L2ma.com | لقمة طيبة | L2ma.com | لقمة طيبة | كب كيك الموز و الزبادي | على, · , كوب, الله, البيض | L2ma.com

القائمة الرئيسية

الأكثر تصفحاً

كب كيك الموز و الزبادي

الكاتب/ منى

06/11/2008

كب كيك الموز و الزبادي

اليوم الوصفة مميزة لكتير أسباب, أول الشي هي أول وصفة بعد تهكير الموقع لمدة 10 أيام تقريباُ , أيام مرت علي طويلة و خصوصاً الأيام الأخيرة منها , حسبي الله و نعم الوكيل على كل من تسبب بهذه الأذية . السبب التاني هو ان رقم الوصفة اليوم هو 500 , صار مطبخنا فيه 500 وصفة لذيذة و مجربة و عقبال الالف و الالفين و أكتر ان شاء الله . السبب التالت هو ان رجعت لنشاطي السابق إذا الله راد بعد ما خلصت خطبة أخي , الله يهني العرسان و يكون التمام على خير .

لهيك اخترت وصفة مميزة كتير و الصراحة أنها واحدة من الوصفات الي عم حضرها و احفظها عندي خاصة لكتاب لقمة طيبة , هلأ نزلتها لعيون كل الأخوات المحبات .

الوصفة كتير كتير طيبة و سهلة بأقل من خمس دقايق بتصير في الفرن و فكرة مفيدة إذا بقي عندك موز مستوي مع شوية لبن في البراد و ما في داعي لخفق البيض لوحده ..

بعد ما حضرت هل الكب كيك كل العيلة عندي صارت تقليلي : أنت ملكة الكب كيك ..

الكمية رح تعمل الك 12 قطعة من الحجم المتوسط أو 20 من الحجم الصغير

بالصحة و الهنا

كوب و ثلاث أرباع طحين حلويات
ملعقة صغيرة و نصف بيكنغ بودر
ثلاث أرباع أو كوب سكر
نصف كوب زيت
نصف كوب حليب
نصف كوب لبن زبادي
كوب موز مهروس ( تقريباً 2 حبة موز كبيرة ناضجة جداً )
بيضة
فانيليا
direction

·          يحمى الفرن على حرارة 180 درجة مئوية , تدهن صينية المافن بالزبدة أو تغطى بأوراق البليسيه , يجب أن يكون الموز و اللبن و الحليب و البيض و بقية المواد المستخدمة بحرارة الغرفة .

·          يخفق البيض و الفانيليا و السكر و الزيت و اللبن و الحليب في خفاقة العصير حتى الحصول على مزيج متجانس .

·          ينخل الطحين و البيكنغ بودر على زبدية متوسطة , يضاف مزيج البيض و الموز المهروس و يقلب الكل بمضرب سلك حتى يتجانس المزيج .

·          يوزع المزيج على القوالب ثم تخبز الصينية في الفرن المحمى حتى تنضج لمدة 30 – 35 دقيقة ثم ترفع و تترك حتى تبرد و يمكن أن تقدم دافئة أو باردة .

أفكار و تنويعات :

·          مكن استعمال لبن المنكهة بالفواكة المختلفة أو إضافة القليل من العسل لإضفاء نكهة مختلفة .

·          يمكن إضافة القليل من رقائق الشوكولا أو الزبيب للوصفة .

أضافة إلى المفضلة (0) |

أقتباس | مشاهدات : 5549

تعليقات (41)

1 الكاتب سلاف, on 06-11-2008 10:56
بشكرك كتير أختي منى على هالموقع الأكثر من رائع ماشاء الله عليكي أنا كنت عطول بتابع طبخاتك بمنتدى لك ولما عرفت عندك موقع حبيت ضم حالي الكن 00 كان عندي سؤال بالنسبه للموقع هاي تاني مره بينهكر شلون وضع الحمايه عندك الموقع مو محمي منيح؟انا صرلي اكتر من 15 يوم قبل ماينهكر سجلت وحاول ضيف رد مايمشي الحال بس بركي اليوم بيمشي الحال ،،، جربت اكتر من 5 وصفات الك وكلهن رائعين الله يسلم ايديكي يارب

2 الكاتب سمسمة, on 06-11-2008 12:03
ان شاء بيعيشوا ايديكي منى وألف مبروك لأخوكي والله الأيام الماضية كنت حاسة فيكي وعارفة أديش مشغول بالك عالموقع وموطالع بأيدنا نساوي شي رح أسألك اذا بنقدر نحط نظام حماية من الهكر

