ياسمين يا قمر

الله يبارك بعمرك و قلبك و دينك
منورة على طوةل حبيبتي

19 الكاتب منى, on 17-11-2008 12:11
هلا منامينو

هادي من زووءك حبيبتي و لطفك , الله يخليك على الدعوات الحلوة

20 الكاتب منى, on 17-11-2008 12:12
هلا هيا

الله يباركلك أختي و وصفتك وصلت , بس في قبلها كم وصفة للنشر , الف الف شكر ليك عليها

21 الكاتب منى, on 17-11-2008 12:12
هلا سلاف

و الله استفقدتلك و قلت ان شاء الله المانع خير , الله يبارك بعمرك ختي
أأأمين يا رب و من كل أولاد .... الي بيخربوا بس لان جاي الهم مزاج

22 الكاتب رنا, on 17-11-2008 16:04
شي كتير لذيذ بس مابعرف شو انا بخمن يا قرع يا سفرجل بس السفرجل مابظن يصير باللبن الاممكن يصر معك لانه انتي ام الافكار

بس الاغلب قرع لانه في اكلة بتعملها ستي بالشام اسمها ابو بسطي وهيك بالقرع وشغلات بس بتوقع هديك بمرقة حمرااا
وبالنسبة للمسابقة رح كون متل بدور من المتعلمين وغير المعلمين لاني جديدة عالمصلحة بس بفيدك بشغلات انشالله

23 الكاتب souha, on 17-11-2008 16:05
السلام عليكم
ألف مبروك أخت منى على الموقع الجديد ما شاء الله و صلنا للعالمية أمنياتي لك بالتوفيق و النجاح يا رب على طول
أعتقد أنو الوصفة فيها قرع شتوي بس بقية المكونات ما عرفت إذا كانت كريما أو لبن , والدتي بتعمل من القرعة الشتوية أكلتين وحدة إسمها كفتة القرعة و الثانية شيخ المحشي بالقرعة

24 الكاتب منى, on 17-11-2008 17:57
هلا رنونة

ما الي علاقة , لاااازم تشاركي و لو بوصفة صغيرة , هلا انت استني بالاول و بعدها نبقى نحكي :zzz

25 الكاتب منى, on 17-11-2008 17:57
و عليكم السلام سهى

الله يبارك بعمرك كله حبيبتي كلك زووء
ما عرفتها هي كفتة القرعة , لازم تشاركي فيها

26 الكاتب رندوش, on 17-11-2008 18:08
الف الف مبروك منى من تقدم لتقدم دائما ان شاء الله
عزيزتي منى
يمكن قلقاس احنا موسمه قلقاس بلحمه مفرومه

27 الكاتب منى, on 17-11-2008 18:29
الله يبارك بعمرك رندوشة يا قمر

انا ما بعرف , فقثدت الزاكرة بس بترجعلي بكرة :grin

28 الكاتب سمسمة, on 17-11-2008 18:57
حبيبة البي منى ممكن يكون يقطين باللبن

29 الكاتب منى, on 17-11-2008 19:12
:roll

يمكن

30 الكاتب ام نور, on 17-11-2008 21:10
انا كتير محتارة ساعة بقول بطاطا ساعة سفرجل فما عندي اجابة صحيحة بس اكيد اكلة طيبة ومميزة عم استنى الجواب بوقرة انشالله

31 الكاتب ام دانية, on 17-11-2008 22:05
احلى سلام الاحلى ست منى بصراحة هل المرة مصعبة الوصفة انا بقول بطاطا ومعا كريمة ولحمة وبقدونس وعلى فكرة كتير عجبتني فكرة المسابقة وانا كتير متحمسة الها صحيح انا ما بطلع نقطة ببحرك بس يالله الوحدة بتجرب :cry

وان شاء الله هاد كلو بميزان حسناتك

32 الكاتب منى, on 18-11-2008 06:00
هلا ام نور

يلا بعد شوي رح نزل الوصفة اذا الله راد

33 الكاتب منى, on 18-11-2008 11:54
هلا ام دانية

ااامين أختي و ان شاء الله انت كمان , انا بانتظار وصفاتكم و كتيررر متحمسة الها
حابة اتعلم اشيا جديدة عن اليقطين , يلا ما تتاخري :zzz

34 الكاتب ام نور, on 18-11-2008 12:29
يعد اليقطين، والمعروف بقرع العسل في بعض البلاد العربية، من أسهل الخضراوات هضماً وأكثرها فائدة للصحة. فهو غني بمضادات الأكسدة التي تقوي المناعة وتقلل فرص الإصابة بالأمراض المزمنة مثل السرطان وأمراض القلب.
واليقطين غني أيضا بفيتاميني "أ" و"ب"، وكثير من الأملاح المعدنية، كما أنه مسكن وملين ومدر للبول ويساعد في علاج البواسير والتهاب الأمعاء والأرق. ويستعمل اليقطين في الطب الشعبي في علاج الحروق. ويذكر أن تناول كوب من اليقطين المطهي يمد الجسم بـ50 سعرا حراريا فقط، بينما يحتوي على 3 جرامات من الألياف. وقد بينت الدراسات أن بذور اليقطين (اللب الأبيض) مفيدة أيضا، حيث تقي من أمراض القلب وتساعد في علاج أمراض البروستاتا.

35 الكاتب ميساء, on 18-11-2008 13:50
عزيزتي منى ما بتتخيلي قديش كنت فرحانة لما قرأت ملاحظتك بأني بس أنا اللي ذكرت اليقطين بطحينة ويسعدني كثيرا أن أشارك في المسابقة الجديدة وأنا أحب المطبخ جدا و أدخله برغبة وحب شديد وطبخي طيب بشهادة من حولي ولكن عندي مشكلة بالمقاديرلأني بعمري ما عيرت شيء طبعا ما عدا الكاتويات وأعتمد على النظر والتذوق وما بعرف كيف بدي أبعث لك بعض الوصفات :cry

وشكرا مجددا لك يا أروع طباخة

36 الكاتب منى, on 18-11-2008 15:35
ممم ألف شكر ليك ام نور على المعلومات المهمة ..
انا اعرف أن في مضادات أكسدة بس كل الباقي ما بعرفه :roll

أغنيتي الوصفة يا قمر الف شكر ليك

37 الكاتب منى, on 18-11-2008 15:40
هلا ميوسة

معك حق بقصة المقادير , كتير طبخات الواحد بيحسها على النظر ..

انت ابعتي الوصفة و لو ممكن بمقادير تقريبية لحتى الكل يستفيد و نبقى نذكر قبل الوصفة ان المقادير تقريبية

ممكن تبعتي الوصفات باي رد , بانتظار مشاركتك اختي

38 الكاتب سلاف, on 18-11-2008 16:33
يعطيكي العافيه منى 000 كنت بدي اسألك اللي بدها تبعتلك وصفه كيف بتبعتها يعني بكتب رد هون وبتصير عندك وسؤال تاني اذا لازم الوصفه تكون مجربه وبالصور طيب كيف فيني ابعتلك الصور ؟؟ هلأ لو كان فيه نظام الرسائل او ايميل خاص الك بالموقع منى لقمه طيبه هوت ميل دوت كوم كان الموضوع اسهل من انه نحملها على موقع ونبعتها ؟؟؟ قوليلي شلون بدي ابعت الصوور مع الوصفه ؟؟
تذكرت بدي شارك بالمسابقه مع انه بعتقد ماخرجي شيئ زياده بالمطبخ بطلع نقطه ببحرك بس ليش لاء بنجرب بركي بيطلع معنا شيئ طيب بلقمه طيبه :roll

كمان عندي سؤال الوصفه لازم من اختراعنا ولا عادي اكله دقناها عند حدا وعجبتنا وجربناها وطلعت طيبه 00 مابقلك اني مابخترع بحاول اخترع واحيانا بطلع معي شيئ طيب واحيانا بخبص وبيحمر وجهي

وشكرا عالاكله الطيبه بس يجبلي زوجي القرعه منشان اشتغل فيها رح جرب ساويها ولا مره جربتها بهالطريقه

ناطره ردك تسلميلي منى

39 الكاتب منى, on 18-11-2008 17:38
مو ضروري الوصفة تكون مصورة , هو الاحسن تكون بس مو ضروري

و فيك تحملي الصور على ايا موقع للتحميل و بترسلي روابط الصورة

الوصفة مو ضروري ابدا من اختراعك , اي وصفة بتعرفيها ان شاء الله من الهنلولو ممكن تشاركي فيها :zzz

عم استنى الوصفة و ان شاء الله تجربي هل الطريقة و تعجبك

40 الكاتب ام محمد, on 18-11-2008 19:13
اختي الغاليةمنى الف مبروك ع الموقع الجديدوان شاءالله من احسن لاحسن

41 الكاتب الدمشقية, on 19-11-2008 11:27
حبيبتي منى أنا بحب الأبو بسطي كتيييييييييييييير وخصوصاً بعد ما سمعت مرة من المرات هذا الحديث وعرفت أنه حديث صحيح صرت حبه أكتر وأكتر وكمان الكبة بيقطين لذيذة فعلاً
:zzz

وانت هيك حبيبتي ما خليتي أكله من أكلات اليقطين إلا وقلتيها

يعني نحن شو بدنا نقول بقا :sigh

والله يجزيك الخير حبيبتي على الكلام فعلاً لازم نحتسب كل شيء حتى كل نفس من أنفاسنا عند الله تعالى وعند رب العالمين ما بيضيع شي

42 الكاتب الدمشقية, on 19-11-2008 11:32
أنا أسفة حياتي نسيت باركلك على الموقع الجديد

أنا دخلت عليه وفعلاً ربي يقويك ويكرمك من واسع فضله وكرمه يارب

43 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 19-11-2008 13:57
السلام عليكم اخت منى انا بعثت تعليق قبل هيك لكن مش عارفة وين بعثته او اذا وصلك او لأ انا حابة كثير شارك في المسابقة وعندي طريقتين يعتبروا من المقبلات لكن بدون مقادير اتمنى انها تعجبك
اول واحدة وهي بنقطع الياقطين شرحات وبنسلقها وبعدين بنطحنها مثل الحمص وبنضع عليها طحينة وليمون وثوم وملح طبعا يعني مثل الحمص بالضبط وتوضع بالصحن وعليها زيت وتغمس
والثانية هي انو بنقطع الياقطين لشرحات وبنقليها وبعدين بنكون عاملين ليمون وثوم وسماق وبنرشها عليها

44 الكاتب منى, on 19-11-2008 17:26
هلا ام محمد

الله يبارك بعمرك حبيبتي نورتي الموقعيين أختي

45 الكاتب منى, on 19-11-2008 17:28
هلا دمشقية

اذا عندك وصفة لأبوبسطي أو الكبة يا ريت تشاركي فيهن , اكيد الوصفة الشامية من دمشقية رح تكون أطيب و على أصولها zzz
الله يبارك بعمرك و قلبك و بدنك و نورتي حبيبتي

46 الكاتب منى, on 19-11-2008 17:29
هيا التعليق وصل بس انا ما نشرته لان ناوية أنشر الوصفات كلها مرة واحدة ان شاء الله , شو رايك :roll

47 الكاتب منى, on 22-11-2008 07:52
وصلت الوصفا سهى , شي بيشهي ربي يحفظ هل الدياات

48 الكاتب kuwaiti_girl, on 24-11-2008 06:11
حبيبتي منمن

عجبتني المسابقه كثييييييييييييير

وحابه اشارك بس المشكله بالصور

هل من الممكن احط وصفه بس من غير صوره؟؟

لان عندي وصفتين وحده يقطين مع بطاطا ولحمه مفرومه بالبشاميل
والثانيه وصفه شوربه القرع بالكريمه بس من غير صوره ينفع احطهم؟

49 الكاتب منى, on 24-11-2008 06:46
هلا كوكو

وصفة كتير طيبة , بانتظار التانية :zzz

50 الكاتب منى, on 25-11-2008 06:19
الف شكر ليك سلاف على الوصفات , بس طلب الله يخليك , الصور حجمهم كبير كتير كتير , هي صار الي اكتر من نص ساعة عم حاول افتحهم تفتح معي ربع الصورة و ما بتكمل :roll

ممكن تعيدي تحميلهم و يكون حجم الصورة 500 عرض و على قد ما بدك طول , اذا ممكن

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 19/11/2008 )

< السابق		التالى >

[ عودة ]