ملوخية على طريقة أهل حلب

متل ما وعدتكم اليوم إن شاء الله الملوخية الناعمة على طريقة أهل حلب , و هي أكيدة من الوصفات الطيبة كتير و أظن ما حدا بيعملها غير عنا , و هي إذا كانت مطبوخة مظبوط ما في أطيب منها ..

 المطبخ الحلبي معروف باستعمال الدهن في كل الطبخات , و من هل الطبخات الملوخية إلي كانت تتحمص بالدهنة المسيلة .. هلأ ستات البيوت و خصوصا الي بعمر مو كبير عم يحاولوا يخففوا من استعمال الدهنة في الطبخ , و حتى في بعض من ستات البيوت صارت تستعمل مزيج من زيت الزيتون و السمنة لتحميص الملوخية ..

أهم مرحلة في تحضير الملوخية المفروكة هي التحميص , لأن إذا كان التحميص قليل , بتصير الملوخية تشط و تمط و إذا كان كتير رح تحترق الملوخية , و أسهل طريقة انك تحطي مع تحميص الملوخية كم حبة صنوبر , لما بيصير لون الصنوبر زهر كاشف معناها الملوخية صارت جاهزة لإضافة المرق ..

ممكن أن تحضر الملوخية بالدجاج أو اللحمة و أنا بحبها بالدجاج أكتر و كمان ممكن تتحضر الملوخية الورق الناشفة بنفس الطريقة تمام , بس تحميص ورق الملوخية بيكون على مراحل ..

أتمنى أن تجربيها و تعجبك ..

بالصحة و الهنا

3 كوب من الملوخية المفروكة
2 ملعقة كبيرة سمنة
دجاجة متوسطة الحجم
6 كوب من مرق الدجاج
6 – 8  فص ثوم مهروس
2 ملعقة كبيرة كزبرة يابسة
رشة بهار
باقة عطرية

·          تقلب الدجاجة بالقليل من الزيت حتى تحمر ثم تضاف الباقة العطرية و تغمر بالماء و يغطى القدر و تترك حتى تنضج ثم ينزع العظم و الجلد و تقطع لقطع مرتبة .

·          تقلب الملوخية بالسمنة لمدة نصف ساعة أو أكثر على نار هادئة جداً حتى يصبح عض الملوخية أشقر فاتح جداً ثم يضاف الثوم و الكزبرة و البهار و تقلب لبضع دقائق إضافية أو حتى تظهر رائحة الثوم و الملوخية اللذيذة .

·          يصفى مرق سلق الدجاج و يضاف للملوخية و يترك على النار لمدة 25 – 30  دقيقة أو حتى يصبح قوام الملوخية سميكا نوعاً ما ثم تضاف قطع الدجاج و تترك على النار لخمس دقائق أخرى .

·          تقدم الملوخية مع الرز بالشعيرية مع الليمون أو السلطة الحامضة أو المخلل . 

تعليقات (23)

2  الكاتب منى, on 15-08-2008 16:27 هلا رنونة   أكيدة ما بقى بدها غسل , ما هي مغسولة و منشفة من قبل ما تنحفظ , و متل ما قلتي ان ممكن تنطبخ ورق بحالها و ممكن تنفرك و بعدها تنطبخ , و شو ما كانت تبقى نممي

3  الكاتب غيث, on 15-08-2008 18:35 يا عيني عليك يا منى على ملوخياتك الملوكيات فعلا يا ستي حيرتينا شو بدنا نطبق لنطبق المهم اليوم جربت الملوخية الخضراء ويا عيني عليك يا قلبي على هالوصفة الرائعةبالفعل ما بعرف شو اقول لك وكيف اشكرك هي هيه الوصفة اللي منتظرة من زمان اعرفها وخايفة اسال حدا عليها ويكون مو ثقة والمشكلة كنت صايمة اليوم وانا عبشم الروائح اللي بتجنن وخذي فرط قلبي لوقت ما افطرت المغرب ورحت في سباق مع الصحون وتغلبت وعيني بالاكل قلتله لزوجي المسا العشاء كمان ملوخية ما شبعت منها شكرا من القلب الى قلبي منى والله يطعمك مراد قلبك لاننا ما بقى نتعذب بالطبخ فورا مقادير مظبوطة ولذيذة والله وكاني دايقتها رغم كوني صايمة من كتر ما طيبة الله يعطيكم الف عافية ورمضان كريم على الجميع اسرة موقع لقمة طيبة

4  الكاتب منى, on 15-08-2008 23:19 ريتو مية ألف صحة و هنا غيوثة ..    حسيت فيك , ما انا لما حضرت الملوخية الورق , يمكن خلصت نص الطبخة و هي على النار grin     الله يتقبل صيامك , اليوم كل البيت عنا صايمين الحمد لله , بس انا لسا ما الي جلادة على الصوم , الله يهون علينا و يتقبل منك و منا يا حق     ان شاء الله رمضان كريم عليك كمان و على كل أهلك و حبايبك , هلا حبيبتي غيوثة

6  الكاتب منى, on 19-08-2008 15:23 هلا نوريتا مية هلا نور الموقع   الباقة العطرية مجموعة معطرات و بهارات تضاف لسلق اللحوم أو الدجاج لحتى تعطيها طعم طيب , ممكن تضيفي اي بهارات صحيحة موجودة عندك متل حب الهال أو أعواد القرفة و ورق الغار و الزنجبيل الصحيح و حب الفلفل الأسود أو الفلفل الحلو .. اضافة لحبة بصل كاملة أو كراث أو جزر , مو ضروري نضيف الكل , الموجود عندنا منضيفه

7  الكاتب منامينو, on 29-11-2008 06:28 حبيبتي منى، عندي كمية ملوخية ناشفة ومفروكة متورّطة فيها. كيف بتنعمل؟؟ لإنه أنا بالعادة بستعمل الملوخية الخضرا أو المثلجة.. بس ناشفة ومفروكة... هاي أول مرة. عمتفصل النجدة ساعدوني

8  الكاتب منى, on 29-11-2008 10:11 هلا منونة   شو متورطة و ما متورطة نحنا بسوريا ما منعمل الملوخية بغير وقتها الا ناشفة و مفروكة ..   اصلا لما عرفت ان في ناس بتستعملها خضراء صرت هيك بس لما جربتها حبيتها     المهم رح اقلك سر بيخلي ملوخيتك ما تفصل , أهم الشي انك تقليها على نار هادية , و لحتى تعرفي ان الملوخية صارت جاهزة لاضافة المرق بتحطي معها ملعقة صغيرة من الصنوبر أول التقلية و بتقلي الملوخية متل ما قلت الك على نار هادية كتير و انت عم تحركيها , يعني ما بتوقفي و لا لحظة , التحميص بياخد معك على حسب الكمية , أنا على طبخة عيلتي ممكن ياخد معي نص ساعة , و انت بس ما صار الصنوبر لونه أشقر معناها ملوخيتك صارت جاهزة لاضافة المرق .    إذا أضفتي المرق قبل هيك رح تفصل و إذا كانت النار عالية أو تركتي الملوخية من دون تحريك أو كانت السمنة قليلة فرح تحترق ملوخيتك     الملوخية الناشفة هي أكلة ملوكية اذا انطبخت مظبوط , شو رايك تعزميني لعندك لحتى اطبخاك اياها , أضمن

9  الكاتب منامينو, on 29-11-2008 11:27 تسلميلي يا عسل     بجربها على طريقتك وان شاء الله ما تكون العواقب وخيمة . الله يسلم هالإيدين يا رب

10  الكاتب منى, on 29-11-2008 12:12 الله يسلمك و يحفظك , ان شاءالله تحبيها , انا عني بمووت عليها

11  الكاتب JoJo, on 10-06-2009 01:16 تقريبا نفس الطريقة الفلسطينية وانا باموت عالملوخية حتي مرات باشرب اخر شي بيتبقي في الصحن

12  الكاتب منى, on 10-06-2009 11:30 هلا جوجو   و انا متلك و الله بتلاقيني بيطلع صحني فاضي و نظيف .  ممم , ما كنت اعرف ان الفلسطينية بيعملوه بنفس الطريقة , الف شكر الك للمعلومة حبيبتي

13  الكاتب آرام, on 05-07-2009 11:20 مرحبا أخت منى .. الملوخية من الأكلات المفضلة جداً عندي .. وهي (بالإضافة لمنسفة الباذنجان والمامونية) ما بطبخها إلا بالسمن العربي وإلا ما بطبخها أبداً .. بحس هالأكلات التلاتة تحديداً حرام ينطبخوا بغير سمنة .. الملوخية ما بحبها مفروكة أبداً يمكن لأني تعودت عليها ورق .. وللأسف مو دائماً بتنجح معي لأنو متل ما قلتي بدها انتباه شديد ومعلمية كتير بالتحميص .. البارحة طبختها وجربت طريقة الصنوبر بالتحميص بس طلع تحميصها زيادة شوي .. بالعادة بحمص الصنوبر لحاله.  في وحدة قريبتي مشهورة بأنها أشطر طباخة بالعيلة كلها .. أكلاتها كلها غير شكل وخصوصاً البامية والملوخية وما حدا بتطلع معه متلها أبداً .. فعلاً بحياتي ما شفت أطيب من ملوخيتها .. من فترة أعطتني سر عن الملوخية .. الثوم بتقسمه نصين .. نص بتحطه بالأول مع التحميص كالعادة .. والنص التاني بتحطه ني بآخر خمس دقائق وبعدين بتطفي النار .. جربيها شي مرة وادعيلي.  آخر نقطة .. بالسطر الأول من طريقة التحضير مو مذكور بشكل واضح إضافة الماء لسلق الدجاج وممكن يلتبس الأمر على البعض إذا ما بيعرفوا الطريقة .. وبالفقرة الثالثة مكتوب ساعة بدل دقيقة .. وآسف للإطالة

14  الكاتب منى, on 07-07-2009 10:51 و كمان اضافة للتلات الاكلات عندك الكبة بصينية و بقية الكبب الي المفروض ان تنطبخ بالسمنة, حرام الواحد يعزب حاله و بعدها يخبصها بالاخير و يطبخها بالزيت , اما سمنة معتبرة او نو ..    انا عكسك , الملوخية الورق ما دقتها الا لمن كبرت لان ما حدا بعيلتي بيعملها , كمان هلا صرت حضرها و بتطلع طيبة كتير     معلش سماح هل المرة لان ما زبطت معك تمام , و ان شاء الله المرة التانية بتحمصها متل مو متعود و بتطلع اطيب . و كل ما جربت اكتر بيصير عندك خبرة و معلمية اكتر     مرة دقت ملوخية عند واحدة من قريباتي و كانت اطيب ملوخية بدوقها بحياتي كلها , و مع اني حسيت ان في " ان " بوصفتها بس هي ما عطتني و لا معلومة جديدة أو مختلفة عن طريقة ملوخيتي , بقى اتوقع ان اضافة التوم بالاخير هو السر , الف شكر الك للمعلومة و رح جربها قريب , لان حاسة حالي بدي طنجرة ملوخية كبيرة بعد كل هل الحكي الي بيجوع     رح عدل الوصفة اخي , الف شكر الك للتنبيه و انا انتظر ملاحظاتك و ردودك دوما .    نورت

15  الكاتب ميديا, on 17-08-2009 00:41 تسلم ايدك منى بس عندي ملاحظة صغيرة الفروجة لازم تنسلق هيك نحنا منعمل بحلب بحياتي ما سمعت انو تقلب بزيت عذرا وانا بحمص الملوخية بتوم وكزبرة وما في حدا اكلا عندي الا واخد طريقتا تقبلي مروري

16  الكاتب منى, on 20-08-2009 14:35 هلا ميديا   مية اهلا و سهلا , نورتي و شرفتي أختي .    هلا ممكن تسلقيها و ممكن تقلبيها بالزيت و بعدها تسلقيها , بالطريقتين رح تنسلق بس انا بشوف ان الدجاج و اللحمة اذا تقلبوا شوي قبل ما ينسلقوا بتصير طعمتهم أطيب     أما اضافة التوم و الكزبرة من الاول , بحس ان ممكن يلتدع التوم اذا حمضته من الاول للاخير , لهيك بحمصض شوي الملوخية و بعد شوي بضيف التوم , و على كل الاحوال هل الاختلافات البسيطة لا تفسد للملوخية قضية

17  الكاتب آرام, on 21-08-2009 18:43 مرحبا أخت منى  آسف للتدخل بس أعتقد أن الأخت ميديا فهمت من الوصفة أن الدجاج يقلب بالزيت فقط دون سلق .. وهذا بالضبط ما أشرت إليه في تعليقي السابق على الوصفة عندما قلت أنك لم تذكري بشكل واضح إضافة الماء من أجل سلق الدجاج مما قد يسبب التباس في فهم المقصود .. وأنت وعدت حينها بتعديل الوصفة

18  الكاتب منى, on 22-08-2009 11:31 صح انا وعدت بس راح عن بالي , يلا هلا رح عدلها ان شاء الله

19  الكاتب نادين, on 08-10-2009 16:53 يالله يا منى انا كتيييييييييير بحب الملوخيه والليموت ممممممممم   وعندي ملوخيه ناعمه وورق بس بخاف اعملها و ما تنجح ورح تكون الصدمه كبيرة لانو بحبها

20  الكاتب منى, on 08-10-2009 17:15 لا لا تخافي , سمي بالله و حطي الصنوبر مع الملوخية و حمصي على نار هااااااادية و بعدها ادعيلي ان شاء الله

22  يمي يمي ملوكيتي هي الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 16-11-2011 07:29 مرحبا منى ..أنا مغرمة بالملوكية كتير خصوصا الخشنة مع الدجاج يمي يمي ولما سافرت ماما فرزتلي ملوكية   بس خلصت ومشتهية عليها كتير ، أنا عندي ملوكية ناعمة مفروكة يعني وجاي عبالي أطبخها باللحمة لأنو مرة دقتها عند قرايبينا وحبيتا هيك كمان ..."لحمة مدعبلة "   هلأ السؤال الذي يطرح نفسوا اكيد الملوكية بدها تحميص بس انو اللحمة كيف منعملها ؟؟   وبدي ارفع طلب ، انو خصصيلنا قسم لأكلات الريجيم معلش لو بدها خبز منبقى مناكل خبز حنطة زوجي على طول بيقلي طبخيلنا طبخة خفيفة بدنا نخفف هالكرش وفوق منها انا كمان سمنت   وبس يسلمو مقدماً خيت

23  الكاتب منى, on 16-11-2011 20:07 هلا زهرة   يا ستي عن جد معك حق ما تقولي الا ملوكية , اذا كانت على اصولها بتكون شغلة     اللحمة بتدعكيها مع ملح و بهار و رشة قرفة و بتدعبيلها و بعدها بتقليها بالسمنة و بترفعيها و بنفس السمنة بتقلي الملوكية    في وصفات خفيفة هون و هون , و ان شاء الله بحطهم بقسم لحالهن     مية هلا فيك , منورة

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved