L2ma.com | لقمة طيبة | L2ma.com | لقمة طيبة | كب كيك الكوسا | · , الوصفة, كيك, الكوسا, الكب | L2ma.com

القائمة الرئيسية

الأكثر تصفحاً

كب كيك الكوسا

الكاتب/ منى

25/08/2008

هل المرة الوصفة غير شكل سواء بالشكل أو بالطعم , سهلة كتير و كل من عطيته الوصفة حبها كتير , بالنسبة لأولادي و لزوجي هنا و عوافي على قلبهم خلصوها بأقل من 5 دقائق ..

الوصفة ممكن تقدميها حارة أو فاترة أو باردة حسب عيلتك و هي فكرة ممتازة إذا حابة تطلعي انت و عيلتك تقضوا اليوم برة البيت , بهيك تعطي الاولاد أشياء مفيدة و شكلها جذاب .. فيك كمان تحضري الوصفة بصينية واحدة إذا مو متوفر عندك قالب الكب كيك بعدها بتقطعيها لشرائح , فيك كمان تقدميها مع صحن سلطة حامضة كوجبة غذاء خفيفة أو فيك تعتبريها مقبلات أو طبق جانبي .

الكمية بتعمل تقريباً 18 كب كيك من الحجم المتوسط ..

لمن يرغب بالتخفيف من الدسم يمكن الغاء الزيت من الوصفة و استخدام جبنة قليلة السعرات الحرارية و الطعم سيبقى لذيذ , و لإضفاء نكهة مختلفة في كل مرة يمكن اضافة جزر مبشور أو فطر مقطع أو ذرة مع قلية البصل و المرتديلا , كمان يمكن اضافة ملعقة كبيرة من الأعشاب الطازجة المفضلة عندك إذا بتحبي اضافة نكهتها على الوصفة مثل الحبق أو الزعتر أو البقدونس أو الشبت

شايفين الوصفة شو سهلة و متنوعة , عن جد أنصحكم أنكم تجربوها

بالصحة و الهنا

نصف كيلو كوسا مبشورة ( ما يقارب 4 حبة كوسا متوسطة الحجم ) أو يمكن استعمال لب الكوسا
8 – 10 بيض
بصلة متوسطة الحجم
فص ثوم كبير
كوب كامل أو أقل من المرتديلا المقطعة لمكعبات
كوب جبنة شيدر مبشورة
نصف كوب طحين
ملعقة صغيرة بيكنغ بودر
ثلث كوب زيت زيتون
ملح و بهار مشكل
direction

· يحمى الفرن على درجة حرارة 180 درجة مئوية , يغلف قالب الكب كيك بورق الزبدة .

· يقلى البصل و الثوم و المرتديلا بملعقتين من الزيت حتى تصبح قطع المرتديلا مقرمشة ثم تترك جانباً حتى تبرد .

تقلى المرتديلا و البصل بالقليل من زيت الزيتون

· يبشر الكوسا ثم يعصر بين راحتي الكف للتخلص من السائل الزائد في الكوسا .

· يخلط الكوسا و مزيج البصل و الطحين و البيكنغ بودر و الجبنة ثم يتبل المزيج بالملح و البهار المشكل و يقلب الكل حتى الحصول على مزيج متجانس .

يمزج الكوسا و الجبنة و المرتديلا و كمان البيض و الطحين

· يخفق البيض و الزيت بمضرب سلك حتى يتجانسا , يصب مزيج البيض فوق مزيج الكوسا و يقلب الكل ثم يصب في قوالب الكب كيك مع الأخذ بعين الاعتبار أن المزيج سينفش بشكل بسيط .

· تخبز الكب كيك في الفرن لمدة 20 – 30 دقيقة أو حتى تنضج و يصبح لونها ذهبيا و جميلاً .

· يقدم الكب كيك مع السلطة الحامضة و الكتشاب .

أضافة إلى المفضلة (0) |

أقتباس | مشاهدات : 2697

تعليقات (18)

1 الكاتب Eman, on 26-08-2008 19:04
شكلها بشهي ،يمييي
ممكن أعملها بالكوسا الأخضر؟ وقوالب الكب كيك كأنها صغيرة مو هيك ؟؟ يعني الصينية أم ال12 قالب مو 6 ما هيك؟

2 الكاتب منى, on 26-08-2008 19:32
أكيد فيك تعمليها بالكوسا الأخضر و القالب هو الي فيه 12

يلا عمن انتظر تجربيها اذا الله راد

3 الكاتب سارونات, on 31-08-2008 06:45
السلام عليكم و رحمة الله و بركاته و الله الكوسا شكلها عامله عمايلها معك شو هالابداع و ان شاء الله ستتم التجربة
بالتوفيق
سلام

4 الكاتب سارونات, on 01-09-2008 21:45
السلام عليكم و رحمة الله و بركاته
رجعت و رجعت اسئلتي المزعجة :upset

هل فينا نقلل من مقدار البيض لانو كتير بعرف انو دور البيض هو انو يخلي المكونات تمسك ببعض بس قلت اسألك و كمان هل يمكن استعمال بياض البيض فقط شو قولك
و سؤالي المعتاد هل يمكن استبدال جبن الشدر بالجين الابيض العادي حيث يتم وضعه في الفريزر لدقائق ثم بشره
بالتوفيق
سلام

5 الكاتب منى, on 02-09-2008 06:49
هلا أختي

و لا يهمك أسئلتك على العين و الراس , ممكن تقللي من البيض , بس مو ممكن تستخدمي بياض البيض , و إذا الجبنة الصفراء مو من الاشياء الي بتحبي تستعمليها بالوصفات , ممكن تستخدمي الجبنة البيضاء بس رح تبقى قطع ظاهرة مو متل الجبنة الصفراء الي رح تدوب

6 الكاتب سارونات, on 13-09-2008 13:56
السلام عليكم و رحمة الله و بركاته
ساويتها بالاسبوع الاول من رمضان و طلعت كتير طيبة و شكلها كتير حلو و هي سهلة و ما بتاخد وقت ابدا و ساويتها بجبن مبشور
و بينما انا عم ساويها قطعو الكهربا مشان يصلحو شي فساويتها على ضوء الموبايل
و وجودها بالسفرة بيجزب النظر و الكل بيسأل شو هي مع ان في اللي ما تقبلو انها تكون شي مالح و محطوط باكياس كب كيك عاساس انو الاكياس بس للحلو بس انا وراهم و راهم و اكيد الطعمة الطيبة راح تنتصر بالاخير
اكيد راح ساويهم مرة تانية و تالتة و رابعة لان عم جد وصفة مميزة و بنصح الكل يجربوها
في عندي فكرة كتير بسيطة ساويتها قبل مع الكب كيك و بيطلع شكلهم كتير حلو و هي انك تتركيهم يبردو شوي و بعدين تطلعيهم من الاكياس الورقية و تقلبيهم يعني الوجه بيصير تحت و بتحطيهم بالطبق بشكل متناسق و بيطلع شكلن كتير حلو راح جربامع كب كيك الكوسا و بشوف كيف بيطلعو و هيك بتكون طريقة تقديم مختلفة و منتخلص من مشكلة الضيوف اللي يمكنم ما يتقبلو فكرة الاكياس الورقية بعتقد مشكلة التقبل هي هي في كيفية اكلهم يعني يمكن ينزعجو من الكيس
جازاك الله خيرا اختي منى على هالوصفة المميزة و جعله في ميزان حسناتك
بالتوفيق
سلام

7 الكاتب dado, on 26-09-2008 13:54
باينة أكلة طيبة كتير.. أنا بموت على الكوسا وعلى المعحنات.. كيف اذا اجتمعوا سوا

بس عندي سؤال أخت منى.. هل بالامكان الاستغناء عن المرتديللا أو استبدالها بشي تاني؟ لأنو أنا ما باكل لحم.
وشكرا كتير وجزاك الله ع قد تعبك

8 الكاتب منى, on 26-09-2008 14:47
مية هلا سارونات

بتعرفي , أحيانا اسئلتك طويلة و بتسألي عن أدق التفاصيل بس لما تجربي وصفة كمان بتعطي رايك بادق التفاصيل , لهيك ردودك على الوصفات الي مجربتيها مميز و بيغني الوصفة ..

