L2ma.com | لقمة طيبة | L2ma.com | لقمة طيبة | سندويش البطاطا | حتى, البطاطا, كبيرة, · , السندويشات | L2ma.com

القائمة الرئيسية

سندويش البطاطا

الكاتب/ منى

28/09/2008

سندويش البطاطا

يعني البطاطا رح لفها بالخبز و أكلها , هيك قالتلي ماما لما قلتلها على سندويشة البطاطا …

بس بعدها غيرت رأيها و أتمنى أنك تجربي هل السندويش لأن سهل و طيب كتير و حتى أولادي قالوالي بيشبه سندويش الشاورما .

لحتى تكون السندويشة طيبة لازم تدعميها بالمايونيز و المخلل و إلا رح تطلع ناشفة و تنتزع كلها .

بالصحة و الهنا

2 حبة بطاطا كبيرة
4 – 5 رغيف خبز عربي من النوع الرقيق أو خبز صاج
8 – 10 ملعقة كبيرة مايونيز
2 فص كبير ثوم مهروس
بندورة مفرومة شرائح رقيقة ( اختياري )
كتشاب
مخلل قتي أو خيار مفروم لشرائح
direction

·          يمزج المايونيز مع الثوم و يمكن استخدام المايونيز من دون ثوم , تقشر البطاطا و تقطع لأصابع ثم تغسل و تترك حتى تجف , تقلى حتى تشقر .

·          يفتح الخبز العربي و يدهن بملعقة كبيرة من المايونيز ثم يغطى بالبطاطا و شرائح المخلل و البندورة و أخيراً يضاف الكتشاب حسب الرغبة .

·          تلف السندويشة و توضع على صينية, تكرر العملية حتى الانتهاء من كل كمية البطاطا .

·          تكبس السندويشات في سخانة السندويشات حتى تقرمش من الطرفين ثم تقسم كل سندويشة إلى قطعتين باستخدام سكينة حادة و تقدم فوراً .

فكرة سريعة :

لدى إعداد كمية كبيرة , ترتب السندويشات في صينية غير لاصقة و تغطى بصينية ثانية أصغر منها كي تكبس السندويشات ثم تخبز في الفرن حتى تقرمش من الطرفيين .

أضافة إلى المفضلة (1) |

أقتباس | مشاهدات : 8035

تعليقات (26)

1 الكاتب dado, on 28-09-2008 17:11
وليييييي شو هاد!
يا إمي شو صار فيني.. لسة بقيان عنا 3 ساعات عالفطور.. وفتحت الموقع لآخد فكرة وقمت شفت صورة البطاطا
كنت ناوية اعمل فتة اليوم... غيرت رأيي.. بطاطا يعني بطاطا
يسلمو دياتك.. عنجد المكونات يلي اخترتيها نفس المكونات يلي بيحطوها بالمحلات المختصة بسندويش البطاطا
شكرا وصحة على قلبك وقلب ولادك

2 الكاتب منى, on 28-09-2008 19:09
مية هلا دالو

ولي على ألبي يلا , هلا بتكوني عم تاكليهم و تتمزمزي ان شاء الله مية صحة و ألف هنا على قلبك , و الله أختي هي الوصفة خصوصي للنباتيين أو الي حابب يخفف من اللحوم , كلك زووء أختي و ان شاء الله تجربيها و تعجبك

3 الكاتب أم الليث, on 28-09-2008 19:18
أنا من عشاق البطاطا المقلية وكتير بحب أعمل هيك سندويشات يسلموا إيديك

4 الكاتب منى, on 28-09-2008 20:43
هلا ام الليث , ان شاء الله رح تعجبك الوصفة و خصوصا لان بتحبي البطاطا , ان شاء الله تجربيها و تكون على زووءك

5 الكاتب ام ناصر, on 28-09-2008 21:45
فنانه يامنى ماشاء الله عليكي وعليكي افكار انا بموت في البطاطاتسلم دياتك يارب

6 www.12ma.com
الكاتب ام عبداله, on 28-09-2008 23:05
تسلم يديكي علي هالوصفه الرئعة واتمني ان تراسليلي علي الاميل لان عندي افكار طبخ رائعة وشكرا لكي

7 الكاتب غيث, on 03-10-2008 07:24
السلام عليكم وكل عام والجميع بالف خير والله اشتقنا لموقعنا الغالي سلامتكم ما كان الموقع بالعيد عم يشتغل اظن ولا بس عندي مهكر والله كتير انزعجت عليه يالله الحمد على رجعتكم بالسلامة والله يصطفل باللي كان السبب

8 الكاتب منى, on 03-10-2008 10:43
هلا ام ناصر

الله يسلمك و يحفظك من كل شر أختي , ان شاء الله تجربيها و تكون طيبة و على زووءك

9 الكاتب منى, on 03-10-2008 10:45
هلا ام عبد اله

ان شاء الله اختي و مشكورة على التواجد الطيب

10 الكاتب منى, on 03-10-2008 10:47
هلا غيوثة

الموقع كان مهكر من أول يوم عيد عندنا بسوريا , بتحسي شغل ولاد حلال بتعرفي العيد ما حدا فاضي لحدا :roll

..

الحمد لله هلا مشي الحال و ان شاء الله ينعاد عليك و على كل المسلمين بخير و سلام , مية هلا

11 الكاتب بدور, on 03-10-2008 16:07
يا سلام على افكارك الروعة يا منى و حمدلله على سلامة موقعك يلي ما منئدر بلاه ابدا ابدا

عنجد شو بيخطرلون يعني بس يعملوا ضرر

الله يجازيهم يا رب.

البطاطا المقلية لحالها لا تقاوم, شلون اذا عملتيها بهيك سندويش مشهي ومزينة وصفتك بهالصورة البتجنن والله أد ما كنت شبعانة ما بئدر اقاوما

الله لا يحرمنا من افكارك الحلوة يا رب وكل عام و انت و الموقع و كل يلي بتحبيون بألف خير

12 الكاتب منى, on 03-10-2008 18:23
هلابدورة

الله يخليك يا قمر سالت عنك العافية و الخير دايما , ان شاء الله تجربيها و تعجبك و ما دام كل عام و انا و الي بحبهن بخير معناها وصلتك عيدية

13 الكاتب رنا, on 04-10-2008 13:07
الحمدلله على سلامة الموقع العزيز ويخرب بيته اللي عم يعمل هالعملة وشو حاطط 5 اصابع بوجهنا يعني ليش متقصدين هالموقع بالذات ؟؟والله شي غريب
يلا انشالله تكون اخر مرة
بس السندويش رائع جدا وانا بعمله بنفس طريقتك بس بلا تسخين المرة الجاية رح جرب سخنه :grin

14 الكاتب منى, on 04-10-2008 14:54
شايفة رنونة :sigh

ما بقى في غير موقع طبخ يطالعوا عضلاتهم عليه , بس بسيطة الله يمهل و لا يهمل :roll

هو التسخين رح يخليه يممي , جربيه و ان شاء الله بيعجبك

15 الكاتب abeer, on 06-10-2008 13:41
مرحبا منى كيفك اشتقتلك واشتقت لطبخاتك يسلمو ايديك على هالطبق الطيب وخصوصا انا بحب البطاطا بكل اشكالها0رجعنا من الصيفية وبدأنا بالشتاء وكنت حابة اسالك عن شوربة الكشك وهل انتو بتعملو الكشك بحلب

16 الكاتب منى, on 06-10-2008 14:07
هلا عبورة

ان شاء الله تجربيه و يعجبك , اما الكشك فنحن بحلب لا نعمله و لا نعرفه, بس انا الصيفية الماضية ساويته على ايدي و طلع كتير منيح , نقعت البرغل باللبن شي يومين تلاتة و هو مغطى و بعدها فردته على الشمس لحتى نشف كتير بعدها طحنته بالمولينكس لحتى صار بودرة

شوربة الكشك ما بعرفها , حبيت فيدك بس ما عندي معلومات عنها :roll

17 الكاتب سارونات, on 06-10-2008 15:20
السلام عليكم و رحمة الله و بركاته
جازاك الله خيبرا اختي منى و الله يخليلك امك و يحفظها
اختي منى بدي اسألك عن الخبز العربي ازا بتساويه بالبيت دورت كتير عوصفات و لقيت طرق مختلفة بس حبيت اسألك عن طريقتك لان بدي شي مضمون
بالتوفيق
سلام

18 الكاتب منى, on 07-10-2008 04:56
مية هلا أختي

الصراحة ما بعمله , بس حاطة بذهني ان جربه , أكيدة ببقى بنزل الوصفة

19 الكاتب سارونات, on 12-10-2008 21:56
السلام عليكم و رحمة الله و بركاته
:cry

جيت تحتى شوف تفاصيل الوصفة مشان ساويها و اذا بي اتفاجأ بالانسة سخانة الساندويشات اللي ما بعرفها و لا التقيت فيها من قبل فينا نخبزها بالفرن او نشويهاعلى الشواية عادي او ما بينفع ازا بينفع فيا ريت تقوليلي كيف
و كمان هل فينا نستعمل كريم الثوم لانو اخف من المايونيز و كمان هلأ مو متوفر عندي المخلل بشو فيني استبدلو او ما بينفع استبدلو بشي
بالتوفيق
سلام

20 الكاتب منى, on 13-10-2008 09:20
و عليكم السلام أختي

أكيد بيصير و أصلا انا لما بيكون عندي ضيوف كتير و عاملة اكتر من 40 أو 50 سندويشة مو معقولة سخنهم على السخانة , برتب السندويش بصينية تيفال و فوق السندويشات بحط الصينية الاصغر من الصينية الاولى لحتى تكبس السندويس و ممكن حط تقل خفيف فوقهاو بخبزهم في الفرن لحتى يتحمص أول طرف بعدها بقلب السندويش على الطرف التاني :zzz

, كريم الثوم البي من دون بيض قصدك ؟ ممكن بس ما رح تطلع طيبة , شوفي اختي هل السندويش كتير بسيط و اذا غيرتي شي واحد ما رح يطلع طيب , و المخلل اساسي بالوصفة , فيك تستني لحتى يتوفر

21 الكاتب gsm, on 01-09-2009 21:53
اهلين منونة اليوم عملت هل الساندويش كتيير طلع طيب ولذيذ بس انا عملت شغلة :roll

انا لغيت المايونيز وكترتله المخلل وحطيتله اوراق خس طلعت روعة بس طبعا ما سخنتها كتيير عجبتني خصوصي صرلي فترة ما عم اقبل اكل شي عم اطبخ وما عم احط لقمة بتمي :cry

يسلموا ايديك منونة والله يخلينا ياكي يا ست الكل ومعلمة الساندويشات

22 الكاتب منى, on 02-09-2009 15:50
يا ستي اعملي شو ما بدك المهم تقبل نفسك , انا كنت بوحامي الحس رغوة الصابون , مو من قليل انا من بيت الصابوني :grin

هنا و الف عافية يا رب و ان شاء الله فترة و بتمرء على خير تكوني انت و النونو الحلو بصحة و عافية يا رب

23 الكاتب نوارة, on 07-01-2010 16:18
يعني جد الله لا يحرمنا منك ومن لقمة طيبة
امبارح جربت هالصندويش كتير حبو محمد وكمان واخيرا جربت عجينة العشر دقائق عملت ب جبنة وعملت ب فليفلة كمان شقد طلعت طيبة وناجحة
يعني دائما وقت بكون محتارة او حدا بدو يجي لعندي او بدي اعمل شي تغير شكل لقمة طيبة بتكون المنقذة

24 الكاتب رغد غسان علاء الدين, on 27-02-2011 12:34
وااااااو ما شالله يا منى..حتى من سندويشة البطاطا عملتي إبداع..هللئ كللو تمام بالنسبة إلي غلا بندورة..جربتها مرة ما زبطت معي بنوب بنوب..أنا بعملها نفس طريقتك لكن بدون إضافة البندورة..وعنجد طلعت هيك أزبط..أو الشغلة شغلة أذواق رغم إني بحب البندورة..لكن ما حسيت محلها هون..وعلى كل..صحة وهنا على قلب الكل

25 الكاتب منى, on 27-02-2011 18:27
هلا نوارة

صحتين حبيبتي على البك و الب محمد , ريتو عوافي يا رب
الله لا يحرمني من هل الرفيقة و ربي يديم الود دوما

26 الكاتب منى, on 27-02-2011 18:37
هلا رغودة

اي صح مو كل الناس بتفضلها لهيك كتبت جنبها اختياري

انا على الاغلب عم حط البندورة بجبنب البطاطا بقى الي بيحب بياخد منها و الا نو براحته و هيك الواحد بيرضي جميع الاذواق

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 28/09/2008 )

< السابق		التالى >

[ عودة ]