L2ma.com | لقمة طيبة | L2ma.com | لقمة طيبة | سلطة البطاطا بالزبادي على الطريقة التركية | البطاطا, · , على, حتى, الجزر | L2ma.com

القائمة الرئيسية

الأكثر تصفحاً

سلطة البطاطا بالزبادي على الطريقة التركية

الكاتب/ منى

06/11/2008

سلطة خالة بتول
سلطة البطاطا بالزبادي على الطريقة التركية

السلطة اليوم اتعلمتها من خالة بتول و مع أنها خالة امي بس هي أصغر من امي و لحل هذه المعادلة الصعبة لازم تعرفوا أن نانا فدوى أكبر ولد بين 12 ولد ما شاء الله لا قوة إلا بالله و خالة بتول أصغر بنت , لهيك أمي أكبر من خالتها بكم سنة ..

نحنا ما كتير متعودين على استخدام اللبن مع خضار غير الخيار أو الخس أو البقلة , أما الأتراك كتير بيستعملوه حتى مع خضار ما بتخطر على البال مثل البندورة مثلاً أو مع البطاطا و الجزر . السلطة بتطلع طيبة و تغيير و خصوصاُ لمحبي الأشياء الجديدة .

بالصحة و الهنا

نصف كيلو بطاطا ( 2 حبة كبيرة )
عصير نصف ليمون أو حسب الرغبة
4 ملعقة كبيرة زيت زيتون
رشة كمون
نصف كوب لبن
2 ملعقة كبيرة مايونيز
فص ثوم
1 – 2 حبة جزر
ذرة
ملح
فليلفة حمراء ناعمة
direction

·          تسلق البطاطا حتى تنضج ثم تقشر و تفرم ناعماً أو تهرس بين أصابع اليد حتى يبقى فيها بعض القطع الخشنة .

·          تتبل البطاطا بملعقتين من الزيت و عصير الليمون و القليل من الكمون ثم ترتب في طبق التقديم .

·          يبشر الجزر ثم يقلب بباقي الزيت على نار متوسطة لمدة 5 دقائق ثم يترك حتى يبرد .

·          يمزج اللبن و المايونيز مع الثوم المهروس والقليل من الملح حسب الحاجة ثم يسكب فوق البطاطا .

·          يوزع الجزر و الذرة فوق اللبن و يزين الوجه بالفليلفة الحمراء الناعمة ثم تقدم .

أفكار و تنويعات :

·          يمكن سلق البطاطا بمرق الدجاج أو مع مكعب ماجي .

أضافة إلى المفضلة (0) |

أقتباس | مشاهدات : 8102

تعليقات (23)

1 الكاتب منامينو, on 08-11-2008 12:05
السلام عليكم ورحمة الله وبركاته،،

حبيبتي منى، يسلمو إيديكي، مبدعة كالعادة. بس خليني أعطيكي طريقة ثانية لسلطة البطاطا المهروسة باللبن عالطريقة التركية مثل ما أخدتها من بنت تركية، وبيسمّوها بالتركي yourtlu ezme patates salatas1 وهي كالتالي:

المقادير: 4 بطاطا وسط - كوب لبن - نصف كوب مايونيز - ملح... الصلصة: كوب لبن - نصف كوب مايونيز - سن ثوم... للزينة: نعنع ناشف مطحون - سماق

الطريقة:
- نسلق البطاطا ثم نهرسها مع الملح. نخلط اللبن والمايونيز ثم نخلطهم مع البطاطا جيدا ونفردهم في طبق التقديم بالتساوي.

- لعمل الصلصة نهرس سن الثوم ونخلطه مع اللبن والمايونيز جيدا ثم نصبهم فوق طبقة البطاطس بالتساوي.

- نزين الوجه بعمل خطوط رفيعة مائلة من السماق والنعنع بحيث يكون خط من النعناع ثم خط من السماق، أو تزيني الوجه حسب الرغبة.

- تضعي القالب في الثلاجة قليلا حتى يتماسك ثم تقدميها.

وهاي يا ستي هي الطريقة الأصلية أو خلينا نقول طريقة مختلفة لسلطة البطاطا باللبن التركية. جربيها وقوليلي رأيك وما تنسي تدعيلي..

2 الكاتب منامينو, on 08-11-2008 12:09
نسيت أقول إنه حجم حبات البطاطا يكونو وسط، ولسرعة السلق فيكي تقطعي الحبات فبيستوو أسرع..

3 الكاتب سلاف, on 08-11-2008 14:48
شكلها الوصفه كتير طيبه رح جربها ان شاء الله بس ياضافة المايونيز لانه مع التوم واللبن بعطي طعمه بتجنن يسلموووووو منى

4 الكاتب سلاف, on 08-11-2008 15:09
منى لو سمحتي بدي اسألك بتعرفي شيئ كبة الارز ؟؟ مره دقتها عند وحده من صاحباتي لبنانيه وسافرت بس عجبتني شفت مقاديرها باكتر من موقع بس اذا عندك انتي طريقتها بدي جربها لأن ماعندي ثقه بس بطبخاتك الله يسلم هالايدين يارب وكمان سؤال الشوكه شو الها طرق طبخ عندك غير مع كبه بالسماقيه وغيرلحالها مع مرق اللحمه ؟؟ بعرف اسئلتي كتيره بس والله ماعاد النا غنى عنك الله يحفظك ويديمك

5 الكاتب منى, on 08-11-2008 20:00
هلا منامينو

ممممم وصفة كتير كتير بتشهي , يعني بالزور مسكت نفسي ان جربها اليوم , بكرة اذا الله راد
يا ترى شو معنى كلمة ezme ؟
الف شكر لك و يا ستي لما واحدة من تركيا تعلمني هيك وصفة اكيد رح تكون الوصفة الاصلية , الف شكر ليك على الوصفة

6 الكاتب منى, on 09-11-2008 06:00
هلا سلاف

بالفعل المايونيز مع اللبن غير , ان شاءالله تجربيها و تعجبك

كبة الرز بعملها و ان شاء الله بنزلها , بس هي مو لبنانية هي عراقية

الشوكي بعملها مع خضرة كتير و كمان بعملها غراتان غير عن الشوكي بزيت , و ان شاء الله الوصفات رح نزلها , بس انت طولي بالك علي

7 الكاتب منامينو, on 09-11-2008 06:43
يا هلا حبيبتي منى، صحة وهنا ان شاء الله.

يا ستي كلمة ezme معناها بوريه أو مهروس. وكلمة yogurtlu معناها باللبن، وحرف الجي هون مخفف كتير قريب من حرف الغين، وطبعا الكلمتين الباقيين هن سلطة بطاطس. يعني بيصير اسمها سلطة البطاطس المهروسة باللبن

.. وان شاء الله تعجبك.

8 الكاتب منى, on 09-11-2008 06:52
ممم , فهمت الكلمات الباقية ما عدا مهروسة

يلا بدي حط عندك دروس بالتركي , شو رايك :zzz

9 الكاتب منامينو, on 09-11-2008 07:02
طوّلي بالك، شو حكاية الدروس هالأيام؟

أنا يا دوب عمبمشي أموري بنفسي مع الأتراك والحمد لله، يعني بعتبر حالي مبتدئة باللغة. الله وكيلك بدل ما آخد منهن دروس تركي، عطيتهن بناء على طلبهن دروس عربي :grin

(أما بالتركي برضه)

((عشان بدهن يفهمو القرآن))... والله إحنا بنعمة كبيرة مش حاسين فيها.. بس بيني وبينك وأنا عمبدرسهن عربي بالتركي، قويت لغتي التركية شوي. أصل اللغة ممارسة.. :upset

10 الكاتب منى, on 09-11-2008 09:32
معناها جديدة لسا بتركيا
عم امزح معك لا تاكلي هم :grin

الله يجزيك الخير على الدروس الي عم تعطيها
ما شاء الله تبارك الله كم حسنة رح تاخدي اذا قراوا القران بسبب تعليمك

11 الكاتب muna.g.7, on 09-11-2008 10:13
الحمد لله على رجوع الموقع كل يوم ادخل خمس ست مرات واشعر بالحزن العميق لان فيه ناس بها المستوى الحقير اللي يخربون جهد ناس ابرياءفي حالهم يفيدون الناس ويساعدونهم بدون اي مقابل ولكن ما اقول الا عليهم من الله ما يستحقون

12 الكاتب منى, on 09-11-2008 10:31
اااااامين منونة , لان لو كان بس هاكر أفهم انهم بيحاولوا اثبات ذاتهم و مقدراتهم , بس الي صار اكبر من هيك بكتير
لا حول و لا قوة الا بالله و حسبي الله و نعم الوكيل

13 الكاتب رندوش, on 09-11-2008 12:11
وااااااااااااو بتشهي
اخير رجع الموقع حمد لله على السلامه

14 الكاتب منى, on 09-11-2008 13:15
الله يسلمك رندوشة يا قمر سالت عليك العافية

ان شاء الله تجربيها و تعجبك

15 الكاتب سارونات, on 09-11-2008 16:07
السلام عليكم و رحمة الله و بركاته
ساويتها امس و طلعت طيبة
و الله يجازيك كل خير اختي منامينو على تعليمك اللغة العربيةلغيرك لفهم القرآن و كمان على وصفتك
الله يوفقك الجميع
سلام

16 الكاتب منى, on 09-11-2008 18:24
هنا و عافية سارونات

الف صحة

17 الكاتب بدور, on 09-11-2008 22:09
فعلا شي جديد و مبينتو لذيذ كتير
والاحلى من مكونات الوصفة هو طريقة تزينها و تقديمها :zzz

ما شاء الله عليكي اديش انتي مزوئة و مرتبة
عبتعلم منك كتير افكار نشالله

يسلمو هالايدين يا رب..

18 الكاتب منى, on 10-11-2008 05:45
هادا بس من زووءك :zzz

الله يسلمك و يخليك و لا انحرم من هل الطلة الحلوة

19 الكاتب منامينو, on 10-11-2008 09:26
أختي سارونات، شكرا لذوقك. الله يوفقك ويبارك فيكي. وصحة وهنا على قلبك

20 الكاتب أم علي, on 10-11-2008 22:43
السلام عليكم كيفك ست منى ان شاء الله تمام ومبارك خطبة اخوك :grin

اعذريني صرلي فترة مادخلت تالموقع لاني كنت مشغولة بالبيت والاولاد وكمان لاني كان الموقع معطل :zzz

بس من اليوم رح افتح الموقع دائما وانتظر اكلاتك الشهية

وتسلم ايدك على هالاكلات الشهية وخصوصا شيخ المحشي منظرو لذيذ كتير :zzz

21 الكاتب منى, on 11-11-2008 06:32
هلا ام علي

ان شاء الله مشغولة بالخير و العافية
بتنوري دايما أختي و ان شاء الله تجربي شيخ المحشي و يعجبك

22 الكاتب آرام, on 06-06-2009 10:25
أخت منى المايونيز مذكور ضمن المقادير وغير مذكور في طريقة التحضير

23 الكاتب منى, on 08-06-2009 12:29
:roll

عن جد الف شكر الك لقراءة الوصفات و التنبه , تم التعديل .

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 07/06/2009 )

< السابق		التالى >

[ عودة ]