أقراص بعجوة

الحلقة التانية من حزورتنا , أتوقع هل المرة سهلة كتير و ان شاء الله الكل رح يعرفها ...


شو الوصفة الظاهرة بالصورة و هي الوصفة إلها علاقة برمضان الكريم و العيد لهيك اجا وقتها و نزلتها ..


كمان يا ريت نسمع من الأخوات الزائرات , أتمنى منكن المشاركة و إبداء الرأي ..و هي مناسبة  لألفت نظر الكل لهل الوصفة المميزة كتير ...

شو الطبق الظاهر بالصورة و كالعادة أنا بسمع و بس ..

مثل ما عرفت أغلب الأخوات الوصفة هي أقراص بعجوة , و الوصفة مميزة كتير اتعلمتها من أمي و عمتي الله يخليهم و يحفظهم يا حق , هنن الأصل ..

من اسبوع تقريباً حضرنا الأقراص بعجوة عند ماما مها و كانت عمتي رغيدة معنا و مع أننا عملنا 5 كيلو سميد , بس و الله ما حسينا بالتعب , بالعكس ضحكنا عن سنة ...

حكتلنا عمتي كيف لما كانوا صغار كانوا يعملوا شي 40 أو 50 كيلو سميد !!! لاأن عيلتهم كانت مؤلفة من 10 أشخاص , ما شاء الله تبارك الله ..

بعد تنظيف البيت استعداداً للعيد , تحضّر نساء البيت السميد و تبثه في الليل و اليوم الثاني تبدأ بتحضير الكرابيج و المعمول و الأقراص بعجوة , طبعاً لازم يكونا متفقين مع الفران لحتى ما يسكر فرنه .. بعد ما تخلص تحضير حلويات العيد , يروحوا الأولاد للفران مع الصواني و يخبزوها , كأن كل شي كان اله أهمية و إله طعم غير ...

أتمنى تجربي الوصفة لان عن جد مميزة كتير ..

بالصحة و الهنا

كيلو سميد ناعم
400 غ سمنة بقرية ( مثل سمنة البقرة الحلوب )
200 غ ماء
نصف كوب حليب بودرة
نصف كوب سكر
ملعقة كبيرة محلب مدقوق ناعماً
ملعقة كبيرة حبة البركة


الحشوة :

600 غ تمر مخلى من النواة
2 ملعقة كبيرة سمنة عربية
نصف ملعقة صغيرة قرفة
رشة قرنفل

·          يمزج السميد و السكر و الحليب المجفف في وعاء كبير .

·          تحمى السمنة على نار هادئة حتى تذوب كلها من دون أن تغلي , ثم تسكب فوق السميد و تحرك بملعقة خشبية ثم تعجن باليد بشكل جيد حتى تفتر العجينة , تغطى العجينة و تترك لترتاح لمدة ساعتين على الأقل أو لليوم الثاني .

·          يفرم التمر على ماكينة فرم اللحمة مرتان أو حتى يصبح ناعماً و مثل المعجون ثم يدعك مع السمنة البلدية و القرفة و القرنفل و يترك جانباً لتتمازج نكهات البهارات فيه .

·          في اليوم التالي يضاف الماء المغلي للسميد و يعجن الكل مرة أخرى ثم تفرم العجينة على ماكينة فرم اللحمة الشفرات المتوسطة لمرة واحدة أو لمرتان حتى تشعري بأن السميد أصبح عجينة قابلة للتشكيل .

·          تعجن العجينة مع حبة البركة و المحلب ثم تقطع العجينة لكرات بالحجم الذي تفضليه و ترق بين أطراف الأصابع لعمل حفرة فيها .

·           تقطع كرة صغيرة مناسبة من التمر المجهز و توضع في قلب الحفرة ثم تسد أطراف الكرة و تدور بين راحتي اليد  .

·          توضع  الكرة المحشية في قالب الأقراص بعجوة و يضغط عليها بلطف حتى تأخذ شكل القالب .

·          يضرب القالب على منضدة العمل حتى يخرج القرص المحشي من القالب .

·          تصف الأقراص المحشية على صينية ألمنيوم أو صينية غير لاصقة من دون دهن و تكرر العملية حتى تنتهي لدينا كل الكمية .

·          تخبز صينية الأقراص بعجوة في الفرن على درجة حرارة 180 على الرف المتوسط  حتى تشقر القطع و يحمى الفرن لبضع دقائق من فوق لتحمير وجه الأقراص بعجوة إذا احتاجت القطع ثم ترفع بلطف و تترك حتى تبرد و تقدم مع الجبنة البيضاء و كوب من الشاي .


سر الطبخة :

 ·          تستعمل سمنة بلدية في الحشوة و سمن عادية في العجينة لإضفاء نكهة مميزة على الأقراص بعجوة من دون أن تكون الأقراص ثقيلة على المعدة .

·          الحليب المجفف في العجينة سيضفي على الأقراص لوناً زهرياً جميلاً .

 

تعليقات (22)

1  شو هاد الكاتب Mahone, on 16-08-2008 15:12 شو هاد ... ؟؟؟؟ شيخ المحشي ؟؟؟

2  سهلة الكاتب رنا, on 16-08-2008 15:31 ياعينيييييييييييي شي طيب كتير   اقراص بعجوة يالله يامنى شهيتيني وانا صايمة

4  الكاتب سارونات, on 16-08-2008 16:39 السلام عليكم و رحمة الله و بركاته    كنت راح اطلب منك حزورة جديدة بس ليكك حطيتيها  انا بقول انو معمول   بالتوفيق  سلام

6  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 16-08-2008 17:54 يا عيني يا عيني كل ما مالنا عم منغمق منمن يعني وصلت الريحه لهون كالعاده بستنى الوصفه بكل تفاصيليها   عجبني القالب صغير و حلو يسلموا

9  الكاتب نهى ربيع, on 17-08-2008 17:04 السلام عليكم  منى شكلها ما شاء الله انا بيتهيقلى انها معمول

12  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 18-08-2008 17:55 منى وصفه بتجنن يسلموا ياديكون كلكون. اول مره بسمع عن فرم السميد بماكنه اللحمه شو بيعمل الفرم منى هل عشان ينعم السميد? و القالب بشو بتدهنو? سمنه او زيت? و الفرن كام الحراره و على اي رف و كام دقيقه? و هل بتشغلو الشوايه بالاخير علشان يحمر الوش? سوري حياتي كتير اساله بس هدول من سر نجاح الوصفه.   الشكر الكبير لك و لماما و عمتك العزيزه على هالمجهود و كل سنه و انتو سالمين

13  الكاتب منى, on 19-08-2008 08:00 هلا أمونة     و انت ان شاء الله بالف خير انت و كل عيلتك و حبابك ...  الفرم بالماكينة لحتى ما تفرط القطع معك بعد الشوي و لحتى تسهل عليك عملية الشغل بالعجينة و القالب ما مندهنه بشي , العجينة فيها سمنة بتكفي ان ما تلزق بالقالب , الفرن على 180 و الرف الوسط و بعد ما يشقر من تحت منشعله كم دقيقة أو أقل لحتى يشفر من فوق     من عيوني اسالتك و الشكر ليك أمونة و ان شاء الله تجربيها و تعجبك

14  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 19-08-2008 16:00 الله يرضى عليكي يا منى كفيتي ووفيتي بهالرد يسلم هالتم

15  الكاتب منى, on 19-08-2008 18:30 الله يسلمك حبيبتي , انت و اسئلتك على العين و الراس

16  الكاتب أحمد الله, on 20-08-2008 07:54 شي بيفتح النفس و الله   الله يسلم ايديكي اخت منى على الابداع المنقطع النظير..  كويس انك نزلتي الوصفة قبل رمضان و الا كنا..   الله يعيده عليكم و علينا و على الامة الاسلامية بالخير و البركات  يارب     هلأ صار في كرابيج و قراص بسيوة او بعجوة و باقي المعمول    الله يجزيكي الخير و يبارك فيك   و ان شاء الله موقعك بتصل شهرته للعالمية

17  الكاتب منى, on 20-08-2008 18:46 هلا فيك أخ أحمد , أمين يا رب و ان شاء الله من عتقاء الشهر كلنا , امين يا رب العالمين ..      أخي الف شكر ليك على الكلام الجميل و الدعوات الحلوة و ان شاء الله بتجربوها و بتكون على زووءكم , و أكيدة وصفة المعمول بإذن الله قريبة , هلأ وقتها     مية هلا اخي

18  الكاتب بدور, on 29-08-2008 13:48 سبحان الله على جو رمضان والعيد ما أحلاهن  كل عام و انت بألف خير و الله يحئئلك كل أحلامك يا رب.    مبينتك متحضرة على رمضان منيح     هالأكلة صحيح بدها وئت و تعب بس والله بتستاهل كتير     الله يخليلنا ياكي ميمو الحلوة والله وصفاتك بتجنن و طريئة شرحك بتستوفي كل الافكار   الله يسلم ايديكي و شكرا كتير على الصور المرفقة هيك بتسهل الشغل كتير كتير.

19  الكاتب رنا, on 21-09-2008 14:04 والله اشتقنا للموقع صرله يومين خربان وبهاليومين عملت خبز التوست بس للاسف مو كتير زبط وطلع معجن شوي مابعرف شو السبب قلت بركي لانه ماجربته بقوالب التوست بس قسمته وحطيته بالفرن ليتقمر وقلت بعمله بقسماط قام صار هجوم عليه وهو مقمر بس رح جربه انشالله مرة تانية  بس بدي اسالك عن حلو العيد انشالله كل عام وانتي بخير بدنا نعمل حلو للعيد بس مرة شفتك عم تقولي انك بتفرزي الحلو بدون ماتخبزيهن يعني بتخبزي على قدك بدي اعرف منك قديش بيطولوا بالفريزر وهل بتنصحيني بالتفريز ؟

20  الكاتب منى, on 22-09-2008 20:54 هلا رنونة معلش ازرعيها بدقني و ما دامه معجن القصة اما زيادة في السوائل أو غلط بالخبز و المهم انك لاقيتيله صرفة و هنا على قلوبهم .    أنا ما بفرز شي , امي بتفرز الحلو من دون خبز و عمتي بتخبزه و بتفرزه و الاتنتين ما شاء الله عليهم حلوياتهم بتاخد العقل , بيقعدوا في الفريز لشهريين تقريبا بس اذا كانت الكرابيج مو بقشطة لان القشطة ما بتتحمل , انا ما بحب التفريز بس الصراحة هو بيسهل كتير الشغل , ممكن تفرزيه و لما بتحبي طالعيه على ورق و خليه شي عشر دقايق و بعدها خبزيه من دون ما يفك عنه التلج و هادا اهم الشي

21  الكاتب أم جودي, on 08-11-2008 15:54 وصفة رائعة وعيد الاضى على الأبواب وعندي اقتراح بيخلي طعم الأقراص بعجوة ألذ وأطيب اضافة القليل من حب الهال المطحون للتمر بيعطية نكهة فاخرة جداً وشكرا الك وللأخوات

22  الكاتب منى, on 08-11-2008 16:36 ممممم , اكيد فكرة غيررر شكل , رج جربها المرة التانية اذا الله راد , الف شكر ليك على الاضافة

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved