سلطتنا اليوم غير شكل بالطعم و كمان بالاسم , ست كليلة خانم , و أول حرف يلفظ مثل الجيم المصرية و بكسر حرفي اللام ..

هي السلطة طيبة كتير و فاتحة للشهية و إلها نوعان , ست كليلة صيفية و بتعمل من البندورة و مخلل القتي و ست كليلة الشتوية و بتعمل من مخلل اللفت . يفرم المخلل و يتبل و يا سلاااام , و كمان ممكن تستعملي مخلل الخيار أو القتي أو الفليلفة , بس مع القتي اطيب الشي ..

و لحتى أعرف أصل الأسم , بحثت في موسوعة حلب المقارنة للأسدي و لقيت عدة احتمالات , منهم أنها  سميت على اسم أميرة عثمانية اسمها كلهّ و إلي معناها الوردة بالتركية و بعدها الحلبية دلعوا الاسم و صغروه فصارت كليله , أي أكلة السيدة كليلة‏ , و الاحتمال التاني إنها سميت على اسم زاهدة مصرية اسمها جليلة و كمان صغرت و لفظت متل ما الست بتلفظ اسمها بالجيم المصرية ,  و كمان أحتمال تاني أن أصلها : ست كل ليلة بمعنى أنها سيدة كل شي موجود على المائدة من أصناف و أنواع طعام مختلف في كل عشاء‏ ..

  بالصحة و الهنا 

2 حبة بندوة وسط
3 حبة مخلل القتي
حبة صغيرة جداً بصل ( اختياري )
كمون و رشة فليلفة حمراء ناعمة
2 – 3 ملعقة كبيرة زيت زيتون
ملح بعد التذوق

تعليقات (7)

2  الكاتب منى, on 25-08-2008 16:32 هلا منونة كلك زووء اختي و هنا و عوافي ان شاء الله تجربيها و تعجبك , يا ترى انت من وين

3  الكاتب رنا, on 25-08-2008 18:23 الله يسلم هالايدين شو بحب هالسلطة وخصوصي مع البيض المقلي ..انا بصراحة كنت اكلها عند اهلي بس كانوا يسموها سلطة المخلل بماانه امي شامية بقا مابتعرف اسمها بس وقت جيت عند بيت حماي صاروا يعملوها ويقولولها ستي كليلة قام انا صرت دلعا اكتر واقلها (شن كليللة) بس شو بدنا بالحكي سلطة كتير طيبة وخصوصي مع اللفت   وفي سلطة تانية بنفس المكونات بس مع مخلل الخيار بس قال اسمها أرملة ..بقا سبحان الله الاكل بالفعل فن

5  الكاتب منى, on 25-08-2008 18:58 هلا رنونة   و لحتى انا ما كنت اعرف اسمها لان هل الاسم قديم , لهيك كانت ماما تسميها سلطة المخلل مع انها حلبية صميمة , بس بعد ما حضرنا مسرحية همام حوت و الي بيقول فيها شعلتي قلبي بقز الليلة انت اطيب من ست كليلة سألت ماما شو هي ست كليلة قالتلي معقول ما بتعرفيها هي سلطة المخلل , بس شو يا ستي بتستاهل التدليع هل السلطة , بموت عليها

6  الكاتب منى, on 25-08-2008 18:59 هلا منونة   مية هلا فيك , بينور لقمة بهل الزيارة الحلوة , ان شاء الله تكوني جربتي شي من الوصفات و عجبك

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved