L2ma.com | لقمة طيبة | L2ma.com | لقمة طيبة | كبة نية بزيت الزيتون | الكبة, · , كوب, الجوز, كتير | L2ma.com

القائمة الرئيسية

كبة نية بزيت الزيتون

الكاتب/ منى

07/09/2008

اليوم في ميل من كتير من الناس أن ما تاكل لحمة نية إما بسبب الأمراض أو لأسباب تانية و بهيك رح ينحرموا من الكبة النية و هي من أطيب المقبلات , لهيك صرنا نحضر الكبة بس من دون هبرة ..

و هل الطريقة طيبة كتير و سهلة و رح تعجبك كتير ان شاء الله , بس ما تتوقعي ان الطعمة رح تكون متل الكبة العادية , مختلفة و لكن لذيذة ..

بالصحة و الهنا

2 كوب برغل ناعم
2 كوب جوز , يفضل الجوز الشامي لان لونه فاتح
ملعقة كبيرة رب البندورة
2 – 3 ملعقة كبيرة دبس الفليفلة
رشة ملح
نصف ملعقة صغيرة كمون
رشة من بهارات الكبة في حال توافرها
بصلة متوسطة مفرومة ناعماً
نصف كوب زيت زيتون

للتزيين :

المزيد من زيت الزيتون
صنوبر محمص أو جوز مجروش
direction

·          يغسل البرغل جيداً و ينقع بالماء لمدة 10 دقائق ثم يصفى جيداً .

·          يدعك البرغل مع رب البندورة و دبس الفليفلة و البهارات ثم يدار على ماكينة فرم اللحمة 3 مرات و باخر دور يضاف الجوز و يدار مع الكبة .

·          تفرم البصلة ناعماً جداً ثم تقلى بالزيت حتى تشقر قليلاً .

·          تصب البصلة مع الزيت فوق الكبة و تدعك الكبة باليد لمدة عشر دقائق .

·          تقطع الكبة لكرات ثم يضغط عليها لتأخذ شكل أصابع اليد ثم تصف في طبق التقديم .

·          يرش الجوز أو الصنوبر و المزيد من زيت الزيتون و تقدم الكبة .

أضافة إلى المفضلة (1) |

أقتباس | مشاهدات : 2548

تعليقات (23)

1 الكاتب Eman, on 09-09-2008 02:39
يسلمو إيديك ميمي ،أنا وزوجي كتير بنحبها ،وكل فترو بنشتهي عليها ،لهيك صرت أعمل كمية كبيرة وفرزها ..

2 الكاتب منى, on 09-09-2008 03:03
هنا على قلبك و قلبو يا حق , و انا متل حكياتك بضاعف الكمية و بفرزها لحتى تصير سفرتي مرتبة و متنوعة برمضان

3 الكاتب غيث, on 09-09-2008 05:38
لك دخيل الحلبية وطبخات الحلبية ما اطيبها الله يسلم دياتك يا حق لك والله انا مشغولة برمضان كتير الوقت بيمر بسرعة بس الا ما اطل ولو مرة على الموقع لاشوف جديد فنانتنا منى وكمان منها باخد الوصفة اللي ناوية اعملها وبمشي عذرا لازم اشكرك على كل شي عملته بس والله كتير زركة المهم يا عيوني من كم يوم لبين ما اجا زوجي من عمله نزلنا لنتشري بعض المتطلبات للطبخ اللي كاتبتهم او طابعتهم من موقعك اللي كان سر تميزي بهذا الرمضان الله يجزيك الخير كان الوقت مساء لاني ما بقدر انزل بالشوب نهارا وكمان زحمةووو وبلا طول سيرة رحت على هايبر ماركت محلين ما كان في لبن ولازمني لانه فطوري تاني يوم كبة بصينية ومعكرونة بالباشاميل من تحت دياتك قام خطر ببالي اعمل لبن على طريقتك يعني ضروري لازم احل المشكلة المهم عملته وكتير طيب بس طلع مريق واله مطة شوية بس كتير طيبة طعمته وكان صالح لان يكون عيران اكتر من الاكل ومشي الحال مع الكبة والمعكرونة بس عجب ليش كان مريق وماطط بس والله فكرته حلوة وخاصة عند الضرورة متل ما صار معي واسفة كتير كتير على غلاظتي وسامحونا هههه

4 الكاتب غيث, on 09-09-2008 05:45
سؤال تاني دخيل عينك منى المعروك هنا ما شفته الابالندر بمحل واحد واشتريناه كانت طعمته مالحة وانا بحب معروك حلب سؤال رح جرب البريوش بطريقتك بس رح اكتر له سكر لاني بحب الحلو برمضان كتيروشلون بدي اعمل له على وجهه هاللمعة متل معروك حلب عبيلمع وحلوو لا عندك رأي تاني الله يجزيك الخير يا رب والله تاعبينك معنا صحيح عملت اطيب بين نارين من موقعك على سيرة الحلو والحشوات اخدتها من عندكم وما فيني اقلك الا يسلمو ايديك والله يجعل دعائي لك من نصيبك واسفة كتير كتيرعلى اطالتي

5 الكاتب غيث, on 09-09-2008 06:01
منى اخر تعليق والله التوبة حتى ما اكلها بهدلة مرتبة شو ما بقى حدا بالموقع غيري هلق رح تقولي لي ارجعي لرمضان وانشغلي عنا شوية على ثقالتي بس عفوا انا الان طلعت على البريوش قام وضحتي لنا فيه انه نفسه المعروك مالي خبر والله صراحة انا كنت محسبة اني الميني صمون هو بريوش والمعروك هو الاقراص الكبيرة المدوروة او المطاولة سواء كانت فارغة او محشية لذلك اكيد رح اعمل البريوش مادامه هو نفسه المعروك وشكرا لك للايضاح والله ناقصنا كتير معلومات لنصير ماهرات بالطبخ عموما شكرا لك وتحمليني الك الثواب بهالشهر الفضيل

6 الكاتب منى, on 09-09-2008 12:42
هلا غيوثة حبيبة قلبي

هنا و عوافي على كل شي جربتيه و ان شاء الله الك متل هل الدعوات و أحلى و أغلى يا حق ..

اللبن , ما عم يخطر ببالي و لا فكرة , يعني مريق كان ممكن ااقل الك من نوع الحليب أو ما خليتيه يتخمر لوقت طويل أما ماطط هي فما خطر ببالي و لا فكرة :roll

, ممكن تجبري نوع حليب غيره المرة التانية بركي من نوع الحليب , أو ليكون ما بيصير يتحضر بالحليب المبستر لأن انا بساوي اللبن بالحليب العادي الي منجيبه

اااحترت غيوثة , يلا الحمد لله ان مشي حاله متل عيران و خيرها بغيرها ان شاء الله

البريوش الي بالموقع كنت حضره السنة الماضية و يطلع نفس المعروك , هلأ عندي أكتر من وصفة جديدة من دون بيض و أظن أن هي أظبط , جربتها أول واحدة بس طلعت بهدلة , رح جرب غيرها و ان شاء الله بتطلع تمام ,لان بلا بيض أخف و أسهل , جربي هلأ البريوش و رح يعجبك كتيررر ان شاء الله , وصفة البريوش بالموقع سكرها مناسب ما بدها سكر كمان و للوش لحتى يصير عم يلمع أنا بعمل قطر مريق و بدوب معه شوية عسلو بدهن البريوووش, يمممي

غيوثة حبيبتي رح ازعل منك , انا كتير بنبسط لما بحكي معك و بسمع منك و عن أخباارك هلا فيك أختي

7 الكاتب muna.g.7, on 09-09-2008 13:28
الحمد الله انك نزلتي وصفة كبة نية بدون لحمة نية لاني ما اتخيل اكل لحمة نية لاكن هالوصفة شكلها لذيذ انشاء الله في اول عزومة اجربها

8 الكاتب منى, on 09-09-2008 13:40
في كتير ناس متلك , انا بمووت عليها بكل اشكالها , ان شاء الله تجربيها و تعجبك منونة

9 الكاتب ام دانية, on 09-09-2008 14:01
تسلم ايدك انا كتير بحب الكبة النية والله وشكلها بشهي

10 الكاتب منى, on 09-09-2008 15:38
اتفضلي ام دانية و الأكل على قد المحبة

مية هلا فيك نورتي أختي

11 الكاتب ام نور, on 09-09-2008 17:05
سلم هالديات يا عسل مع اني كتير بحب الكبة نية بلحمة هبرة
كتير وبرغل قليل بس انشالله رح جربا بلا لحمة بهل يومين عطريقتك لان اكيد طيبة وتغير شكل

بتعرفي منى نحن بلبنان منحط حبق مع البصلة ومنفرمون ناعمين ومنضيفون عالبرغل كتير بيعطي نكهة شهية

12 الكاتب ام نور, on 09-09-2008 17:19
منى انا عندي فكرة جربتا ميشان البريوش يلمع بحط السكر ناعم تبع المعمول مع ماء واذيبهم وبعدها اقوم بدهن وجه البريوش بالفرشاة

13 الكاتب منى, on 09-09-2008 20:22
هلا ام نور

هي فكرة الحبق سمعت ان اللبنانية بيضيفوها, أظن انك قلتيلي عايها شي مرة :roll

جربتها و متل ما قلتي بتضيف طعمة طيبة كتير , هلا بهارات الكبة الجاهزة فيهم حبق اذا كان الحبق مو متوفر فريش

فكرة حلوة و سهلة كتير لوجه البريوش , ألف شكر ليك أم نور على الأضافة يا ست الجود و الكرم

14 الكاتب ام نور, on 09-09-2008 21:29
انت الكرم والجود كلو حبيبة قلبي على فكرة صرت عاملة البريوش اكتر من سبع مرات وبيطلع ولا اطيب وكل مرة بموديل جديد وحشوة مختلفة وما حدا اكلوا عندي الا ما حبوا وفكروا جاهز والفضل الك الله يجزيك الخير في الدنيا والاخرة

15 الكاتب منى, on 10-09-2008 12:58
هلا ام نور حبيبتي , ريتو هنااا و عوافي , يتعرفي من ايمتى رح اسالك شو صار بالبريوش من وقت حفلة ابنك و برجع بنسى :zzz

هنا و يا حق و الك متل هل الدعوات و احلى

16 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 12-08-2009 02:36
اهلين منى. ما بعرف كيف فاتتني هالكبه. قريت عنا بعزيمتك لصاحباتك. شكلا كتير طيب. عندي سوءال منى كيف بتفرزيها? هل بعد ما تشكليها او هيه و عجينه بتحطيها في كيس نايلون بالفريزر? كتير حابه اعملا لرمضان و غيره و حابه فرزها. شكرا كتير

17 الكاتب منى, on 14-08-2009 11:49
هلا امونة

بفرزها متل ما هي بس بحطها بكيس و بالفريز و لما بدي برجع بطالعا و بشكلها اما كتل الصورة , او بمدها و برش المكسرات و الزيت و نممم :zzz

18 الكاتب ام احمد الغالي, on 16-08-2009 11:05
السلام عليكم
منى اليوم جربت الكبه بس عندي سؤالين
الكبه ما طلع لونها متل اللي بلصورة
تاني سؤال في شوية قرطة يا ترى ليش
انا ما بعرف شي بلكبه واليوم اول مرة بستعمل الماكينه :eek

الله يعينك علينا وعلى غلاظتنا بس شو بدك تعملي انتي علمتينا عليكي
:zzz

\
يسلم ديلتك يارب

19 الكاتب منى, on 16-08-2009 12:33
القرطة جاية من أن البرغل ما انتقع لمدة كافية و اللون إما انك استعملتي برغل غامق و اما انك ما استعملتي جوز فاتح ..

و لا يهمك انا تحت امرك حبيبتي و هلا فيكي ترجعي تديري الكبة و تحطي معها شوية مي لتروح القرطة , اما اللون فعوضك على الله

20 الكاتب gsm, on 01-09-2009 23:17
سلام عليكم منونة انا كان بدي اسالك انا كتيير مشتهية على الكبة النية بس المشكلة ما عندي ماكينة كبة يا ترى لو استعملت البرغل الناعم تبع التبولة وبعد ما انقعه احطه على الخلاط بيمشي الحال شو رايك بتزبط ولا لأ عم استنى ردك ويسلموا كتييير على كل شي الله يجزيك الخير على هل الموقع التحفة

21 الكاتب na3oom, on 02-09-2009 06:36
منون يسلمو إيدكي الطعم بجنن
المهم طلعت معي غامقة وعرفت السبب
بس كيف ممكن اخليها برتقالي
أحط دبس بندورة ولا دبس فليفلة

الله يجزيك الخير مقدما
نعوم

22 الكاتب منى, on 02-09-2009 15:50
هلا gsm

و الله ما بعرف اذا بتزبط , على كل ممكن تتحضر بالبرغل السميسمي ما بعرف اذا بتعرفي , بيكون حباته كتير صغيره , بعد النقع بالمي السخنة بتصفيه كتير منيح و بتدعكيه مع الهبرة , هلا ما بعرف كيف ممكن نطبق هل الحكي على هل الوصفة :roll

فيكي تجربي بكمية صغيرة كتير و تشوفي احلىما تتورطي و بتجربي تضربي الكل على مفرمة البصل اذا عندك منها :zzz

23 الكاتب Eman, on 09-09-2009 20:12
أختي gsm،أنا أحيانا بفرم الكبة على الفود بروسيسر، وبحط نص الكمية كل مرة ، وبمشي حالها

بس سؤال منى إضافة الجوز هل هي ضرورية للكبة أثناء فرمها؟؟ أنا كنت دائما أعملها بدونها بس بخلط شوي جوز مكسر وبشكل الكبة أصابع ، عندي عزيمة بعد يومين ، خايفة أخاطر وأحطه ..شو رأيك؟؟

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 11/08/2009 )

< السابق		التالى >

[ عودة ]