مهلبية الشوكولا

كل سنة و الجميع بخير و فضل من الله سبحانه و تعاله و بأفضل صحة و أحسن حال ..

رجعنا لحزورتنا و على اعتبار ان الحزورة الماضية كانت شوي صعبة هل المرة أسهل , و الوصفة اليوم طول ما عم حضرها قمة في الاستمتاع بالرائحة الرائعة ,, ممممم و هلأ انا عم اكتب و عم اتمزمز .. نيااالي

شو الوصفة الظاهرة بالصورة ؟

الاعلان عن اسم الوصفة و طريقة تحضيرها يوم الأثنين ان شاء الله .

في أمان الله

---

اليوم وقت الكشف عن اسم طبقنا المميز و كتير أخوات عرفت الاجابة الصحيحة و منهم بعدوا كتير , الوصفة اليوم مهلبية الشوكولا و على قد مو سهلة و على قد مو طيبة ما بينشبع منها , إدمان من الصغار و الكبار , هادا الي صار بعيلتي عن جد تحضيرها ما بياخد أكتر من خمس دقائق .

أنا ما بحب المهلبية تكون سميكة كتير لهيك استخدم 3 ملاعق من النشاء لتحضير المهلبية , هي بتكون طرية و بتدوب في الفم و ممكن زيادة كمية الكورن فلاور إذا بتحبيها أسمك شوي .

أكيد كل ما استعملتي نوعية شوكولا منيحة بالوصفة رح تكون النكهة أطيب و فيك تستعملي أي نوع بس يكون شوكولا على حليب .

و فكرة لذيذة جداً اضافة بسكويت بالشوكولا للوصفة , و خصوصاً لعشاق الشوكولا , جودي قالتلي يا ماما مهلبية البسكويت لازم يكون اسمها إدمان الشوكولا على اعتبار أن هل الكاتو بتسميه عشق الشوكولا  .

بالصحة و هنا

 

ليتر حليب ( 4 كوب )
ثلاث أرباع كوب سكر
علبة قشطة أو قيمر  أو ثلاث أرباع كوب كريم فريش
3 ملعقة كبيرة كاكاو بودرة
3 ملعقة كبيرة كورن فلاور
3 مكعب شوكولا على حليب

تعليقات (52)

1  الكاتب Eman, on 18-09-2008 21:00 أعتقد كاسترد شوكولا ،اممي ،شو ماكان شكله شهي   بكفي أن فيه شوكولا حبيبة قلبي

2  الكاتب ام دانية, on 18-09-2008 21:35 والله مبين من شكلا انها طيبة انا بقول هي كستردا بالشوكولا والله اعلم

3  إي إي إي عرفتا انا اول واحد الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 18-09-2008 22:00 إي إي إي عرفتا انا اول واحد     هي أكيد شوربة العدس

5  الكاتب DOUHA, on 18-09-2008 22:54 مهلبية بالشوكولااااااااااااا يميمي

8  الكاتب نور, on 19-09-2008 03:10 بودنج النشا بالشوكولا .. يم يم

10  الكاتب قهوه مُره, on 19-09-2008 12:23 السلام عليكم...شراب توت شامي...وإذا ماكان هوه ساويلنا ياه لو سمحتي

12  الكاتب غيث, on 21-09-2008 05:02 انا حبيت سلم عليك منى وعلى الاخوات وصار له الموقع يومين ما عم يفتح عندي لسحور اليوم حتى مشي حاله و الحمد لله انا هالصورة ذكرتني بأكلة نحن ما بنعملها بس دايقتها وانا صغيرة عند عدة ناس وهي خبيصة بالدبس بتشبه هالصورة بس على وجهها بيحطوا جوز ما بعرف بقى او كمان ممكن تكون مهلبية بالشوكولا يالله منتظرين تنورينا بالجواب اليوم الله يعطيك العافية

13  الكاتب ام نور, on 21-09-2008 09:44 منى شكلا بيشبه المغلي نحن منسمي عبارة عن القرفة والكراوية معقولة هو

15  الكاتب منى, on 22-09-2008 19:09 هي ما أعرفها منونة ليكون قصدك دبس العنب المطبوخ مع النشاء إذا هيك من عيني هي قبل هي

16  الكاتب سارونات, on 22-09-2008 23:20 السلام عليكم و رحمة الله و بركاته  جازاك الله خيرا اختي منى على تلبية الطلب الله لا يحرمني منك كتير فرحت لما عرفت انها مهلبية الشوكولا و انا عم اقرا الموضوع كنت هيك و بعدين صرت عرفتي ليش لان فيها قشطة او كريم فريش يا ترى ممكن نستغنى عنهاو صير هيك او ما بينفع و صير هيك و ازا تنفع هل بعوض مقدار القشطة بالحليب او لا   بالتوفيق  سلام

18  الكاتب منى, on 23-09-2008 14:52 هلا سارونات انا عم ضيف القشطة قلت هلا رح تسأليني اذا فينا ما نضيفها , فيك تستغني عنها بس متل ما قلتلك قبل الكريما بتعطي غني للوصفة و إذا ما حابة تضيفيها ما بتغيري شي من الوصفة و لا بتزيدي شي بس ما بتضيفيها

19  الكاتب منى, on 23-09-2008 14:52 هلا فرح على فكرة بنتي الصغيرة الدلولة حبيبة قلبي اسمها فرح يعني انت الك سكرة من أول رد الك , مية هلا فيك نورتي و نور الموقع , ان شاء الله جازة الدهر و السعادة و تشوفي من جوزك الخير الكتير ..    كتير انبسطت ان الوصفات عجبوك و ظبطوا معك و نورتي اخت غالية و كريمة     مكعب الشوكولا هو المكعب الي بيجي بألواح الشوكولا الكبيرة و مقداره 50 غ يعني وصفتنا لازمها 150 غ شوكولا , جربيها كتير طيبة و الله ما لحقت تبرد أكلوها الحلويين و هي لسا مفترة     رسالتك ما وصلتني للأسف لان كان في مشاكل باالرسائل بس هلا انحلت المشكلة و فيك تبعتيها مرةتانية , مية هلا و ردك و كلامك أسعدني جداً

20  الكاتب سارونات, on 23-09-2008 15:37 السلام عليكم و رحمة الله و بركاته  اي صحيح صايرة عم تعرفي اسئلتي قبل ما اسأل كتير فرحت  لكان راح ساويها ازا قدرت اليوم و بخبرك بالنتيجة و سؤالي كالعادة ازا بتضاين ليومين او \" بالبراد و هل بغطيها لما حطها بالبراد او لا و ان شاء الله تضبط معي   جازاك الله خيرا و وفقك  سلام

22  الكاتب منى, on 23-09-2008 18:59 هلا سارونات , أكيد بتضاين و الاحسن انك تغطي وجها بصحن لحتى ما ينشف , بس ما أتوقع تضااين لان انا عندجي خلال نص ساعة كانت خلصت يلا لما تدوقيها ابقي خبريني

25  الكاتب بدور, on 24-09-2008 19:30 يا سلاااااام على هالأفكار الحلوة   فعلا بتشهي الواحد يجربها ونشالله بكرة أنا أول المجربين ويارب تظبط معي.   بس للأسف و كالعادة فاتتني الحزورة هالمرة كمان       الله يسلم دياتك الحلوين يا رب  والله يا منى الحلوة والشهادة لرب العالمين انك المصدر الاول المشجع الي لأتعلم الطبخ مع اني ماعندي اي خبرة سابقة    الله يجزيكي كل خير و ينولك مراد البك يا رب

26  الكاتب منى, on 25-09-2008 07:30 هلا سارونات منيح انك حبيتيها , أنا ما بحب وصفات المهلبية و الكاسترد تكون تقيلة لهيك ما كتير بكتر نشا , بس انت فيك تعدلي الوصفة على كيفك , المهلبية البيضا وصفة قريبة الها بس بتصير بالنشاء العادي , هلا في الموقع في مهلبية الرز , بتجنن فيك تشوفيها لوقت ما نزلك وصفة المهلبية العادية

27  الكاتب منى, on 25-09-2008 07:32 مية هلا فيك فرح الله يخليك و يحفظك يا رب , كنت اتمنى الرسالة توصل , يلا الحمد لله هلا خلصت المشاكل , ان شاء الله الف الف صحة وهنا على الوصفات وحدة وحدة و خصوصا شوربة البصل, يا ستي انو جوزك طلب الوصفة مو قليلة و إلي قلتيه مضبوط ان بحب اكتب كل تفصيلة صغيرة ممكن تخطر على بالي أو ممكن أكون سألت عنها الست الي علمتني الوصفة ..    بالعكس فرح لا طولت و لا شي , انك جربتي كل هل الوصفات بيعنيلي كتير , هنا و عافية يا حق و الف شكر ليك على الدعوات الحلوة ان شاء الله الك متلها و أحلى , نورتينا فروحة

28  الكاتب منى, on 25-09-2008 07:33 هلا بدورة ,شو القمر غايب من زماان متل بدر رمضان , ان شاء الله تجربيها و تعجبك , خليلي عينك عندك ماماتك تعلمك الاكلات الحلبية و انا هون للتغيير , كل زووء يا قمر و ان شاء الله الك متل هل الدعوات

29  الكاتب سارونات, on 25-09-2008 16:07 السلام عليكم و رحمة الله و بركاته  انا ما طلعت عندي جامدة بعتقد لان ما خليتها تطول كتير على النار بتعرفي كيف طلعت طلعت من فوق جامدة بس شويييي و لما تجي تاكليها بالملعقة بتلاقي الداخل دايب   المرة التانية راح خليها تجمد اكتر تشوف كيف بتطلع بس هيك طلعت 10 على 10 خفت ما يتقبلوها لانها سايحة بس العكس قالوبتجنن و بدهن منها كمان و كمان   الله يوفقك و يسهل دربك و يجازيك الجنة ان شاء الله  سلام

30  الكاتب منى, on 25-09-2008 22:28 مية هلا و سهلا سارونات كتير انبسطت انها عجبتك و بيضت وجهك ادام عيلتك و المهم ان الفكرة وصلتك و انت بتتحكمي بالوصفة متل ما بتحبي

31  الكاتب dado, on 26-09-2008 13:59 مرحبا..   شكرا كتيييييير على هالوصفة.. بس الله يسامحك.. زاد وزني مدري قديش من وقت تعرفت على موقعك   جربتها مبارح وطلعت طيبة كتير. بس دخلت تعديل بسيط وهو اني حطيت كاسترد بدل الكورن فلاور وعطى طعمة ظريفة كتير للوصفة.. وكمان زينت وجه الكاسات بمكسرات مجروشة  يعطيكي العافية

32  الكاتب منى, on 26-09-2008 23:43 هلا فيك دالو يلا اذا كان هيك مو مشكلة , المهم الواحد ياكل لقمة و تكون طيبة أحسن من عشرة لتكبيس المعدة , صح     هنا و مة عافية علىالمهلبية أنا بالعادة بزينها بشوكولا مبشورة بس بما أنها كانت للمسابقة فتركتها من دون تزيين لحتى ما توضح     نورتي أختي

33  خوف الكاتب نادين, on 03-10-2008 12:49 السلام عليكم   كيفك اخت منى   والله انا ما بعرف اديش عمرك بس انا بعتبرك متل والدتي او اختي الكبيرة لاني عم اتعلم الطبخ منك   لاني مغتربة ووما بعرف اطبخ كن كاسة رز بس رفيقتي قالتلي على موقع وصرت ضيع بدونو   بس انا زعلانة لمن عم يوقف الموقع لانو ما بعرف شو اشتغل وقررت اكتب كل شي او انسخو عالكومبيور عندي لانو اذا رقف الموقع انا و زوجي منجوع   من يومين قررت جرب المهلبية و جبت الاغراض اللازمة وانا فتحت النت لاشوف كيف ولا قيت الموقع واقف وبقيت لليل افوت و اطلع حتى اشتغل وطبختها ب 12 بالليل بس عملتها بدون شوكولا كتجربة اولى وحبها زوجي كتير واليوم بدي جربها بالشوكولا و اكتب باقي الوصفات   شكرا كتير الك و بالسلامة انتي وموقعك

34  الكاتب منى, on 03-10-2008 15:21 وعليكم أفضل السلام و أتم التسليم نادين  ولي على ألبي , خسى الجوع , يا ستي بتنوري على طول و ان شاء الله ما بقى تنعاد..    انا مو كتير كبيرة , خليها متل اختك أحسن ان شاء الله مية صحة و الف هنا و عافية علىالبك و قلب زوجك يا حق و شو ما جربتي خبريني , هنا عليهم مقدما

35  الكاتب منامينو, on 08-11-2008 13:21 يسلمو إيديكي على هالوصفة الحلوة. ظريفة وخفيفة وسهلة.. الزغار حبوها كتير ، وأنا كمان

36  الكاتب منى, on 08-11-2008 13:43 هنا و مية الف عافية على قلبك و قلب الصغانين الصغار الحلوين , نورتي أختي

