L2ma.com | لقمة طيبة | L2ma.com | لقمة طيبة | لقمة تشكن | · , حتى, كبيرة, ملعقة, على | L2ma.com

القائمة الرئيسية

لقمة تشكن

الكاتب/ منى

14/09/2008

صينية الدجاج و البطاطا بصوص الكريم و المايونيز

لقمة تشكن

من الوصفات الي بينطبق عليها كلمة انك حتأكل صوابعك وراها , لذيذة جداً و تغيير و شي نفيس بيتقدم للملوك بس مشكلتها أنها شوية تقيلة ..

ممكن تستعملي أي بهارات أو خضار بتعجبك أو متوفرة عندك و السر بهل الوصفة هو الصوص : قشطة و جبنة كريم و مايونييز , يعني أصحاب القلوب الضعيفة ما الهم محل في وصفتنا

حضرتها من فطر و جزر و حضرتها باستخدام الجزر فقط و أخر مرة مع تشكيلة من الخضار و كل مرة بتكون رائعة جداً , السر بالصوص الخطير

بالصحة و الهنا

حساب الوحدات الحرارية من semo:

عدد الحصص : 5حصص
السعرات الحرارية في الحصة:725 سعرة حرارية
ملاحظة : من دون الجبنة المبشورة

نصف كيلو صدر دجاج منزوع الجلد و العظم
3 ملعقة كبيرة خل
3 - 4 حبة كبيرة بطاطا مقطعة مكعبات
4 ملعقة كبيرة زيت
حبة بصل متوسطة مفرومة ناعماً
حبة فليلفة حمراء مفرومة ناعماً
حبة فليلفة خضراء مفرومة ناعماً
حبة متوسطة جزر مبشور
نصف كوب فطر
نصف كوب ذرة
بهار مشكل
رشة فلفل أبيض و زنجبيل أو بهارات حسب الرغبة
ملح
جبنة قشقوان أو موتزاريلا مبشورة للوجه ( اختياري )

صلصة الكريم و المايونيز :

2 ملعقة كبيرة جبن كريم
علبة قشطة
2 ملعقة كبيرة مايونيز
ربع أو ثلث كوب حليب
direction

·          تقطع صدور الدجاج لمكعبات بنفس حجم مكعبات البطاطا ثم تنقع بالخل مدة ساعة .

·          تقلى البطاطا في زيت حار حتى تشقر و تصبح ذهبية .

·          يحمى الزيت على نار متوسطة و يضاف البصل و يقلب حتى يطرى و يشقر .

·          تعلى النار و يرفع الدجاج من الخل و يضاف على البصل و يقلب حتى يحمر و يجف مرقه ثم يتبل حسب الرغبة .

·          تخفف النار قليلاً و يضاف الجزر و الفليلفة الحمراء و الخضراء و الفطر و يقلب الكل لمدة 5 دقائق أو حتى ينضج الدجاج و تطرى الخضار , ترفع الحشوة عن النار و تضاف الذرة .

·          تمد البطاطا المقلية في صينية فرن ثم تغطى بالدجاج و الخضار .

·          تخلط مقادير الصلصة في الخلاط و تمد على وجه الصينية ثم تغطى بالجبنة المبشورة و تخبز الصينية في الفرن لمدة 20 دقيقة ثم يشعل الفرن من فوق لبضع دقائق حتى يشقر الوجه .

أضافة إلى المفضلة (6) |

أقتباس | مشاهدات : 11573

تعليقات (85)

1 الكاتب أم ساطور, on 14-09-2008 11:06
السلام عليكم ورحمة الله وبركاته ماشاء الله شو هالاكلات الطيبة يسلم ايدك يا أخت منى والله هالوصفة باين عليها لذيذة كتير وجوزي عجبتو مكويناتابس ما بيحب المايونيز بيصير بلا مايونيز ؟
وشكرا الك على وصفاتك الحلوة

2 الكاتب منى, on 14-09-2008 12:10
هلا أختي ام ساطور

الله يسلمك و يحفظك يا حق , أختي فيك تستغني عن المايونيز بس انصحك تظيفيه و لو ملعقة لان الطعمة مو ظاهرة بس بيعطي طعمة طيبة كتيرللوصفة

3 الكاتب ام دانية, on 14-09-2008 12:17
تسلم ايدك شو ما عملتي بشهي بس الي طلب عندك اذا كان من الممكن تعملي اللقم يعني العوامة لانو انا عملتا كتير بس مع ذلك ما عم تنجح معي دوختني والله :upset

والله ياام ساطورخسارة انو ابو ياسين ما بحب الميونيز لانو كتير طيب :grin

4 الكاتب منى, on 14-09-2008 14:53
هلا ام دانية

من عيوني اختي باذن الله طريقة اللقم, و الله حسيت انك و ام ياسين بتعرفوا بعض

انا قلبي دليلي

5 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 14-09-2008 16:05
مرحبا ست منى
انا عضوة جديدة وكثير مبسوطة فيك وبوصفاتك انت وكل الاخوات
الصراحة ابهرتيني بكل ما يشمله الموقع
وهالاكلة شكلها كثير طيبة الله يسلم ايديك ويعطيك العافية والف صحة وهنا
تقبلي مروري

6 الكاتب منى, on 14-09-2008 18:49
هلا سمورة

بينور الموقع بأخت عزيزة و كريمة و ان شاء الله تجربي شي وصفة و تطلع طيبة و على زوزوءك

مية هلا فيك

على فكرة واحدة من أعز صديقاتي اسمها متل اسمك

7 الكاتب ام دانية, on 14-09-2008 21:42
والله حزرتي يا ست منى ام ساطور اختي وانا عم استنى اللقم من تحت دياتك ان شاء الله :roll

8 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 15-09-2008 00:40
اي وصفة تنزلينها في الموقع اعملها وانا مغمضة عيوني ومتاكدة انها لذيذة مية في الميةوهذي طعمتها في فمي قبل ما اجربها

9 الكاتب منى, on 15-09-2008 05:59
هلا ام دانية

الله يديمكم لبعض على قلب واحد و ترجعوا سالميين و غانميين من ألمانيا , ان شاء الله اختي رح ضيف الوصفة , رح حاول قبل رمضان :zzz

10 الكاتب منى, on 15-09-2008 06:00
هلا منونة

ان شاء الله بتعجبك كتير و كلامك بس من زووءك حبيبتي , انا اليوم عندي ضيوف على السحور و محضرتها , اتفضلي معانا يا قمر

11 الكاتب Eman, on 15-09-2008 10:32
وصفة شهية ،ممكن جربها بعد رمضان ،لأن رمضان بده خفايف..سلمت يمينك..
،سؤال ،شو الأكلات المفضلة على السحور وما بتعطش؟؟ مليت من سحوري ،صدقامن أول رمضان لهلأ ،يوم بيض مقلي ويوم جبنة بالسخانة وبنعيد الدور، البارحة لغير شكل عملت جظ مظ ،واليوم دور جبنة بالسخانة :upset

،عطوني رأيكن يا حلوات!!شو ممكن أعمل على الفطور؟؟؟؟

12 الكاتب ام دانية, on 15-09-2008 14:50
والله معك حق يا ست ايمان شي بحير فعلا شو الواحد بدو يطبخ بس بتعرفي ذكرتيني بالجظ مظ الي زمان كتير كتير ما ساويتو من قبل ما اطلع على المانيا :cry

ست منى كنت حابة اسئلك انو عجينة السمبوسك نفسا بتصير للشيشبرك لانو جاية على بالي اعملو بس ما بعرف كيف بتصير العجينة وياتر العجينة بدها بعد ما تنحشا لحمة سلق؟ قبل مااحطها بالبن :sigh

لا تواخذيني عم عذبك باسئلتي لانو الصراحة مالي كتير شاطرة بالكل

13 الكاتب أم ساطور, on 15-09-2008 15:00
السلام عليكم كيفك اخت منى وين اكلت اليوم

14 الكاتب منى, on 18-09-2008 05:22
أمولة سؤالك على الصفحة الرئيسية صار ان شاء الله الأخوات كلهم بيشاركوا , عن جد مشكلة هل السحور و خصوصاً مع هل الشوبات ,هلأ أنا عندي عزيمة على السحور و مشغولة شوي , بكرة ان شاء الله بكتب شوية أفكار و أكيد الأخوات بيشاركونا كمان

15 الكاتب منى, on 15-09-2008 15:18
هلا أم دانية

و لا يهمك أنا بخدمة الناس الطيبة , الشيشبرك وصفته بالتفصيل الممل على هل الرابط

16 الكاتب منى, on 15-09-2008 15:18
هلا أم ساطور

معلش اليوم سمااح عندي عزيمة و مشغوووووولة كتير , بكرة ان شاء الله وصفة جديدة

17 أهلا
الكاتب حوراء, on 18-09-2008 05:20
أطباق الخضروات وخاصة التورولي

ايضاالمعجنات

18 الكاتب dado, on 18-09-2008 05:20
مرحبا..
أنا بفضل شي يكون حلو وبارد إذا أمكن..
سلطة فواكه مثلا... أو زبدية رز بحليب باردة أو مهلبية.. بظن انها افضل شي لأنو الدنيا شوب فهيك أكلات بتبرد القلب.. وكمان فيها نسبة سكريات منيحة وبالتالي بتعطي طاقة خلال يوم الصيام

19 الكاتب لارا مينا, on 18-09-2008 05:19
مساء الخير..بصراحة عندي أفكار كثيرة وإن شاء الله تستفيدي منها راح أكتب الأشياء إلي نعملها بالبيت ..رز مصري بالبندورة -مكرونة بالبندورة - بيتزا تخبز مع شوي لحم مفروم مطبوخ حيث يعطي طعم غير غير للبيتزا--خبز باغيت يقطع مائل يدهن بخليط من (بصلة صغيرة على النار مع شوي زيت وفلفل رومي طولي وجزر مبشور وملح وبهار ثم يضاف له 3أو 4 ملاعق جبن سائل وتحرك) ثم تحمر في الفرن قليلا من الأعلى-- خبز عربي يستخدم كقاعدة ويوضع فوقه أي حشوة ثم يخبز بالفرن مثلا زيت وزعتر أو صلصة بندورة أو جبن سائل يخلط بأي نوع خضار أو مكونات البيتزا -- سلطة خيار باللبن -- عجينة سمبوسة جاهزة تحشى بحشوة خضار أو عصاج وتلف بشكل رول ثم يصب عليها خليط طماطم معصورة وتغطى ثم تخبز بالفرن حتى تجف-- 4قطع توست تقطع أطرافها وتصف بجانب بعضها البعض وتحشى ثم طبقةتوست أخرى وتحشى ثم طبقةتوست أخرى وتغطى باللبنة وكأنها تورتةمربعة بيضاء وتزين بأي نوع خضار وزيتون.. وبصراحة كلها لذيذة بشكل ما تتخيلين والكتابة أحيانا لا تعطي الطبق حقه مثل الصورة وعذرا للإطالة .

20 الكاتب غيث, on 18-09-2008 05:18
السلام عليكم يا ستي كلنا عنا هالمشكلة وخاصة مع الشوب والعطش حتى صرت اشرب كوب من الكوكتيل فقط على السحور مع طونات من الماء ههه ممكن تمر ولبن عيران جدتعلمتها من هنا بالسعوديةتمرو حليب او تمر ولبن عيران وهو افضل منشان مشاكل الاسهالات للي بيكتر من التمر بيعدله اللبن او ممكن فطاير بجبن حلو غير مملح مع كاسة شاي بترد العطش شوي اشو كمان جربت ما بقى اتذكربس غالبا هيك عم اتسحر وشكرا منى منشان نستفيد من الاخوات ونتذكر شو ناسين شكرا لك

21 الكاتب غيث, on 18-09-2008 05:18
كمان حبيت اشكر ايمان على الفكرة الحلوة والسؤال المهم واللي بوقته وكتبت ذلك بتعليق منفصل عن التعليق السابق منشان ابارك لك برمضان ايمان وكل عام وانت بخير ولو اجت متاخرة بس بتعرفي انا اول رمضان عايدت على اسرة موقع لقمة طيبة بشكل عام واليوم معايدتي لك بشكل خاص ورمضان كريم على الجميع ان شاء الله

22 الكاتب منى, on 18-09-2008 05:18
مممم صباح الخيرات على الجميع

أنا بهل الشوب ما عم اتسحر غير فواكهة و بس , و اليوم إلي بشتهي أكل في شي معناه اليوم التاني عندي عزااب مع العطش , أما لبقية العيلة أكتر الشي بريوش مع كاسة شاي و مع تنويع بالحشوات كل مرة شي مختلف شي قشطة و عسل و شي كيري و شي شوكولا ..

لارا ردك جوعني من على الصبح ما شاء الله سحوركم عامر دايما كله شي خفيف و طيب

, أخذت كم فكرة للتجريب

23 الكاتب ام دانية, on 18-09-2008 05:17
:zzz

صباح الخير لكل الحلوات بصراحة شهيتوني على كل هل الاكلات ماءشاء الله عليكن على هل لافكار :eek

انا وزوجي منتسحرسحور عادي يعني حواضر زيت وزعتر وجبنة وو...... الخ والحمدلله عنا موشوب بالعكس برد كتير :upset

بس اكيد احسن من الشوب الله يكون بعونكن بدي خبرك ياست منى اني عملت اليوم عجينة الشيشبرك وبصراحة قد مني ست شاطرة تعذبت بالعجينة لصارت معي :grin

وبيني وبينك صار يطلع معي اشكال غريبة عجيبة :cry

بس ان شاء الله تكون الطعمة طيبة يالله الكلام مو بالشكل بس كمان بالطعمة لانو زوجي كتير بحب هل الاكلة وانا اول مرة بعملا ادعيلي تطلع طيبة لانو هي فطور اليوم هههههههههههههه

24 الكاتب منى, on 18-09-2008 05:15
هلا ام دانية

يلا كله بالاول صعب بس بعدها بيصير سهل , و هادا الشيشبرك مو سهل أبدا و يا ويلي شووو بياخد وقت , بس أنا بمووت عليه , ان شاء الله بيطلع معك طيب و بيعجك و بيعجب زوجك

25 الكاتب Eman, on 18-09-2008 05:15
ما شاء الله على الأفكار الرائعة!! :eek

لسه البارحة كتبت الرد ،واليوم بلاقي أفكار كتيرة وشهية ..!

الله يجزيك الخير أختي الحبيبة الغالية منى ،حاسة حالي شغلة اسمي مكتوب بأول الصفحة

،فكرة البريوش لسه ماخاطرت وجربتها ،رح حاول بعد التمحيص الجيد في الوصفة :upset

..يسلمو حبيبتي لجعل سؤال مطروح للجميع بها الأسلوب الجميل

أختي dado ،حبيت فكرة الرز بحليب والمهلبية رح جربها إذا الله راد،جزاك الله خيرا

لارا أكلاتك طيبة وشهية،لكن المشكلة أني بنام بعد السحور فلازم يكون خفيف على المعدة ..يسلمو لارا على أفكارك .