9 الكاتب سارونات, on 27-09-2008 11:55
السلام عليكم و رحمة الله و بركاته

تسلميلي اختي منى كتير فرحت بكلماتك الطيبة يخليلي ياكي :zzz

بدي ارجع ساويهم اليوم و بدي اعرف ازا فيني جهزهم و حطهم بالقوالب و خليهم بالبراد لشي ساعة قبل ما دخلهم الفرن و ازا بينفع فهل عطول بفوتهم على الفرن او بنطر تياخدو درجة حرارة الغرفة بينما الفرن عم يحمى
بالتوفيق
سلام

10 الكاتب منى, on 27-09-2008 17:40
هلا دالو

ان شاء الله بتعجبك كتير , فيك تستغني عن المرتديلا بس النكهة بدها تعزيز , زيدي شوية بهارات و لو بتاكلي لحم دجاج ممكن تضيفي دجاج مسلوق

مية اهلا و سهلا نورتي اختي

11 الكاتب منى, on 28-09-2008 20:51
هلا سارونات

اختي لا ما بيصير انك تخليهم ساعة قبل ما تخبزيهم , لازم ينخبزا على طول بعد ما تجهزيهم , هنا و عافية مقدماَ

12 الكاتب souha, on 11-12-2008 21:58
هلا كيفك منى كل عام و انت بخير
كيف قضيتي العيد؟
اليوم عملت الوصفة كتير طلعت طيبة و والدتي حبتها كتير و عجبتها فكرة الأكياس يعني ما في قلي ما في دسم المرة الجاية بدي ضيف عليها بقدونس و بركي شوية جزر وهي الصورة و قوليلي رأيك

بس أنا لما طالعتها من الفرن و صفيتها بالصحن بعد شوي شفت بالصحن شوية رطوبة مع أنها استويت كتير منيح يعني نص ساعة بالفرن يا ترى هدا من بخار الماء :zzz

سلام

13 الكاتب منى, on 12-12-2008 09:59
هلا ام السوس

كل سنة و انت بالف الف خير
متل ما قلتي المهم الفكرة و بعدها انت و زوءك
الرطوبة الي طلعت سببها انك حطيتيهم قريب كتير من بعضهم , انا بالعادة ببردهم على رف الفرن الي متل الشبك , طبعا و هو برة الفرن :zzz

الف صحة و هنا و الصورة منظرها بيشهي , يممي , انا بموت على الكوسا

14 الكاتب شفاء, on 20-08-2009 14:01
هلأ طالعتا من الفرن وعمبدوقها

فعلا طعمتها لا يُعلا عليها والاولاد كتير عجبتن وماحدا اكتشف الكوسا غيري :grin

وطبعا انا حطيت كلشي قلتي عليه يعني البقدونس والجزر يعني ماشاء الله الاكلة جمعت كتير فوائد
مليحة للاطفال خاصة انن بصوموا

واكيد رح اعتمدا

الله يجزيك الخير يامنى ويكتبلك بكل حرف حسنة

واكيد بكرة برمضان رح ادعيلك كتير

ورح اعملك دعاية اكتر(عاساس انا مو عاملة دعاية من شي 3 شهر) :grin

15 yummy
الكاتب tamtoom, on 27-04-2010 18:02
هاي يا صبايا.. شكرا كتير ع الاكلات الطيبين انا صرلي فترة عم جرب الوجبات الظريفة اللي عندكن بس لهلأ قررت اعمل اشتراك وكون عضو نافع واعطي رأيي.. هلأ الكب كيك بياخد العقل انا عملتوا بس بما انو ما كان عندي كوسا ولا مرتديلا حطيت بدالون فول اخضر ونقانق وحطيتن بقوالب الكب كيك الورق لانو ما عندي المعدن المهم شو بدي احكي طلعوا شغغغغغغلة بياخدو العقل عن جد يسلم هالايدين

16 الكاتب منى, on 28-04-2010 12:03
هلا شفاء

الف الف صحة و هنا على البك و الب الصبايا الحلوات , كتير انبسطت انهم عجبكي و عجبوهن .
الله يخليلي ياكي و الف الف شكر للدعوات الكريمة من اخت كريمة :zzz

17 الكاتب laimuna, on 14-05-2010 11:30
بدي جربها انشالله الوصفة باين عليها مميزة كتير وانا كتييييييير بحب الكوسا يسلمو ايديكي منى

18 الكاتب منى, on 16-05-2010 14:20
ان شاء الله تجربيها و تكون على زووءك

رح استنى رايك

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 28/04/2010 )

< السابق		التالى >

[ عودة ]