كمان من المطبخ السوري و لاحظت أن ما عم نزل وصفات غير من المطبخ السوري لأن خضرة الصيف ما في أكتر منها و ما عم لحق اطبخ غير من أكلاتنا و وصفاتنا التقليدية , و يا عيني على المطبخ السوري شو متنوع ..
اليوم محشي القرع و الفليلفة الحمراء و لو كانت الفليلفة حرّة بيكون أطيب و أطيب لأن رح تعطي طعمة حرّ خفيفة لباقي المحشي , بالأساس بينطبخ المحشي لحاله , بس لما كان يزيد من الحشوة , تحتار الست شو تعمل و يكون عندها فليلفة حمراء فتحشيها , و بعدها صار محشي الفليلفة لازم ينطبخ مع المحاشي بكل أنواعها لان رح يعطي طعمة كتير طيبة لباقي الوصفة ..
عندنا طريقتين للصلصة الي ممكن ينطبخ فيها المحشي , و الصلصتين كتير طيبات و الطعم بيكون في كل واحدة مختلف عن التاني ..
بالصحة و الهنا
2 كيلو قرع
1 – 2 حبة فليلفة حمراء
عظام خاروف
الحشوة :
كوب و نصف رز مصري
ربع كيلو لحمة غنم مفرومة مدهنة
ملعقة صغيرة بهار مشكل
1 – 2 ملعقة كبيرة رب البندورة
ملعقة صغيرة دبس فليلفة ( اختياري )
رشة قرفة
رشة فليلفة حمراء ناعمة
الصلصة الأولى :
4 فص ثوم مهروس
ملعقة كبيرة نعناع
عصير حصرم حسب الرغبة و إن لم يتوفر يستخدم عصير الليمون
2 ملعقة كبيرة رب البندورة
ملح و بهار
الصلصة الثانية :
2 حبة بصل مفرومة
2 كيلو بندورة مقشرة و مفرومة
ملح و بهار
·يغسل القرع و يبشر بلطف بالسكين ثم يحفر و يفرغ قلبه .
·يقطع رأس حبة الفليلفة و تنزع البذور من دون أن تكسر حبة الفليلفة .
·يغطى قاع طنجرة كبيرة بعظام الخاروف .
·يغسل الرز حتى ينظف ثم يخلط مع باقي مقادير الحشوة و يضاف القليل من الماء للحشوة لتسهيل عملية الحشي .
·تحشى حبات القرع بالرز و ترتب في الطنجرة المجهزة ثم تحشى حبة الفليلفة و توضع فوق المحشي , يغطى المحشي بثقل مناسب لمنع خروج الحشوة منه أثناء الطبخ .
·إذا اخترت الصلصة الأولى , يذوب رب البندورة بالقليل من الماء ثم يوضع فوق حبات القرع مع الحمض و الثوم و النعناع و ما يكفي من الماء لغمر المحشي , أما إذا اخترت الصلصة الثانية , توزع البندورة و البصل المفروم بين طبقات المحشي و تغمر بالماء .
·توضع الطنجرة على نار متوسطة و بعد أن تغلي تهدى النار و تترك لمدة ساعة و نصف أو حتى ينضج المحشي .
·يقدم المحشي فوراَ مع الصلصة و الفليلفة الحرّة و الفجل و النعناع .
تعليقات (2)
