L2ma.com | لقمة طيبة | L2ma.com | لقمة طيبة | مكدوس الفاصولياء | لمدة, على, مكدوس, الفليلفة, المكدوس | L2ma.com

القائمة الرئيسية

الأكثر تصفحاً

مكدوس الفاصولياء

الكاتب/ منى

16/10/2008

مكدوس الفاصولياء

كل السوريين بيعرفوا و بيحبوا مكدوس البانجان , بس مو كلهم بيعرفوا مكدوس الفاصوليا بس اكيدة كلهم رح يحبوه , مكدوس سهل كتير و طيب كتير و حلاوته ان ممكن الكل يحضره بمقادير متوفرة ..

جربيه و ما رح تندمي ان شاء الله

بالصحة و الهنا

كيلو فاصولياء خضراء مبرومة
كيلو فليلفة حمراء حرّة أو حلوة ( 4 – 5 حبة )
3 كوب جوز مفروم خشن
2 فص صغير ثوم مهروس
ملح خشن حسب الرغبة
direction

·          تفرم الفليلفة ناعماً ثم تخلط مع الملح و توضع على مصفاة و تترك في البراد لمدة ساعتين . تنشر على طبق واسع مسطح في الشمس لمدة يوم كامل للتخلص من مائها .

·          تمشط الفاصوليا و تقطع لقطع خشنة , ثم تسلق في ماء مغلي مملح لمدة 5 – 7 دقائق أو حتى تطرى قليلاً و بنفس الوقت تبقى محافظة على قرمشتها ثم تغسل بماء بارد للحفاظ على لون أخضر مشرق و توضع على مصفاة حتى تصفى من الماءً .

·          يخلط الثوم و الفاصوليا و الفليلفة و الجوز و يضاف القليل من الملح إذا دعت الحاجة و يترك المكدوس في البراد لمدة نصف يوم .

·          يوضع المكدوس في مرطبانات زجاجية و يغمر بالزيت بحيث لا يبقى أي جزء ظاهر منه ثم يترك لمدة اسبوع حتى يحمض و يقدم مع الخبز العربي .

فكرة لذيذة :

الزيت الباقي من المكدوس له نكهة الفليلفة و الثوم و الجوز , يضفي طعماً لذيذاً لتنكيه سلطة البندورة و الخيار .

أضافة إلى المفضلة (1) |

أقتباس | مشاهدات : 4182

تعليقات (22)

1 الكاتب dado, on 16-10-2008 12:05
أول شي ألف ألف مبروك خطبة أخوكي وانشالله بتمام الفرحة وبالرفاه والبنين وعقبال أخي الوحيد كمان

إذا عزمتيني ما بقول لأ

.. لأنو زيارة حلب ما بتتفوت .. زرتها أربع مرات وعكتر ماحبيتها أصريت إنو زوجي يزورها لما ننزل عبى سوريا.. وهو كمان حبها كتير... حتى أكتر من الشام

بتعرفي... من زمان كنت حابة جرب مكدوس الفاصوليا.. دقته من شي عشر سنين عند خالتي بحمص ولسة طعمته عم تعن على بالي :zzz

منظر المرطبان بيشرح القلب .. رح جربها قريبا انشالله
سلام

2 الكاتب منى, on 16-10-2008 14:37
مية هلا دالو

اذا ما شالتك الارض بتشيلك عيوني يا عسل

ان شاء الله عقبال أخوكي و كل العايزين , يا ستي مع ان عدت علي خطبات خواتي التنتين بس خطبة الأخ غير , ربي يسعدهم و يهنيهم و يتمملهم بخير

ان شاء الله تجربيه و يكون متل الي دقتيه و أطيب , نورتي دالو

3 الكاتب ام دانية, on 16-10-2008 15:21
تسلم ايدك يا حلوة انا كتير بحب المكدوس وان شاء الله رح جرب اعمل منو مطربان صغير والف الف مبروك لاخوكي وخطيبتو وعققبال التمام على خير .اكيد معك حق انك ما تكوني فاضية هيك اكيد عازرينك بس الحمدلله انو غيابك علينا لفرحة حلوة وان شاء الله ايامك كلها حلوة عقبال اخي الوحيد كمانة قولو امين :zzz

4 الكاتب منى, on 16-10-2008 17:17
امين ام دانية

ايامك و ايامنا كلها حلوة و عقبال أخوكي يا حق

لا تنسي تخبريني اذا جربتيه

5 الكاتب abeer, on 16-10-2008 18:03
الف مبروك وعقبال كل الصبايا والشباب و الله يتتم فرحتكم 0 اي هيك خلينا نسمع خبر حلو والله لو انا بحلب كنت جيت باركتلك 0 وشو هالمكدوس يا عمي يا هيك الاكل يابلا انا بعمل مكدوس باذنجان كل سنة وسمعت عن مكدوس الفاصولياء بس ما جربتوه بس شكله بالصورة بيشهي 0

6 الكاتب Eman, on 17-10-2008 11:57
يا عيني على المكدوس ، أنا دقته من حوالي أربع سنين وطعمه كان طيب وقريب على الفاصوليا بزيت ..بإذن الله رح جربه لأن مقاديره متوفرة ..

فتقتيلي جروحاتي ، لأن حفل كتب كتاب أخي عرسه ما قدرت أحضرهم ،وهو أخي الكبير وأول عريس بالعيلة .. بس يالله شو بدنا نعمل هي ضريبة الغربة .. :sigh

الله يتمم له على خير ، وتكون خطيبته امرأة صالحة تسعده ،وربنا يجعل كل أيامك فرح يا منى خانوم .

7 الكاتب منى, on 18-10-2008 13:59
هلا عبورة

أمين يا رب أختي الف شكر ليك على الدعوات الحلوة , و اذا نويتي رح اقلك مية اهلا و سهلا بتنور حلب حبيبتي
ان شاء الله تجربي هل المكدوسات , مستاهل سهل و طيب

8 الكاتب منى, on 18-10-2008 14:02
هلا امولة

ما كتير بيشبه الفاصوليا بزيت بس طيب كتير , ان شاء الله تجربيه و يعجبك

سلامة جروحاتك و ان شاء الله بتحضري مواسم البقية يا ستي شو بدنا نعمل , كل واحد الا ما يتنغص عليه بشي شغلة , الله يخليك على هل الدعوة الحلوة , اامين يا حق و ايامك يا أمولة العسولة

9 الكاتب أم ساطور, on 19-10-2008 14:44
السلام عليكم ياحلوين شو اخباركون ان شاءالله كلها تمام ,كيف حالك يااخت منى وان شالله الف مبروك وعقبال ولادك .ان شاءالله رح جرب اكلتك لانو خرطت مشطي وتسلم ايدك بكل الاحوال .

10 الكاتب ام دانية, on 20-10-2008 11:04
السلام عليكم يا احلى ست منى ان شاء الله تمت الاخطبة على خير انا عندي سؤال؟ انا كتير حابة اعمل المكدوس بس في مشكلة انو ما عندي مكان بحسن احط الفليفلة على الشمس حتى تنشف ميتا ياتر في عندك طريقة تانية لتصفاية الفليفة ؟ :cry

11 الكاتب منى, on 21-10-2008 17:13
مية هلا اختي ام ساطور

الله يسلمك و يحفظك اختي و عقبال ولادك و كل حبايبك , يلا عم استنى تجربيها و ان شاء الله تعجبك

12 الكاتب منى, on 21-10-2008 17:14
مية هلا ام دانية

لسا الخطبة التنين الجاية , ربي يتمم على خير

اختي ممكن تستعملي دبس الفليلفة و اذا مو متوفر ممكن تنشفي الفليلفة في الفرن شوي على نار هادية كتير لحتى تظبط معك , كتير من الاتراك في المانيا أو انكلترا بيعملوا الدبس فليلفة بهل الطريقة لان ما في عندهم شمس منيحة دايما

13 إن الله مع الصابرين
الكاتب لارا مينا, on 06-11-2008 04:35
صباح الخيرللأخت منى ولجميع الأعضاء ولموقعنا الحبيب ,,, مباشرة من السرير إلى جهاز الكمبيوتر كعادتي ولا أحد يتخيل فرحتي عندما رأيت بداية الصفحة تتفتح كالزهرة تدريجيا بألوانها الرائعة بدل تلك الصفحات السوداء التي كانت تشعرني بالإكتئاب الشديد,, واول كلمة نطقتها الحمد لله يارب الحمد لله - ألف مبروك أختي على فتح الموقع ولكل من حب هذا الموقع وألف مبروك على خطبة أخونا العزيز وللأسف كنت حابه أبارك بوقتها حتى يبقى التعليق للذكرى بس للأسف....فبلغيهم تحياتنا ودعواتنا لهم وباركيلهم بالنيابة عن صوتنا, وأي مساعدة أختي منى بالنسبة للموقع أنا حاضرة بس لايغيب مرة ثانية والمتسببين الله يحاسبهم دنيا وآخرة ..ولكي كل الشكر والتحيات .

14 الكاتب منى, on 06-11-2008 10:27
مية هلا لارا

خليلي قلبك لارا على هل المحبة كلها , الله يبارك فيك و بعمرك و بوقتك كله يا رب ..
الشكر ليك على القلب الطيب و المحبة الصادقة , و ان شاء الله لا بقى تنعاد :roll

..

نورتي لارا

15 الكاتب آرام, on 13-10-2009 05:49
مرحبا أخت منى
أخيراً عملت هالمكدوس .. ما كنت أعرفه من قبل .. من شوي حطيته بالمرطبانات ورح أنتظر الأسبوع لحتى أشوف النتيجة .. ماني متخيل كيف راح تكون الطعمة ولو أني متأكد من النتيجة سلفاً .. ألف شكر إلك أختي الكريمة.

16 الكاتب منى, on 16-10-2009 12:20
ان شاء الله رح يعجبك كتير , انا بحسه اخف من المكدس العادي , و اسهل بكتير :zzz

17 الكاتب آرام, on 21-10-2009 05:44
كمان صباح الخير

عن جد شي بياخد العقل .. البارحة أفطرت منه وكان ألذ مما كنت متخيل .. رح أعمل كيلو تاني هاليومين :zzz

وهلأ بالإذن لأن إبريق الشاي بلش يغلي وعصافير بطني طلعوا مظاهرة يطالبون بالمكدوس

18 الكاتب منى, on 21-10-2009 10:43
صباح الخيرات و الليرات

الف هنا يا رب على كل لقمة من هل المكدوسات , يا عمي مين ادك , اذنك معك و ريتو ان شاء الله الف صحة :zzz

19 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 18-02-2010 09:41
جهزتها مبارح وحفظتها بمرتبانات بعد اسبوع ان شاء الله متشوقه لادوق الطعم :roll

20 الكاتب منى, on 18-02-2010 19:24
ان شاء الله بيعجبك , حامض و حد و ما في اسهل منه :zzz

خبريني رايك

21 الكاتب ام رومل, on 29-10-2010 20:39
السلام عليكم منى
بعد زمان
يصير الفليلفله ماتتنشف بالشمس لانو هون بالسعوديه مافي بلاكين ففي صعوبه بالموضوع

22 الكاتب منى, on 09-11-2010 07:39
لا ما بتقدري , بس ممكن تستعملي دبس الفليلفة عواض الفليلفة الفريش , بيطلع كمان يمممممم

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 05/01/2009 )

< السابق		التالى >

[ عودة ]