غيث..كل عام وأنت بخير أختي ، جزاك الله خيرا ،أنا شفت معايدتك من قبل ووصلتني

،فكرة التمر مع اللبن حلوة ،ممكن أعملها بكرة ،وإن شاء الله تعجب أبو العيال :roll

26 الكاتب منى, on 18-09-2008 05:14
هلا أمولة

أكيد شغلة , ليه أنا كم اخت ديجيتال عندي :zzz

ان شاء الله بيمشي حال سحوركم و صحتين و هنا و الف شكر لكل الاخوات

27 الكاتب سارونات, on 17-09-2008 00:08
السلام عليكم و رحمة الله و بركاته
لو بتعرفي اختي منى كم مرة اجي طل عالوصفة و ارجع اطلع صايره كل يوم عم زورها
اول مرة شفتها اكيد الصورة جزبت انتباهي بس لما قريتها و عرفت ان فيها قشطة و مايونيز و جبن كريمي :cry

بس لساتني متمسكة فيهاو بدي اعرف ازا منقدر نخففها و تظلها طيبة حتى لو مو متل الاصلية بس المهم طيبة معليش خلينا نحافظ على اصابيعنامن الاكل هالمرة :grin

بقى شو قلتي اختي منى
بالتوفيق
سلام

28 الكاتب منى, on 17-09-2008 06:24
هلا سارونات

سبحان الله حضرتها من يوممين لضيوفي على السهرة و لما جيت تأعمل الصوص كانت القشطة خالصة و ما بقى في وقت روح اشتري , المهم كوب حليب على النار مع ملعقة صغيرة طحين و ملح و فلفل أبيض و جوزة الطيب لحتى يغلي الصوص و يسمك , رفعته بعدها أضفت المايونيز و الجبنة , و حتى الجبنة ممكن تستغني عنها إذا حابة تطلع أخف أما المايونيز نو لان هو سر الصوص و الله طلعت بتجنن كتير طيبة و شوي أخف

29 الكاتب رنا, on 18-09-2008 05:13
والله وصفات شهية للسحور بس بماأنه بالامارات شوب كتير وبنتي بترضع مني مابقدر اتسحر اكل دسم مشان العطش والصراحة السمن كمان يعني كتير خايفة من الميزان بعد ماعرفت موقع لقمة طيبة
بس سؤال عالماشي يامنوشة هلأ قرب العيد وكل عام وانتي بخير وبتعرفي حلويات العيد مافي اطيب منها بس بدي اسألك انا مرة شفت برد للاخوات انك مابتخبزي كعك العيد كله يعني بتخبزيه اول بأول بس بدي أسأل كيف طريقة التفريز وقديش ممكن يقعد بالفريزر وممكن تنصحيني بالتفريز ولا اخبزه دفعة وحدة ؟؟؟

30 الكاتب سارونات, on 18-09-2008 02:19
السلام عليكم و رحمة الله و بركاته
تسلميلي اختي منى و صحتين و هنا عليكم انتو و ضيوفكم
و الله هالقشطة طلعت بنت ناس مع اننا انا و ياها ما منتفاهم بالمرة بس لما شافت ان بدي ساوي الوصفة و ان وجودها غير مرحب فيه قامت راحت عبيتها :grin

و خلتلك الساحة فاضية مشان تساوي البيشاميل الخفيف و تنحل المشكلة
اختي منى المايونيز منضيفها مباشرة على الصوص بعد ما نرفعو من على النار او مننطر تحتى يبرد شوي
ما دام انحلت مشكلة الصوص فاكيد راح ساويها ان شاء الله بس ما عرفت قديش بيكون حجم قطع الدجاج و البطاطا يعني متل الشيش طاووق او اقل بعتقد اقل
و كمان ما راح اققدر ساويها بدجاج فريش لان راح اشتري دجاج و جهزو و احفظو في الفريزر و راح ساوي فيه اربع وصفات دجاج اللي هن هالوصفة و الشيش طاووق و فروج البطاطا و دجاج البوب كورن بقى بقدر قطعو للحجم المناسب و بس بدي استعملو طلعو من الفريزر او ما ينفع و قصدي بالنسبة للوصفات الاربعة يعني اي وصفة ينفع و اي وصفة ماينفع
بالتوفيق
سلام

31 الكاتب منى, on 18-09-2008 06:28
هلا رنونة , الله يخليلك القطة الحلوة و تشوفيها ادام عينك مالية البصر و القلب يا حق ..
حلو العيد متل الاقراص بعجوة و الكرابيج و غيره ممكن يتفرز أو ممكن ينخبز و يتفرز بعدها حسب رغبتك , انا الصراحة ما بفرزه بس امي بتفرزه من دون خبز و عمتي بتخبزه و بتفرزه :zzz

حيرتك بعرف , بس الطريقتيين بيصيروا .

إذا شلتيه من دون خبز لازم تنتبهي لما تجي تطالعييه لازم من الفريزر للفرن على طول , هنا و عوافي و كل سنة و انت و الجميع بخير

32 الكاتب منى, on 18-09-2008 06:29
هلا سارونات

المايونيز و الجبنة مباشرة بعد ما ترفعيها من على النار و الدجاج أصغر شوي من الشيش طاووق و هو و البطاطا بنفس الحجم , كل الوصفات بينفع تستعملي الها دجاج مفرز , جهزييه و قطعييه و فرزييه عادي

مية هلا فيك و ان شاء الله تجربيها و تعجبك

33 الكاتب سارونات, on 27-09-2008 01:18
السلام عليكم و رحمة الله و بركاته
اختي منى عم فكر ساويها بكرا بس بدي اسألك بما انها ما بتاخد غير 20 دقيقة بالفرن فهل فيني جهزا من قبل بشي ساعة او 2 و حطها بالبراد تحتى يوصل الوقت او ما بينفع و ازا بينفع فهل بحطلها الصوص او انطر حتى يصير وقت دخلها الفرن و بالبراد هل بغطيها او لا
و بعد ما طلعها من الفرن هل فيني علفها بالالمنيوم تحتى تظلها بادرة او خليها بالفرن و هو مطفي
لما قريت اسم الوصفة لقمة تشكن قلت شو هالوصفة ما شفتها من قبل و فكرتها دجاج بحجم اللقم متل دجاج بوب كورن و انا بالدجاج اللي فرزتو منشان الوصفة كتبت تشكن الا منى :grin