3 الكاتب نهى, on 06-11-2008 12:46
ألف مبروك عودة الموقع..
كتير قلقت عليكم المرة دى لان الغيبة طولت كتير..
ربنا يعينكم وكل فريق العمل.. والله يجازى اللى كان السبب

4 الكاتب نهى, on 06-11-2008 13:06
نسيت ابارك لك الوصفة ال500 ويارب دايما فى زيادة

وكمان مبروك لاخوكى كتير

5 الكاتب منى, on 06-11-2008 13:14
مية هلا سلاف

نور الموقع باخت غالية و كريمة والف شكر ليك على الرد , اسفة للمشاكل بالرد و كتير منيح انها انحلت , كان ممكن تراسليني او تراسلي المهندس المختص لنساعدك لحل المشكلة

ان شاء الله الموقع هلا اتحصن منيح :roll

هنا و عوافي على الوصفات الي جربتيهن يا ترى شو جربتي ؟ :zzz

6 الكاتب fofo2, on 06-11-2008 13:14
يسلموا ايديكي على هالوصفات أنا كتير بحب وصفاتك وجربت كتير منهاوكلها زبطت بالذات الشاورما طلعت بتجنن وبدي جرب الكب كيك ان شاء الله لأن أولاد اختي كتير بحبوه(و أنا كمان)

7 الكاتب ام دانية, on 06-11-2008 14:27
:zzz

الحمدلله على رجوع الموقع لانو تعودنا عليه وتسلم ايدك على الاكلة بتمنى من الله تكون اخبارك كلا تمام والله لا يوفق الي عم يخرب الموقع

صحيح كيف الخطبة كانت ان شاء الله كلو تمام وانبسطتو؟

8 الكاتب سمسمة, on 06-11-2008 17:11
من فرحتي برجوع الموقع نسيت أسألك حبيبة ألبي منى بالنسبة للكب كيك بعد مايطلع من الفرن بحاول طلعه من قالب الورق مابيطلع معي وبيتفتت ياترى شوالسبب
وفي سؤال تاني شو رأيك بقناة فتافيت واذا جربت منهاشي وطلع ظريف ياريت تنزلي بالموقع تحت أسم آكلات غربية

9 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 06-11-2008 18:35
مبروك يا منى الرجعه و مبروك على الوصفه رقم 500 و مبروك لاخوكي الله يتمم على خير. كتير قلقت عليكون كل ما ادخل للموقع و تطلعلي المسج. على العموم الحمدلله على السلامه و فعلا الكون وحشه. يعني كتير مهم وجودكم لكل المحبين لهالموقع.

10 الكاتب تورتاية بالكريز, on 07-11-2008 04:15
يامرحبا بغالية الغاليات والحبيببة لقلبي
الف مليون حمد لله على السلامة ياملكة الكب كيك وكل انواع الكيك والاطايب الحلوة
بجد وحشتيني كتير كتير وانا لم انس الموقع تقريبا كل يوم كنت بدخل اشوفه
والف مليون مبروك تمام الخطبة وعقبال الزفاف الله يهنيهم ويسعدهم ويجمعهم على طاعة الله يارب العالمين
طبعا بعد الغيبة كان نفسي ادخل الموقع ومعاي وصفة مصورة هدية وترحيب بعودة موقعنا الغالي بس للاسف ماعندي صور جديدة ان شاء الله رب العالمين للموقع عندي وصفة متواضعة ترحيبا بعودة الغالية منى الله يتملك مشروع الكتاب على خير يارب ويحقق النجاح والفائدة واناطبعا بحجز نسختي من الان
حياك الله اختي الغالية واعطاك الصحة والعافية ورزقك الخير كله والمسلمين جميعا انه سميع مجيب الدعاء
ويسلموا ايدكي على وصفة الكب كيك بالموز المشهية واللذيذة

11 الكاتب سلاف, on 07-11-2008 07:25
صباح الورد للجميع 00 أنا جربت الكبه المبرومه وطلعت معي بتجنن وجربت السفرجليه باللحمه الكباب لاني عادة بطبخها بتوم ونعناع كمان طلعت بتجنن وكمان الموساكا ،، شوربة العدس بحامض اللبنانيه ،، بنبون الزنجبيل وكلهم طلعو طيبين يسلمو ايديكي يامنى وطبعا رح جرب باقي الاكلات على طريقتك ،، هلأ أنا جربت الأكلات اللي ولا مره ساويتها وبما انه زوجي من نص حلب وحماتي حلبيه أغلب الاكلات بعملها بطريقه مشابهه أو نفسهاتقريباطريقتك بس انتي والله نفسك ماشاء الله نفسك غير

بعرف حالي حكيت كتير بس انا كان عندي اقتراح من بعد اذنك يعني اللي بده يسألك سؤال أو مثلا عنده طبخه من اختراعه أو كلمة بده يقولها ليش مابكون فيه منتدى واحد بس بالموقع اسمه رابطة صديقات لقمه طيبه

؟؟ مو منشان شيئ بس منشان مانخرب جمالية موضوعك بأسئلتنا وكلامنا الخارج عن موضوع الوصفه

وبالنسبه للكب كيك رح جربه ان شاء الله بكره وقلك النتيجه مع اني متاكده مسبقا انه رح يكون طيب كتير

لا تواخذيني منى لعييت كتير :zzz

12 الكاتب منى, on 07-11-2008 09:39
هلا سمسمة

الله يسلمك و يخليك اختي , كلك زووء يا عسل , ان شاء الله هلا في نظام حماية ..

الكب كيك ما لازم يطلع من الورق و اكيد رح يتفتت و ينخرب منظره اذا حاولتي طالعيه , اذا بتحبي ممكن ما تستخدمي الورق , ادهني القوالب المعدن منيح بالزبدة و بس

انا بحب قناة فتافيت كتير بس ما دايما بقدر تابعها لان ماالي هوية بالتلفزيون , بحب اكتر الشي ناجيلا و ريك ستاين و من الشيفات العرب بحب حورية , بس مومتابعة دايما و لا جربت اي وصفة , بس باخد منها افكار

و اذا جربت منها اي شي ببقى بخبركن بالوصفة

13 الكاتب منى, on 07-11-2008 09:39
هلا نهى

الله يبارك بعمرك و ببدنك و صحتك يا حق , الله يجز الي كان السبب الجزاء الي بيستحقه و يشوفه من بين عيونه

14 الكاتب samar2005, on 07-11-2008 12:22
مرحبا منى
الف مبروك على الرقم 500 وعقبال الالاف
والف مبروك خطبة اخوكي ويا رب يتهنوا
الوصفة حلوة كثير وخصوصي للاولاد يسلموا ايديكي

15 الكاتب منى, on 07-11-2008 16:04
مية هلا فوفو

هنا على قلبك على كل شي جربتيه و كتير انبسطت ان الشاورما عجبتك , بركي يقية الاخوات بيتشجعوا لان هي من الوصفات المميزة كتير عندي

هنا على قلبك و قلب اولاد اختك مقدما يلا خبريني شو بيصير معك و لا تنسي تحسبي حسابي :zzz

16 الكاتب منى, on 07-11-2008 16:06
مية هلا ام دانية

الحمد لله الخطبة منيحة , بس صار معنا فصل هندي بحجز الصالة , بس بعدها الحمد لله مشي الحال و تمت على خير و ان شاء الله عقبال تمام الفرحة و عقبال احبابك و كل الغاليين

17 الكاتب منى, on 07-11-2008 16:07
مية هلا أمونة

الله يسلمك و يبارك بعمرك و باولادك الحلويين , الحمد لله ان الي طلعلك بس المسج لان الي خربوا الموقع الله لا يوفقهم حطوا فيه شغلات ما بتنحكي و لا بتنشاف , حسبي الله و نعم الوكيل

18 الكاتب منى, on 08-11-2008 05:32
حبية ألبي ام ياسمين عسل مصر كلها نورتي يا احلى قمر

الله يبارك فيك و بقلبك و بعمرك ,دعواتك غالية كتير كتير , ما بقى اعرف كيف ممكن رد على تعليقك , ان شاء الله الك متل هل الدعوات و أحلى و اكتر يا رب الك و لكل الغاليين على قلبك
شوفتك و ردك الحلو عندي احلى هدية , بس اكميد ببقى طمعانة بوصفاتك المصرية الغيررر شكل
ان شاء الله تجربي هل الكب كيك و يعجبك
مية هلا ام ياسمين

19 الكاتب رنا, on 08-11-2008 20:49
اول شي الحمد لله على سلامة الموقع والله يجازيهن يلي عملوا هالعملة ...لا وشو هالقرف يلي حطوه بداله شي بيشيب شعر الراس ...قال دخلت ششوف اذا مشي حال الموقع ومالاقي غير فتحتلي هديك الصفحة قلت ياربي شو هاد والله انا بعمري مادخلت على هيك شي وطلع بالاخير اولاد ....شو الواحد بده يحكي هنن يلي حاطينها ليسيؤا لسمعة صاحبته بس على كل حال انتي لاتزعلي وهنن عملوا بأصلهن لانه الاناء بمافيه ينضح
المهم بالنسبة للكب كيك طلع كتيررر طيب ولذيذ وطار بدقيقة وصورته بس ياستي الصور علقو بالموبايل لانه الوصلة منزوعة ...رح نزلهن باقرب وقت بس عندي كم سؤال
انا الخليط يلي عملته طلع كتير بالنسبة للقالب اللي عندي لانه كتير صغير القالب
قام اضطريت اني استنى كل صينية لتطلع من الفرن واستوو معي تقريبا بربع ساعة ياترى يلي عملته بيأثر ؟؟انا شفت انه اول وجبة كتيييير نفشت بس الباقي نفشوا عادي بس قلت يمكن لانه عبيتهن بالورق بعدين بالقالب يعني نقصت الكمية عن اول مرة ..
وتاني شي ممكن استغني عن الموز ؟؟وكمان بدي اسأل الشوكولا يلي احطها دايبة ولا قطع ؟؟
طووولت عليكي بس سامحيني ناوية ارجع اعمله بكرا بس بالشوكولا

20 الكاتب منى, on 09-11-2008 06:40
هلا سلاف

صباح الورد و الف و الياسمين
هنا على قلبك و قلب كل العيلة على كل وصفة جربتيها , كتير انبست ان الوصفات عجبتك

كان في فكرة ان نعمل منتدى بالموقع , ان شاء الله بيصير خير . الله يسامحك شو واخذك و ما واخذك , الرد الطويل دليل على الاهتمام :zzz

ان شاء الله تجربي هل الكب كيك و يعجبك و لا تنسي تخبريني

21 الكاتب منى, on 09-11-2008 06:50
هلا رنونة

الله يجازيهن بالدنيا و الاخرة , حسبي الله و نعم الوكيل , احسن الشي :roll

يلا عم استنى الصور و الي عملتيه ممكن يأثر شوي بس مو لدرجة ان ما ينتفخوا , و بياخدوا معك بالفرن حسب فرنك
كل واحدة فينا بتفهم على فرنها ,
الموز اساسي في الوصفة , في غير وصفات في الموقع من دون موز و الشوكولا قطع صغيرة ..

لبا طولت و لا شي على عيني و راسي رنونة

22 الكاتب muna.g.7, on 09-11-2008 10:32
ولا يهمك اختي منى القافلةتسير واحنا كلنا قلوبنا معاكي وندعيلك والف الف مبروك على كل الماسبات الحلوة وانشاء الله ابارك لك قريب جدا على الطبخة الالف انا اموت في كل انواع الكيك واكيد لما يجتمع الموز بالزبادي قصة ثانية

23 الكاتب منى, on 09-11-2008 10:44
هلا منونة

و الله اشتقت لحيكاتك كتير كتير , الله يبارك بعمرك و بقلبك و ببدنك
اكيد اذا جربتيها عم استنى رايك

24 الكاتب بدور, on 09-11-2008 22:01
الله لا يحرمنا من موقعك الحلو والمميز كتير كتير منى الحلوة..
ألف مبروك رجوع الموقع بالسلامة والله يجازي يلي كان السبب يا رب!
و ألف مبروك الوصفة ال 500 بالموقع و عقبال ما اتعلمهم كلون و يصيروا 1000 و 2000 كمان

و ألف مبروك خطبة اخوكي والله يتمملون بالخير يا رب ويحميهون و تشوفوا على قدوما كل الخير

والله يسلملنا ايديكي الحلوين يلي بيلتفوا بالحرير والله..

هالأكلة من زمان مشتهية اتعلمها ونشالله رح تكون على دياتك متل كتير اكلات غيرها.

الله يخليلنا ياكي و يباركلك يا رب

25 الكاتب منى, on 10-11-2008 09:05
هلا بدورة

الله يجازيه الجزاء الي بيستحقه..
الله يخليك على الدعوات الغالية , ربي يباركلهن و يبارك فيهن هل العرسان الحلويين

جربيها و شوفي شو سهلة و لا تنسي تخبيلي قطعة

26 الكاتب سلاف, on 10-11-2008 08:02
امبارح جربت الكب كيك وشو بدي قلك يامنى ما بعرف ؟؟ :zzz

عنجد صدقو اللي سموكي ملكة الكب كيك والله انتي ملكة الشيفات يسلمو هالايدين يارب طلع بجنن متل اللي بالصوره والطعم ولا اروع من هيك المهم امبارح كانت عندي رفيقتي وراحو 12 قطعه واليوم ولادي الاتنين من لما فاقو قالولي ماما بدنا كيك 00 فقررت اعمله مره تانيه

الله يجزيكي كل الخير منى 000

27 الكاتب منى, on 10-11-2008 09:04
هلا سلاف

هنا و ريتو الف عافية و صحة على قلبك و قلب القطط الحلوة و على قلب ضيوفك

خجلتيني يا قمر بهل الكلام الحلو
متل حكايتي انا هلأ متعطلة عندي محضرة الطعام لهيك عم دور على وصفات ما بدها خفق و هل الكب كيك ما عم لحق منه , هنا و عوافي :zzz

28 الكاتب رنا, on 11-11-2008 06:41

هي الصورة متل ماوعدتك

29 الكاتب منى, on 11-11-2008 06:44
مممم بتشهي كتير

الف صحة و هنا و عافية رنونة و الف شكر ليك على الصورة

30 الكاتب الدمشقية, on 19-11-2008 12:16
حبيبتي منى إن شاء الله ألف مبروك بخطبة أخوكي وربي يتمم فرحتكم على خير يارب :grin

وألف مبروك على عدد الوصفات وإن شاء الله من تقدم لتقدم أكتر يا رب

حبيبتي إن شاء الله بدي جرب الكب كيك بكره (طبعاً لأنه أخواتي وولادهن بيكونو عنا بالبيت) :zzz

وتصوري يعني من كتر الأكلات يلي عم طبقها من هالموقع (ربي يسلم ايديكي عليها :zzz

) اشتريت من يومين بتيفور من السوق (يعني شهوة

) والله طعمهن مو زيادة فقالتلي ماما والله يلي عم تعمليه بايدك اطيب بكتير طبعاً والفضل الك حبيبتي

وطبعاً أنا بقلك مين عم يخرب هالموقع وهو واحد من اثنين إما واحد عم يجرب بهالأكل الطيب فعم يزيد وزنه ولهيك خربه :cry

أو واحد مرته ما عم تعرف تعمله أكل طيب من هالأكلات

حبيبة قلبي ولا يهمك وربك أكبر من الجميع ومنقول ربي يهدي هالشباب ويبعدهن عن الحرام يا رب

31 الكاتب سارونات, on 24-11-2008 19:18
السلام عليكم و رحمة الله و بركاته
يا اختي الدمشقية دمك خفيف و عسل :grin

ضحكتيني
و انا زعلانة شوي لان ساويت الوصفة اليوم و ما ضبطت معي
اختي منى انا معودة ساوي كاب كيك من قبل و عندي الهن 3 وصفات الحمد لله ضبطو من اول تجربة اثنين بالفانيلا و واحد شوكولا ان شاء الله ببقى ابعث الوصفات بالمستقبل و ان شاء الله تجربوهم و يضبطو معكم
هلأ بدي قلك اللي صار معي تحتى نعرف شو المشكلة انا اتبعت الخطوات بالضبط و المقادير كمان و الفرن و كل شي و الكاب كيك نفش و شكله حلو و ريحته بتجنن لكان شو المشكلة يا ترى

) عم استظرف دمي :grin

)) المشكلة هيانو ظل ابيض يعني ما نضج و خليتو ل 35 دقيقة و لانو ما احمر قمت شغلتو شوي من فوق تحتى يحمر فاخد وقت بس احمر شوي اما لما طالعتو لقيتو عجين من جوا يعني ما نضج ما عرفت شو السبب
يا ترى شو السبب

لان عبالي عيد جربو مرة تانية
بالتوفيق
سلام

32 الكاتب منى, on 25-11-2008 06:10
هلا دمشقية

الله يبارك بعمرك و ببدنك و دينك يا حق .
شو ضحكت على هل الابن الحلال الي عم يخرب الموقع :grin

, الله يهديهم و يلهيهم بشي يفيدوا منه و يستفيدوا

هنا و عافية على كل وصفة جربتيها من الموقع و عجبتك , و بوسات كتيرة لاولاد اختك و تبقى لا تنسي تخبريني شو صار باختك , بالي عندها :roll

33 الكاتب منى, on 25-11-2008 06:13
هلا سارونات

ما عرفت تمام سبب المشكلة الي صارت معك , كيف اتحمروا من برة و قلبهم لسا سائل , ممكن تكون درجة الفرن عالية , او انك خبزتي الكب كيك على الرف السفلي في الفرن ؟ اذا لا هيك و لا هيك خليه المرة التانية اكتر لان الوقت بيختلف من فرن لفرن , و كتير احيان بيكونوا زاكرين ان الوصفة بتاخد 20 دقيقة انا بتاخد معي 40 , اكيد بتفهمي على فرنك ما دام زبطت الكب كيك معك من قبل

34 الكاتب سارونات, on 25-11-2008 15:58
السلام عليكم و رحمة الله و بركاته
جازاك الله خيرا اختي منى
انا خبزتهم في الرف الاوسط و درجة الحرارة 180
وبالتالي بيظل احتمال واحد هو انه يمكن كان بدهن وقت اطول بالفرن
ان شاء الله بالمرة الجاية بخليهم تحتى يحمرو
اختي منى سمعت عن شي اسمه صوص التمر بيمحط على الكاتو بتعرفيه شي لان دورت عليه و ما لقيت اي معلومة عنه و عبالي ساوي كاتو التفاح و بتعرفي لهلأ ما ضبطت معي التوفي فهل في شي صوص بديل بعرف يمكن بتصير بلا صوص بس اشتهيت ساويها بصوص لان بيطلع شكلها و طعمتها مختلفين بالمختصر الصوص بيعطيه برستيج للكاتو :grin

بالتوفيق
سلام

35 الكاتب الدمشقية, on 27-11-2008 06:29
ياستي جربته وطلع شي بياخد العقل :zzz

جربته يوم الجمعة الماضي واليوم إن شاء الله بدي ارجع وساويه مرة تانية :grin

واكلت منه خالتي (ورغم إنها ما بتحب الكاتوهات يلي بتنعمل بالبيت يعني بالعادة بتساويه بايدها بس ما بتاكل منه) طار عقلها فيه وقالتي طيب كتير وابنها قالي الله يخليكي عازم رفقاتي ساويلي يوم يلي بيجو منه لأنه طعمه كتير طيب :grin

بس بدي اعرف غير الموز شو ممكن حط لأنه في منهن ما بيحبو الموز :upset

36 الكاتب منى, on 02-12-2008 12:57
هلا دمشقية

ألف ألف هنا و عافية على قلبك و قلب كل ضيوفك حبيبتي و خصوصا خالتك

هلا انا مرة كان عندي بس موزة واحدة لهيك كملت باقي الكوب بتقاح مبشور و طلع طيب :zzz

37 الكاتب فله, on 09-01-2009 23:18
السلام عليكم ورحمةالله وبركاته تسلم ايديكي حبيبتي على الكب كيك الروووووووعه الله يعطيك العافيه ويبارك في عمرك بدي من بعد اذنك تعملي كيكة الزبيب او ( الانجلش كيك ) ومشكورة حبيبتي

38 الكاتب منى, on 10-01-2009 06:41
هلا فلة

مية اهلا و سهلا فيك بالموقع , نورتي اختي و تكرم عيونك على الوصفة الي طلبتيها

39 الكاتب marmour, on 06-11-2011 11:32
مرحبا يامنى انا جربت كل انواع الكيك حتى الاسفنجي وكلها تقريبا نجحت بس الكب كيك مابعرف شو قصتو جربت مثلا هادا تلات مرات طعمتو طيبة بس معجن شوي مع اني ملتزمة بكل شي :cry

40 الكاتب منى, on 06-11-2011 19:50
لازملو وت اكتر بالفرن لان بصورة عامة كيكات الفواكهة بتاخد وقت اطول

41 الكاتب marmour, on 07-11-2011 10:58
بس هو عم يبلش يحترق عم طفي عليه وبيطلع لسه معجن شوي والحرارة عندي 180 شو رايك

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 06/11/2008 )

< السابق		التالى >

[ عودة ]