37  الكاتب سارونات, on 19-12-2008 18:08 السلام عليكم و رحمة الله و بركاته  اليوم جربتها من غير شوكولا انا فكرتها ما بتنفع بس لما عرفت انو اختي نادين ساوتها و طلعت حلوة قلت تجربها لان جربتها بالشوكولا و طلعت بتجنن بس لان الشوكولا مو دايما متوفرة عندي حزنت كثيرا بس الحمد لله بتنفع بلا شوكولا و بتطلع كمان طيبة و هيك كل ما بدي بساويها حتى لو ما في شوكولا يخليلي ياكي اختي على هالفكرة  جازاكم الله خيرا و جعله في ميزان حسناتكم  سلام

38  الكاتب منى, on 20-12-2008 12:47 الف صحة و الف هنا أختي على قلبك و قلب كل العيلة   الف شكر الك للدعوات و الك نتلها و اغلى ان شاء الله

39  الكاتب شفاء, on 28-05-2009 11:00 هلأ ساويتا وطلعت كتيييييييييييييييير طيبة وعم بتخيل شكل بوتاتي بس يرجعوا من المدرسة     يسلمو ايديك على كل اللي بتقدميه

40  الكاتب منى, on 31-05-2009 20:05 هلا شفاء   مممم , الف صحة و هنا عبلى قلبهم و قلبك ,ان شاء الله تكون عجبتهم و لو اني متاكدة انهم رح يلحوسوا الصحن لحوسة

41  الكاتب آرام, on 13-06-2009 10:30 يعطيك العافية أخت منى .. البارحة جربت الوصفة وكانت لذيذة جداً .. ولو أنها دسمة شوي .. قصدي دسمة كتير   بس بتنفع تكون ضيافة مميزة جداً وتغيير شكل عن الرز بحليب والحبوب وغيره .. ألف شكر إلك.

42  الكاتب منى, on 13-06-2009 10:58 الف صحة و هنا على قلبك يا حق .  معك حق هي دسمة بس طيبة , شو نعمل الحلويات من غير قشطة و شوكولا و سكر ما الهم طعم

43  الكاتب DOUHA, on 26-06-2009 21:53 اليوم جربتا     طيييييييييبة شكرا منى

44  الكاتب منى, on 27-06-2009 08:28 عافية و الف صحة ضحى حبيبتي     اكيد كنتي حلوة و اكلتي عني صحنين تلاتة

45  الكاتب ام احمد الغالي, on 28-07-2009 11:40 اختي منى اليوم جربتا وطبقتها خطوة خطوة متل مو كاتبه يسلم دياتك  اليوم رح تزورني رفيقتي ورح شوف ردود الافعال   يسلم دياتك يارب ويخليلنا اياكي انتي وهاالموقع الكنز

46  الكاتب منى, on 28-07-2009 12:55 يا رب تعجبك و تعجبك ضيوفك , ان شاء الله بتعجبهم , اما اذا عندها اولاد فأنا اضمن الك انك رح تصيري الملكة     هل الكلام بس من زووءك يا عسل , نورتي

47  الكاتب ام احمد الغالي, on 28-07-2009 18:46 منى يا احلى منى بلعالم   طلعت كتير طيبه وعن جد شي بيبض الوش وكلن صارو بدن المقادييير قلتن هي منى احلى منى بلعالم   الله يجزيكي الخير ويجعل هالموقع بميزان اعمالك الحسنه   حمودة وكل ولاد رفقاتي عجبتن كتير وخاصه حطيت لبعض الكاسات بسكوت كتير حبو الاطفال الفكرة

49  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 06-11-2010 23:31 كتير طيبة صرت عاملتها اكتر من عشر مرات رائعة والمهم انو ولادي حبوها قال متل الدانيت وانا بقول اطيب من هالاكلات المصنعة وافيد الف الف شكر اختي منى

50  الكاتب منى, on 08-11-2010 13:01 هلا ماسا   الف صحة و هنا على البهم , ايه بالفعل اصح و افضل , لان شو ما كانت الماركة موثوقة , بهل الايام صارت الواحدة فينا بتخاف على اولادها من كل شي

51  الكاتب منى, on 08-11-2010 13:05 هلا كرميلا   هنا و الف الف صحة و عافية على البك , هي واحدة من الوصفات المفضلة عند الكل , ان شاء الله مطرح ما سرى مرى

52  الكاتب منى, on 08-11-2010 13:07 هلا ام احمد   الف صحة و هنا على البوهم الصغيرة , ربي يباركلك فيهم و تشوفي منهم كل الخير    فكرة حلوة رح جرب البسكويت المرة التانية ان شاء الله

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved