L2ma.com | لقمة طيبة | L2ma.com | لقمة طيبة | مربى الدراق | · , الدراق, الوصفة, الله, حبات | L2ma.com

القائمة الرئيسية

الأكثر تصفحاً

مربى الدراق

الكاتب/ منى

05/09/2008

مربى الدراق

رمضان كريم علينا وعليكم و ان شاء الله ما بيخلص إلا و نحنا كلنا من عتقائه و صيامنا مقبول و أعمالنا مرفوعة بالخير و الطاعات و الصدقات ..

رجعنا لحزورتنا , و بما ان الحزورات الماضية كانت سهلة , خليها شوي اليوم أصعب ..

شو الوصفة الظاهرة بالصورة ؟؟

يا ريت لو فيكم تشموا الريحة الي طالعة منها لما كنت عم صورها و انا صايمة و الله رح مووت على لقمة ..يا ترى عرفتوا و إلا نو

بانتظار أجوبتكم و مشاركاتكم الغالية و الإعلان عن اسم الوصفة مع طريقة تحضيرها بالخطوات المصورة يوم الإثنين إن شاء الله ..

في أمان الله

هلأ صار وقت الكشف عن الوصفة و كنت متوقعة أن الحزورة اليوم أصعب و أغلب الأخوات ما عرفوا الإجابة , الوصفة اليوم لمربى الدراق اللذيذ الشهي و المغمور , لا أعرف لما لا يحضر مثل مربى المشمش أو غيره ..

الوصفة تعلمتها من احدى الصديقات التركيات و لا أعرف إذا كان مشهور في تركيا أو لا و لكن ما أعرفه أنه يستاهل التجربة و لو بكمية بسيطة للتجربة و لحتى تحكمي بنفسك ..

شكر خاص لكل الأخوات المشاركات , لولا مشاركاتكم الحلوة ما كان في حزورة و ان شاء الله وصفات تانية غريبة أو جديدة على الطريق

بالصحة و الهنا

كيلو دراق ( 4 حبات كبيرة )
ثلاث أرباع كيلو سكر ( 3 كوب سكر )
ليمونة
direction

· تختار حبات الدراق القاسية و الغير ناضجة, تقشر و تنزع البذرة ثم تقطع لأرباع و بقسم كل ربع لقسميين .

· يوضع الدراق المجهز و السكر في وعاء بالتناوب على شكل طبقات و يترك طول الليل حتى يخرج عصيره الطبيعي .

يوضع السكر مع الدراق طوال الليل حتى يخرج الدراق من عصيره الطبيعي

·          في اليوم التالي , ترفع حبات الدراق من العصير باستخدام ملعقة ذات ثقوب ثم يغلى العصير و السكر حتى يذوب كل السكر و يصبح الشراب ثقيلاً نوعا ما .

·          تقشر حبة الليمون بحيث نستخرج الجزء الأصفر من قشرتها من دون اللب الأبيض الذي يحتوي على المرار .

·          ترجع حبات الدراق مع قشرة الليمونة الصفراء للشراب و تغلى لمدة 10 دقائق و يضاف ملعقة صغيرة من عصير الليمون بأخر دقيقة .

· ترفع قشرة الليمون و يتم التخلص منها ثم يصب المربى في مراطبين زجاجية و يحفظ في الفريزر و يمكن أن يقدم مع الزبدة و التوست أو حسب الرغبة .

أضافة إلى المفضلة (0) |

أقتباس | مشاهدات : 378

تعليقات (30)

1 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 05-09-2008 21:01
الله اعلم الله اعلم ياست الستات يا منى هذا قرع اصفر يقطين مطبوخ بالقطر

2 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 05-09-2008 21:45
الله اعلم انها قرع اصفر يقطين مطبوخ بالقطر من ايدين الفنانه منى

3 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 06-09-2008 00:03
وااااااااو منىىىىىىىىى ارحمينا شو هادا منى هلكتينا على هالمنظر. مش معقوووووول. شكلو كانو مربى شي. بس لما قلتي ريحتو حلو قلت يمكن يكون شي كلاج محشي و مقلي و عليه قطر? بس الالوان مش طبيعيه. و الصحن اللي وراه جايب المنظر كمان. بتعرفي شو ما يكون المهم شكلو بيعقد و الوانه خياليه. هههه يسلمو ايديكي و صحتين على قلوبكم. :zzz

4 الكاتب basema, on 06-09-2008 01:50
Your puzzle is getting harder and harder

I guess it's pumpkin jam
(Moraba Al-yakteen)!!!

5 الكاتب Eman, on 06-09-2008 03:36
هل هو نوع من أنواع الحلويات؟ :roll

هل هو من الفواكه؟ :roll

هل هو دراق؟ :roll

ما بعرف هاد اللي طلع معي ،بقى ما هو هذا الشيء؟

6 الكاتب ام ناصر, on 06-09-2008 08:00
شكله مربى مشمش

7 الكاتب سارونات, on 06-09-2008 09:58
السلام عليكم و رحمة الله و بركاته

رمضان كريم و تقبل الله صيامكم و قيامكم
هالمرة عن جد صعبة بس راح حاول هي فاكهة اكيد و فاكهة من الحجم الكبير انا بقول مربى الدراق هاد هو الاحتمال الوحيد اللي طلع معي
راح انطر و شوف شو هي الوصفة و عفكره شكلها كتير حلو
بالتوفيق
سلام

8 الكاتب نوارة, on 06-09-2008 11:30
ميمو هادا مو مربى كباد؟
مممم ذكرتيني باخي محمد كان كتير يحبو الله يذكرو بالخير
شومربى كباد ولا شو ؟

9 الكاتب أم الليث, on 06-09-2008 12:32
يمكن مربى المشمش أو مربى النارنج

10 الكاتب لارا مينا, on 06-09-2008 14:48
مساء الخير للجميع وكل رمضان وإنتو بسعادة وسرور...أتوقع عجينة محشية و مطبوخة بقطر ومربى مع شوي زعفران وشكرا على اللعبة الحلوة والله خلتنا نفكر ونركز على كل تفاصيل الصورة وصار شكلي بيضحك وأنا ملزقة وجهي بشاشة الكمبيوتر يعني كأن الجواب رح يطلعلي.

11 الكاتب ام نور, on 07-09-2008 14:30
انا كتير محتارة شكلا مربى اليقطين او المشمش

12 الكاتب Eman, on 08-09-2008 11:21
هيييييه :zzz

أنا أول وحدة حزرت !
يالله ناوليني هالصحن لأتحلى فيه ،معلش ابعتيلي ياه بالDHL،وقبلانة فيه كجائزة :grin

ها لا حدا يقول أنا عرفت كمان ،اللي بيسبق بياكل بندق

13 الكاتب منى, on 08-09-2008 12:32
و الله يا امولة انت اول واحدة جبتيها , و يا ستي خلص هل الصحن لعندك بغمضة عين , ان شاء الله ما يطير على الطريق :grin

14 الكاتب سارونات, on 08-09-2008 16:05
السلام عليكم و رحمة الله و بركاته
جازاك الله خيرا اختي منى
و ان شاء الله بساويه شي يوم بس راح قطعو قطع اصغر
اختي منى بدي منك طلب ازا فيكي بدي طريقة مربى العنب ضروري بهاليومين ازا بتقدري تكتبيهاهون او تبعتيهالي و ربنا يجازيك كل خير
بالتوفيق
سلام

15 الكاتب منى, on 08-09-2008 21:41
هلا أختي

ان شاء الله تجربيه و يعجبك , أختي المربى الي طلبتيه ما عاملته , رح اسال عن طريقته و اذا شفت وصفة عجبتني ان شاء الله بحضرها و بنزلها

16 الكاتب Eman, on 09-09-2008 02:28
سبحان الله ،زوجي جاب لي دراق ومكتر ،فقلت إذا كانت الوصفة دراق رح أعملها ،والحمد طلع ظني بمحله..

بس الحبات اللي عندي مستوية ،ومو كأن كميةالدراق قليلة والسكر كتير؟؟

17 الكاتب منى, on 09-09-2008 03:01
هلا أمولة

ما بيصير يكون الدراق مستوي و الا بيصير المربى طري و مو طيب , و السكر مو كتير , بالوصفة الي اتعلمتها كان مقدار السكر نفس الدراق يعني كيلو بكيلو , بس انا نقصته و حضرته هيك

18 الكاتب سارونات, on 10-09-2008 16:28
السلام عليكم و رحمة الله و بركاته
جازاك الله خيرا اختي منى
بالتوفيق
سلام

19 الكاتب منى, on 10-09-2008 21:18
مية هلا أختي

20 الكاتب سمسمة, on 11-09-2008 21:51
مرحبا منى من يومين رجعت من الشام وماصدقت ايمتى أوصل وأفتح النت لأن بالشام النت بطئ كتير أشتقتلك كتير وأشتقت لآكلاتك اللذيذة بالنسبة لمربى الدراق كتير طيب أنا بساوي نفس طريقتك بس القطع مربعات صغيرة أسهل بالأكل

21 الكاتب منى, on 12-09-2008 11:40
هلا سمسمة بعد زماان

الحمد لله على السلامة و انا اشتقت الك كتير و فاقدة طلتك , الحمد لله المانع خير

فكرة كمان ان تكون القطع صغيرة أكيدة رح تكون أسهل , ألف شكر على الفكرة المفيدة و لا بقى طولي الغيبة

22 الكاتب سارونات, on 16-09-2008 19:48
السلام عليكم و رحمة الله و بركاته
:cry

قال شو كان بدي ساويلك مفاجأة و ساويه من دون ما ازعجك باسئلتي و امبارحه بالليل قشرتو و قطعتو و جهزتو و حطيتو مع السكر و غطيتو لحتى ساويه اليوم و على فكرة قبل ما حط العصير اللي فيه السكر على النار كان لونو احمر باهت المهم حطيتو على النار و اتبعت الخطوات و انا ملاحظة ان لون الشراب احمر و مستغربة يا ترى ليش

لان بعتقد عندك ما طلع احمر المهم بعد ان انتهت الفترة المحددةلقيت انو قطع الدراق ما دابت متل ما لازم و ظلت قاسية شوي فزودت النار و خليتو يغلي و يغلي و يغلي و عم حك و شوف و هيك ظل لاكتر من نص ساعة و لونو طلع غامق و يادوب حطيتو بالمرطبان و صار يجمد و يجمد يعني جمد تماما و فشلت فشلا ذريعا و شوهت الوصفة :cry

و ضاعت المفاجأة
بالتوفيق
سلام

23 الكاتب منى, on 16-09-2008 20:31
هلا سارونات

زعلت كتير علىالي صار معك بس ما فهمت سببه , هلا اللون مو مشكلة لان إذا كان قلب الدراق عندك أحمر كتير رح يعطييه هل اللون الأحمر الحلو , بس الدراق رقيق و المفروض أنه ما ياخد كل هل الوقت , المهم هلأ المشكلة أنه جامد كتير و هي ممكن تحليها بانك ترجعي المربى على النار مع شوية مي و تغليه شوي لحتى يرجع يصير بالقوام المناسب , و مشكلة اللون ما بقى تنحل , المفروض المربى ينطبخ على نار هادية لحتى يبقى لونه مشقرق ..

زعلت على الي صار بس خيرها بغيرها و هلأ لحقيني على تارت الجوز

24 الكاتب Eman, on 22-09-2008 18:44
على نار هادية ! ما لي خبر :upset

إنو من حظي وقت اللي عملته كان الموقع مسكر ،واللي صار معي عكس سارونات،حسيت المربى قوامه سائل مو ماسك شوي متل المربى العاي ،ومع ذلك حطيته بالمطربان ،قلت بلا ما أنزعه ورح خليه،وصراحة لسه ما دقته لأني ما حسيته المربى المطلوب ،وأنا عملت متل ما قلت بس 5 دقائق على النار ،يا ترى وين الغلط؟

25 الكاتب Eman, on 22-09-2008 18:47
صحي منوشة ،بتعرفيلي طريقة مربى القرع كيف؟؟

هلأ صار وقت الهاليوين ،والقرع منظره بشهي ،لذلك عم فكر جبلي وحدة أعملها مربى ،من قبل سألت وقالولي جيبي جبس ،وصراحة ما بعرف من وين بنجاب وشو اسمه هون ، فيا ريت تقوليلي على الطريقة لصنع مربى قرع مقرمش..

26 الكاتب منى, on 22-09-2008 19:07
انا كاتبة 8 - 10 دقايق أمونة , و إذا كان مريق مو مشكلة ,بترفعي الدراق من القطر و بترجعي تغلي القطر لحتى يصير متل ما بدك , بعدها بترجعي الدراق و دقيقة مع القطر على النار , بس رح يكون طيب حتى لو مريق

مربة القرع بده كلس و شغلته مو صعبة , باذن الله ناوية نزله , بس ان شاء الله يصير اله وقت لأن بهل الزركة و رمضان و العيد و المدارس :upset

, وعد رح حاول نزله

27 الكاتب Eman, on 23-09-2008 08:34
أنا خليته يغلي 10 دقائق وطفيت عليه وبعدما برد لقيته مريق ،رجعت غليته وبرد رجعت لقيته مريق لذلك مليت ،وبطلت اغليه خفت ينزل الدراق من كتر الغلي.. :upset

إي مو مشكلة حبيبتي ميمي ، وأنا هيك رأيي ،هلأ ما في وقت ،حتى أنا عندي نقلة وشغل ودراسة وسفر ،أوووووف الشغل ما بخلص..

28 الكاتب منى, on 23-09-2008 14:21
منيح وقفتي غلي , عرفت وين المشكلة , الغلط انك أضفتي الدراق و كان القطر مو سميك بشكل كافي لهيك ما بقى يسمك , يلا بس مشكلة الها حل على فكرة فيك تحطي قطع الدراق مع شوية من القطر و هو مريق مع شوية لبنة بتصير متل اليوغرت الي بالفواكهة

بيجنن

موفقة بالدراسة و النقلة و الشغل و السفر و ان شاء الله ميسرة كل امورك

29 الكاتب Eman, on 23-09-2008 20:06
فعلا فكرة حلوة :zzz

مضبوط أنا قللت السكر ،قال يعني أخف مشان ما يطلع حلو :grin

لكن رح أستخدمه بطريقته وجربه ،أكيد النتيجة روعة لأنها منك..

30 الكاتب منى, on 23-09-2008 21:01
بقى هيك , كنت احكي من الأول ما كنت عزبت حالي بالتفكير شووو الغلط :grin

, ان شاء الله تجربي اليوغرت و تحبيه

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 23/09/2008 )

< السابق		التالى >

[ عودة ]