كتير عجبني الاسم بس كمانن لقمة تشكن حلو بس تحتى اتعود عليه
بالتوفيق
سلام

34 الكاتب منى, on 28-09-2008 20:42
أختي فيك تجهزيها حتى قبل بيوم و تغلفيها منيح بالالمنيوم و تحفظيها في البراد , وقت حابة تقدميها تجهزي الصوص و تسكبيه على وجهها و تخبزيها

. انا خبزتها مع الصوص و طالعتا و لما اجو الضيوف رجعتها للفرن شي عشر دقايق لحتى سخنت مرة تانية ..

أنا غيرت الاسم لان هنن الهم شكل اللقم , قصدي الدجاج و البطاطا و ما كتير حبيت خص هل الوصفة باسمي , يعني غيرت رااي :grin

35 الكاتب سارونات, on 28-09-2008 22:03
السلام عليكم و رحمة الله و بركاته
ساويتها و طلعت طيبة و عجبتهم بس ما اكلو اصابيعن وراها

اختي منى قولك ازا ضفت جبن كريمي بياكلوهن و شو قصدك بالجبن الكريمي هل هو الجبن الدائب او متل ما بيسموه جبن الكاسات و هل فينا نستبدلو بالجبنه مثلثات )) انتبهتي على كاسات و مثلثات :grin

))
شكرا كتير على المعلومة اكيد هيك كتير بيسهل الموضوع ففينا نحضرها قبل بيوم :zzz

وان شاء الله يتخترعي شي وصفة و تسميها تشكن الا منى راح كتير افرح فيها :zzz

بالتوفيق
سلام

36 الكاتب منى, on 29-09-2008 06:32
هلا سارونات

يعني ما اضفت قشطة و لا مايونيز و لا جبن كريمي , بس صوص الحليب :roll

معناها طلعت صينية عادية لان الصوص الي بيميزها ,جبن الكريم هو جبن الكاسات أوجبنة متل لافاش كيري

وهي وصفة انا الي اخترعتها بس غيرت الاسم

37 الكاتب مروة المصرية, on 10-10-2008 22:22
بجد عايزة اشكرك جدا لانى اول مرة اجرب وصفة وتنجح معايا كدة وفعلا زوجى عجبة جدا طبق لقمة تشيكن .بجد وصفة رائعة وشكرا لك جدا وانا مشتركة جديدة وان شاء الله اجرب وصفات اكتر من موقعك الرائع

38 الكاتب منى, on 11-10-2008 10:22
مية هلا و مية سهلا مروة , بينور الموقع بأخت مصرية غالية

هنا و عوافي على قلبك و قلب زوجك بكل لقمة اكلتوها , و ان شاء الله تجربي كمان غير وصفات و تعجبك :zzz

39 الكاتب ام سيمى, on 16-10-2008 20:30
السلام عليكم
الله يعطيك العافية لان الوصفة رائعة انتهينا قبل قليلي من العشاء ويا سلام شي لذيذ

40 الكاتب منى, on 17-10-2008 06:41
مية الف هنا و عافية على قلبك و قلب العيلة

كتير انبسطت انها عجبتكم , هلا فيك ام سيمى أخت جديدة في الموقع :zzz

41 الكاتب بدور, on 09-11-2008 22:23
اسم على مسمى.. فعلا حتاكل صوابعك وراها

انا بموت بهيك اكلات
عنجد فرحت كتير على هالوصفة الله يعطيكي الف عافية ولا يحرمنا من لمساتك السحرية ميمو الغالية

42 الكاتب منى, on 10-11-2008 05:44
هلا بدورة

الله يخليك حبيبتي و ان شاء الله تجربيها و تعجبك

43 الكاتب نادين, on 28-11-2008 13:19
بجد هالاكلة عذاااااااااااااااب
انا عملتها 4 مرات و كل مرة بيقلي زوجي انو ماتهنيت فيها حبابة ندوش عيديها هههههه
لانو فعلا ماحدا يقدر يحزر الصوص العظيم وبالنسبة الي كل شي مايونيز و بشاميل انا بعزو موووووت
يسلم ايديكي
بس سؤالي انو شو اسم الاكلة ؟
يعني كل اسماء الاكلات هو شرح للمحتوى ...بقصد مافي اسماء خاصة
اه بقليلي 27 يوم انزل لسوريا واول شي بدي اعمل لاهلي هالاكلة يسلم دياااتك

44 الكاتب منى, on 29-11-2008 10:10
هلا ندوشة

الف الف هنا على قلبك و قلب زوجك .
الاكلة هي انا اخترعتها , بالاول سميتها الدجاج على طريقتي , بعدها سميتها لقمة تشكن , لان هي وصفة خاصة ةبموقع لقمة طيبة و كمان كل شي بمقاديرها بحجم اللقمة :grin

عصفوريين بحجر واحد

الله يسلمك حبيبتي و ان شاءالله بتوصلي سالمة و غانمة و تعجب كل اهلك , لا تنسي تخبريني رايهم

45 الكاتب رنا, on 04-03-2009 15:23
بكرا رح اعمل هالطبق وهل حضرت الدجاج بس بدي اسألك يامنى العزيزة بيصير اعمل المايونيز بالبيت ....ولا بيعمل شي اذا تعرض للحرارة بعدين ليش ماعم يطلع معي المايونيز ابيض عم يطلع مايل للصفار ..
ياريت تردي بسرعة ...انا وحظي

46 الكاتب منى, on 04-03-2009 17:28
اختي بيجوز تعمليها بالمايونيز الي بالبيت بس انا بفضل انك تحضريها بالمايونيز العادي هل المرة و بعد ما تشوفيها و تدوقيها تبقى حضريها بالمايونز الي شغل البيت , و هل المايونيز اذا كان تازة و بعدها استخدمتيه لهل الوصفة , هي بس , ما بيأثر ابدا

47 الكاتب رنا, on 04-03-2009 18:20
حظي حلو رديتي علي بسرعة خلص بكرا رح جربها وببقى بخبرك...شكرا كتير كتير

48 الكاتب منى, on 05-03-2009 05:33
كان صايرة كسلانة بالردود انا :roll

.

منيح نبهتيني رح حاول ظبط هل القصة , بس ما شاء الله تبارك الله عم يكون عندي كل يوم تقريباً أأقل الشي 20 رد و فيهم سؤال لأجاوب عليه لهيك عم يصير تاخير احيانا , ازرعيها بدقني رنونة :zzz

49 الكاتب رنا, on 05-03-2009 11:50
لا والله مو مشكلة الله يقويكي يارب اولاد وبيت وطبخ ومونة ...معك حق يلي عنده مشاغلك مادخله بالنت ولا بيعرف عنه

بالنسبة للطبخة ساويتها اليوم بس للاسف ماصورتها لانه لبين ماوصلت عالطاولة كان طاير نصها ....طلعت طيبة كتير والله والمايونيز مو ظاهر بالمرة بالطعمة بس في نكهة مميزة ...بس حسيت انه لو نحط معها كمان صوص بشاميل بتطلع طيبة يعني مابينشف الصوص كتير بيضل في مزيج من الصوص وبتبطل تصير ناشفة ...انا اول مرة بطبق بالحذافير بس بعدين بخترع :zzz

ياستي بس جد وصفة لا يعلى عليها بس كتيربتشبع

ههههه مابضل مكان للتنفس

50 الكاتب منى, on 06-03-2009 06:25
الف هنا و الف عافية

و هادا هو المطلوب , انك تعرفي بالأول شو بقصد و بعدها تصيري تغيري الي بدك اياه لحتى تطبق مع زووءك

أنا بحس ان صوصها هيك رح يميزها عن الوصفات الي فيها بيشاميل كتير , و هي ما بدها كتير بالفرن بس يا دوب شوي لحتى ياخد الدجاج من نكهة الصوص لان بالأصل كل شي مستوي

هنا و عافية مرة تانية رنونة

51 الكاتب رنا, on 06-03-2009 14:39
انا ماطولت عليها بالفرن عشرين دقيقةمتل ماقلتي بس مابعرف ليش حسيتها نشفت ...؟؟؟يعني متبلة تتبيل ....ليكون لان شغلت الفرن من فوق وتحت ؟؟؟

52 الكاتب منى, on 07-03-2009 05:48
:roll

هادا هو السبب

هي بدها من تحت بس و بعدها يا دوب كم دقيقة من فوق لحتى تحمر , بس مع ذلك ما رح تكون كمية الصلصة كبيرة , يا دوب شي تغمس بالخبزة اذا اكلتيها غمس , لهيك فيك تزيدي الصلصة مرة تانية

53 الكاتب نوارة, on 07-03-2009 20:50
ميموقصدك القشطة هي نستله نفسهااللي منستخدمهاللحلويات

54 الكاتب منى, on 08-03-2009 08:13
هلا نوارة

تمام حبيبتي هي نفسها

55 الكاتب نوارة, on 27-03-2009 17:53
ياي ما أطيبها اليوم كان اخي وخالي عالغدا جربتها ياي شو طيبة
دسمة بس صراحة تستاهل
الله لا يحرمنا من وصفاتك

56 الكاتب منى, on 28-03-2009 18:27
الف هنا و عافية و صحة على قلبك و قلب محمد و فارس و خالك

خليلي عينك نوارة الله لا يحرمني من هل الرفقة الحلوة

57 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 25-05-2009 20:32
اليوم كنت قاعدة محتارة ومو عارفة شو بدي اطبخ فعلى طول فكرت بموقع لقمة طيبة وفتحت عليه ولقيت عزيمة خالك وتذكرت ساعتها لقمة تشكن فقررت اني اعملها وعلمتها ويا الله شو طلعت طيبة طعمها مو معقول عن جد يسلموا ايديك يا منى والله لا يحرمنا من وصفاتك اللي بتنقذنا لأني كل ما بحتار بالاكل بفتح على الموقع تبعكم وبلاقي فيه اشياء كثير لذيذة وعلى طول بجرب وهداك اليوم كمان جربت وصفة عجينة العشر دقائق وكثير طيبة طلعت وعجبت الجميع عندي بالبيت

مرة ثانية بقول لك يا منى تسلم ايدك ولمزيد من التقدم ان شاءالله

58 الكاتب منى, on 27-05-2009 09:35
هلا هيا

لو تعرفي شو انبسطت ان جربتي الوصفة و عجبتك و عجبت العيلة كلها
الف صحة و هنا على قلبك و قلب القطط الحلوة و العيلة واحد واحد

الف شكر الك للثقة في الموقع و لتجربتك الوصفات و كمان للتواجد و الرد الطيب , نورتي حبيبتي

59 الكاتب dado, on 04-06-2009 04:10
مرحبا
حضرت هالطبق مبارح لضيوفي على الغدا.. وكتير حبوها وانا حسيتها سهلة، وأحلى شي إنو بتحضريها كلها تقريبا وبس يجوا الضيوف بتخبزيها وما بتاخد وقت كتير.
والطبق كله خلص عالغدا وهذه سابقة تـُسجَل لهالوصفة

بس في شي غريب.. إنو كل يلي أكلوا منها قالوا إنها وصفة خفيفة :grin

60 الكاتب منى, on 04-06-2009 10:22
عن جد دالو :grin

يا ستي الف هنا على قلبهم و هي كمان سابقة , لان و لا واحد بعرفوا قال عنها خفيفة

يا ترى انتي دقتي منها و الا نو :roll

61 الكاتب DOUHA, on 10-08-2009 22:14
ياجماعة الوصفة تجنننننن وانا دئتا من شغل منى والله
من المصدر الاساسي

:zzz

بجد رائعة بس منى ليه الصورة طالعة بس نصا؟؟

معقول من عندي

على العموم صورتا ببالي ههههههههههه

62 الكاتب منى, on 11-08-2009 14:15
هنا و عافية يا ضحى يا ام الزووء كله

الصورة طالعة كلها عندي

بقى يمكن من عندك :roll

بس خليك على الصورة الي ببالك اطيب :grin

63 الكاتب mareya, on 07-01-2010 16:21
حلو موقعط الله يعطيكي العافية يا رب
انا اليوم ان شاء الله ناوية جرب الوصفة و برجع بعطيكي رأيي ان شاء الله مع صورة
الف شكر

64 الكاتب منى, on 07-01-2010 19:59
رح استنى صورتك و رايك و اتمنى انها تكون على زووءك

65 الكاتب توتة الشام, on 22-03-2010 23:09
مرحبا منى ماشالله موقعك بجنن وانا بالصدفة دخلت كنت عم دور على اكلات جديدة طلعلي موقعك انا بساوي متل هالصينية بس بساويها بالمعكرونة والدجاج والخضار بس بصل وتوم وفليفلة خضرا وجزر مبشور ونفس الصوص تبعك بتطلع بتجنن وتسلم ايديكي على وصفاتك الطيبة

66 الكاتب منى, on 23-03-2010 08:52
مممم , اكيد بالمعكرونة بتطلع طيبة كتير

رح جربها على طريقتك ان شاء الله شي مرة ,
نورتي الموقع و شرفتيه و مية اهلا و سهلا فيك اختي

67 الكاتب semo, on 09-04-2010 17:26
شو هالاكلة يامنوش بتاخد العقل سيمفونية رائعة تناغم بيجنن بالطعمات بيخلي القلب يدق والعيون تشوف كل شي قدامها حلو

أكلة بينكتب فيها قصيدة عملتها من كم يوم وكان عندي ضيوف تركوا الاكل وضلوا ياكلوا فيها لخلصوها وبعدين التفتو لباقي الاكل

والله عم ادعيلك من كل قلبي الله يجعل دعواتي من نصيبك

68 الكاتب farah, on 23-06-2010 23:02
تسلميلي يا منوش على هالأكلة شو طلعت لذيذة وخفيفة :zzz

اي عن جد خفيفة كتير بتعرفي انا سلقت مكعبات البطاطا بدل ما اقليها وكترت شوي عيار الصوص وما بتتخيلي شو طلعت طيبة وبتشهي وحطيت مع الخضار شوية فاصوليا خضرا كانت عندي تازة حتى تعشيت منها من شوي وهاد انا ما بتعشي بالعادة بس من كتر ما طلعت طيبة ما شبعت منها من وقت الغدا وبكرا كمان غدانا منها يا ستي الله يجعل هالوصفات الحلوة بميزان حسناتك وصدقة جارية بحياتك لأن هي بالفعل بمثابة الصدقة على كل مين بيستفيد من وصفاتك بدون انتظار مقابل من حدا

69 الكاتب منى, on 24-06-2010 07:31
هلا سمسومة

اي شو هل الرد الحلو , عم تحكي شعر و القصيدة انت كتبتيها, و هل الاكلة بيلبقلها هيك حكي :zzz

الف الف صحة و هنا و عافية على البك و الب الضيوف و الحمد لله انها بيضت وجهك ادامهم

ان شاء الله الك متل الدعوات الغالية و اكتر بكتير

صحتين مرة تانية

70 الكاتب منى, on 24-06-2010 07:44
هلا فروحة

انت ا الافكار الي بتتاكل و الله , كيف ما خطرتلي و انا روح قلبي هل الحكي :roll

ان شاء الله المرة التانية بجربها على طريقتك و انا ماكدة انها رح تطلع اطيب

الله يخليلي ياكي على هل الدعوة الحلوة و الغالية و الكريمة منك , كل الشكر الك يا حلو

71 الكاتب semo, on 28-06-2010 23:45
منوشة حبيبتي اليوم بعمل هالأكلة للمرة التالتة وكل مرة بتكون أطيب وأطيب
وقلت لازم احسب السعرات الحرارية وياليتني ما حسبتها :eek

والله طلعت عيوني من مكانها
بس لازم نتقبل الواقع وكل واحد يعرف شو عم ياكل بس شو بدك بالحكي كتييييييير طيبة أنا وزنت البطاطا تقريبا طلعت كيلو بطاطا وعلى هالأساس حسبتها بس طبعا من دون الجبنة
والرد الجاية رح فصل

72 الكاتب منى, on 29-06-2010 20:07
:cry

انا بعرف انها هيك بس بالارقام الدقيقة الواحد بيحط ايده على البه , هلا رح اضرب سمعة هل الوصفة مع هل الكالوري :grin

بس متل ما قلتي , هي هيك و اله البه ضعيف لا يقرب

شطرا كتير الك سمسومة , عم تغني الموقع بهل الاضافات , خليلي عينك

73 الكاتب massa, on 02-11-2010 00:01
جربتها كتير طيبة اولادي كلهم حبوها وقالولي دايما جربي اكلات من عند طنت منى واسمك صار معروف عنا بالبيت جزاك الله خيرا على هالموقع

74 الكاتب منى, on 02-11-2010 09:02
الف صحة و هنا على الوبهم الحلوة الصغيرة

نورتي اختي

75 الكاتب إسراء, on 12-01-2011 18:50
السلام عليكم ورحمة الله وبركاته كتيرررررر طيبة غير شكل بجد يسلمن على هالوصفة وانا طول ما عم حضرا ماكنت خايفة بس لما سكبت الصوص فوقهاوصار لونها ابيض خفت انو ماتطلع طيبة او مخبوصة بس لما حطيتا بالفرن الصوص تشرب بالمكونات وعطا طعمة كتير لذيذة أعجبت الجماهير كتير وطلبوا مني اني عدلن الطبخة بأقرب وقت .......

76 الكاتب نجمة, on 19-01-2011 13:12
السلام عليكم شكلا كتيير طيبة الله يعطيك العافية ان شاالله بجربها وبخبرك بالنتائج

77 رووووووووووووووووووووووووووووووووووووووو
الكاتب nisreen1979, on 06-04-2011 13:13
عملتها امبارح وطلعت بتجنن

يسلمو يا منى

78 المشاركة بوصفة
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 06-04-2011 13:19
أختي منى كيف استطيع المشركة بوصفاتي في الموقع

79 ...............
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 28-05-2011 18:24
عندي كمان سؤال هون
فيني استبدل القشطة بالـــدبل كريم

و لا ما بيمشي الحال غير بالقشطة

و سؤال آآآآخر
إذا بيمشي الحال استبدل القشطة بالكريم راح تتغير شي كمية الحليب

و شكراً سلفاً

7ayah Dayyen

80 الكاتب karamela, on 27-06-2011 02:45
السلام عليكم اختي منى
اشتقتلكن كتير
بس انتي كمان يامدام منى في شي شاغلك عن لقمة طيبة بتمنى يكون خير
انا لاني عاهدت نفسي اني اتشكرك عن كل اكلة جربتها وطلعت طيبة فبتشكرك على هالاكلة الظريفة اللي جربتها اليوم
بتمنى اطمنيني عنك

81 الكاتب منى, on 23-11-2011 19:01
ااااااخ يا كرميلا , بيعين الله , الله يهدي الاوضاع و يرجع البال مرتاح متل قبل

صحتين و هنا على اللقمة الي حبيتيها و تسال عليك العافية و الخير دوما يا رب

82 الكاتب lalosh, on 23-11-2011 15:40
جربتها اليوم لهالوصفة كانت طيبة كتير بس مو معقول شو دسمة

بس أهم شي انها زاكية
يسلمو دياتك مدام منى

83 الكاتب منى, on 23-11-2011 18:45
انا قلت في المقدمة انها دسمة و بتنفع بالشي :zzz

صحة و الف الف هنا علا و ريتو مطرح ما سرى مرى

84 الكاتب لينا74, on 05-05-2012 14:39
مرحبا منى كيفك حابه اسالك لوسمحتي بالنسبه للقشطه هون ماعنا قشطه نستله عنا بس كريم فريش في فرنسا لذالك شو اعمل اضيف كريم فريش ولا اطبخ علي النار حليب مع شويه طحين شو رايك؟ بعدين بالنسبه للجبن الكريمي ماعرفت شو يعني استخدم جبنه كيري ولا لافجكيري ارجو الافاده بعدين في شغله تانيه حطيتي في العزيمه اكله اسمها روزاليتا بس مو حاطه المقادير ممكن تحطيلنا ياهن لو سمحتي وشكرا

85 الكاتب منى, on 05-05-2012 19:33
فيك تدوبي معلقة صغيرة نشا بتلات ارباع كوب كريم فريش , و إذا كان متوفر عندكم شي اسمه heavy cream فممكن تستخدميه عوض عن النسلة

الجبنة ممكن تستخدمي الكيري الافاش كيري او ايا جبنة طرية متوفرة عندك
تكرم عيونك , ان شاء الله ما باخرها اكتر من هيك

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 29/06/2010 )

< السابق		التالى >

[ عودة ]